شباب الخير💚
جزاكم الله خير الجزاء وبارك فيكم جميعا
اليوم بعد طول فترة إنقطاع لـ جلِيس بسبب ظروف وحاجات كتيره، الحمد والشكر لله ربنا يسر ووفقنا أنه جلِيس يرجع بفضله سبحانه وتعالى💚.
نسأل الله أن يوفقنا

ورونا في التعليقات كيف كان المجلس اليوم واستفدتوا شنو💚، ولو كتبتوا مقتطفات شاركونا
عسى ولعل بإذن الله يمر زول ويقرأ كلامك ويستفيد ويكتب لك أجر.!

وحماسكم كيف لي اللقاءات الجاية بإذن الله؟🔥💚💚

#جليس
#قوم_امشي_صلِّ💚

‏لما طلب الصحابة رضوان الله عليهم الجنة برهنوا على ذلك بالتضحية بكل مالديهم حتى بأنفسهم.

ونحن نعجز أن نضحي بساعة نوم لأداء صلاة الفجر.

صلاة الفجر أثابكم الله يا آل صلِّ 💚


#الصلاة_خير_من_النوم
#قوم_أمشي_صلِّ💚

أعلم أنكَ تائه الأن ! بين قلب يشتاق لله، ونفس أنهكتها الدنيا.

أعلم أنك تصلي وفي داخلك ألف سؤال، وتبتسم وفي صدرك وجع لا يقال؛ لكن تذكر :
لولم يكن بك خير، لما شعرت بهذا الضيق عند البعد؛ ولا بهذا الحنين عند الذكر...

فالإنتكاسة ليست نهاية هي مجرد دليل على أنك كنت في الطريق، ومازلت تُرى من السماء "💚

#قوم_أمشي_صلِّ 💚

أتندس الصلاة..

صليتو الظهر ولا لسه؟👀
أي رفيق صلّى يتفاعل مع الرسالة بـ "❤️"

" اللَّهُمَّ إنَّا نَعُوذُ بِكَ مِنْ دُنْيَا تَمْنَعُ خَيْرَ العَمَلِ، وَمِنْ حَيَاةٍ تَمْنَعُ خَيْرَ المَمَاتِ🤲🏻 "

#قوم_أمشي_صلِّ💚

شوف ي صحبي…
إنت ممكن تكون مشغول، مضغوط، زهجان…
لكن وسط دا كلو، م تنسى ان الحوائج تقضى بكثرة الصلاة على النبيﷺ:

اللَّهُــمَّ صل على محمد وعلى آل محمد كما صليت على ابراهيم وعلى ال ابراهيم انك حميد مجيد💚.

#قوم_أمشي_صلِّ💚

صلاة الفجر... بداية النور، وبركة اليوم💚

صدقني ماف شيء بساوي لذة انو تصحى على طاعة، تصحى والناس نائمة مساهرة في التلفون، وغافلة عن الصلاة.
تقوم تصلي ركعتين الفجر اللي هم ما مجرد ركعتين، ديل عهد بينك وبين الله.
وبعدها قريت وردك من القرآن وقريت أذكار الصباح،تشوف البركة والخير باقي يومك🥰💚

#الصلاة_خير_من_النوم
#قوم_أمشي_صلِّ💚

يوم القيامة لمَّا تعرض على العباد أعمالهم حيلقوا من ضمنها الأعمال القدموها أو أخروها على حساب أعمال تانية

”يُنَبَّأُ الْإِنسَانُ يَوْمَئِذٍ بِمَا قَدَّمَ وَأَخَّرَ“
فمثلا لم تقلب في الشورتس والريلز ويظهر ليك مقطع ديني أو تلاوة وتقلبها سريع عشان تشوف غيرها، أو لم تكون تشوف في فلم أو مسلسل ووقت الصلاة يدخل وتأخرها لحدي الفاصل الإعلاني يجي أو شوط الكورة ينتهي

