عزيزي المصلي...
هل تعلم أنو في أربع ركعات تُصلى قبل صلاة العصر؟!

طيب هل تعلم انها سنة مستحبة ..
ولو سألت نفسك ليه قبل العصر ما بعده؟ 🤔

فأولاً قبلية عشان تهيء قلبك وعقلك لصلاة الفريضة فتدخلها بخشوع وحضور 💚
ليه ما بعد ده موضوع تاني
( لو حابين نتكلم فيهو اكتبو لينا في التعليقات 🤗)

ومن فوائدها أكيد زيادة القرب من الله تعالى وعشان ندخل في دعاء النبي ﷺ ”رحِم اللهُ امرءًا صلَّى قبل العَصرِ أربعًا.“
فنكون مشمولين بالرحمة دي بإذن الله 💚

ورونا كمان لو عارفين...
كيف بنصليها، كلهم مع بعض ولا متفرقة؟👀
وخلونا كلنا نتشارك ونكسب الأجر 💚

#قوم_امشي_صلِّ💚

الله سبحانه وتعالى أرحم بك من نفسك،
ولا تخلو تعاليم دينه من الرحمة والرأفة بعباده،
كل عبادة وعمل فيها من الراحة والسكون مالم تجده في أي عمل أخر، وبعد دا هنالك أجور وحسنات للعباد يثقل بها الميزان ويُضاعف الله لمن يشاء💚

قال تعالى: {وَاللَّهُ يُرِيدُ أَن يَتُوبَ عَلَيْكُمْ...}
قال النبي ﷺ: {ما من عبدٍ يُذنبُ دنبًا فيتوضأ فيحسن الوضوء ثمَّ يقوم فيصلي ركعتين ثم يستغفر الله بذلك الذنب إلا غُفرَ له}

فاللهمَّ أجعلنا من المستغفرين بالنهار والأسحار وأغفر لنا وارحمنا أنت مولانا ونعم النصير💚

#قوم_امشي_صلِّ💚

عارف يعني شنو {وَقُرْآنَ الْفَجْرِ إِنَّ قُرْآنَ الْفَجْرِ كَانَ مَشْهُودًا}؟ 🤔

في اللحظة اللي بكون فيها الكون كله ساكن،
والناس غرقانة في أحلامها، بتجيك "أجمل دعوة" في الدنيا: (الصلاة خيرٌ من النوم).💚
تخيل بس، إنو رب العالمين، ملك الملوك، ناداك "إنت" بالاسم عشان تقيف بين يديه..
في وقت الخلوة والمحبة.. والناس نايمة، إنت صاحي بتبوح له بوجعك، وتطلب منو جبراً وعوضاً.💚
ليه الفجر بالذات؟

• رزقك بيبدأ من هنا:
الفجر هو "محطة التزويد" لباقي يومك.. الزول البدغش الصلاة، يومو بيمشي "مستّف" بركة وراحة بال

• تكون في ذمة الله:
إنت لما تصلي الفجر، بتكون في "ذمة الله".. يعني حمايتو، ورعايتو، ولطفو ماشي معاك في أي خطوة، وفي أي شارع

• نور في وجهك:
والله السجدة في ضلمة الفجر، بتنور الوش والقلب نور ما بتوصف

همسة من القلب.. 💚
يا حبيب، لو فاتتك صلاة الفجر،
إنت كدا ما فاتك "وقت" بس.. إنت فاتك "إحساس" إنك قريب من الله والكون كلو بيشهد ليك.. فاتك نصيبك من الطمأنينة البتخليك تواجه تعب الدنيا بقلب ثابت ومطمئن.💚

فما تخلي المخدة تسرق منك الجنة..
قوم، اتوضى ، وصلي ركعتين "خيرٌ من الدنيا وما فيها".
أرح.. أصحى، المنادي للصلاة بنادي..
فخلي قلبك يسبق رجلك 🤲💚

#الصلاة_خير_من_النوم
#قوم_امشي_صلِّ💚

أبطال الشهادة،
الحمد لله أولاً وأخيراً الحمد لله أن وفقكم لجلوس الإمتحانات وأعانكم فيه على الدراسة وإجابة السؤال

وآخر جلسة إمتحان بعد ساعات
فسددوا وقاربوا ما استطعتم وتذكروا..

