- ما وراك من النعيم إلا نعيم الجنة -

اذا ملكت انسان ذكي عاطفيًا مُرهف احساس، يعرف احتياجك الصامت، يعرف شاللي في خاطرك من نبرة صوتك، يعرف من مشيتك إذا زعلان ولا راضي، يعرف يفرق بين ضحكتك من قلب وضحكتك المُجاملة، اللي يقرا صمتك، اللي دايم منتبه لك ما يحتاج إنك تصوّت له، اللي يعرف يرد على لهفتك بلهفة أكبر منها،

تراك ملكت الدنيا.

سهل جدًا إنك تلقى اللي يحبك، بس صعب جدًا إنك تلقى اللي يفهمك

"كلنا نعرف نحب..بس مو كلنا نعرف شلون نحب"

‏لا شهد إلى شهدك .. ولا عبير الى عبيرك
‏العسل كلٍ يذوقه … والعطر كلٍ يشمه

‏الاكيد الي يحبك مستحيل يحب غيرك
‏لو يشوف الي يشوف من العذارى مايهمه

‏ 🔥

‏سلام الله على اللي حبها ما فارق الاعماق
‏وقلبي من غلاها فيه شقر وفيه ماريه

‏تعمدني غلاها لين حبيت و عرفت أشتاق
‏و أنا ما كنت أليين من العلاقات الغراميه

‏صحيح انه صدفني غيرها لكن على الاطلاق
‏بعدها كن مابه ذات حسن وذات اهميه

‏علي الدعيه

- صباح الخير -

وفي صورة أُخرى للحبيب الفداوي/
‏"والله لو انك جمرة حمراء يخالطها شعاع
‏ إني قبل أعرف مدى تأثيرها.. ضميتها"

تفرقنا الظروف ونجتمع عقب البطا شفقين
‏على ادنى فرصةٍ تسنح نحاول ما نطوّفها
‏ㅤ
‏ترّف قلوبنا و اول ملاقانا عناق ايدين
‏تحت شلال ليلٍ ما يضمه غير معطفها
‏ㅤ
‏شوي شوي لين اضيع بين ايدينها الثنتين
‏و احس بنشوةٍ والله ما اعرف كيف اوصفها

مساء الخير
"شوفتك أحلى من ثواني عتق في ساعة قصاص"

ينتابني شعور سعد علوش مُتمنيًا أن يسرق خلّه
عندما قال

"ليت مالك في حياتك خويّ ولا طليب
‏كان ابا أخشك وسط خافقي واقول ضاع"

«في قربك النفس ما تاخذ تدابيرها»
شطر يعلمك إن من أبرز مقوّمات المحبّة معاشرة شخص مأمون الجانب

‏"بس أنت فيك إحساس حسيته مريب
‏كنك حبيبي.. من حياةٍ ماضيه"

‏"ياكم غلطة تقفّاها الندم لكن أنت؟
‏ الغلطة اللي لو يرد الزمن..عدتها"

يعم الهدوء ويستثير السكون الصوت
‏وأنا بين صوت العقل واحساسي الجايش

‏ماضيعني وذوقني الموت قبل أموت
‏الا عقلي المتحرّص وقلبي الطايش

‏أشوف الحياة جنازةٍ في بطن تابوت
‏لكني رغم كل الصعوبات ، متعايش

‏ترا ما أصعب من الموت واللي خلّاف الموت
‏إلا الفترة اللي ، لا أنت ميت ولا عايش

صباااااااح الخير ❤️

‏أشوفك حقيقة عمر لو الليال تزلّ
‏مثل منسبي وأسمي وموتي وميلادي

‏عسى كل عام يمرّك احلا من اللي زلّ
‏فدى ضحكتك حسّاد عمرك وحسادي

‏ترى من عرفتك يا حبيبي وشفتك خلّ
‏وأنا ما احسب لأيام هجري وميلادي

"عيد وحب هاي الليلة الناس معيدين"

*على ذمة كاظم الساهر

‏الزعل من الوسائل الملتوية لإثبات المحبة، ولو لم يكن للطرف الآخر مكانًا عليًّا في النفس لمَا استاء منه

ومن باب إن الزعل مرادف للمحبّة
"لا تخاف أعاتبك وأزعل عليك
خاف إذا ما عادها..تفرق معي"


‏وعلى حد قول صالح بن حمد:
‏"بخير إن عادها تزعل على تقصيري الأحباب
‏وإذا ما عادها بتزعل على تقصيري؟ مصيبة"