#Adabiyot

Togʻay Murodning tugʻma isteʼdodi

Qadimiy bir baytda shunday deyiladi:
Hidi yoʻq gulga chaman hayf,
Mehri yoʻq dilga badan hayf.
 
Har bir gulning oʻziga xos hidi va har bir dilning takrorlanmas mehri, ayniqsa, adabiyot uchun qadrlidir. Chunki adabiyot – saralangan badiiylik chamanidir. Inson diliga yoʻl topgan asarlargina bu chamandan oʻrin ola biladi. Kitobxonlar qalbiga “jiz” etib tegmagan, unga zavq bermagan soʻxtasi sovuq asarlarga bu chaman chindan hayfdir. Shu sababli adabiyotga kitobxon qalbi orqali yoʻl topib kelmagan asar unda yashab keta olmaydi. Isteʼdodli qalbning mehri bilan yoʻgʻrilgan gʻoyaviy mazmun va yangicha bir goʻzallik xush boʻyini taratadigan badiiy shakllargina adabiyot chamaniga mos tushadi, uning boyligiga boylik, husniga husn qoʻshadi.

Togʻay Murod qissalari adabiyotimizga Surxon vodiysining oʻziga xos nafasini olib kirdi, mehnatsevar, kamtar va tanti chorvadorlar, bogʻbonlarga nisbatan dilimizda samimiy mehr uygʻotdi. “Ot kishnagan oqshom” qissasi “Alpomish” dostoni anʼanalarini eslatadigan xalqchil ruh bilan sugʻorilgan. Togʻay Murodning oʻzi ham Alpomish va Barchinlarni bergan goʻzal vodiylar, bepoyon yaylovlarda oʻsganligi uning soʻz boyliklaridan, yozuvchilik uslubi va oʻziga xos ovozidan sezilib turadi. Nasriy asarga sheʼriy jarang va koʻtarinki ruh bagʻishlay olish qobiliyati yosh adibning qalamiga xos eng yaxshi fazilatlardandir.

Qissa qahramoni Ziyodulla oddiy bir choʻpon. Uning oʻz oti Tarlonga boʻlgan mehri – insonning tabiatga qoʻygan mehriday sof. Tarlon tabiat timsoli boʻlgani uchun ham yozuvchi uni yorqin bir obraz darajasiga koʻtarib tasvirlaydi.

Birinchi qissaning qahramoni Ziyodulla oʻzi yashayotgan joydagi qallob va riyokor odamlarga qarshi dadil kurashadi. U hatto oʻzidagi jismoniy nuqsonga qarshi isyon koʻtaradi, “kal” degan malomatni maʼnaviy ustunlik – mohir chavandozlik shuhrati bilan yengib oʻtadi.

📚 @kitoblar_pdf

​​#iqtibos

O'g'ri o'g'riligini, g'ar g'arligini qo'ysa qo'yadiki, ammo oq poshsho zolimligini, kambag'al mehnatkashlar boshida danak chaqishini qo'ymaydi. Bu savdo siz-u bizning boshimizdagina emas, O'risiya kambag'allari boshida ham bor.

"Farg'ona tong otguncha"
✍️ Mirzakalon Ismoiliy

📚 @kitoblar_pdf

#Savodxonlik

Murosai madora yoki murosayi madora

Oʻzbekiston Respublikasi Vazirlar Mahkamasining 24.08.1995-y. 339-son “Oʻzbek tilining asosiy imlo qoidalarini tasdiqlash haqida”gi Qarorida shunday deyilgan:
...izofa undosh bilan tugagan soʻzlarga i shaklida, unli bilan tugagan soʻzlarga yi shaklida qoʻshiladi: dardi bedavo, nuqtayi nazar, tarjimayi hol kabi.

Yaʼni, izofali birikmalarda izofa (moslashmagan aniqlovchi) unli bilan tugasa, lotin yozuvida yi qoʻshiladi:

Murosa — Murosayi (madora)
Sahoba — Sahobayi (kirom)
Fotima — Fotimayi (zahro)
Madina — Madinayi (munavvara)

Kirill alifbosi qoidalarida bunday chalkashlik yoʻq: муросаи мадора, саҳобаи киром, таржимаи ҳол va h. k.

