Dam olishimning so‘nggi kuni, yana bir go‘zal xotira!

YTBning Anqaradagi Hamamönü ofisida “Türkiye Bursları” grandi asosida ta’lim oladigan oilali, yosh bolasi bor talabalar yig‘ilishdi.

E’tiborlisi, YTB başkanı' Abdulhadi Turusning shaxsan o‘zi kelib, Navro‘z va Ramazon hayiti bilan chin dildan qutladi. Bahonada biz ham u kishi bilan yaqindan suhbatlashdik.

Adashmasam, oilali o‘zbeklardan faqat biz edik. Qozoq bovurlarimiz ko‘pchilik, hatto birisi kelib, “O‘zbeklar ham o‘qiydimi, kamiga bola bilan, grand asosida?! Halol bo‘lsin, qoyil sizlarga” dedi. Faxrlandik!

Mahdi va Safina uchun alohida, yoshlariga mos sovg‘alar tayyorlashibdi, quvondik, qo‘shiq va o‘lanlarga ulanib ketgan bayram tadbiridan bir olam taassurotlar bilan uyga qaytdik...

@Ijoddardi

Hayit namozidan so‘ng “Kahvaltı”ga chaqirilgandik...

Ertalab qirg‘izistonlik o‘zbek Vohid akamiz tayyor turishimizni tayinladi, mashinasida keldi. Avtobus/metro yoki taksida boraveramiz desam, vaqtida meni ham ko‘pchilik mehmonga chaqirishgan, uyimdan o‘zlari olib ketganlarini boshqacha eslab qolganman deb hijolatimizni aritdi...

U kishining “Ak Büro” tarjimonlik ofisi bor, Zumrad yangamiz bilan yuritishadi, Mahdi va Safinaning pasport olishida juda katta yordam qilishgan, qilishyapti. Turkiyaga yo‘lingiz tushib, shu ishlarga duch kelsangiz, bu oila bilan, albatta, uchrashasiz...

Uylariga bordik, yangamiz dasturxonni to‘ldirib kutib turgan ekanlar, baraka topsin. Bunaqa hurmat-izzatni umuman kutmagandik, Sitora ikkimiz hayron, Mahdi esa... qornini to‘ydirib, yangam bergan o‘yinchoqlarni o‘ynab o‘tirdi :)

Maza qilib gaplashdik, tashqarida yomg‘ir, ichkarida biz “to‘kilardik”. Ilk marta 1998-yil kelishgan ekan, biz bu yo‘lning boshida turganimizni, hali hammasi ortda qolib, yaxshi kunlar kelishligini alohida ta’kidladilar.

Xonadon o‘ta shinam va fayzli edi. Kitob javoni e’tiborimni tortdi, diniy va dunyoviy adabiyotlar shunchalik ko‘p ediki, hayrati bir o‘zimga og‘irlik qilib, darrov Sitorani chaqirdim. 

Ayolim ham bir narsa ko‘rsataman deb farzandlarining xonasiga yetakladi. E’tibor berilgan, qiziqishlari bostirilmagan, hamisha qo‘llab-quvvatlangan yigitlar ulg‘ayishgani shundoq ko‘rinib turardi.

Yotoq yonida gitara, kompyuter, pianino turardi. Shkafda esa aka-ukalar bolaligidan yig‘ib-tergan qadrli o‘yinchoq mashinalar kolleksiyasi, devorda qaysidir ajnabiy musiqa guruhining suratlari ilingan...

Mahdi ham umuman zerikmadi. Yangamiz bir dunyo robotchayu mashinalarni to‘kib tashladilar yoniga. To‘yib-to‘yib, ko‘zlari yonib-yonib o‘ynadi...

Katta o‘g‘li Italiyada o‘qirkan, SAT imtihonidan 1500 ball olgan! Kichigi 15 yoshlarda, bizga shirinliklar pishiribdi oyisi bilan, u ham ingliz tilini zo‘r biladi, musiqaga qiziqarkan.

Bolalar Turkiyada tug‘ilib ulg‘ayishgan, o‘zbekchani tushunishadi, turkcha gaplashishadi. Lekin yuz-ko‘zidan tarbiyali, samimiy yigitlarligi shundoq sezilib turardi...

Chet elda farzand tarbiyasi, mustahkam oilaviy munosabatlar haqida ko‘p gaplashdik, tajribalari bilan bo‘lishishdi, jon qulog‘imiz bilan tingladik, xulosalar oldik o‘zimiz uchun.

Bugun begona odamni hammayam uyiga kiritib, mehmon qilavermaydi. Ayniqsa, musofirda. Bizni bunga munosib ko‘rishgani, to‘rdan joy berishgani turklar ta’biri bilan aytganda, “Çok duygulandırdı”. Oilaviy do‘stlarimiz soni bittaga ortishiga hissa qo‘shishgani uchun Alloh rozi bo‘lsin ulardan, ko‘p-ko‘p minnatdormiz!

