➡️ MAS'ULIYATLI JARAYONLAR UCHUN — ISHONCHLI ELEKTR TA'MINOTI ZARUR!

Bugundan respublikamiz bo‘ylab oliy ta'lim muassasalariga kirish test sinovlariga rasman start berildi. Bir necha yuz minglab abituriyentlarning bilim va salohiyati sinovdan o‘tadigan ushbu mas'uliyatli jarayonni uzluksiz elektr energiyasi bilan ta'minlash maqsadida "Farg‘ona hududiy elektr tarmoqlari korxonasi" AJ tomonidan keng ko‘lamli tayyorgarlik ishlari amalga oshirildi.

Xususan, viloyat hududidagi barcha test sinovlari o‘tkaziladigan binolar va ularga tutash elektr ta'minoti tizimlari mutaxassislar tomonidan to‘liq texnik ko‘rikdan o‘tkazildi. Aniqlangan kamchiliklar o‘z vaqtida bartaraf etilib, elektr tarmoqlarining ishonchli ishlashi ta'minlandi.

Yuklama yuqori bo‘lishi ehtimoli inobatga olinib, ayrim hududlardagi mavjud transformator punktlari yuqori quvvatli transformatorlarga almashtirildi. Shuningdek, favqulodda holatlarda elektr ta'minotida uzilishlarga yo‘l qo‘ymaslik maqsadida zaxira generator qurilmalari to‘liq texnik ko‘rikdan chiqarilib, ishchi holatga keltirildi hamda doimiy shay holatda saqlanmoqda.

Bundan tashqari, test sinovlari davomida tezkor harakat qilish uchun malakali elektromontyorlar va maxsus texnikalardan iborat navbatchi brigadalar tashkil etilib, barcha hududlarda doimiy navbatchilik yo‘lga qo‘yildi. Har qanday nosozlikni imkon qadar qisqa muddatda bartaraf etish uchun barcha zarur kuch va vositalar safarbar etilgan.

"Farg‘ona hududiy elektr tarmoqlari korxonasi" AJ jamoasi test sinovlari ishtirokchilari uchun qulay va barqaror sharoit yaratishga o‘zining munosib hissasini qo‘shishda davom etadi.

Aziz abituriyentlar! Sizlarga bugungi mas'uliyatli sinovlarda ulkan muvaffaqiyat, yuksak natijalar va orzu qilgan oliy ta'lim muassasasiga talaba bo‘lish baxtini tilaymiz.
Qilgan mehnatingiz va tinimsiz izlanishlaringiz o‘z samarasini bersin.
Omad sizga yor bo‘lsin!

⚡️ t.me/farhetk_admin

✅ MUROJAATLAR AMALIY ISHLAR BILAN O‘Z VAQTIDA YECHIM TOPMOQDA

Yozning jazirama kunlari. Harorat tobora ko‘tarilayotganiga qaramay, elektr ta'minoti tizimida mehnat sur'ati bir lahzaga ham pasaygani yo‘q. Aholidan kelib tushayotgan har bir murojaat sinchkovlik bilan o‘rganilib, muammolar amaliy ishlar orqali bosqichma-bosqich bartaraf etilmoqda. Chunki energetiklar uchun eng muhim vazifa — har bir xonadonga sifatli, barqaror va uzluksiz elektr energiyasini yetkazib berishdir.

Ana shunday ezgu maqsad yo‘lida Farg‘ona shahrining "Yoshlar" mahalla fuqarolar yig‘ini hududida ham navbatdagi muhim loyiha amalga oshirilmoqda.

Mahalla aholisining elektr energiyasiga bo‘lgan ehtiyojini to‘liq qondirish, tarmoqdagi yuklamani me'yorlashtirish hamda elektr ta'minoti sifatini yanada yaxshilash maqsadida quvvati 400 kVA bo‘lgan yangi transformator punkti o‘rnatildi.

Hozirgi kunda Farg‘ona shahar elektr ta'minoti korxonasi mutaxassislari tomonidan transformator punktini elektr tarmoqlariga ulash, montaj va sozlash ishlari jadal sur'atlarda olib borilmoqda. Issiq havo, yuqori harorat yoki murakkab mehnat sharoiti energetiklarning fidoyiligiga to‘sqinlik qilmayapti. Zero, har bir bajarilayotgan ish ortida minglab xonadonlarning yorug‘ligi, yuzlab tadbirkorlik subyektlarining barqaror faoliyati va aholi farovonligi mujassam.

Mazkur transformator punkti ishga tushirilgach, hududdagi elektr ta'minotining ishonchliligi yanada ortadi, kuchlanish sifati barqarorlashadi hamda iste'molchilarga yanada sifatli va uzluksiz elektr energiyasi yetkazib berish imkoniyati kengayadi.

Energetiklar uchun faslning issig‘i yoki sovug‘i muhim emas. Muhimi — xalq ishonchini oqlash, har bir murojaatga amaliy yechim topish va elektr ta'minotining uzluksizligini ta'minlashdir. Shu bois tizimdagi bunyodkorlik va modernizatsiya ishlari kecha-yu kunduz, bir soniya ham to‘xtamasdan davom etmoqda.

⚡️ t.me/farhetk_admin

QARZDORLIKNI QISQARTIRISH VA QONUNBUZARLIKLARNING OLDINI OLISH MASALALARI MUHOKAMA QILINDI

O‘zbekiston tumani prokuraturasi tomonidan elektr energiyasidan noqonuniy foydalanishning oldini olish hamda qarzdorlikni qisqartirishga qaratilgan navbatdagi tadbir o‘tkazildi.

Tuman elektr ta’minoti korxonasida qarzdor iste’molchilar bilan uchrashuv tashkil etilib, ularga mavjud qarzdorliklarni qisqa muddatlarda bartaraf etish, to‘lov intizomiga qat’iy rioya qilish hamda elektr energiyasidan noqonuniy foydalanish qonuniy javobgarlikka sabab bo‘lishi tushuntirildi.

Bu kabi profilaktik tadbirlar elektr energiyasidan oqilona foydalanishni ta’minlash, qonunbuzarliklarning oldini olish va to‘lov intizomini mustahkamlash maqsadida izchil davom ettirilmoqda.

⚡️ t.me/farhetk_admin