يلا زين صارت باردة عالفاينل

غطي راسك وابچي

أكو چم طالب يسألوني عالبوت طريقة دراستي.. شلون چانت

نظامي الدراسي چان بسيط، وخالٍ من الأخطاء تقريبا إلا *خطأ واحد*

مبدئيا، ما چان مثالي..
ما مبرمج على مكان ووقت معيّن

المكان؟ گرايندرز هههههه

لا..عادي چنت أفرلشي دوشگ بالگاع واقرأ، أگعد يم الصوبة، بالمطبخ على ميز الأكل، عالثيل، بالكية، بالشارع وأنا أمشي..

الوكت؟ الچانوا ينافسوني.. عصرية يوم الامتحان يراجعون المادة وأنا بادي بيها توني.. أي وقت يعجبني أبدي بي، ثقافة الاستيقاظ مبكرا طاگها بالحزام..

هذا خطأي الاستثنيته؟ لا

خطأي الوحيد..الأفتخر بي والماريدكم تسوونه
أنه لا تتعمقوا.. احترموا المنهج
وادرسوا على گد الموجود..

العمق بالمعلومات كلّفني ٣ درجات بالسادس عالمعدل، وبسببه دخلت أهلية، وبالكلية استمريت بي، صحيح من الأوائل تسلسلي.. بس ضيعت هوايه درجات.. وبإرداتي خلّيت اثنين ثلاثة يعبروني..


فلا تتعمّق بوكت بي أنت محصور بالدرجات، أي شيء تتعمّق بي نهايته راح تعورك...

شروحات الصيدلاني عبد الحكيم عماد للكورس الاول

مادة العقاقير اضغط هنا

مادة الفارما اضغط هنا

مادة العلاجيات اضغط هنا

أول مرحلتين.. الطّالب يكون بيها مستجد، ما عنده خبرة، كل شيء جديد عليه، عشوائي غير مرتّب، هذا الطبيعي، المو طبيعي أنه يستغل -من البعض- بطريقة مستفزّة ويدركها من يصير مرحلة رابعة..خامسة (المفروض)..يضحك عليها.. مع ندم بسيط..يگله شچنت تسوي بروحك أنت، وإن ما أدركها.. فعنده مشكلتين.

الأولى: ضعف اطّلاعه، يبقى يراوح بمكانه حدّ التخرّج وبعده، ينتظر فلان ينزّله معلومة، ما يبحث بنفسه للوصول لأي معلومة يريدها، التطوّر النفسي بين مرحلة وأخرى يبقى بعيد عنه.

الثاني: ضعف بتحليله النقدي لما يقدّم إليه من معلومات.

أذكر قبل ٤ سنوات صادفني ملف pdf بإحدى القنوات الچانت معروفة، فتحته..قريته وأنهيته
بإيش التمضرط ذا؟ وغادرت القناة.

كاتبه تخرّج، الفاجئني..
أنه الملف تحوّل لكتاب وصار بي عنوان مختلف، الجانب التوجيهي والتنموي..ويقدّم بكورس مدفوع!

أخوية المستجد، اهدأ
حتى اليقدملك المعلومة يهدأ وياك؛ لا تخلي يتعملق..عليك وتصير بيدقه اللطيف..

اصبر..راح تتعلم، بس اتعبلك شويه

لحظة ، شدتني معلومة

شلون يعني أگعد بالصيدلية وأبقى مهيوب؟

شايف آخر ساعة بالتواجد؟ حتى حزامك تنزعه

اتركوهم يجربون، يبقون على طبيعتهم..

كافي مثاليات..

الكلنكل غرضه واحد فقط، وهو الوصول إلى "diagnosis" دقيق، ويحتاج إلى ثلاثة أذرع:

-نأخذ "history" من المريض.
-نسوّي "examination" ( جنرل أو لوكل).
-نطلب "investigation".

شنو أهم شيء بيهن؟
الـ"history"، الطبيب الخبرة دائما تشوفه سريع بالتشخيص بسبب سرعته بأخذ ال"history" وربط المعلومات ببعضها، غالبا وبنسبة ٧٠٪ تگدر تشخّص صحيح منه.

