يا الله عسى الروح تفرح كِثر ما دعت🧡

انبش عن اعذار وصلك عل تعذرني
‏لا جيتك أسال وله عن اخر اخبارك

‏كنت احسب إني عليك القرب عودني
‏و علمني البعد عنك كبر مقدارك

‏من ثقل مدري حيا روحً مثقلني
‏لو امحلت مهجتي مانادت أمطارك

‏يمكن لو امر بالك ما توقعني
‏اشتقت حتى حسدت عيون زوارك

‏أجيك واروح والضحكة تميزني
‏ما كني اللي توقد لهفته نارك

‏أفصح من لساني عيونً تسولفني
‏أهدابها من عظيم الوصف شعْارك

‏ و الفزه اللي على قلبي تساومني
‏كم سولفت عن غلاك ورزت اثارك
‏
‏أحفظً تفاصيل يومً فيك جامعني
‏ لـ الليله اللي بها باحتاج تذكارك .

شعوري تعرفينه معك ماهو بكذاب
‏انا واحد لو خانك الوقت ماخانك

‏تربعتي في عرش الغلا وآمن المرتاب
‏يادعوه يتيم عاضه الله فـ احضانك

‏عرفت المحبّه : يوم بادلتك الاعجاب
‏ومن عقبها عانك ورا الحدب .. عانك

‏جعل بيني وبينك يجي معرّب الانساب
‏حفيدٍ لـ جداني / وحفيدٍ لـ جدانك

جمع ربّي بأوصافك من الندّر وكل ما طاب "
‏ما يجعل قدرك يباهي على غيرك بـ منزلته

لا يلحقك يا نظر عيني من الوقت خوف
‏انا معك ما لحقني خوف طول العمر
‏.
‏بين اتفاق المشاعر واختلاف الشفوف
‏نحاول إن المحبه … فـ القلوب تعمر
‏.
‏انتي حبيبة شجاعٍ ما ألتفت لـ الضعوف
‏وانتي مليكة من يشوف أمنياتك أمر
‏.
‏لك وسط عيني مكان و وسط قلبي رفوف
‏ولك بين حدب الظلوع العوج درب وممر

مابقى في بحة حروفي كلام
‏ومايهم ان قام حظي او قعد
‏ٰ
‏من تعب صدر العنا ودي انام
‏نومة اهل الكهف او اطول بعد

لا تلحقك ريبة ولا يلحقك شك
‏أنت الرفيق الغير .. وأنت المبدّا

‏ولو المواصل بابه سنين منصك !
‏ذكراك .. ما عدّت لو الوقت عدّا

يا نُبل أخلاقي .. و رفعة مستواي
‏لو يكذب الكاذب و يجحّد من جحد

‏إذا ضحكت أضحّك الدنيا معاي
‏و اذا بكيت أبكي و لا أعلم أحد ..

يشوفون الهوى لعبه قلوب و شفته الموات
‏لذالك مستحيل اقول غالي غير للغالي

‏اجامل في سلامي ضحكتي و مواجهي ساعات
‏ولكن مستحيل أجامل " شعوري و عذالي "

‏ماحب أصنع شعوري و المحبه تكره الحيلات
‏احب من الشعور اللي اجي بابه على فالي

‏مثل حبك تمكني وناجى مهجتي بسكات
‏لقيت القلب يمشي له و يسحبني و انا سالي

‏تجيني مثل جيةّ هاجسي قبل أوزن الابيات
‏و تفارقني قصيدة ما وزنها غير موالي

‏غريبه في غيابك كلهم منّك خذوا لمحات
‏و الاغرب في حضورك كن محد غيرك قبالي

‏على بالي تفاصيلك عمر لو المحك لحظات
‏وغيرك لو يجاورني يرقع صورته بالي

‏نشازك يطرب الخاطر كأنه اعذب الاصوات
‏اثاري الحب مو اعمى وبس الا انطرش تالي

‏أحبك حب وجه وحب صوت وحب قلب وذات
‏واحب خصالك اللي تشبه من الطيبه خصالي

‏انا في غربتك موطن و انا في طيحتك وقفات
‏و أنا لو ماني الإول بقلبك ماني التالي .

