مستني فرصة تغير مسارك أو منحة تفتح ليك أبواب جديدة؟
موعدنا اقترب مع اللايف الأول من سلسلة لايفات المنح💙✨.

حنتكلم في تفاصيل ومواضيع مهمة حتساعدك تبدأ مشوارك بثقة وتكسر حاجز الخوف. جهزوا أسئلتكم، وخلونا نكتشف الفرص البتنتظرنا سوا، لأن البدايات دايماً بتصنع الفارق.

⏰الزمان: الساعة 7 مساءً بتوقيت السودان.
📍المكان: قناة قمم على التلجرام.

•°•°•°•°•°•°•°•°•°•°•°•°•°•°•°•°
في قمم بنحاول نكون أمل ولينا أثر في التعليم في السودان، خليك أنت كمان أمل وانشر قمم✨.

#الشهادة_السودانية #دعم_الإبداع #دعم_الطلاب #السودان #تعليم #قمم

﴿وَلَا تَحْسَبَنَّ الَّذِينَ قُتِلُوا فِي سَبِيلِ اللَّهِ أَمْوَاتًا بَلْ أَحْيَاءٌ عِندَ رَبِّهِمْ يُرْزَقُونَ﴾

رحم الله أرواحًا رحلت، ودماءً سُفكت، وأحلامًا لم تكتمل. اللهم ارحم شهداء السودان، واغفر لهم، وتقبّلهم في عليين، واربط على قلوب ذويهم، واجبر كسرهم.

اللهم احفظ السودان وأهله، وألّف بين قلوب أبنائه، وأبدل خوفه أمنًا، وحربه سلامًا، واجعل لهذا الوطن من كل ضيقٍ مخرجًا، ومن كل حزنٍ فرجًا. اللهم ارزقنا سودانًا آمنًا، تسوده الرحمة والسلام، وتُصان فيه الأرواح والكرامة. 🇸🇩🤍

•°•°•°•°•°•°•°•°•°•°•°•°•°•°•°•°
في قمم بنحاول نكون أمل ولينا أثر في التعليم في السودان، خليك أنت كمان أمل وانشر قمم✨

#الشهادة_السودانية #دعم_الإبداع #دعم_الطلاب #السودان #تعليم #قمم

أمر المؤمن كله خير | قصة وأثر💙✨.

_ وفاء بابكر.
بديت سنة تالتة 2.10.2022 في مدرسة القرية في الجزيرة، وزي ما معروف مدارس الولايات ما أحسن شي للأسف.
بدينا كويس الحمدلله وكان في حماس عالي جدًا من أهل وزملاء وبدينا بكل جهدنا. امتحنا الشهري الأول الحمدلله، الشهري التاني امتحنا نصه وفي الأخير بدأ إضراب المعلمين ..
استمر الإضراب فترة طويلة على ما أعتقد شهر أو شهرين، وفي الفترة دي كان أستاذ الفيزياء ربنا يجزيه كل خير بيحاول يمشي لينا في المنهج.. لحدي ما خلص الإضراب هو كان شبه خلص المقرر✨️.

كنا بنحاول نقرأ البنقدر عليهو شوية من اليوتيوب وشوية برانا رغم إنو الحصص اونلاين ما كانت متوفرة بصورة كافية .
نزلنا بعد الإضراب في رمضان وكان كل أستاذ بيحاول يلحق يلم المقرر على أساس نمتحن تجريبي بعد العيد طوالي، وقدّر الله قامت الحرب ووقفنا..
نزلنا بعد اسبوع العيد تكملة مقرر بس للأسف ما استمر وكل شي توقف تمامًا... مرت الأيام والشهور وقامت حرب مدني.

_15.12.2023:
بعدها بفترة سافرت السعودية وكنت بحاول بقدر الإمكان ما أنقطع عن القراية مع إني خليت كتبي في السودان وشبه يأست من اني امتحن، وبعد 9 شهور تحددت امتحانات الشهادة والحمدلله جاء الفرج، رجع الأمل والحماس أقوى من أول
بديت مع صحبتي بكل حماس وبالجد ساعدتني جدًا جزاها الله خير.
بعد فترة بسيطة الوضع في الجزيرة بدأ يتدهور أكتر وأكتر.. كل يوم خبر وفاة من الأهل، اختفاء، مجازر.
وفي موجات النزوح وقتها توفي أستاذ الفيزياء المخلص جدًا، رحمه الله وجزاه عنا كل خير. ما كان باقي على الامتحانات إلا شهرين!، حاولت قدر الإمكان أركز على قرايتي وما أوقف بسبب الحاصل.

_عدت الأيام وجاء وقت الامتحانات 26.12.2024:
سافرت مركز الامتحان في جدة، كانت أول مرة أسافر براي، قبلها بيومين أبوي عمل عملية(عملية بسيطة في يده) أو زي ما كنت مفتكرة، وأمي وأخواني كانوا كلهم معاه كان صعب اني اقتنع انو أيام زي دي ما حاكون مع أهلي بس توكلت ومشيت ..
وصلت جدة الساعة 2 صباحًا .. طول طريق السفر ما كنت فاتحة النت على أساس أراجع
فتحت الجوال ولقيت رسائل تعازي كتيرة بتوصلني ..
كان في توقعات كتيرة لانو أهلنا كلهم كانو نازحين في مخيمات وكان في كوليرا وحمى الضنك وكل الأمراض الانتشرت فترة النزوح واللي كانوا لسة في الجزيرة، جاني مدير المدرسة السافرت معاه... وراني بخبر وفاة أبوي ...