Shunday qilib:
Муросайи мадора ❌
Муросаи мадора ✅

Murosai madora ❌
Murosayi madora ✅

©xatoliklar

📚 @kitoblar_pdf

#Savodxonlik

​Sovqotmoq va ma’nodoshlari

Sovqotmoq (sovuq qotmoq) so‘zining sinonimlari:
Sovuq yemoq
Sovuq o‘tmoq
Junji(k)moq
Dildiramoq
Diydiramoq
Izillamoq (shevada)
Jiyda qoqmoq (ibora)

Sovqotish bilan bog‘liq holatlarni ifodalovchi fe’llar:
Qaltiramoq
Titramoq
Tishi takillamoq
Qunishmoq
Sovuq urmoq
Ushuk urmoq
Ushuk yemoq
Muzlamoq
Yaxlamoq
To‘ngmoq, to‘ng‘moq
Qotmoq
Ayozlamoq
Shamday qotmoq

Sovqotishni ifodalaydigan yana qanday so‘zlarni bilasiz?

📚 @kitoblar_pdf

#Nazmiy

Sizga…
Tunda…
nogoh uyg‘onasizmi,
Dilingizga kirgan titroqdan?
Turasizmi og‘ir xo‘rsinib,
Chiqasizmi asta yotoqdan?
Ochasizmi derazalarni,
Qaraysizmi…
Oyga tikilib?
Ko‘ksingizning ostida nadir
Yashayotgan bo‘lar o‘kinib.
Yodim o‘tsa xayolingizdan,
Tushasizmi siz ham larzaga?
Rozimisiz hayotingizdan,
Menga bergan
oniy lahzaga?

Yolg‘izlikning girdoblarida
Chorasizlik bo‘lganida tosh.
Mening uchun yuragingizdan
To‘kasizmi biron tomchi yosh?
Kesib o‘tsa nigohingizni
Muhabbatning qovjiroq labi,
Siz ham…
qattiq sog‘inasizmi?
Sevasizmi siz ham men kabi?
Chidaysizmi,
jimgina mendek-
Qoningizda yongan olovga?
Yoningizga bir kuni borsam,
Bermaysizmi…
Keyin birovga?

✍️ Zebo Mirzo

📚 @kitoblar_pdf

​​#iqtibos

...Boshqa odamga ta’sir qilmoq – unga o‘z qalbingni bermoqdir. U birovlarning fikri bilan o‘ylab, o‘zgalarning ehtiroslari bilan yona boshlaydi. Uning fazilatlari ham o‘ziniki bo‘lmaydi. Agar, umuman, gunoh degan narsa olamda mavjud deb faraz qilsak, gunohlari ham o‘zgalardan o‘zlashtirilgan bo‘ladi. U begona bir ohangning sadosiga aylanib qoladi. U o‘zi uchun yozilmagan rolni ijro etayotgan aktyorga o‘xshab qoladi. Yashashdan maqsad – o‘zligini namoyon etishdir. Biz o‘z mohiyatimizni to‘la-to‘kis namoyon etish maqsadi bilan yashaymiz. Bizning asrimizda esa odamlar o‘zlaridan o‘zlari qo‘rqadigan bo‘lib qolishgan. Ular eng oliy burch – o‘z oldingdagi burch ekanini unutib yuborishgan...

💽Kitobni yuklab olish

📚 @kitoblar_pdf

#Adabiyot

Togʻay Murodning tugʻma isteʼdodi (davomi)