دي كلها حتلقاها في سجل أعمالك
إنك في اليوم الفلاني أخرت الصلاة عشان تشوف المسلسل
أو المباراة او إنك قدمت تشوف الريلز الفلاني البتضحك على التاني الفيه تلاوة أو درس شرعي، وهكذا

فشوف نفسك عاوز يكون موجود في سجلك شنو!؟

#قوم_امشي_صلِّ💚

- يقولُ اللهُ عزَّ وجلَّ كلُّ عمَلِ ابنِ آدمَ له إلا الصيامَ فهو لِي وأنا أجزِي بِهِ إنَّمَا يتْرُكُ طعامَهَ وشَرَابَهُ مِن أجْلِي فصيامُهُ لَه وأنا أجزِي بِه كلُّ حسنةٍ بعشرِ أمثالِهَا إلى سبعمائِةِ ضعفٍ إلا الصيامَ فهو لِي وأنا أجزِي بِهِ

إتخيل إنه الصوم ربنا ما قال إنه عنده الأجر الفلاني ويضاعف بكدا ؛ لا ده أجره مفتوح على كرمه يعني أعظم من أي أضعاف ممكنه💚

والشتاء نهاره قصير وما فيه عطش يعني غنيمه يا حسرة من ضيعها
وصيام الأيام البيض يبدأ من يوم الخميس معقوله نضيع أجر زي ده ؟!

#قوم_امشي_صلّ💚

قرب شوية يا صاحبي عايز اقول ليك حاجة..💚

رأيك شنو نبدأ من الأول..
رأيك شنو نبدأ نصلي، ونلتزم ونقرأ ورد القرآن..
رأيك شنو نبدأ من اسي، وما نعمل ذنب ولا معاصي..

رأيك شنو نحن بس نبدأ حتى لو الواقع بقول لينا لا💚
مافي مشكلة الفات مات، بس نتذكر إنو ربنا بحب العبد الأواب ودا اللي برجع ليهو كتييير🥹.

#قوم_امشي_صلِّ💚

ماتبخل بمساعدتك ونصيحتك وإعانتك لغيرك،
ماتستصغرها في ميزان عملك، واتذكر قول النبي ﷺ:
”أحبُّ الناس إلى الله أنفعهم للناس“💚

لو فاهم درس كويس اشرحه لزملاءك ولو لقيت مقطع مفيد شاركه مع غيرك ولو حتمشي السوق تجيب حاجيات البيت شوف جيرانك كمان تجيب ليهم معاك

ماتبخل على نفسك ولا على غيرك؛ لأن دي من أقصر الطرق البتنال بيها محبة الله، ويكتب ليك عليها ثواب نفع الغير وإعانتهم كمان💚

#قوم_أمشي_صلِّ💚

وفي يوم الجمعة يا رفيق عايزين نذكرك بـ 💚:
- سنن الجمعة.
- الصلاة على النبي ﷺ
- قراءة سورة الكهف
- الدعاء ساعة الإستجابة، ودسونا في دعواتكم يا كِرام🤲🏻

#قوم_أمشي_صلِّ💚

هوِّن عليك💚

هوِّن عليك يا رفيق، الحياة دي كلها فانية، وكل المآسي الفيها بتمر، الدنيا ما دائمة لينا وكلنا راحلون لكن العيش عيش الآخرة🥰.

#قوم_أمشي_صلِّ💚

أدركُوا ساعة الإستجابة اليوم، فهى لساعةٌ لا يوافِقُها مسلمٌ يسألُ اللهَ فيها خيرًا؛ إلَّا أعطاه إيَّاه"

ألِحُّوا يا رِفاق واذكرونا وبلادنا بدعوةٍ،
ولكم بالمثل🥹💚

#قوم_أمشي_صلِّ💚

وقت الحساب في كتير من الناس حتتحسر على ذنوبها
وقصيرها في أداء العبادات، لكن كمان في الحيتحسروا على الأوقات البتضيع خلال يومهم دون استفادة أو نفع وزيادة حسنات

