Эрон эълон қилинмаган ракета синовини ўтказган бўлиши мумкин

Associated Press агентлиги сунъий йўлдошдан олинган тасвирларга таяниб, Эроннинг Имом Хумайний номидаги космодромида расман эълон қилинмаган ракета синови ўтказилган бўлиши мумкинлигини хабар қилди. Таҳлилчиларга кўра, бу ҳолат Теҳроннинг июнь ойида Исроил билан бўлиб ўтган 12 кунлик урушдан сўнг ҳам ўз қуролланиш дастурини фаол давом эттираётганини кўрсатади.

Расмий Теҳрон бу синов ҳақида хабар бермаганига қарамай, Эрон парламенти аъзоси Муҳсин Зангане мамлакат қитъалараро баллистик ракетани муваффақиятли синовдан ўтказганини даъво қилди. У буни Исроил ва Ғарб босими олдида Эрон қудратининг рамзи деб атади, аммо ўз баёнотига ҳеч қандай далил келтирмади. Бу баёнот Эроннинг ядровий дастури сабабли БМТ санкциялари қайта жорий этилиши кутилаётган бир пайтда халқаро ҳамжамиятда жиддий хавотир уйғотди.

18 сентябрь куни ижтимоий тармоқларда Эроннинг Семнан вилояти осмонида ракета изи акс этган суратлар тарқалган эди. Planet Labs PBC тақдим этган сунъий йўлдош тасвирларида эса космодромнинг учириш майдончасида аввалги синовларда кузатилган куйиш изларига ўхшаш доғлар аниқланган. Халқаро стратегик тадқиқотлар институти (IISS) тадқиқотчиси Фабиан Хинснинг фикрича, бу излар қаттиқ ёқилғили ракета синови ўтказилганидан далолат бериши мумкин.

Қитъалараро баллистик ракеталар одатда 5500 километрдан узоқроқ масофани босиб ўтади. Бу Эрон олий раҳбари Али Хоманаий томонидан белгиланган 2000 километрлик чегарадан анча юқори. Агар 2000 км радиус Яқин Шарқнинг катта қисмини, жумладан Исроил ва АҚШнинг минтақадаги ҳарбий базаларини қамраб олса, қитъалараро ракета бутун Европа ҳудудигача етиб бориши мумкин.

Вашингтондаги Демократияни ҳимоя қилиш жамғармаси таҳлилчиси Беҳнам Бен Талеблунинг сўзларига кўра, 12 кунлик уруш Теҳронни янги ва янада такомиллашган баллистик ракеталарни ишлаб чиқишга ундаган бўлиши мумкин.

@gayratkhodjasaydaliev

Xabarlar kanaliga obuna bo‘ling: https://t.me/+NRMjAWIoTrZjNTAy