للوساع السود جيت أعلن ولائي
‏الحكم حكم المظاليل الوسيعة

‏يالجمال المستحيل اللا نهائي
‏الغزل في حضرتك تجديد بيعة

‏سلهمة رمشك تحطّم كبريائي
‏ لك تداعى قلب ٍ أسواره منيعه

‏ثغرك الضاحك بلادي وانتمائي
‏ضحكتك عن كل غلطاتك شفيعة🤍

اذكرك يا قلبي قبل عدّة سنين
‏تعشق تفاصيل الحياة وصخبها

‏عايش بدون قيود وبدون روتين
‏تمشي ورا احلامك وتنسى تعبها

‏وش جاك متغيّر ولا ودك الحين
‏تسمع سواليف الهنوف وعتبها

‏هذا وتوّك .. ما وصلت الثلاثين
‏موتت شغفْك الغامضه وش سببها

‏قم غن وانسى الهم والدرب بيزين
‏قم واترك الأيام للي كتبها

مهما سترنا احساسنا اللي بالاعماق
‏لابد في غفلة على الوجه يظهر
‏.
‏في فزتي لهفه و في عيني عناق
‏ عالي صدى الاحساس والحُب اجهر.

تجر الذكريات أطراف ثوبي لين ألد خلاف
‏على مافات لي من ماضيٍ جفّت مشاريبه
‏ٰ
‏مع اللي ما يحالي له شبيه ولا قريب أوصاف
‏مزايا غيره من الناس ماتسوى عذاريبه

فمان الله والله يحفظك من وين ماوجهت
‏جعل ربي يسمح خاطري من قبل خطواتك

‏بديتك مستقيم ويوم ناصفت المسافه تهت
‏ولاعدت آعرف وش فرق ضيعاتك وغلطاتك

‏على ماتسمعه لاتستضيق وتزعل ان واجهت
‏ولاتبكي ترا متساويً دمعك وضحكاتك

‏واذا مريتك ب دربي وطالعتك ولا شبهت
‏انا آسف تراك اللي طلبت وطلبتك جاتك

خدّروك من الوجع لكن نسو ما خدّروني
‏ليتهم يدرون وش فرق المريض من المرافق

مدامي في ذرى قلبك عن الصدمات والتقصير
‏ماعاد أخاف من طول الطريق وضيقةْ المسرى

‏أحبك .. والهوى فوق الكلام العذب والتفسير
‏ياوجهٍ فيه (مستقبل شعوري) ماغدا (ذكرى)..

‏عرفت إنك فرح قلبي وضحكات الليال وخير
‏يا حلم العمر مابعدك غرام .. وفرصةٍ أُخرى

ذنبك عظيم وحالف اليوم لأنساك
‏وش لي بحبً دوم يجرح ضميري

‏شرعت لك بابً عن الكل يهواك
‏وأثرك مشروع باب قلبك لغيري

‏خنت الذي ياما وياما تمناك
‏كسرت قلبي ليه تخلف مسيري

‏وفيت انا لك رغم قسوة سواياك
‏واليوم انا بكفيك شري وخيري

‏صدقني قلبي ماهو لايق لشرواك
‏قلبي ثمين وانت غلطة مصيري

لا كبر عمري و لا تغيّر مكاني
‏ليه أحس إني أنا ماني بـ آنا ؟

‏صرت أصور واحفظ الصوره عشاني
‏واجمع الذكرى على العشره ضمانه

‏و صرت آحب الحزن بالحان الاغاني
‏من عقب طيران لحن الخيزرانه

‏و صرت أخاف البرق وادعي في مكاني
‏بعد ما اركض للمطر و أغرق شطانه

‏و صار عندي للمجامل وجه ثاني
‏من بعد ما صرت اخاف من الميانه

‏و اعشق الوحده و احس انها أماني
‏من لقى في وحدته غيري امانه

‏اهلي خلاني و ربعي أخواني
‏والبشر كلً وله قدرة و شانه

‏لي متى واهم البحر و انا المواني
‏لي متى و أنا من الشرهه جبانه

‏مشكلةّ قلبي على طارف لساني
‏" يوم كلً حاجته تحكم لسانه "

‏من خذا مني ، تجمّل لو نساني
‏في زمن رد الجمايل بـ الاهانه

‏ما يعيش بـ هالزمن غير الاناني
‏صارت الانفس تميّل للخيانه

‏لازم اربي على القسوة حناني
‏دام عاب الوقت بالطيّب حنانه .