صندوق التعليقات ✨

صندوق للمرفقات✨

كواليس حلقات دليل الشهادة السودانية🎬✨️

في قمم، بنسعى دائمًا إننا نقدم ليكم محتوى بأعلى جودة، عشان نضمن أكبر قدر من الاستفادة، ويكون بالصورة البتستحقوها.

بعد مجهودات وتفاصيل كتيرة، من التخطيط والتجهيز لحدي اللحظة البتظهر ليكم فيها الحلقة بالشكل النهائي... كانت سلسلة دليل الشهادة السودانية بالصورة الشفتوها والحمد لله💙.

والليلة بنشارككم جانب من الكواليس واللحظات الكانت جزء من السلسلة✨️


•°•°•°•°•°•°•°•°•°•°•°•°•°•°•°•°
في قمم بنحاول نكون أمل ولينا أثر في التعليم في السودان، خليك أنت كمان أمل وانشر قمم ✨

#الشهادة_السودانية #دعم_الإبداع #دعم_الطلاب #السودان #تعليم #قمم

عشان أنتوا أهلنا،
مننا وفينا،
وبيتنا التاني💙.

وكنتوا جزء كبير من رحلتنا في قمم، وتعرفنا وبقينا مع بعض.

وناس البيت كل فترة بعملوا قعدة، بتكون مساحة كل الناس بتقول رأيها، بتحكي قصص، ومرات بتحصل اقتراحات تتنفذ وغيرها🫂.

والمنشور دا، مساحتنا وقعدتنا مع بعضنا، أحكوا لينا فيه رأيكم في قمم، أشكوا، طبّلوا، اقترحوا..
واتكلموا في كل موضوع كان جاء قبل كدا وما لقيتوا فرصة تقولوه🎤.

في حاجة عجبتكم في قمم؟
في حاجة دايرة تحسين؟
ولا بس فضفضة وموقف جميل؟

هنا دايرين نقوي الروابط بين بعض🤝💙.

حبابكم ألف أهلنا، القعدة قعدتكم، والمساحة لصوتكم، اكتبوا لينا، ونحن هنا بنستمع ليكم بكل حب💙.

•°•°•°•°•°•°•°•°•°•°•°•°•°•°•°•°
في قمم بنحاول نكون أمل ولينا أثر في التعليم في السودان، خليك أنت كمان أمل وانشر قمم✨

#الشهادة_السودانية #دعم_الطلاب #دعم_الإبداع #السودان #تعليم #قمم

🎀أكتوبر الوردي | الوعي بداية الطريق🎀.

في كل أكتوبر، بنسمع عن أهمية الكشف المبكر عن سرطان الثدي، وبنتكلم عن ضرورة الإهتمام بصحتنا، بس التوعية بسرطان الثدي ما بتبدأ بمعرفة أهمية الكشف المبكر، بل بمعرفة وين بنقدر نفحص، ومنو الجهات اللي ممكن تساعدنا في الفحص والتشخيص.

لأنو المعلومة مهما كانت مهمة، بتفضل ناقصة لو ما عرفنا كيف نستفيد منها ونحوّلها لخطوة عملية تحافظ على صحتنا🎀.

خطوة صغيرة ممكن تصنع فرق كبير، والمعرفة المُبكِّرة ممكن تكون بداية لقرار مهم🎀.

ــــــــــــــــــــــــــــــ
🎥 فيديو توعوي | سفيرات قِمم


•°•°•°•°•°•°•°•°•°•°•°•°•°•°•°•°
في قمم بنحاول نكون أمل ولينا أثر في التعليم في السودان، خليك أنت كمان أمل وانشر قمم✨

#الشهادة_السودانية #دعم_الطلاب #دعم_الإبداع #السودان #تعليم #قمم

فَمن للأُمَّةِ الغَرقَى إذا كُنَّا الغَريقِينَ
ومَن لِلغَايةِ الكُبرَى إذَا ضمُرَت أمَانِينَا؟💙

_ كيف للأمة أن تطيب جراحها؛ إذا خبا الأمل في قلوب أبنائها، وتخلوا عن أمنياتهم وأحلامهم... فمن سيحمل همها، ويعيد بناءها!