P.s. Rasm tushmabmiz, nasib, biz uyga chaqirganimizda ko‘rasizlar bu insonlarni. Uylaridan yagona xotira shu surat bo‘libdi...

@Ijoddardi

Ayasiga jip, singlisiga vertolyot, dadaga esa kamaz, buldozer :)

Otalar hatto o‘yinda ham ishlaydi, o‘ngida, uyqusida ham. Necha marta tushimda ishdan haydaldim, yangi ish qidirib yurdim, boshliqlar bilan urushdim ehhe... Bu kamdek, o‘yinda ham tinchlik yo‘q ekan😂

Biz ishlab turarkanmiz, ro‘zg‘orimiz but, oilamiz baxtli, dasturxonimiz to‘kin. Nima ishligi umuman muhim emas, bu ishda baxtlimisan yo‘qmi, bu ham oxirgi darajali masala bo‘lib qolgan...

Asosiysi, nonushtadan so‘ng kechgacha ishlaydigan yering borligi, farzandlaring sog‘inib, uxlamasdan seni kutishi, uyga qaytgach birga o‘ynashing, sevinishing, sevilishing...

Hamd...

@Ijoddardi

Anqaradagi Anne Müzesi’dan reportaj

Onalar muzeyi yozuvchi Shermin Yasharniki ekan. So’z muzeyi ham unga tegishli. Adibaning kitoblari Oʻzbekistonda tarjima qilinib boshlangan, Turkiyada anchagina mashhur.

Bunaqa zoʻr gʻoya oddiy insondan chiqmasligini taxmin qilgandim. Nima boʻlganda ham, Anqaraga yoʻlingiz tushsa, bir kirib koʻrishga ming marta arziydigan makon, tavsiya qilamiz!

👉 Matn va rasmli reportaj bu yerdan boshlanadi

P.s. Kelasi safar Soʻz muzeyini ham koʻrsatamiz…

@Ijoddardi

Meva shaklidagi shirinlik chiqibdimi O‘zbekistonda?!

Turkiyada yo‘q ekaney, topolmadik. Rejam bo‘yicha bugun to‘yib uxlayman, dam olaman degandim, kechgacha marketma market kezib, shirinlik izladik...

Lekin sizlar uchun zo‘r kontentlar tayyorladik, montajini bitirib e’lon qilaman. Ko‘rasizlar, Xudo xohlasa...

“Esingdamiiii...” deb boshlanadigan suhbatlarga mavzu bo‘ladigan go‘zal kunlarni yashayapmiz. Oxiridan suyuntirsin, hamd!

@Ijoddardi

Maylida, men ishga ketdim. Uyda bir kun qolganimga sal qoldi foodbloger boʻlib ketardim😂

Lekin ovqat oʻylaganimdan ham zoʻr chiqdi. Uydagilar anchagacha uning mazasini esidan chiqarmaydi, qoʻlim dard koʻrmasin!

P.s. Sitor, bilsang bilarsan :)

@Ijoddardi

Bir shirinlik izidan

Uylanishning faqat yaxshi tomonlarini ko‘rsatyapsiz, deb yozg‘irgandi ayrim bo‘ydoq qadrdonlar. Mana bu videoni ko‘ring :)

Shirinlikni O‘zbekistonga qaytgach yeymiz endi. Nailoj, bu yerdan topolmadik. Lekin uni qidirishdagi jarayon qiziq, buning gashti boshqacha...

@Ijoddardi

Yaxshi ota bo‘lishga maksimal harakat qilyapman...

Toki Mahdi va Safina hozir ham, ulg‘aygach ham orqasida dadasi borligini hamisha his qilib tursin.

Ko‘p turklar bilan aynan oila mavzusida uzoq gaplashdim, eng nozik nuqtasi bu ularning. Xulosalarim, fikrlarim yetarlicha bu mavzuda. Ulardek baxtsiz o‘smirlar yetishtirishdan doim O‘zi asrasin!

Mayli, qariganimda meni boqmasin, ayasi ikkimizni hajga jo‘natmasin, sovg‘a-salomlar qilmasin. Ammo ota-onasidan rozi, hayotda o‘z yo‘lini topgan, bolaligi go‘zal xotiralarga boy baxtli insonlar bo‘lishsin ilohim.

Har qanday vaziyat va sharoitda o‘g‘il-qizlarim bilan g‘ururlanaman, faxrlanaman va buni baralla aytaman. Xudodan oxiridan suyuntirishini qayta-qayta so‘rayman, porloq kelajagiga ishonaman...

Sitor, agar qaysidir tongda men mangu uyquga ketib, faqat sen uyg‘onsang, birinchi vazifang, farzandlarimga otasini unuttirma. Kiyimim doim eshik orqasiga ilinib tursin. Bolalar nimadir istashsa, dadangning cho‘ntagidan ol deysan, tamam mı?

@Ijoddardi