‏اتجنب عن الصجة ادور لعمري الراحه
‏وجلست اقلب ما صار لي من الذكريات

‏مابي الحزن لكن انه ماخذ بصدري مساحه
‏ابعد عن الناس لا دريت ان ضيقتي جات

‏انا اللي انقال عنه شجاع وقصيده سلاحه
‏وانا اللي انقال عنه حي و يحتري الممات

‏سيطر علي الهم والضيق وتبون الصراحه
‏في وصف حزني تعجز القصايد والأبيات

‏على كثر الجروح اللي بصدري ماعرفت أعتاد
‏يجيني الجرح ما كن له دروب بداخلي رحبه
‏⠀
‏و على كثر المفارق في الزمان بخاطري ما فاد
‏أنا للحين فيني من الموادع و الحزن رهبه

‏قودني يا منوّة القلب لو ماني ضرير
‏وودّني لدروبك اللي تبيها ودّني

‏خذ يديني في يدينك مثل طفلٍ غرير
‏وحطّني في وسط صدرك وعقبه هِدّني

‏في غلاتي لا تشارك كبير ولا صغير
‏وعن جميع الناس بالكون كله بَدّني

‏ماخذٍ عقلي وتبغى من الهرج الكثير
‏كان تبغى الهرج كله! لـ عقلي ردّني

‏على الموعد اللي بيننا جيت لك شفقان
‏مع ان والله اني قلت ما عاد يمديني

‏اسابق هبوب الريح لو ما معي جنحان
‏لاكنّ المشاعر حااااالفه ما تخليني

‏عسى ترضي غرورك غيبتي كان الغلا ما ارضاك
‏وانا لا طاب قلبي .. خطوتي ماهي ب تعصاني

‏لا يضنيك الحنين - ولا تعنّي فالسراب خطاك
‏ترا اللي جابني لك ؛ نفسه اللي عَنك وداني ..

‏ولا أنت أسف على فرقاي ولا أسف على فرقاك
‏تساهلنا الجفا .. لين إنجرح كلٍ من الثاني

‏حاشمه عن سوء ظن و حاسبه من طيب فالي
‏ أدري ان قلبه حنون .. و أدري ان روحه نبيله

‏لو تهب الريح من همي على صدرٍ شمالي
‏قصّر البال الطويل و اصبحت نفسه ثقيله

‏و لو يجي غيري مكاني ما يجي غيري بدالي
‏و لو يحبونه جميعاً — ما يعوّض حبني له

‏ولا تسأل عن أحوالي ولاترجع تقول بخير
‏ولا أبي بحلمي تجيني ولاصدفه تكلمني

‏أنا عفتك والله بعيوني غديت صغير
‏محيت أجمل ليالينا وصار البعد يلزمني

‏تركتك يامناي وغلاي ويانصيب الغير
‏لأني شفتك بعيني تخون وخيبت ظني

‏أنا عاندت فيك الناس وقلت عنهم غير
‏ليت الوقت يرجع وعنك الناس تبعدني

‏عسى العمر و تفاصيله من أوّل حبه و تاليه
‏فدا ضحكة محيّا وجهك و تنهيدة إحساسك

‏ليا عاث الزمان بصبحك و نورك عجز يمليه
‏أخذني عن ليالٍ مظلمه بالحيل مقباسك

‏أحب اللي تحبه و أكره اللي يمكن تعاديه
‏ولا باقي سوا أحارب عن ظنونك و وسواسك

‏تمر طيوفك العذبه , وتحييّ ضحكة محياي
‏عسى شوقك يجيبك لين يوقف بك على بابي

‏حبيبي كان ما جابك , بعد طول الغياب غناي
‏لا يمكن غيرك مْن الناس يقدر يكسب اعجابي

‏على شان الغلا والحب جيتك تاركٍ مشهاي
‏عن الزلات وجروح المحبه , صرت متغابي

‏سعيت ولا لقيت الا التعب والحزن في مسعاي
‏ما ضاق الكون عقبك بس ضاقت عقبك ثيابي

‏لا تحسب كل كلمه من زعل بتحدني لـ اقصاي
‏اعرف ان قلبك ابيض مثل وجهك يا اول احبابي

‏اشوفك فـ الليال السود نورٍ يوصل لـ رجواي
‏واعدك وسعة الخاطر , لا منها ضاقت رحابي