لم تكون ماشي لمكان أو راكب المواصلات أو حتى لو قاعد في البيت ومابتعمل في حاجة، استفيد من الوقت دا؛
افتح المصحف وشوف تفسير آيات أو سور محببة ليك
اذكر ربنا واشكره على النعم العندك واستغفر
وصلي على النبي ﷺ

ياصاحبي الوقت البمر ماحيرجع تاني واللحظة البتفوت مابتتلحق ولابتتعوض، فاغتنم وقتك وفراغك قبل ضياعه وانشغالك💚

#قوم_أمشي_صلِّ💚

ليه ما بتسلمها لله وإنت عارف ومتأكد إنه بيده كل شي وهو على كل شي قدير؟!

ليه ما بتسلمها لله وإنت عارف إنه ربنا رحيم بعباده ، رزاق ووهاب ؟!

ليه ما بتسلمها لله وتتوكل على الحي القيوم العظيم؟!

نحنا مطالبين بالسعي والنتيجه من الكريم💚

هون على قلبك💚

#قوم_أمشي_صلّ💚

قال حاتم الأصم رحمه الله :
وفواتُ صلاةِ الفجر شيءٌ عَظيم يستحقُّ العزاء والمُواساة..

الفجـر يـٰ آل صلِّ💚

#الصلاة_خير_من_النوم
#قوم_أمشي_صلِّ💚

قَالَ رَسُولُ الله ﷺ: عَجَباً لأمْرِ الْمُؤْمِنِ إِنَّ أَمْرَهُ كُلَّهُ لَهُ خَيْرٌ، وَلَيْسَ ذَلِكَ لأِحَدٍ إِلاَّ للْمُؤْمِن: إِنْ أَصَابَتْهُ سَرَّاءُ شَكَرَ فَكَانَ خَيْراً لَهُ، وَإِنْ أَصَابَتْهُ ضَرَّاءُ صَبَرَ فَكَانَ خيْراً لَهُ. رواه مسلم.

الحمد لله حمدا كثيرا طيبا مباركا فيه كما يحب ربنا ويرضى💚

الحمد لله على كل شيء الحمد لله على كل حال الحمد لله دائما وأبدا💚

#قوم_امشي_صلّ💚

يقول الإمام بن القيم رحمه الله: "إذا أردتَ أن تعلم ما عندك وعند غيرك من محبة الله… فانظر محبة القرآن في قلبك."☘️💚

في حلقة جلِيس الفاتت د.يزيد المُنير جزاه الله خير أتكلم عن المُعايشة مع القرآن .
و عرفنا أنه المعايشة ما إنك تفتح مصحفك وتقرأ وردك فقط وإنما هي حياة كاملة مع القرآن💚.

إنه القرآن لازم يكون حاضر في كل تفاصيل حياتك ، ويحول قلبك من مجرد آيات تتلى إلى نور يضيء فكرك و شعور يسكن في قلبك و سلوك يتجلى في واقعك .

المعايشة مع القرآن بتربي النفوس وتزكيها، و توجهها نحو الصلاح ، وتهذب الأخلاق .
و كمان ترقق القلب و هي مصدر راحة وطمأنينة حقيقية
"أَلا بِذِكْرِ اللَّهِ تَطْمَئِنُّ الْقُلُوبُ"💚

اكتبوا لينا في التعليقات كيف استفدتو من جلِيس وغير فيكم شنو؟ 😇💚

#جليس
#قوم_امشي_صلِّ💚

انت ما عارف انو ربنا بي بحكمته بقدر ليك ما توصل لي مكان انت عايزو وتقيف في نص الطريق، بس عشان انت مقدر ليك تمشي طريق تاني.
بتلقى نفسك بعد ما عملت حاجة وتعبت فيها ما بتكمل، لكن ربنا داسي ليك شيء تاني حلو وبرضيك وبسعد قلبك🥹💚.
انت بس خلي ظنك بالله كبير، ويقينك بالله كبير💚.

#قوم_أمشي_صلِّ💚