.....
قريبي كان في جدة، وجاني على أساس ارجع معاهو وانو مستحيل امتحن.. وانو امتحن مع الدفعة الجاية.
توكلت وقررت اقعد امتحن، عدت الامتحانات ما متذكرة كانت كيف😂. بس الحمدلله حاولت بكل جهدي وطلعت النتيجة .. كانت نتيجة سيئة جدًا والحمدلله.

كان باقي شهرين لامتحانات 24 ، قلت خلاص حامتحن معاهم، بديت اقرأ بس كنت مترددة
وبعد استخارات واستشارات قررت اني أحول منهج سعودي..
سجلت .. ونزلت مدرسة
كانت تجربة جميلة جدًا والحمدلله .. رغم انها كانت ضاغطة خالص😂، بس علمتني كتيير جدًا جدًا.

وامتحنت الحمدلله كل الامتحانات وكانت نسبتي بعد المعادلة 92% الحمدلله💙✨️.

كانت سنة في 4 سنين.. بس علمتني كتير وزادت إيماني ويقيني بربنا... وأخيرًا بالجد أمر المؤمن كله خير، والحمدلله على التمام.

•°•°•°•°•°•°•°•°•°•°•°•°•°•°•°•°
في قمم بنحاول نكون أمل ولينا أثر في التعليم في السودان، خليك أنت كمان أمل وانشر قمم✨

#الشهادة_السودانية #دعم_الإبداع #دعم_الطلاب #السودان #تعليم #قمم #قصة_وأثر

الحماس مستمر.. والفرص بتكبر!

بعد ما بدينا الخطوة الأولى، جا الوقت عشان نمشي خطوة أبعد في طريقنا.
في اللايف الثاني، حنواصل نقاشنا في سلسلة المنح، وحنتطرق لجوانب وتفاصيل جديدة ومهمة جداً ممكن تكون هي الدفعة البتنقلك من مجرد حلم لواقع حقيقي وخطوة فعلية.

ما تفوتوا اللايف وخليكم قراب ومستعدين💙✨.

⏰الزمان: الساعة 7 مساءً بتوقيت السودان.
📍المكان: قناة قمم على التلجرام.

•°•°•°•°•°•°•°•°•°•°•°•°•°•°•°•°
في قمم بنحاول نكون أمل ولينا أثر في التعليم في السودان، خليك أنت كمان أمل وانشر قمم✨.

#الشهادة_السودانية #دعم_الإبداع #دعم_الطلاب #السودان #تعليم #قمم

صندوق التعليقات ✨

صندوق للمرفقات✨

كواليس حلقات دليل الشهادة السودانية🎬✨️

في قمم، بنسعى دائمًا إننا نقدم ليكم محتوى بأعلى جودة، عشان نضمن أكبر قدر من الاستفادة، ويكون بالصورة البتستحقوها.

بعد مجهودات وتفاصيل كتيرة، من التخطيط والتجهيز لحدي اللحظة البتظهر ليكم فيها الحلقة بالشكل النهائي... كانت سلسلة دليل الشهادة السودانية بالصورة الشفتوها والحمد لله💙.

والليلة بنشارككم جانب من الكواليس واللحظات الكانت جزء من السلسلة✨️


•°•°•°•°•°•°•°•°•°•°•°•°•°•°•°•°
في قمم بنحاول نكون أمل ولينا أثر في التعليم في السودان، خليك أنت كمان أمل وانشر قمم ✨

#الشهادة_السودانية #دعم_الإبداع #دعم_الطلاب #السودان #تعليم #قمم

عشان أنتوا أهلنا،
مننا وفينا،
وبيتنا التاني💙.

وكنتوا جزء كبير من رحلتنا في قمم، وتعرفنا وبقينا مع بعض.

وناس البيت كل فترة بعملوا قعدة، بتكون مساحة كل الناس بتقول رأيها، بتحكي قصص، ومرات بتحصل اقتراحات تتنفذ وغيرها🫂.

والمنشور دا، مساحتنا وقعدتنا مع بعضنا، أحكوا لينا فيه رأيكم في قمم، أشكوا، طبّلوا، اقترحوا..
واتكلموا في كل موضوع كان جاء قبل كدا وما لقيتوا فرصة تقولوه🎤.

في حاجة عجبتكم في قمم؟
في حاجة دايرة تحسين؟
ولا بس فضفضة وموقف جميل؟

هنا دايرين نقوي الروابط بين بعض🤝💙.

حبابكم ألف أهلنا، القعدة قعدتكم، والمساحة لصوتكم، اكتبوا لينا، ونحن هنا بنستمع ليكم بكل حب💙.

•°•°•°•°•°•°•°•°•°•°•°•°•°•°•°•°
في قمم بنحاول نكون أمل ولينا أثر في التعليم في السودان، خليك أنت كمان أمل وانشر قمم✨

#الشهادة_السودانية #دعم_الطلاب #دعم_الإبداع #السودان #تعليم #قمم