جيتك وأنا شايلٍ قلبي براحة يدي
‏بأشواقه الخافيه وأعذاره البيّنه

‏محتاج لك لا تسوّي بي سواة الرّدي
‏اللي لا جيته وأنا محتاج ما عيّنه

أتساقى شرهة الأيام وأمد اعتذاري
‏كلما جف الكلام احتجت للروح القديمة

‏جعلني لا ضاعت أحلامي وسيرتك قراري
‏ما تخيب هقوة عيون بعد فقدك: يتيمة

‏ولا تنشد عن هزائم وقفتي وإلَّا انتصاري
‏الجروح اللي على خبرك على خبرك قديمة

‏هات لي عمر انتظاراتي، وشعري، واعتباري
‏والحقيقة لو عواقبها - على روحي - وخيمة

‏كل درب ما يجيب عيونك النجل اضطراري
‏والدروب اللي تجيبك يا آخر أحبابي كريمة

‏كم مضى لي بين أداري جرحك الأول، وأداري:
‏قلب إن ضاع الكلام اشتدّ لك: شعر، وعزيمة

‏ما علي من الجفاف إن طالت يدينه دياري
‏وين ما لديت أشوفك نوض برق، ووبل غيمة

بعد هالغلا إي والله إني عليك آمنت
‏بأن المحبة رزق .. والرزق من ربك

‏علي السلام ووافر الشوق ولا أنت
‏عليك السلام ورحمة الله وأحبّك

اعيش الامل وتّصنعه في عيون الغير
‏لو ان الحزن في خاطري واصلٍ حدّه

‏معي حسن ظن وطيب فال و سعة تدبير
‏و بيتٍ ليا حدتني ايامي .. اعدّه

‏ورى كل جانب شر لا بد تلقى خير
‏و ورى كل جانب خير خيرات ممتدّه

يالله برزق ما قفل دونه الباب
‏ولا وقف قطّاع الارزاق دونه.

ما نسيتك لو تحسين اني نسيت
‏سيرتك للآن . . تملاني حضور

‏اذكر اني يوم ودعتك بكيت
‏من بعد ذاك اليوم وانا ما املك شعور

عيديّتي شوفتك والكلمه الكلمه
‏اللي من اربع حروف وفعلها كايد

‏جوارحي كلها .. لـ رسايلك ولمه
‏ وانا اتحرى مجيّك ودّي اعايد

في وجوه الناس حولي بالعيادي والاغاني
‏كل نظرة تستمدك كل كلمه تستعيدك

‏كثر مامرتني الليله مراسيل وتهاني
‏ماقرا قلبي رساله ماتمناها من يدك

‏وكثرماحاولت اصد البال واصدد حناني
‏ كثرماأسال من بعيد الناس عنك وعن جديدك

‏عاد عيدك يابعيد العين وقريب المحاني
‏لوعجزت اقولها لك من قريب عاد عيدك

-

أطلبي واللي تبينه والله إنه لعينك يساق
‏ماني من عيال ناصر كان ماسقته وجيت

‏والله إني لجل عينك لأوقف ركبة وساق
‏لين تطلع من لسانك..لا تعودّها رضيت

ودّي اطلع من الدنيا بـ أقل الخساير
‏و سمعةٍ ما تموت ، و سيرةٍ حاتميّـة

تعالي، والطريق اللي تجينه تزهر أوراقه
‏أجل وش ظنّك بـ قلبي لو الليلة تمرّينه !

أثـر الايــام دون مقابلك .. مــرّه
‏والعمر ماهو يسوى شي من دونك

‏دايم وأنا أشتـاق لعيونك .. وهالمــرّه
‏أشتقت للضحكة اللي داخل عيونك

ما أخاف تحقيق حلمي يوم يتأخر
‏أخاف حلمي يموت.. بيوم تحقيقه.