أن الخيل إذا شارفت نهاية المضمار بذلت قصارى جهدها .. لتفوز بالسباق💚

فابذلوا ما بوسعكم واستعينوا بالله وعليه توكلوا،
وفقكم الله أيدكم الله أعانكم الله💚

#قوم_امشي_صلِّ💚

طيب كلامي هنا للمؤنسات الغاليات 💚

يا أختي…
أنتِ مسلمة، وعندك قيمة كبيرة جدًا في الإسلام، ما محتاجة تثبتيها بلبس ضيّق أو ملفت للأنظار.
اللبس الساتر ما بيقلل منك، بالعكس… بيزيدك جمااال وهييبة💚

وبرضو موضوع الصور والنشر في التيك توك والفيس…
هل فعلًا دا كلو عشان كلمة "جميلة" أو "سمحة"؟

طيب لو قالوها…
هل دا الشي بضيف ليك قيمة حقيقية؟
ولا مجرد كلام بيختفي بعد لحظات؟
جمالك دا نعمة عظيييمة،
والمفترض يكون محفوظ للشخص الصح…
البيجيك بالباب عديييل، يطلبك من أهلك، ويكرمك بالحلال💚✨
دا الزوج البستاهل يشوفك في أجمل صورة،
وأنتِ كمان بتكوني له الحلال الطيب، وهو ليكِ بالمثل

أما الباقي…
لا بقربى ولا بغيرها، ما عندهم حق يشوفوا منك الشي الخاص.

عشان كدا…
خليكِ واعية بقيمتك،
والتزمي باللبس الساتر والحجاب الشرعي… لنفسك قبل أي زول💚

#لأنك_غالية٢
#قوم_امشي_صلِّ💚

ما تيسَّر من سورة الأحزاب —
الشيخ عبدالله موسى💚

{إِنَّ اللَّهَ وَمَلائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا}

فاللهم صلِّ وسلم على نبينا محمد ﷺ.

#قوم_امشي_صلِّ💚

ليه في ناس بتبـدأ من الصفـر وبتصـل، وناس بتبـدأ من الصفـر وبتفضل فيـه؟ 🫣

السر كٌله في حاجة إسمها «إدارة الطاقة النفسية»؛ لأنه السخط بسحب طاقتك في: (ليه حصل كدة؟) والرضا بوفر طاقتك لـ: (كيف حنجهز للجاي؟).

الليلة يا رفيق حنتكلم عن الرِضا كـ «بنزين» للسعي، ما كـ «فرامل» للطموح، زي ما قلنا الرِضا ببدأ لما تتصالح مع الحاجة الفاتت عشان تقدر تفتح عينك للجاي، لأنه السخط بعمل ضباب في عيونا، فما بنشوف أي باب مفتوح قدامنا، لازم ترضىٰ عشان تشوف الصورة بوضوح أكتر❗.
يقول إبن القيم: «لو كشف الله الغطاء لعبده، لعلم أن الله يدبر له أمره أفضل مما يدبره لنفسه».

القاعدة الذهبية يا رفيقنا: "مَن رضـيَ فلهُ الرِّضـا، ومَن سخط فلهُ السَّخـط".
لو رضيت، ربنا بيمـلأ قلبـك طمأنيـنة بتنسيك مرارة الألم ، وبسهل لـيك الجاي ولو سخطت؟ الواقع ما حيتغير، بس حتخسر راحتك وأجرك وزمنك 💚.

