Aziz ustozlar va murabbiylar!

FIKRAT jamoasi nomidan barchangizni ushbu qutlug‘ bayram bilan chin qalbdan tabriklaymiz!

Bugun Fikrat tahliliy dasturida biz bilan birga fikr almashib, bilim va tajribasi bilan tomoshabinlarimizga manfaat yetkazib kelayotgan barcha ekspertlarimizga ham samimiy minnatdorligimizni bildiramiz.

Sizlarga mustahkam sog‘lik, oilaviy xotirjamlik va shogirdlaringiz yutuqlaridan faxrlanib yashash baxtini tilaymiz!

Siz bor ekansiz — ilm bor, tafakkur bor, kelajak bor!

Bayramingiz muborak bo‘lsin, aziz ustozlar!

Hurmat bilan,
FIKRAT jamoasi

Россия Хавфсизлик кенгаши раиси ўринбосари Дмитрий Медведев Россиянинг паст орбитали сунъий йўлдош алоқаси тармоғи – “Рассвет” тизимини йўқ қилишга бўлган ҳар қандай уриниш “тўлақонли фазовий уруш”га олиб келиши мумкинлигидан огоҳлантирди. У Украина томонининг мазкур тизим фаолиятини чеклашга қаратилган халқаро чақириқларига муносабат билдирар экан, ҳарбий ҳаракатлар коинотга кўчган тақдирда Илон Маскнинг SpaceX компаниясига қарашли Starlink сунъий йўлдошлари ҳам Россиянинг қонуний зарба нишонига айланиши билан таҳдид қилди.

“Бундай ҳолатда уларнинг Starlink сунъий йўлдошлари “тутдек тўкилади”. Коинот – жуда тор макон, ўзаро хушмуомала бўлиш керак”, – деб ёзди Медведев ўз Telegram-каналида. Россия мулозими “Рассвет” тармоғини халқаро миқёсда “блоклаш” талабларини йўлдошларни йўқ қилишга қаратилган тўғридан-тўғри хатти-ҳаракат сифатида баҳолаб, расмий Вашингтон бундай ҳаракатларнинг глобал хавфсизлик учун оғир оқибатларини тўғри англашига умид билдирди.

Ушбу кескин баёнотлар ортида замонавий уруш майдонида орбитал алоқа инфратузилмаси устидан назорат ўрнатиш учун тобора кучайиб бораётган технологик рақобат ётибди. Фронт шароитида мустақил ва барқарор йўлдошли интернет тармоғига эгалик қилиш қўшинларни оператив бошқариш, зарбдор ва разведка дронларини масофадан йўналтириш ҳамда хорижий тизимларга бўлган технологик қарамликни камайтиришда ҳал қилувчи омил ҳисобланади. Шу сабабли “Рассвет” лойиҳаси атрофидаги баҳс оддий илмий-техник ташаббус доирасидан чиқиб, глобал хавфсизлик ва геосиёсий қарама-қаршиликнинг янги фронтига айланмоқда.

Мақолани тўлиқ ўқиш: https://fikratonline.uz/yulduzlar-jangi-rassvet-va-starlink-atrofidagi-ziddiyat/

@fikrat

“Бундай зарбани қайтаришнинг иложи йўқ”: КХДР сунъий интеллект элементларига эга янги ракетани синовдан ўтказди

Шимолий Корея парвоз чоғида фаол манёвр қилиш ҳамда Жанубий Корея ва Япониянинг ракетага қарши мудофаа тизимларини четлаб ўтиш имкониятига эга экани билдирилган ўрта масофали баллистик ракета синовини ўтказди. Мазкур парвоз икки Корея ўртасидаги демаркация чизиғи бўйлаб содир бўлган мина портлашлари ортидан яриморолда ҳарбий кескинлик кескин кучайган паллага тўғри келди, дейилади Euronews хабарида.

Пхеньян сиёсий элитасида иккинчи нуфузли шахс саналган Ким Ё Чжон мазкур синовларни давлат раҳбари Ким Чен Ин шахсан кузатганини маълум қилди. У синалган қуролни “стратегик ракета” деб атаб, уни ядровий каллаклар билан жиҳозлаш мумкинлигига шама қилди. Ким Ё Чжоннинг таъкидлашича, ракета паст баландликларда парвоз траекториясини ўзгартира олади ҳамда сунъий интеллект элементларига эга бошқарув тизими билан таъминланган; бу эса уни мавжуд радарлар орқали кузатиш ва тутиб олишни мураккаблаштиради.