‏ترا صوتك ونظره من عيونك تستعيد رضاي
‏لا تشره كل ما شفت السكوت يطوق اعتابي

‏ترا طرد المقفي ماهو بـ سلمي ولا مبداي
‏ما يقدر دافع الحب الحقيقي يلغي ادابي

‏انا يمكن اغيب وغيبتي ماهي بـ شهر و جاي
‏لا غاب الوصل والحب الحقيقي طول غيابي

ما ودي أخوض في توضيح بعض الأمور
‏الإحتمالات واجد — واللقاء مُحتمَل

‏جعل العوض يوم بان من الليالي قْصور
‏صدفة تجينا على غفلة تلم الشمل

‏أحرمتني من مقابل وجهك أربع شهور
‏متى تشوفك عيوني والفرح يكتمل

‏ترى الأمل فـ الحبايب مرتبط فـ الشعور
‏مادام باقي شعور.. أكيد باقي أمل

‏بتزين الامور .. وينشرح صدرك
‏العسر بعدّه يسر .. لو طالت المدّه

‏اظن بالله الكريم .. ظن الواثِق المُدرك
‏مهما تضيق الصدور وتكبر الشِدّه

عرفت أختارك وقلبي على هقواه ماقد خاب
‏يعرفك معرفه تمحي الظنون وتقتل اوهامي

‏تجي كلك على الموعد حضورٍ مابعده غياب
‏وإلى منّي تمنيتك أشوفك واقع . . آحلامي

‏وأنا مايكتمل ليلي « سوى مع ليلك الخلّاب»
‏به مْن شعورك وحبي شعورٍ ينهش عظامي

اعتبرني واحدٍ مر و تعدا
‏يمكن يعوّد و يمكن مايعود

‏أشره عليك من الجفا ومعاتبك ما بلّ ريق
‏مثل ما وليّتك على قلبي .. بقلبك ولّني

‏شرواي ما يرضى يكون إنه على مفرق طريق
‏إما تخلّيني على المشراف ولا خلّني

‏عسى لي أثر طيّبٍ فـالقلـوب
‏و موقّف و فعلٍ يُسرّ الخاطر

‏و نفسٍ تحقق أمانيها و تطوب
‏العمـر بخيــرٍ و بـرضا قـادر

‏مرّحبابك يادرع جنبي ليا ثار الفتيل
‏أعتزي بك يوم جور الزّمان المبتلي

‏لاذكرتك في نهارٍ عزومي به قليل
‏أتربّع فوق عرش الصعايب و أعتلي

ماتركته في حدود الممكنه والمستحيله
‏كنت اداري خاطره لو خاطره مدري علامه
‏
‏وكنت اوقّف له على ساق وقدم في كل ليله
‏لين اعدّلها عقب .. ماهيب ميّله واستقامه
‏
‏إن ثقل همه على مَتْنه فـ انا اول من يشيله
‏وان تمادى بالسهر ليله فـ انا آخر من ينامه

‏معاي مْن الحزن شيٍ .. يروّع قلبي الخوّاف
‏واذا ماعشته الليلة «بعيشه بعده وبكره »

‏ثلاث سنين مرتني مابين الظلم والاجحاف
‏اعيش بـ معظم ايامي على نار وعلى جمره

‏انا بي روعةٍ ما تفيد فيها الطبّ ..والاسعاف
‏ولي قلبٍ على كـثـر المتاعب ما فقد صبره

‏وبي شيٍ صعب يُوصف ولو ماينحكى ينشاف
‏تلاحظه العيون اللي تعرْف الضيق و الكسره

‏وانا مابي من الدنيا ولو تقسى عدل وانصاف
‏شبعت من الدروس اللي تعلم قلبي الحسره

‏رضيت بما كتبه الله ،ولو إنّ السنين اعجاف
‏مصير العسر لو طوّل ! بلحظة يتعبه يُسره

‏يارب ادعيك ودموعي من الخشيه على الأطراف
‏«تعوضني عن اللي ضرّني بـ ايّـامي العسره »

ما عقب عاصوف الصبر غير الأفراح
‏وسحايب الخير .. وربيع الخواطر

‏وإن كان باقي بالعمر كثر ما راح
‏يا الله بعمرٍ بالتباشير .. ماطر

‏فيك أشوف لـ حزة الضيق فرجة و اتّساع —
و منك أشوف إن عاد الأيام و الدنيا بخير