الحَل؟ افصل مشاعرك عن الواقـع؛ الحصل دا "قدر" وانتهى استلم الرسالة، شوف الغلط وين وبكل هدوء ابدأ صلح، وخليك متأكـد إنه "المنع" هو عيـن العطـاء، فأقع وقـوم، انفض غبـارك وأنت مبتـسم.

فما ضـرَّنا ضيقُ الـمدى إن كانَ فـينـا لُطفُـهُ
أو مسَّنـا وجـعٌ ففي الرضـا كـلُّ الشفـاء 💚.

#كيف_نرضى_دون_أن_نفقد_الأمل٣
#قوم_امشي_صلِّ

مِنْ سُنَنِ يَوْمِ الْجُمُعَةِ الْمُهْجُورَةِ التَبْكِيرُ إلَى الْمَسْجِدِ وَالذَهَابُ إلَيْهِ مَشْيًا💚

- قَالَ رَسُولُ اللَهِ صَلَى اللَهُ عَلَيْهِ وَسَلَمَ: مَنْ غَسَلَ يَوْمَ الْجُمُعَةِ وَاغْتَسَلَ ثُمَ بَكَرَ وَابْتَكَرَ وَمَشَى وَلَمْ يَرْكَبْ وَدَنَا مِنَ الْإِمَامِ فَاسْتَمَعَ وَلَمْ يَلْغُ كَانَ لَهُ بِكُلِ خُطْوَةٍ عَمَلُ سَنَةٍ أَجْرُ صِيَامِهَا وَقِيَامِهَا
الرَاوِي: أُوسُ بْنُ أَبِي أُوسٍ وَقِيلَ أُوسُ بْنُ أُوسٍ وَالِدُ عَمْرٍو

- "السَابِقُونَ إلَى الْجُمُعَةِ هُمُ  السَابِقُونَ يَوْمَ الْمِزِيدِ"

قَالَ ابْنُ مَسْعُودٍ رَضِيَ اللَهُ عَنْهُ: سَارِعُوا إلَى الْجُمُعَةِ فَإِنَ اللَهَ يُبَرِزُ لِأَهْلِ الْجَنَةِ فِي كُلِ جُمُعَةٍ فِي كُثَيْبٍ مِنْ كَافُورٍ أَبْيَضَ، يَكُونُ مِنْهُ فِي الْقُرْبِ عَلَى قَدَرِ إِسْرَاعِهِمْ إلَى الْجُمُعَةِ، فَيُحَدِثُ لَهُمْ مِنْ الْكَرَامَةِ شَيْئًا لَمْ يَكُونُوا رَأَوْهُ قَبْلَ ذَلِكَ...

#قوم_امشي_صلّ💚

آخر مرة مشيت زرت فيها أهلك ورَحمك متين؟!🤔
طيب آخر رسالة أو تواصل بمكالمة بينكم..

يا صاحبي صِلة الرحم ما بس زيارة وتفقد حال لكنها وعد بالثواب في الدنيا قبل الآخرة كمان، قال رسول الله ﷺ:
”مَن أَحَبَّ أن يُبْسَطَ له في رزقِه ، وأن يُنْسَأَ له في أَثَرِهِ ، فَلْيَصِلْ رَحِمَه“ 💚

فصِلة الرحم زيادة وبركة في الرزق،
وزيادة في الأجل والعمر؛ فحتى بعد الوفاة تُذكر بين الناس بالخير والذكر الحسن، فصِلوا أرحامكم وما تقطعوها يا رفاق 💚

#قوم_امشي_صلِّ💚

يوم الجمعة يوم عظيم يا صاحبي وفيه ساعة لا يدعو فيها العبد ربه بدعوةٍ إلَّا واستُجيبت له، ذي ما قال النبي ﷺ:
"إنَّ في الجُمُعَةِ لَساعَةً، لا يُوافِقُها مُسْلِمٌ، يَسْأَلُ اللَّهَ فيها خَيْرًا، إلَّا أعْطاهُ إيَّاهُ." 💚

فالزم مصلايتك وأرفع أكُفك بالدعاء بعد العصر،
فوالذي نفسي بيده مارُدت يداك إلَّا والإستجابة قرينة لهما 🥹💚.