وكذلك المعنى الأسمى لحياة الفرد هي دفاعه عن الحق، فما غايته إن لم يجعل لحياته سبيلًا لتحقيق النصر لدينه وإحيائه.

•°•°•°•°•°•°•°•°•°•°•°•°•°•°•°•°
في قمم بنحاول نكون أمل ولينا أثر في التعليم في السودان، خليك أنت كمان أمل وانشر قمم✨

#الشهادة_السودانية #دعم_الإبداع #دعم_الطلاب #السودان #تعليم #قمم

بتحس إنك مشغول طول اليوم، لكن في النهاية ما بتنجز القدر اللي كنت مخطط ليهو؟! البوست دا ليك🤯

واحدة من أكثر المشاكل اللي بتواجه أغلب الطُلّاب هي التشتت، بيكون تايه بين ضغط الدراسة، تراكم الحصص، كثرة المهام، ومحاولة التوفيق بين الأهداف الدراسية وتطوير الذات.

والأصعب من دا كلو إنك أحيانًا بتكون محتاج زول يشاركك الرحلة، يفهم تحدياتك، ويشجّعك تواصل بدل ما تستسلم للإحباط. لكن الحل ما بالضرورة إنك تضغط على نفسك أكتر؛ أحيانًا بتحتاج البيئة المناسبة💙!

وهنا بيجي دور مجتمع قمم✨.

مجتمع قِمم ما مجرد مجتمع بتجتمع فيه مجموعة من الطلاب، بل مساحة بتجمع شباب عندهم طموحات وأهداف، وبتساعدهم يتعلّموا من بعض، يتبادلوا الخبرات، ويطوّروا من مهاراتهم وقدراتهم.

في مجتمع قِمم بتلقى فرصة تستثمر وقتك بصورة أفضل، تكتشف مهارات جديدة، توسّع دائرة معارفك، وتكون جزء من بيئة بتشجّعك على المبادرة والاستمرار💙.

في مجتمع قِمم، بنؤمن إنو كل خطوة صغيرة بتعملها اليوم ممكن تكون بداية لتغيير كبير في مستقبلك، وإنو وجودك وسط ناس بتشاركك الطموح بيفتح ليك فرص تتعلّم، تتطوّر، وتكتشف إمكانياتك بصورة أكبر💙✨.

💬أكتبو لينا في التعليقات، شنو أكثر حاجة بتشتّتك بين الدراسة وتطوير نفسك؟! وكيف بتتعامل معاها؟!

°•°•°•°•°•°•°•°•°•°•°•°•°•°
في قمم بنحاول نكون أمل ولينا أثر في التعليم في السودان، خليك إنت كمان أمل وانشر قمم ✨.
#الشهادة_السودانية #دعم_الإبداع #دعم_الطلاب #السودان #تعليم #قمم #مجتمع_قمم

حاسي إنو الجبل أطول من إنك تتسلّقو؟!⛰

الدروس اتراكمت، الأهداف في القِمّة وبعيدة، طريقة المُذاكرة غلط أو صح، فلان خلّص وانت واقف لسا في درس الشهر الفات وحتّى البيئة حولك ما مُساعدة؟

عدم التنظيم عندو خلفيّة عريضة بيستند عليها، والأسباب كتيرة، والحاجة اللي ح تنتج من عدم تنظيمك دا إنك ح تشوف الجبل عالي شديد، ح تكون واقف وبتتفرّج على هدفك وحاسي بالإحباط لأنك كل ما بتتسلّق بمقدار خُطوة بتخت يدّك ف حجر م متين ف بيتكسر وبتنزل خطوتين ل تحت🛘.

بس يا عزيزي مُتسلّق الجبل👀...
مُجتمَع قِمم ح يساعدك ف التنظيم🔥.

حاجز الخوف مُمكن يتكسر، المهام الكبيرة مُمكن تتقسم وتتنظم، ح تستخدم تِقنيات جميلة للمُذاكرة، وكمان ح نوفِّر ليك بيئة دراسيّة مُريحة بالنسبة ليك💙.