Мақолани тўлиқ ўқиш: https://fikratonline.uz/bunday-zarbani-qaytarishning-iloji-yoq-khdr-suniy-intellekt-elementlariga-ega-yangi-raketani-sinovdan-otkazdi/

@fikrat

“Киевдан кетинг”: кўприкларга зарбалар ва кучаяётган босим

Россия Ташқи ишлар вазирлигининг хорижий фуқаролар ва дипломатларга Украинани, хусусан Киевни тарк этиш бўйича берган навбатдаги огоҳлантириши пойтахтга уюштирилаётган ҳаво ҳужумлари янги босқичга чиққан даврга тўғри келди. Сентябрь ойи охирида шаҳар маркази ва энергетика тугунларига берилган зарбалар ортидан, октябрнинг дастлабки кунларида Днепр дарёсининг икки қирғоғини боғловчи асосий кўприклар нишонга олинди. Москва кенг кўламли жавоб зарбалари давом этишини билдираётган бўлса, Европа давлатлари ўз дипломатик миссиялари шаҳарда фаолиятини тўхтатмаслигини таъкидламоқда.

Россия дипломатик идораси 3 октябрь кунги баёнотида 25 майдаги мурожаатни ёдга олиб, чет эл фуқароларини Украина ҳудудида қолиш ва у ерга сафар қилишдан тийилишга чақирди ҳамда Россия қуролли кучлари “оммавий жавоб зарбалари”ни давом эттиришини маълум қилди. Расмий баёнотларда ушбу ҳужумлар Россия ҳудудларига уюштирилган зарбалар, жумладан, 19-20 сентябрь кунлари Давлат думаси сайловлари давридаги дрон ҳужумлари билан боғланган. Кейинроқ, Украина томони Россиянинг нефтни қайта ишлаш корхоналарига босимни оширишини эълон қилгач, Россия Мудофаа вазирлиги 4 октябрда Киев ва бошқа ҳудудлардаги ҳарбий, саноат ҳамда уларга хизмат қилувчи инфратузилмага зарбалар кўпайишини расман билдирди.

Пойтахтдаги кундалик шароитда ушбу ҳаво зарбаларининг оқибатлари аллақачон сезилмоқда. 28 сентябрь куни дрон қолдиқларининг Украина Миллий фанлар академияси биносига қулаши ва шаҳар бўйлаб уюштирилган ҳужумлар камида икки кишининг ўлими ҳамда 24 кишининг жароҳатланишига олиб келди; бир қатор тиббиёт, фармацевтика ва логистика объектлари шикастланди. 30 сентябрда энергетика тизими нишонга олиниши ортидан “Укрэнерго” Киев ва учта ёндош вилоятда фавқулодда электр чекловларини жорий этди. Оқибатда шаҳарнинг айрим ҳудудларида жамоат транспорти тўхтаб, марказий сув тармоғидаги босим пасайди.

Октябрь ойининг бошидан бошлаб зарбалар географияси Днепр орқали ўтувчи стратегик кўприкларга кўчди. 1-2 октябрь кунлари Жанубий кўприкка дронлар томонидан зарбалар берилиши ортидан автомобиллар ва метро поездлари қатнови техник текширувлар учун вақтинча тўхтатилди. 3 ва 4 октябрь кунлари эса Шимолий кўприк ҳужумга учраб, йўл қопламаси, троллейбус контакт тармоқлари ва Деснянский туманига хизмат кўрсатувчи иссиқлик қувури шикастланди. Россия Мудофаа вазирлиги ушбу йўналишлар орқали ҳарбий юклар ва бўлинмалар ташилаётганини таъкидлаб зарбаларни изоҳлаган бўлса, Киев маъмурияти асосий зарар транспорт ва коммунал тармоқларга етганини маълум қилди.

Кўприклардаги қатнов чекловлари вайронагарчилик даражасидан қатъи назар, пойтахтнинг кундалик ҳаётига тўғридан-тўғри таъсир кўрсатмоқда. Днепр дарёси Киевни икки қисмга ажратиб тургани боис, муайян кўприкларнинг ёпилиши ёки улардаги ҳаракатнинг чекланиши транспорт оқимини сақланиб қолган кам сонли йўлларга – хусусан, Дарницкий ва Патон кўприкларига йўналтириб, шаҳар бўйлаб йирик тирбандликлар ва логистик узилишларни келтириб чиқармоқда.

Мақолани тўлиқ ўқиш: https://fikratonline.uz/kievdan-keting-kopriklarga-zarbalar-va-kuchayayotgan-bosim/

@fikrat