#قوم_امشي_صلِّ💚

بتحكي..
الصلاة في الجامعه كانت بالنسبه لي صعبه شديد ،
ما حدخِّل صلاة في صلاة لكن بقعد طول الوقت بدعي إنو اليوم يخلص سريع عشان ألحق أصلي في البيت بس الحمدلله كان عندي صديقه ما بتخليني أأخر الصلاة للسبب ده

ولو ضيعت وقت الصلاة لحدي ما المحاضره تبدا بتحسسني بالذنب وإنها لقت أغلب الدفعه في المسجد، فإستسلمت للأمر وبقيت بمشي معاها وأنا مستثقلة الموضوع جداً
بس سبحان الله لقيت إنه الموضوع بسيط جدا بل ومريح جدا جدا والحمد لله💚

ما في إحساس بالذنب ولا خوف من ضياع وقت الصلاة وبكون مصحصحة في المحاضره ومركزة ومرتاحة وكل حاجه مباركه💚

#قوم_امشي_صلّ 💚

الشباب في السودان للأسف بقى متأثر بالثقافات الغربية،
وبياخد منها الصالح والطالح بدون تمييز💔
يمكن بالنسبة ليهم كغير مسلمين إنو دا شيء عادي، لكن نحنا كمسلمين مؤمنين بالله واليوم الآخر،
فلازم يكون عندنا ميزان مختلف، وما نتشبه بيهم في كل شيء.

عشان كدا يا أختي الغالية لبسك بعكس احترامك لنفسك، وبيفرض احترام الناس ليك.

صح الدنيا فيها متاع كتييير…
لكن زااائل، وما عند الله باقٍ💚
وممكن في أي لحظة يجي الأجل، عشان كدا ما نخلي الدنيا تغرّنا، ونسأل الله الهداية والثبات في الدنيا والآخرة💚

وتذكّروا قصة سيدنا موسى عليه السلام،
لما لقى المرأتين عند البئر…
ما أطال الكلام ولا استرسل،
وكان في تعامله حياء وحدود.
وربنا ذكر صفة عظييمة جدا في واحدة منهن:
{تَمْشِي عَلَى اسْتِحْيَاءٍ} 💚✨

ولو ما كانت الصفة دي مهمة…
ما كان ذكرها الله سبحانه و تعالى في كتاب يُتلى
إلى يوم القيامة!

#لأنك_غالية٣
#قوم_امشي_صلِّ💚

من مقطع (حين التقت أعظم شخصيتين في التاريخ)

م. فداء الدين جزاه الله خيرًا💚

يقول النبي ﷺ: ”لَقيتُ إبراهيمَ ليلةَ أُسْريَ بي فقالَ:
يا محمد، أقرئ أمتك مني السلام، وأخبرهم أنَّ الجنة طيبة التربة، عذبة الماء، وأنها قِيعان، وأنَّ غراسها:
سبحان الله، والحمد لله، ولا إله إلا الله، والله أكبر.“

#قوم_امشي_صلِّ💚

لمن تشوف الزمن الصاح و تعمل الحاجه الصاح؛
فإنت كدا من الفائزين مش؟!👀

كلنا عارفين إنو الأشهر الحُرم ربنا اختصاها على باقي الشهور
وميزها؛ بتعظيم الحسنات والذنوب كمان ،
فلما نقول إن ربنا كره من عبده الحاجه الفلانيه فمن باب أولى تبدأ تخلي الحاجه دي في الأيام المُعظَّمة دي ول شنو؟

عن النبيِّ صلَّى الله عليه وسلَّم أنه قال:
{إن الله كَرِهَ لكم ثلاثًا: قِيلَ وقال، وإِضاعَة المال، وكَثرة السُّؤال}

#قوم_امشي_صلِّ💚

حاسس بالكُره والغيظ الشديد من الشيطان؟
كل مرة تاخد عهد على نفسك… ويرجع يخليك تنقضه؟

طيب، الآن عندك فرصة حقيقية تتسدّى حقك كامل مُكمل، والمرة دي بإذن اللّٰه ما حتفوتها صح؟ 🫣

يوم عرفة
اليوم اللي ربنا بيغفر فيه لعباده ويعتق رقابهم من النار بكثرة، اليوم اللي ممكن يمسح كل التقصير وكأنو ما حصل.