شلون نأخذ history؟

أولا: نبدأ بلـ"personal history"، ويشمل:

1-Name.
الاسم يعزز ثقة المريض بيك.
2-Age.
العمر مهم جدًّا بلـ"differential diagnosis"، لكل عمر أمراضه، وكذلك ينفع بصرف العلاج.

3-Sex.
ينفع بلـ"dfferential diagnosis"، لكل جنس أمراضه، فهناك أمراض نسبتها أكثر عند الرجل وأقل عند المرأة، والعكس صحيح.
فمثلا السايكل عند المرأة فقط، وتفيدنا عند التشخيص وصرف العلاجات، نسأل شوكت بدأت أول سايكل، شوكت انتهت، منتظمة أو لا، مدة البليدنگ وكميته، نوع الألم، المضاعفات، وغيرها..

4-ocubasional (مهنته أو عمله)
ربما تكون المهنة سببا بالمرض، والأمثلة كثيرة.
أغلبها المشاكل التنفسية، التحسسية، والمفاصل، وغيرها.

5-maretal state
متزوّج أو لا، خصوصا إذا كيس "fertility"..وعنده ضعف جنسي مثلا، تسأل عن خلفته إذا مخلّف، وفارق العمر بينهم شگد؛ لأن احتمال المشكلة تكون هرمونية أو عصبية أو جسدية.

6-Resident
تسأل عن عنوانه، سكنه..
ممكن تگول شنو راح يفيدني؟
أگلك، مثلا چان بمنطقة ريفية سكّانها يسبحون بالشط، واجاك عنده إسهال دموي، معناها بشنو تشك عنده غالبا؟ بلهارزيا
أو چانت منطقة فقيرة، ناسها ما مثقفين وما يهتمون للنظافة، واجاك ابنهم يهرش بجسمه؟ غالبا تشك عنده "Scabies" ( جرب).. قبل لا تسأله ماكل شيء أو ماخذ أدوية..

7-habit
نسأل عن العادات إلي تأثر على صحته، أشهرها: التدخين، الكحول، المخدرات.
كل عادة ولها أمراضها.

كل مفردة تأخذك لموضوع منفصل تتثقّف بي، لهذا؛ على قدر المعرفة يأتي التشخيص (يعني كلما تدرس وتطّلع أكثر..راح تشخّص بشكل أسرع وتصرف علاج بشكل أصح)..

ثانيا: شكوى المريض (complaining of):

مبدئيا، حوارك يكون بلغة وعقليّة المريض.

تسأل المريض، إيه سولفلي شعندك؟ ليش جايني؟ شنو المتعبك؟ شنو المضوجك؟ شتحس؟
المريض راح يبدي يسولف الـ"symptoms"، تركّز بكل كلمة تطلع منه حتى تكون حازم بقرارك بفلترة كلامه، مع تسلّحك بمفدراته الدارجة الممكن ما سامعها أنت قبل؛ كثير من المرضى ما يعرف يعبّر عن داخله واليحسه، دائما سوالفه "nonspecific" ما راح توصل لنتيجة بيها.

مثلا تجيك امرأة چبيرة، تگعد عالكرسي وتبدي تسولف ( يمة كل جسمي يوجعني، شعري ديوگع، معدتي تحرگني وقولوني امّوتني، مغص انتفاخ لعبان نفس وغازات، امساك وحرگة بالإدرار..سكر.. ضغط ..).. وزين إذا بقت بس على هذا، تبدي تحچيلك عن همومها ومشاكلها وأولادها وشگد العيشة صعبة..وفرش الزوالي متعب..الخ

ما راح تستفاد منها شيء، فقاطعها بأسئلتك المحدّدة..حتى توصل للتريده أنت وهو "complain" مع "duration"
المختصر: شكوى المريض تشير إلى المشكلة لأي سستم تنتمي؟ فقط.