“Oydinda yurgan odamlar” qissasida yosh adibning ijodiy izlanishlari boshqacharoq yoʻldan boradi. Qoplon ham Ziyodulla kabi mehnatsevar, bir soʻzli odam, u ham tabiatga ixlos qoʻygan, Oymomo degan qizni sevib qolgan. Ikki qalbning tuganmas muhabbatiga farzandsizlik balosi qarshi turadi. Ular umr boʻyi shu dardga davo izlaydilar, baʼzi odamlarning malomatlaridan azob tortadilar, bir qancha vaqt oʻksik va tili qisiq boʻlib yuradilar.
Farzandsizlik muammosiga Togʻay Murod oʻz qissasida yangicha talqin berganini alohida aytish kerak. Muallif qissaning dastlabki boblarida Qoplon bilan Oymomoni “akamiz”, “opamiz”, deb hurmat bilan qalamga oladi. Yoshlari ulgʻaygan sari adib endi ularni “bobomiz”, “momomiz”, deb eʼzoz bilan ulugʻlaydi. Qoplon va Oymomo dillaridagi insoniy muhabbatning yuksakligi tufayli kitobxonlar qalbida farzandlarcha mehr uygʻotadilar. Shu bilan ular maʼnaviy jihatdan koʻp farzand koʻrgan muhtaram bobolar va momolar qatoridan oʻrin oladilar.
Togʻay Murodning qalbida mehnatkash xalqimizga atalgan yaxshi tuygʻular koʻp ekani uning qissalaridan sezilib turibdi. Faqat hali bu asarlar – adibning ilk qadamlaridir. Biz uning ijodi ham, mahorati xam yangi-yangi yuksakliklarga koʻtariladi, deb umid qilamiz. Chunki unda tugʻma bir isteʼdod bor. Isteʼdod esa asl eʼtibori bilan mehru oqibatdan tarkib topadi. Mana shu mehru oqibatning biror zarrasi zoye ketmasligi uchun adib oʻz isteʼdodiga “Bu faqat meniki emas, xalqniki, adabiyotniki!” deb qarashi kerak. Ana oʻshandagina isteʼdod oʻsgan sari uni umrboqiy qiladigan masʼuliyat hissi ham oʻsib, ilk muvaffaqiyatlardan esankirashga yoʻl qoʻymaydi.
Chinakam katta adib oʻz xalqiga katta bir qoʻshin keltirgandan ham ulkanroq zafar va shuhrat keltirishi mumkin. Faqat buning uchun adib oʻzidagi isteʼdodni xuddi qoʻshin bayrogʻini avaylab qoʻriqlaydigan yalovbardor kabi asrashi kerak, bu bayroqni oldirib qoʻymasligi, unga gʻubor yuqtirmasligi, dogʻ tushirmasligi kerak.
Togʻay Murodga chin qalbdan aytadigan tilagim ana shu.
 
✍️ Pirimqul QODIROV
 1985

📚 @kitoblar_pdf

✍️ Ulug'bek Hamdam
📖 Sabo va Samandar (roman)

📚 @kitoblar_pdf

✍️ Ulug'bek Hamdam
📖 Sabo va Samandar (roman)

Ushbu roman haroratli til bilan yozilgan. U oldindan mutlaqo bashorat qilib bo‘lmaydigan o‘ta chigal insoniy taqdirlar tasviriga bag‘ishlangan bo‘lishiga qaramay, shavq bilan yengil o‘qiladi. Bunda yozuvchi qo‘llagan tasvir uslubining o‘zgachaligi katta o‘rin tutgan. Zero, zamonaviy o‘zbek romanida nafaqat tasvir ob’yektini tanlash va unga konseptual yondashuv, balki ifoda yo‘sinida ham ovro‘pocha andazalarga amal qilinadi. Ulug‘bek Hamdam esa keyingi yillarda unutilgan bo‘lsa-da, o‘zbek o‘qirmanlarining qonida asrlar davomida olib yotgan tasvir tarzidan foydalanib, tasvirda qoraso‘z (nasr) bilan she’rni uyg‘unlashtirib yubordi. Bu hol uch jihatdan: ham qadimgi an’analarni ayta jonlantirish, ham bosh qahramon bo‘lmish Samandarning shoirona tabiatini yorqin tasvirlash, ham u bilan Sabo o‘rtasidagi sevgining oddiy kundalik tashvishlardan yuksakda turadigan hodisa ekaniga urg‘u berish jihatidan o‘zini oqlagan. Xullas, qo‘lingizda o‘qib rohatlanadigan, rohatlanib o‘qiydigan kitob turibdi. Har to‘kisda bir ayb deganlaridek, ehtimol, bu asarda ham bir qadar zug‘um qilingan, unchalar o‘rinli tushmagan so‘zlar, roman syujetiga bevosita daxldor bo‘lmagan tasvirlar ham uchrab qolar. Lekin to‘y kunida yig‘i yarashmagani uchun bu haqdagi gaplarni boshqa safarga qoldiraylik. Aziz o‘qirman! Mana, ulug‘ insoniy tuyg‘u ulkan mehr ila tasvirlangan asarni qo‘lga oldingiz. Visolsiz ayriliqning totli azoblari tasviri bilan uchrashuvingiz qutli bo‘lsin!

📚 @kitoblar_pdf

​​#iqtibos

O'g'lim, hammada ham tug'ma iste'dod bo'lavermaydi. Sen ilm manbai - kitob va ustozlaring tufayli, tinimsiz izlanishlaring va o'z mehnating orqali har qanday tug'ma iste'dodlardan ancha oldinga o'tib ketishing mumkinligini yodda tut.

"Liderlar kitobi"
✍️ Otabek Hasanov

📚 @kitoblar_pdf

#Savodxonlik

Uslubiy xatoliklar

Xatoliklar turli xil boʻladi. Soʻzlarni notoʻgʻri tanlash va nooʻrin ishlatish; matnda aniqlik, loʻndalik va ifodalilik talablarini buzish uslubiy xatolik deyiladi.