والأهم من دا كلو، ح تفهم إنو الإحباط اللي كان عِندك نتيجة ل إنك مُتوقِّع من نفسك الكمال، في حين إنو التعَثُّر والخطأ هم جزء من رحلة التعلّم و م معناها إنك فاشِل.

في مُجتمَع قِمم ح نعلمك كيف تحب أخطائك...
ف هل انت ح تشاركنا في الرّحلة ومُتحمّس تتعلم كيف تنظم زمنك؟!👀

°•°•°•°•°•°•°•°•°•°•°•°•°•°
في قمم بنحاول نكون أمل ولينا أثر في التعليم في السودان، خليك إنت كمان أمل وانشر قمم ✨.

#الشهادة_السودانية #دعم_الإبداع #دعم_الطلاب #السودان #تعليم #قمم #مجتمع_قمم

السر في الاستمرارية | قصة وأثر💙✨.

_إيلاف أحمد.
لمن الحرب جات، كنت في الصف الثاني ثانوي، وما حصل أصلًا قريت منهج تالتة في حياتي. وياهُو حرب ونزوح وأوضاع ما مستقرة، وماف أخبار أصلًا عن شهادة ٢٣.

فياهو كلمت ناس البيت إنو أجي مصر وأمتحن منهج مصري كسبًا للزمن، لانو خلاص سنة ٢٠٢٣ كانت على نهايتها، والأوضاع ماشّة أسوأ فعلًا

جينا مصر بداية ٢٠٢٤، وقلت أنزل أمتحن مع صحباتي مصري، بس الله ما اتسهلت لحكمة يعلمها الله، وخفت حبة من حكاية إنو المنهج المصري ما فيهو إعادة، وسمعت إنو بندفع الرسوم كاملة في جامعاتهم

بس صحبة أمي قالت ليها عن منهج جنوب السودان، وبعملوا تخفيض في الجامعات زيو زي الشهادة السودانية. وفعلًا أهلي اقتنعوا، وأنا اقتنعت، واتّوكلت، وكان أسوأ قرار عملتو 😂

المنهج أصعب من منهج جامعتي حاليًا، وكتييير! والزمن ضايقنا، والسنة كانت طويلة؛ بدينا يناير ٢٠٢٤ وانتهينا في ديسمبر! سنة كاملة.

وطبعًا في الأثناء ديك بدت تتضح الرؤية، وحددوا امتحانات ٢٣، لكن أنا أصلًا ٢٤، فا ما اهتميت. لكن المنهج الجنوبي أثر على نفسياتي، وقلت ما أواصل فيهو، بس بعد دفعت رسوم الامتحان اضطريت أمتحن، وخلصنا في أواخر ديسمبر ٢٠٢٤

جات ٢٠٢٥، و٢٣ امتحنوا، وبقينا نحن الممتحنين. صحباتي، حتى الامتحنوا مصري، خلصوا مصري من زمان، ونزلوا سوداني وكملوا المقرر.

الناس كلها كانت قارية، أنا بقيت محتارة في دنيتي! عارفة روحي اشتغلت كعب في الجنوبي، وما حـ أجيب النسبة البتليق بي ولا تدخلني شيء زي الناس.

ورأسي لفا من التفكير: أمتحن مع دفعتي؟ كيف، وما عندي كتب ولا مذكرات، وقالوا امتحاناتنا احتمال بعد ٣ شهور، وأنا ما حصل قريت تالتة ولا حافظة سورة النور؟!!!

قلت: يا بت، انزلي مع دفعة ٢٥، ما ح تقدري كيف تحلقيهم!

وفعلًا، لمن جا شهر اتنين، وأنا لسه في دوامة: أمتحن ولا لا؟

بس صحباتي جزاهم الله خير الجزاء، حفزوني أمتحن، وقالوا إني بقدر وبثقوا فيني. وأبوي برضو الله يحفظه، قال لي: امتحني وجيبي أي شيء، وامتحني مع ٢٥ عادي.