ثالثا: "history of present illness"
هنا نسأل عن تاريخ مرضي، غالبا يكون عشوائي، نبدي نربط الأعراض ونسقّط احتمالات، التشتكي منها أكثر..نطلب بيها investigation ( تحاليل..سونار منظار ايكو رنين..وغيرهن).. والما تشتكي منهن ومرتبطة بحالتها -حتى لو غير سستم- نسأل عنهن، يعني نسوّي عملية analysis للـ"complain" ، وللـ "symptoms"
والـ "another disease"

كل هذا المفروض ما يعبر الچم دقيقة للطبيب بتحليله، والصيدلي يحتاج فترة أقل، كون التشخيص إذا مو بسيط.. يتخطّى صلاحياته يحوله لطبيب.

وهنا تجي عبقرية التشخيص، بسرعة البديهة وربط المعلومات بتسلسل..كأنك program ثابت، وهي أصعب شيء يتعامل وياه أي دماغ بشري معرّض للسهو والنسيان والخطأ،

السوالف متفيد، الممارسة وحدها تعلمك.

اليجيك للصيدلية ما يعرف اسم علاجه، عرفه بي بعد ميتعبك وتعرفه من وصفه.. أفضل من تصويره ونشره وكأنك تحل شفرة مورس، ما بيها ذكاء ترى ولو ١٪

مجرّد المواطن ما واصل للثقافة الصحية المطلوبة؛ فثقّفه.

لأنه مثل ما گدر يحفظ أسماء وكالات المطاعم، الأحذية، الساعات، الملابس
يگدر يحفظ اسم علاجه إذا نطقته گدامه ونبّهته على ضرورته.

التهاب اللوزتين (tonsillitis) واختيار المضاد الحيوي (antibiotic)..

ليش الـ(Ceftriaxone) يصرف لعلاج التهاب اللوزتين؟ وهل الخيار مناسب؟

في أغلب حالات التهاب اللوزتين، الـ(Ceftriaxone)..مو first line ولا المفضّل.

ليش؟ لأن المسبب -غالبا- لالتهاب اللوزتين البكتيري هو
Streptococcus pyogenes (Group A Streptococcus)..

البكتريا هذي تستجيب لمضادات أضيق وأبسط.

استخدام "broad spectrum antibiotic" مثل الـ(Ceftriaxone) ما بي فائدة إضافية، يزوّد خطر المقاومة البكتيرية، والآثار الجانبيّة.

المختصر: قوة المضاد ≠ صحة الاختيار
المعيار الحقيقي هو الاستهداف الصحيح للبكتريا.


شنو الخيارات الأفضل؟
الخيار الأول:
•Penicillin V.
•Amoxicillin.
بدائل مناسبة:
•Amoxicillin-clavulanate.
•Benzathine penicillin G.

-في حالة الحساسية من البنسلين:
•Clarithromycin.
•Azithromycin.
•Clindamycin.

تُستخدم في حالات خاصة:
•Cefuroxime.
•Cefdinir.
٠Vancomycin أو Levofloxacin.

إضافةً، ما كل التهاب لوزتين يحتاج مضاد حيوي، الـ(viral infection) هي الأكثر شيوعا.

•IDSA – Guidelines for Acute Pharyngitis.
•CDC – Group A Streptococcal Pharyngitis.
•BMJ Best Practice – Tonsillitis.
•Johns Hopkins Antibiotic Guide.
•Medscape.

الـ(who) توصف الصيدلي "بـذي النجوم التسع" ، وهي:
1-Care giver.
2-Decision maker.
3-Communicator.
4-Manager.
5-Teacher.
6-Leader.
7-Researcher.
8-Entrepreneur.
9-life-long learner.

الأخيرة عجبتني؛ منطقيّة.

الصيدلي فعلا ضروري يكون متعلّم مدى الحياة...

هنا..
يبقى يركض وعشاه خُبّاز...

الحامل أو المرضع ممكن تستخدم قطرة عين؟ كريم مضاد للاتهاب؟
ممكن مع أمان نسبي.


أولًا: الأدوية العينية (قطرات/مراهم) المسموح استخدامها خلال الـ(pregnancy)..