وعشان توصل لليوم ده وأنت جاهز…
عندك ٨ أيام قبله تشحذ همتك فيهم،
العشرة الأوائل من ذي الحجة 💚
أعظم أيام السنة…
أقسم الله بها في كتابه الكريم
والعمل فيها أعظم، والأجر فيها مُضاعف.
فالموضوع ما بس "نلحق يوم عرفة وخلاص"

الموضوع: كيف تدخل اليوم ده؟
جاهز؟
ولا زي كل مرة، تسويف وكسل وبعدين تقول "يا ريت؟! "
القرار من هسي في يدك:
يا تضيع الأيام دي…
يا تخليها ١٠ أيام تغيّر فيك كل شيء بإذن اللّٰه، وتغيظ بيها عدوك اللدود. 😏🔥

#قوم_امشي_صلِّ💚

الرِضـا.. هــو مَرفـأ القلــوب💚.

بعدما عرفنـا إنه الرِضــا ما إستسلام، بل إنه ذكاء في توفير طاقتك للجاي، حتكتشف في النهاية إنه الرِضـا هو «الدرع» إللي بخليك واقف على رجليك مهما كانت الرِيَّاح قوِية.

والحياة دي يا رفيقي ما بِتمشي دائمًا زي ما نحنا راسمين في خٌططتنا، و المنع فِيها أحيانًا بكون هو « عطاؤك الحقيقي» بس أنت لسة ما شَايف الصورة كاملة، و الزول الراضي هو إللي عرف اللعبة صح؛ عرف إنه عليه «سعي» و النتيجة دي من رب العالمين، فبطل تشوف هم النتائج واستمتع بالرِحلة💚

الرِضـا بخليك تعيش بقناعة تامة إنَّ « ما أصابك لم يكن ليخٌطِّئك، و ما أخطأك لَم يكن لِيٌصيبك» ، التعايٌش مع الأقدار بخليك لما تَصل، تصل و أنتَ نفسك طيبة، ولما تتأخر، تتأخر و أنتَ قلبك مٌطمئن وما حاسد أي زول على سبقٌه ليك، وحتكون واثق إنه كل إللي إتأخر وراه حِكمة إلهيه.

السلسلة دي كتبتها عشان أٌذكر نفسي و إياكم إنه الرِضـا والسعي هم «جِناحين» الطائر؛ لو واحد بس اتكسر ما حتقدر تطير، فأرضىٰ بالقِسمةَ عشان «تهدأ» واسعى في الأرض عشان «تَصل».

وكما قال الشافعي:
وَمَن نَزَلَت بِساحَتِهِ المَنايا .. فَلا أَرضٌ تَقيهِ وَلا سَماءُ
‏وَأَرضُ اللَهِ واسِعَةٌ وَلَكِن .. إِذا نَزَلَ القَضا ضاقَ الفَضاءُ

فيا رفيق؛ طالما التدبير من عند «الرحيم» وسع فضاء قلبك بالرِضـا، وخلي خطوتك الجاية دايماً «بالله» ولله💚.

تمت السِلسلة بحمد الله.

#كيف_نرضى_دون_أن_نفقد_الأمل٤
#قوم_امشي_صلِّ💚

_يا محمد، كلما أحاول ألتزم بي حاجة بلقى نفسي انشغلت أو كسلت، أحلها كيف؟
=حتى أنا بعاني من نفس المشكلة، كنت عايز أواظب على الأذكار لكن برضو ...