ما دمت أحبّك حبيبي ليه أهيم الدروب؟
‏أو كيف ابرضا زعلك وببخل بجيتي

‏وكيف اتجاهلك؟ .. يا الوجه الرضي الرحوب
‏وأنا أشوفك هوى نفسي وشخصيتي

‏أحبّك إلييين ترضى من زعلك وتتوب
‏وتشوف حبك بصدري وتعرف نيتي

‏زعلك يأثر علي! وأشوفه مْن الذنوب
‏اللي تضايقني.. وتلعب بنفسيتي

عرفت ان اللقا أرض ومدارات الفراق أفلاك
‏تدور ايامنا حول التجارب والقدر .. أجدا

‏وعرفت ان الزهر مغري ولكن به كثير أشواك
‏يبي له من يعرف انه مع أوقات الفجر يندى

‏وعرفت ان العمر مهما يطوّل ما ينول رضاك
‏عجول الوقت لا أنهى رحلة سنينه قبل تبدا

‏وعرفت ان دمعة الغيمه تصب الروح في دنياك
‏كذا طبع العتب صاخب وإذا ملّ الصخب يهدا

‏وعرفت ان الطموح دروع لا صار المدى فتّاك
‏اذا أستسلمت لـ العثره ترا المقبل عليك أردا

‏وبعد عثرات ودروس وسنين و تجربه و أدراك
‏عرفت ان أكبر كنوز الحياة الفانيه مبـدأ

رد قلبي للدفا ، للصبح وأحلامي القديمه
‏لليقين إن أجمل أيام العُمر فيما تبقّى

‏للكلام اللي عثت به شر خيبات الهزيمه
‏لين ما خيّم عليه الصمت وحروفه تتقى

‏ردني للفجر الأزرق يوم للضحكات قيمه
‏تنتشي فيني قصايد حُب لو قلبي مشقّى

أعذروني عن غياب ٍ زلّته مدموحه
‏وأسمحوا لي لين أراجع سيرتي وسجلّي

‏غبت كليّ والدوافع كلّها مشروحه
‏أفتحوا كشف الحضور وسجلّوني كلّي

‏هكذا طعم المحبّه .. حلوه ومملوحه
‏وهكذا الفرقا مملّه .. والوصال مسلّي

‏العلم مرفوع يا اللي ترفعون اللوحه
‏الشحيح يصدّ عنيّ والكريم يهلّي

‏دام باقي في ضميري نافذه مفتوحه
‏عبرها ينفذ شعوري لين يبرد غلّي

‏قلبي المجروح مدري كبدي المجروحه
‏جرّ عمرك يا النسم بين الضلوع وقلّي

‏دمعتي تبحث خفاي وضحكتي مذبوحه
‏هيّنه والصبر طبعي والقناعه دلّي

‏ما بقا للشعر واهس والهجوس تشوحه
‏بين منقود الرفيق وبين شرهة خلّي !

‏أنقرض نسل القصيد وراح راحت روحه
‏وأكثر الشعّار ولّت والزمان مولّي

‏أنتكس حاله وحال الساحه المسيوحه
‏الحصن تضبط وتربط والكديش تفلّي

‏يا معين الصايبه والمخطيه مسموحه
‏قام يمشي مع رصيف الشمس..راكب الليّ !

‏جاك وقت الذرّه المفترّه الدرموحه
‏عقب باد ( المارتين ) وبادت ( العصملّي )

‏يفزع الطحطوح وألاّ تفزع الطحطوحه
‏الدعاوي حطّها وأشتالها بامجلّي

‏كيف صدّرت الفتاوي يا بناخي توحه
‏وأنت لا تعرف تصوم ولا تعرف تصلّي ؟

‏كلّ ما هبّ النسيم أستنزلت منفوحه
‏والعليّا يا ماشاء الله حظّها متعلّي

‏القضيّه بين شمطان اللحا مطروحه
‏ينقطع حبل النفاق وعقدته تنحلّي

‏طاوله وأربع كراسي وأمسيه وأصبوحه
‏والله الله .. مير حلّي يا حلاوه حلّي

والله اني في ذراه وفي امانه
‏من صدوف الوقت والدنيا واهلها