المضادات الحيوية العينية:
•Tobramycin
•Erythromycin
•Fusidic acid
•Acyclovir (للالتهابات الفيروسية)

-مضادات الحساسية والالتهاب:
•Cromolyn
•Dexamethasone
•Prednisolone →الخيار الأكثر أماناً
ليش أكثر أمانا؟
لأن نسبة وصوله للجنين أقل (12%) مقارنة بالديكساميثازون (90%).
لكن الديكساميثازون ممكن يُستخدم.
━━━━━━━━━━━━━━━
المضادات الحيوية الجلدية:
•Fusidic acid.
•Chloramphenicol (ما مفضّل).
━━━━━━━━━━━━━━━

ثانيًا: الأدوية المسموحة (أثناء الرضاعة)..

المضادات الحيوية العينية:
•Tetracycline.
•Tobramycin.
•Gentamicin.
•Ciprofloxacin.
•Levofloxacin.
•Moxifloxacin.
•Gatifloxacin.
•Erythromycin.
•Fusidic acid.
•Acyclovir.

مضادات الحساسية والالتهاب العينية:
نفسهن الأستخدمناهن خلال الـ(pregnancy).
━━━━━━━━━━━━━━━

أدوية الجلد الآمنة (شرط ما تلامس الطفل):
•Fusidic acid
•Mupirocin
•Chloramphenicol (ما يستخدم).
━━━━━━━━━━━━━━

References:
•BNF – British National Formulary.
•TGA Pregnancy & Lactation Guidelines.
•AMH – Australian Medicines Handbook.
•LactMed – Drugs and Lactation Database.
•Micromedex.
•FASS – Swedish Drug Compendium.
•FDA ophthalmic drug safety data.
•Medscape Ophthalmic.

"Iron Deficiency Anemia"

من الأخطاء الشائعة في علاج نقص الحديد إيقاف العلاج عند رجوع الـHb للحد الطبيعي.

الرقم يتحسّن » العلاج يتوقّف » يرجع المريض -بعد فترة- بنفس الأعراض.

ليش؟

الـHb يرتفع بسرعة؛ لأن الجسم يوجّه الحديد الداخل مباشرة لتكوين كريات الدم الحمراء، لكن الـFerritin (مخزون الحديد) يبقى منخفضا.

*Normalize Hb ≠ End of treatment

الخطة العلاجيّة:

-Phase 1: Correction phase
رفع الـHb للحد الطبيعي، غالبًا خلال (4–8) أسابيع.

-Phase 2: Repletion phase (الأهم)
الاستمرار على الحديد -بعد رجوع الـHb للطبيعي- لمدة (8–12) أسبوع.

*بعض الحالات تحتاج (3–6) شهور.

الهدف من الاستمرار : الـFerritin يوصل ≥ 50 ng/mL.

فنحصّل: استقرار الحالة، تقليل الانتكاس (Relapse)، تحمّل أفضل لأي stress (دورة، عدوى، نزيف بسيط)..


الجرعات (بشكل عملي):

أثناء التصحيح:
•Elemental iron (100–200) mg/day.

بعد رجوع الـHb طبيعي:
• نقلل الجرعة إلى (60–100) mg/day.
ــــــــــــــــــــــــــــــــــــــــــــــــــــــــــــــــــــــ
المتابعة:

قياس الـFerritin بعد نهاية فترة الاستمرار

-المخزون تصحّح » نوقّف العلاج.

-بعده منخفض » نمدّد الفترة العلاجيّة.

الخلاصة:
العلاج الصحيح = Hb طبيعي + مخزون حديد طبيعي.

*غالبا المريض ما يلتزم؛ بسبب الآثار الجانبية (الطعم، التيقؤ، أثره على المعدة)، حاول تنصحه بالاستمرار.

References:
•WHO.
•British Society for Haematology.
•UpToDate.
•NICE Guidelines.
•AAFP.
•Harrison’s Principles of Internal Medicine.

(2025/1/6 - 2026/1/6)

قبل سنة بالضّبط، بديت أشتغل تواجد.
چنت مرحلة خامسة داخل على كورس ثاني، الكورس اليتعّب أي طالب ويحاصره نفسيّا، شخصية مثلي ما ينفعلها التواجد بهذي الفترة، بس چان لا بد من أخذ خطوة للأمام باحتكاكي مع الواقع، وتوجيه ما أعرفه للعالم، مهما چنت مضغوط.