وأنا زاتي على الأساس دا قلت أقرا وأجيب أي شيء. حملت كتب في جوالي، وكنت بقرا بالجوال شهر برضو.

لمن وفروا لي الكتب، كنت بقول: وااايي، كيف أقرا دا بدون أستاذ؟!! 😭

حرفيًا أيام كنت ببكي وأقول ما بقدر، وألم الكتب وأقول خلاص، عايدة، أرجع تاني أواصل، أقول جيبي أي شيء.

بقّيم الليل، كنت كتييير، وأدعي تحصل معجزة؛ لانو حرفيًا ما معاي زول يشرح لي، وحتى حصص اليوتيوب ما كاملة، وخفت أجيب فلاش وما أقدر أكملو بسبب ضيق الوقت.

بس في رمضان، بتذكر قريت الكتب كلها، طبعًا بدون فهم، وتاني عدتها، واشتغلت قراية بدون توقف.

ما كان في شيء بوقفني! حملت امتحانات من قنوات التلي هنا، حليت لمن يدي وجعتني. بصحى من الساعة ٥، أصلي الفجر وأقرا.

اليوم حرفيًا أقسم بالله اليوم كلو أقرا، ماف زول بوقفني إلا الصلاة أو الأكل، غير كده قريت لمن عيني طلعت!

ووثقت في ربنا واتّوكلت عليهو، عرفت إنو ما ختاني في الموقف دا إلا وأنا قدرو، والحمد لله.

كانت امتحاناتنا بتتأجل، وختيت ديدلاين لنفسي إنو يوم نتايج ٢٣ أكون كملت حل وقراية، وقاعدة أراجع.

وفعلًا، يوم مؤتمرهم كنت براجع، وأشوف الاتذاعوا وأقول: إن شاء الله حالي 😂💙💙

ضغطت روحييي شديد شدييد! ٥ شهور وشويّة منازل، بدون أدخل سنتر والله، ولا جبت أستاذ خصوصي، كلو قريتو براي

جاتنا امتحاناتنا، ولله الحمد، ماف امتحان غلبني كده إلا الأحياء. انبسطت بشغلي، وكنت متوقعة روحي أتذاع من كترة الحفر والضغط 🤣

يوم نتايجنا المفاجئ جا، وقلت: يا بت، إنتِ رابعة الشهادة أكييد!

وطلعت نسبتي كانت ٩١.٤✨

زعلت والله، لكن تاني رضيت بيها، وحرفيًا هي فخري حاليًا. وكل ما أتذكر إني جبتها بجد عرق جبيني، بفرح وبحس روحي أولى الشهادة.

والحمد لله، اتقبلت طب حكومي، وهسي قربت الشهر الجاي أخلص سنة أولى. دعواتكم، وعقبالكم💙.

لو في نصيحة جد ح أقولها ليكم: الاستمرارية سر النجاح.

_ أنا ما كان وصلت للوصلت ليهو لو استسلمت أو وقفت شغل وحل. لو ما استمريت، ما كان جبتها، ولله الحمد💙.

•°•°•°•°•°•°•°•°•°•°•°•°•°•°
في قمم بنحاول نكون أمل ولينا أثر في التعليم في السودان، خليك إنت كمان أمل وانشر قمم ✨.

#الشهادة_السودانية #دعم_الطلاب #دعم_الإبداع #السودان #تعليم #قمم #قصة_وأثر

من امتع طرق الدراسة هي الدراسة الجماعية، بس كيف نضمن أنو تكون مفيدة بدون ما نجرها ونسة؟!🤔

لازم نحاول نلقى بيئة محفزة، تحت اشراف متميز، وكمان طلاب مجتهدين وجادين، ويكون سهل الوصول.

هل حاسس أنو الموضوع مستحيل؟

كل الحاجات دي موجودة في مجتمع قمم، بالإضافة إلى:

🔹تحديات جديدة تخلي رحلتك التعليمية أمتع.
🔹مراجعات مستمرة تخليك مواكب للمنهج دائماً.
🔹مجتمع مليان تحفيز وانجاز مستمر .