يا عزيزي، الزي محمد وصحبه كتار
-ويمكن تكون انت👀- فرايك شنو في سلسلة تتحدى بيها نفسك ونشجع بعض على المواظبة والالتزام؟!💚

#قليل_دائم💚
#قوم_أمشي_صلِّ💚

شتّان ما بين…
إنك تنتظري أهلك ينوموا عشان تتكلمي معاه،
وبين إنك تتكلمي معاه قدام أهلك، وقدام الناس كلها، بما يرضي الله💚

تعالوا نتفق إنو الحلال سمح بكل تفاصيله…
وإحساس إنو يختارك من بين كل البنات، ويجيك بالباب عديييل، ويطلبك من أهلك، ويعقد عليك…
مافي أحلى منو💚✨

عشان كدا يا الغالية…
جاهدي، وادعي، واصبري،
واتذكّري قول الله تعالى:
{والذين جاهدوا فينا لنهدينهم سبلنا وإن الله لمع المحسنين}💚

ولو في لحظة وسوس ليك الشيطان…
اذكري الله، وقرّبي ليه بالدعاء:
ربنا هب لنا من أزواجنا وذرياتنا قرة أعين، واجعلنا للمتقين إمامًا
ربِّ إني لما أنزلتَ إليَّ من خيرٍ فقير
ربنا آتنا في الدنيا حسنة، وفي الآخرة حسنة، وقِنا عذاب النار

والسلام عليكم ورحمة الله تعالى وبركاته💚

#لأنك_غالية٤
#قوم_امشي_صلِّ💚

كلنا بنبدأ طريق الاستقامة بحماس كبير…
لكن مع الأيام بنكتشف إن الثبات ما دائمًا سهل،
وإن البداية الحلوة أحيانًا بتكون بداية اختبار حقيقي.
هل فكرت يوم إن الطريق بعد التوبة ممكن يكون أصعب
من قبلها؟🤔

الجواب ببساطة:
لأن الاستقامة نفسها ابتلاء…
ابتلاء في الصبر،
وابتلاء في ترك العادات القديمة، وابتلاء في الثبات رغم الفتور.
قال تعالى:
﴿وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا﴾
فالإستقامة ما لحظة قرار بل طريق طويل،
فيه مجاهدة للنفس، وثبات بيتجدد كل يوم، واختبارات بتكشف صدقنا في السير إلى الله💚

حنعرف أكتر عن الموضوع ده مع جليسنا د. يزيد المُنير
جزاه الله عنَّا خيراً، في مجلس بعنوان:
(أول خطوة: رحلة الإستقامة والإلتزام)💚

📆 يوم الإثنين | ١٠ ذو القعدة ١٤٤٧هـ الموافق ٢٧ أبريل ٢٠٢٦م
⏰ الساعة | ٨:٣٠ مساءًا بتوقيت الخرطوم —
٩:٣٠ مساءًا بتوقيت القاهرة ومكة المكرمة أحبِّ البقاع💚

اضبطوا منبّهاتكم… وانتظرونا يا رفاق!

#جليس
#قوم_امشي_صلِّ💚

من بودكاست محفوف | (هل كل بلاء رسالة من الله؟)
الشيخ د. محمد حسان

قال رسول الله ﷺ:

”من كانتِ الآخرةُ هَمَّهُ جعلَ اللَّهُ غناهُ في قلبِهِ وجمعَ الله عليّه شملَهُ وأتتهُ الدُّنيا وَهيَ راغمةٌ ، ومن كانتِ الدُّنيا همَّهُ جعلَ اللَّهُ فقرَهُ بينَ عينيهِ وفرَّقَ عليهِ شملَهُ ، ولم يأتِهِ منَ الدُّنيا إلَّا ما قُدِّرَ لَهُ“

#قوم_امشي_صلِّ💚