بدايتي مو شيء چانت، لأني أعرف.
صاحب الصيدليّة چان يلعب بكيفه، وما چنت أسكت، بقينا بجدال.
أگدر أگول -لو چنت سوفت- حاربني نفسيا، چنت تذكيره المستمر باحساسه بالنقص.

چان يشوفني بالكاميرات أدرس بجديّة، ويتقصّد ما يجي حتى يأذيني، ومن يجي يستهزئ.. "شدتسوي أنت هههه هي مال دراسة متفيدك هالسوالف" ، حتى بالوقت حاربني..چنت أرجع من الدوام -بعد ركوب ٤ كيّات- تعبان، وبوجهي للصيدلية..لنهاية اليوم

المهم، ما أثّر عليّ.. چنت آخذ كلامه واليسوي..وأحوله لدوافع، وحقّقت تقريبا الأريده.
بقيت متفوّق بدراستي، علّمت علمي لغيري، أديت واجبي المهني بلا مجاملة وأخطاء قليلة.

ولا تظنوا أعوفلكم سالفته بدراما، لا.
قبل لا ينتهي الكورس، أذيته بطريقة محترمة وعفته بعدها.

بالصيدلية الحالية، الوضع مختلف.
اني المسؤول الأوّل، الاونر من يشوفني أدرس يكيّف؛ ومحترم جهودي، وآرائي، فمو كل شيء مو زين.

سنة عشت بيها كل شعور، چنت بين الألم والأمل، الخيبة الخذلان السعي والخلاص.

الأهم من كل هذا
ما تخطّيت حدودي.
ما لعبت بكيفي.
ما بخست معلومة بحق مريض أو متعلّم.
ما تعاجزت عن مساعدة أي متألّم.
تعاطفت، ساعدت، تحمّلت، وهاي اني بعد، أجدّد سنة جديدة بنفس الدوافع، وإن چنت متألّم..لازم أكمّل، العالم يحتاجلنا.

شوف حبيبي، باختصار راح أحچيلك وافهمني مثل ما تريد..


ما كل ما يُدرك يباح، المهنة كلما زادت أسرارها، علا كعبها وتفرّدت بسيادتها.

لهذا؛ من تقرر تصير صانع محتوى
لا تبقى تراوح عالجرف، وتصيد الأسماك الصغيرة بأفكارك؛ لأن هناك دائما -حوت بمصطلحكم- من يتابع بجديّة.

ولا تحاول تصير لطيف بزيادة؛ لأن أثره سلبي عليك، يعني، خليهم يگولون هذا مزعج بس محتواه راقي، مو فارغ بس كيوت.

اختصاصك ما يحدّه شيء، تگدر تسولف بكل شيء.. بس شويه عوفلنا أدوية الانفلاونزا والمعدة.. وتعمّق باختصاصك؛ حتى تمثّل الصيادلة بصورة لائقة.

راح أحچيلك بقلم نبّالته أعرض شويه
وهم باختصار..هالمرة

قناتك بيها الآلاف، صيادلة أغلبهم
ما يتعبّر عن رأيك السياسي بيها؛ كل واحد تفكيره غير عن كل واحد

فيا حبيبي.. لا تشعلها ، وتميّل الزعاطيط يحچون على طائفة معينة، وأنت مكيّف لأن صار تفاعل..

الچم مرة تعبر، بس مو كل مرة
خليك حذر، حتى لا تجيك ردود ما تعجبك..

اجاني واحد يريد كريم شانتيه
گتله عدنا بس ڤيت غير شركة

شبي ما اقتنع

الرجال ممكن متعارك وي زوجته وميندل دربه
والنوب انت استلمته :)

بالابتدائية چانت أمي ما تخليني أدرس عالجدول اليومي
أي شيء تأخذه..تدرسه بنفس اليوم، وتحضّر لباچر..

معادلة رغم قسوتها إلا أنها واضحة..

تدرس كلشي = أنطيك الأتاري تلعب بي دبابات ، وتأخذ فرة بالبايسكل..

ولا عاد جماعتنا هسة
احددلكم الوزاريات قبل الفاينل شنو؟
لعب وتشتيت ما له داعي..

يا تحدد المواد الوزارية..

يا تخلي كل المواد وزارية..

أسلوب التخويف المزيف والتضليل هذا فاشل