БИЛДИРГИ

Ассалому алайкум, азизлар.
"Иман инвест" ҳақида сўрашмоқда, сўров кўпайганидан ҳамда ташкилотга пул киритган ҳалоллик илинжида бўлган кишиларимизнинг хотирларини ўйлаб ушбу умумий жавобни эълон қилишни лозим топдим. Қолаверса, баъзан кўрган ва билган ҳолатни баён этиш возифа ҳам бўлади.
Ташкилотнинг қонуний фаолияти эмас, шаръий жиҳатига тўхталмоқчиман.
Бу ташкилот бошидан ҳалол савдони ният қилганидан хабарим бор. Беш-олти йил олдин бу борада каминадан ёрдам ҳам сўрашган эди, ўзим шуғиллана олмаган бўлсамда, ҳамиша қўллашга ҳаракат қилиб келганман.
Кейинчалик Маҳмуд Усмон домла билан ишлашди, Аллоҳ ажрларини зиёда этсин, у киши анча меҳнат билан ташкилот фаолиятида тузатишлар қилди ва буни ҳам ҳамиша қўллаб қувватладик, бундан хурсанд эдик. Афсуски, охирги пайтда тушунмовчилик сабаб ўртада низо чиққан шекили, шартнома бекор қилинибди. Келишмовчилик молиявий эмас, ташкилий ишларда деб биламан. Биз уларнинг орасини ислоҳ қилишга уриндик, аммо тақдирда бошқа битик бордир балки, ҳарқалай, биз истамаган ҳолат бўлди. Албатта яхшилик Аллоҳнинг ирода қилганидадир.
Мусулмон киши зиммасида биродарлари ҳаққи бор. Баъзан адолатли шаҳодат вожиб бўлади. Шунга кўра яна бир нуқтани айтишим лозим. Билишимча, ташкилот фаолияти ҳақида айтилган хатоларнинг кўпи тўғриланган ва яна тўғрилаш йўлида кетилмоқда. Буни биз турли жиҳатлардан суриштирдик. Энг муҳими, ташкилот хатоларни тузатишдан бош тортмаган, ҳатто Ислом молияси талаби учун катта миқдордаги зарарларга ҳам рози бўлган. Буни ҳам эътироф этиш лозим. Улар ҳозир ҳам шаръий ислоҳотларга тайёр эканларини таъкидлаб турибди. Агар шу йўлда собит турсалар, иншооллоҳ, ҳаммаси яхши бўлиб, ишлар жойига тушиб кетади.
Биз Ислом молиясига ҳаракат қилган маҳаллий ташкилотларни қўллашимиз лозим. Албатта қаллоблик , фирибгарликни эмас. Иш бор жойда хато бўлади, муҳими уни тузатишга интилишдир. Яхшилик истаган кишиларнинг хатоларини тўғрилашга ҳаракат қилишимиз, бу борада қўлдан келганча ёрдам беришимиз керак, аммо бор нарсани бузишга шошиш тўғри эмас. Баъзан хатоларни тузатишга муҳлат бериш, керагича чоралар кўриш даркор. Катта ишларда тузатишлар маълум тартибни тақозо этади.
Биз бу ташкилотнинг ривожланиши тарафдоримиз. Айни ҳолатда сармоядорлар учун ҳам шуниси фойдали, деб ўйлайман. Умид қиламиз, ҳали бу лойиҳа халқаро миқёсда улкан ишларни амалга оширади.
Агар ташкилот фаолиятда ноҳақ йўл танласа ва биз бундан хабардор бўлсак, у ҳолда бу ҳақда кишиларни огоҳлантириш вазифамиз бўлади. Можоролар ичида туриб ҳозирча ислоҳ йўлида эканларини кўрмоқдамиз.
Бировни айблаш нияти йўқ, ҳар кимнинг ўз қараши, ўз вазияти бор, билганимизни айтиш ҳам омонат, мақсадимиз Аллоҳнинг розилиги, халқимиз ва динимиз манфаати, бошқа ҳеч бир илинж йўқ. Ҳар икки тарафга ҳам умумманфаат учун ислоҳ йўлини танлашни тавсия этиб қоламан. Бу эълон эса имкон доирасидаги чорадир.
Юртимизда Ислом молияси ривожи барча учун манфаатли бўлиши аниқ. Бу борада ислоҳга ҳаракат қилиш бурчимиздир. Аллоҳ ислоҳ қилгувчиларни яхши кўргай. Барчамизни Ўзи суйган бандалардан бўлишимизни насиб этсин.

Ҳасанхон Яҳё Абдулмажид