YO‘QOTISHLARINI KAMAYTIRISH BO‘YICHA AMALIY ISHLAR SAMARASI

Qo‘shtepa tumanida elektr energiyasi ta’minoti barqarorligini oshirish, iste’molni to‘g‘ri hisobga olish hamda elektr tarmoqlaridagi yo‘qotishlarni kamaytirish borasida tizimli ishlar olib borilmoqda.

Xususan, tumandagi “O‘qchi” mahalla fuqarolar yig‘ini hududida elektr energiyasi yo‘qotishlari yuqori bo‘lgan 285- va 286-sonli transformator punktlari chuqur o‘rganilib, mazkur hududlarda amalga oshirilgan ishlar tahlil qilindi.

O‘rganishlar davomida transformator punktlari, elektr tarmoqlari hamda iste’molchilarning elektr energiyasidan foydalanish holati to‘liq ko‘rib chiqildi. Aniqlangan kamchiliklarni bartaraf etish yuzasidan amaliy choralar ko‘rildi.

Jumladan, 1050 metr elektr tarmog‘i daraxt shoxlaridan tozalandi, bu esa tarmoqlarning xavfsiz va barqaror ishlashini ta’minlashga xizmat qiladi. Shuningdek, 47 ta elektr hisoblagichi iste’molchilar xonadonlarining fasad qismiga ko‘chirildi, 7 ta zamonaviy, ASKUE tizimiga mos elektr hisoblagichi o‘rnatildi.

Bundan tashqari, nazorat tadbirlari davomida 157,8 ming kVt-soat elektr energiyasi miqdoridagi noqonuniy iste’mol holatlari aniqlanib, tegishli tartibda bartaraf etildi. Ushbu holatlar bo‘yicha 187 million so‘mlik zarar aniqlangan.

Hududdagi noqonuniy ulangan 18 ta ko‘cha yoritish tarmog‘i ham qonuniylashtirildi. Bu orqali nafaqat elektr energiyasidan oqilona va qonuniy foydalanish ta’minlandi, balki tarmoqdagi ortiqcha yuklamalarning oldini olishga ham erishildi.

Amalga oshirilgan kompleks chora-tadbirlar natijasida 285- va 286-sonli transformator punktlarida elektr energiyasi yo‘qotishlari sezilarli darajada kamaytirilib, belgilangan me’yor darajasiga keltirildi.

Mazkur ishlar elektr energiyasi hisobini shaffof yuritish, noqonuniy iste’molning oldini olish va iste’molchilarni sifatli hamda ishonchli elektr energiyasi bilan ta’minlash borasidagi amaliy sa’y-harakatlarning muhim natijasi bo‘ldi.
 
⚡️ t.me/farhetk_admin

❗️ MAVJUD QARZDORLIKLARNI TO'LIQ UNDIRISHGA QARATILGAN NAZORAT TADBIRLARI DAVOM ETMOQDA

Elektr energiyasi uchun to‘lovlar o‘z vaqtida amalga oshirilishini ta’minlash hamda debitor qarzdorlikni kamaytirish maqsadida Furqat tumanida mas’ul xodimlar ishtirokida nazorat-reyd tadbirlari tashkil etilmoqda.

Tadbirlar davomida elektr energiyasi uchun muddati o‘tgan qarzdorligi mavjud iste’molchilar xonadonlari va obyektlari o‘rganilib, ularga qarzdorlikni qisqa muddatlarda bartaraf etish yuzasidan ogohlantirishlar berilmoqda. Belgilangan muddatda to‘lov amalga oshirilmagan hollarda esa amaldagi tartibga muvofiq elektr ta’minotini vaqtincha cheklash hamda qarzdorlikni undirish bo‘yicha qonuniy choralar ko‘rilmoqda.

Elektr ta’minoti korxonasi iste’molchilardan elektr energiyasi uchun to‘lovlarni o‘z vaqtida amalga oshirishni so‘raydi. O‘z vaqtida to‘langan to‘lovlar elektr tarmoqlarini modernizatsiya qilish, sifatli xizmat ko‘rsatish va iste’molchilarni uzluksiz elektr energiyasi bilan ta’minlashda muhim ahamiyat kasb etadi.

⚡️ t.me/farhetk_admin

Qo‘qon shahrida transformator punktidagi aniqlangan qizish holati bartaraf etildi

Qo‘qon shahrida elektr ta’minoti barqarorligi va tarmoqlarning ishonchli ishlashini ta’minlash maqsadida elektr tarmoqlari hamda transformator punktlarida texnik ko‘rik va nazorat ishlari izchil olib borilmoqda.

Navbatdagi o‘rganishlar davomida 38-sonli transformator punktining montaj qismida qizish holati aniqlanib, uni bartaraf etish bo‘yicha zarur amaliy ishlar amalga oshirildi.

Mutaxassislar tomonidan transformator punktining montaj qismi sinchiklab ko‘zdan kechirilib, aniqlangan kamchiliklar bartaraf etildi hamda elektr jihozlarining texnik holati qayta nazoratdan o‘tkazildi.

Amalga oshirilgan ishlar natijasida transformator punktining barqaror va xavfsiz ishlashi ta’minlanib, elektr ta’minotida yuzaga kelishi mumkin bo‘lgan nosozliklarning oldi olindi.

Bunday profilaktik tadbirlar elektr tarmoqlarining ishonchliligini oshirish, avariyaviy holatlarning oldini olish hamda iste’molchilarni uzluksiz elektr energiyasi bilan ta’minlashga xizmat qiladi.

⚡️ t.me/farhetk_admin