جاهز تحول وقت الدراسة لأمتع وقت في يومك؟ 🚀

°•°•°•°•°•°•°•°•°•°•°•°•°•°
في قمم بنحاول نكون أمل ولينا أثر في التعليم في السودان، خليك إنت كمان أمل وانشر قمم ✨.

#الشهادة_السودانية #دعم_الإبداع #دعم_الطلاب #السودان #تعليم #قمم

قرار بسيط، لكن تأثيرو عظيم شديد! 🚨

تخيّل تكون مقتنع بقرارك 100%، وما عندك أدنى شك إنك اخترت صاح، وبعد ما تمرّ الأيام، ويمكن السنين... يجي يوم تكتشف فيه إنو في حاجات كتيـرة ما كنت عارفها.

حاجات لو عرفتها من البداية، كان ممكن تغيّر طريقة تفكيرك، وبالتالي تخليك تشوف الموضوع من زاوية مختلفة تمامًا. وأكيد، ما كنت حتتخذ نفس القرار.

فالسؤال اللي محتاجين نتأمّله:
هل فعلًا بنكون عارفين كل اللي محتاجين ليهُ قبل ما نقرّر؟ ولا مرات بنختار بناءً على المعلومات المتوفرة عندنا بس؛ واللي ما بتكفي عشان تُؤسس بناءً عليها قرارات مصيرية🤔؟

هنا بالذات 🚨..
الموضوع أكبر من إنك تختار وخلاص؛
لأنو في فرق كبير بين إنك تاخد قرار وبس، وإنك تاخدو وإنت فاهم أبعادو ومُلم الحاجات الممكن تترتب عليهو!

🔥خلّيك قريب؛
في حاجة جاية ممكن توضّح رؤيتك، وتكون ليك نور في وسط العتمة والضباب دا💙!

والآن شاركنا:
لو عرفت إنو في معلومات مهمة فاتتك، حتراجع حساباتك وتعيد النظر في قراراتك، ولا حتقول: خلاص الحصل حصل؟

°•°•°•°•°•°•°•°•°•°•°•°•°•°
في قمم بنحاول نكون أمل ولينا أثر في التعليم في السودان، خليك إنت كمان أمل وانشر قمم ✨.

#الشهادة_السودانية #دعم_الإبداع #دعم_الطلاب #السودان #تعليم #قمم

بتدخل تالت بكل حماس، وفجأة بتصطدم بجدار ما✋

بعد أسبوع أو أكتر من بداية تالت، الحماس الكان عندك، وتوتر ما قبل البداية بكون قلَّ، وحتنتبه لتراكم المواد الحصل وتقعد متحيّر، وتبدأ الأسئلة.

_ هسي أعمل جدول كيف، وأسويه أصلََا كيف؟
بس لو لقيت زول من الأوائل يديني شوية نصائح!

نبشرك أنه في مجتمع قمم بتلقى دا وأكتر🔥.
حتلقى حل لمشكلة الجدول، إما لقيت الجدول مناسب ليك، أو عرفت كيف تعمل جدول يناسبك وينظم ليك طريقة القراية، بالتالي مشكلة المراكمة حتتحل👀.

ولأنه قمم بتهتم بطلاب الشهادة الثانوية، فحتلقى في مجتمع قمم أوائل من الدفعات السابقة.
حيقدموا نصائح، وحتقدر تسألهم من أي مشكلة بتواجهك💙.


ما تنسى تكلم صحبك الممتحن معاك عن مجتمع قمم، وما تحتكره لروحك براك👀.
يلا منتظر أكتر من كدا شنو.
ادخل المجتمع على الرابط في التعليقات.

°•°•°•°•°•°•°•°•°•°•°•°•°•°
في قمم بنحاول نكون أمل ولينا أثر في التعليم في السودان، خليك إنت كمان أمل وانشر قمم✨.

#الشهادة_السودانية #دعم_الإبداع #دعم_الطلاب #السودان #تعليم #قمم #مجتمع_قمم