Turkiyaga kelganimdan beri yashagan “garip ve komik olay”larim 🤠

• Turkcham deyarli yo‘q edi, uy pastidagi baqqolga non olishga chiqdim. Do‘konda ko‘p jo‘jalar bor ekan...

- Ooo, Dayı, minik tavuk mu bakıyorsunuz? - deganman. Bu “Civciv” deb rosa kulgandi, haligacha borsam “Minik tavuk”ni eslab turishadi :)

• Uyda milliy ovqat pishirardik. Trotuardan bozorga ketyapman, soch-soqollarim bir ahvol...

Yo‘l chetida turgan uzun “Ford” mashinasining haydovchisi eshikni ochib, bir qo‘lida sigaret, bir qo‘li bilan imlab yoniga chaqirardi.

Atrofga qarasam, mendan boshqa hech kim yo‘q. Yoniga borsam, sigara cheka-cheka “Polis!”, “Polis!” deydi. “Burası mahalle içi abi, yok polis, polis olmaz buralarda!”, deganman :)

Afg‘onmisan, suriyalikmi yo, deb to‘xtovsiz savol berib ketdi. O‘zing kimsan desam, yonidan guvohnoma chiqarib, “Ben polisim, kardeşim” desa bo‘ladimi. “Sivil Polis” ekan qurmag‘ur, forma kiyishmaydi, oddiy odamlar orasida yurishadi shunaqa...

Kimligim bor, hujjatlarim joyida, yanayam shubhali ko‘rindim shekilli, “Üstünde bir şey var mı?” deb so‘rab qoldi.

Balki holimga rahmi kelib, achinganidan yordam bergisi keldi, ust-boshing butmi, kiyiming bormi, oldimiz qish... deyaptiyov dedim-da, “Var tabii!” deganimni bilaman, ikki tomonimdan formali polis kelib, qo‘llarimni qayirdi.

Sumkam, cho‘ntaklarim, har tarafimni tekshirdi. “Yo‘qku!” deyishardi o‘qrayib. “Nima izlayapsiz o‘zi?” desam, sen nimani tushunding dedi, “kiyim!” deganman. Keyin hujjatlari joyidami deb so‘radi mashinadagi hamkasbidan, tasdiqlangach, “bor, ketgin-da, ko‘zimga ko‘rinma” deb qo‘yvorishgandi 😂

Bunaqa savol yoningda qurol, pichoq, giyohvand modda... bormi degan ma’noda berilarkan keyin bilsam :)

• Turkiyaga ilk kelganimda Istanbulgacha bilet olib, Anqaraga avtobusda kelganman, puldan ekonom qilish uchun.

Chanqab ketgandim, avtobus muovini suv, keks va pechenye tarqatib qoldiku. O‘lgudek ochman yetmaganiga.

Bu bepulmi deb so‘rolmaganman. Qanday so‘rashni bilmaganman aniqroq aytsam. 7 soat hech narsa olmay kelganman, yo‘lda hamma narsa qimmat bo‘ladi, deganman-da. Aslida bilet puli ichida hammasi “ikram” bo‘lishini keyin bilganman😂

• Mahdi tug‘ilguncha hech taksiga minmaganmiz. Humoyun jo‘ram umuman yaqin yo‘lamang taksiga, o‘ta qimmat degan gapi miyamizga o‘tirib qolgandi.

Hatto Mahdi tug‘ilgach, ertasi kuni chaqaloqni quchoqlab, uygacha piyoda kelganmiz, 10-15 daqiqalik yo‘l edi shifoxona, taksi chaqirmaganman.

Bir kun hujjat masalasi bilan o‘ta zarur bo‘ldi taksi, chaqirsam, arzimagan pul olgan. Rosa kulganmiz ayolim bilan unchalik qimmat emas ekanku bu, nega oldinroq sinab ko‘rmaganmiz deb...😅

P.s. Biror davlatga borsangiz, tilni muloqot darajasida o‘rganib oling. Shunda menga o‘xshab har xil noqulay vaziyatlarga kamroq tushasiz :)

@Ijoddardi