Misol uchun:
1. Oyogʻi bilan tepdi — maʼlumki, qoʻli yoki boshqa joyi bilan tepib boʻlmaydi. Tepish soʻzi aynan oyoq bilan zarb berishni nazarda tutadi.

2. Mebel doʻkonidan qizil daraxtdan yasalgan yogʻoch stol sotib oldim — daraxtdan yasalganidan keyin, temir stol boʻlib qolmaydi-ku, albatta yogʻoch stol boʻladi.

3. Ishchilar qisqa muddat davomida traktorni tuzatish ishlarini amalga oshirish boʻyicha qaror qabul qildilar. — bu gapda ortiqcha soʻzlar koʻpayib ketgan va gap murakkablashgan. Bu gapni oddiygina quyidagicha ifodalash mumkin: Ishchilar qisqa muddatda traktorni tuzatishga qaror qildilar.

—

Tilda turli uslublar boʻladi:
- soʻzlashuv nutqi uslubi;
- ilmiy uslub;
- rasmiy hujjatlar uslubi;
- publitsistik uslub;
- badiiy uslub.

Har bir uslubning oʻziga xosliklari bor. Bir uslubga oid soʻzlarni ikkinchi uslubda ishlatish ham uslubiy xatolik hisoblanadi.

Misol uchun:
Rasmiy maʼlumot: Ichki ishlar organlari xodimlari gapga quloq solmaydigan qaysar muxbirni oʻz xizmat mashinalariga zoʻrgʻa uloqtirib, tergov boʻlimiga sudrab keldilar — bu gapda koʻrib turganingizdek, rasmiy bayonotda ogʻzaki va badiiy nutqdagi soʻzlar qoʻllanilgan.

©️xatoliklar

📚 @kitoblar_pdf

#Jadid_gazetasi
📰 Jadid gazetasi. 21(73)-son (2025-yil, 23-may)

😎Avvalgi son

😎Barcha sonlar

📚 @kitoblar_pdf

#Savodxonlik

-lar qo‘shimchasini qo‘llashdagi xatolar

Eng ko‘p uchraydigan xatolardan biri miqdor sondan keyingi otga ko‘plik qo‘shimchasini qo‘shishdir:

10 ta kitoblar, 4 ta uylar, 15 nafar o‘quvchilar, 30 dona lug‘atlar va hokazo. Bu misollarning barchasida -lar qo‘shimchasi ortiqcha. Chunki sonning o‘zida ko‘plik ma’nosi borligi sababli otga ko‘plik ma’nosi qo‘shilmaydi.

Bunday xatolar tarjima matnlarda tez-tez ko‘zga tashlanadi. Chunki ko‘p tillarda, jumladan, rus va ingliz tillarida miqdor sondan keyingi so‘z ham ko‘plikda bo‘ladi. Masalan, 10 knig – 10 books. Lekin o‘zbek tilida unday emas.

Demak,

5 nafar bolalar ❌
5 nafar bola ✅

Qorda qolgan 20 nafardan ortiq fuqarolarga yordam ko‘rsatildi. ❌
Qorda qolgan 20 nafardan ortiq fuqaroga yordam ko‘rsatildi. ✅

Keyingi xato kam bo‘lsa-da, uchrab turadi. O‘zi birlikda ishlatiladigan, lekin ko‘plikni bildiradigan so‘zlardan keyin ko‘plikdagi fe’lni qo‘llash. Masalan:

Aholi kerakli axborotga ega bo‘ldilar. ❌
Aholi kerakli axborotga ega bo‘ldi. ✅

Ko‘pchilik bu so‘zning ma’nosini yaxshi biladilar. ❌
Ko‘pchilik bu so‘zning ma’nosini yaxshi biladi. ✅

Bu kabi holatlarda fe’lni birgalik nisbatda (ega bo‘lishdi, yaxshi bilishadi) qo‘llash ham xato. Fe’l faqat birlikda bo‘lishi kerak.

©

📚 @kitoblar_pdf

#Tavsiya

📖Jaloliddin Rumiy: “Yetti majlis”

‌Rumiy o‘z asarlarida odamni tadqiq etadi, uning tabiati va intilishlarini kuzatadi, botiniy jilolar va surilishlar, qalb siljishlarini qidirib topadi. Rumiy asarlaridagi joziba shu qadar inson ko‘ngliga yaqinki, uning har bir so‘zi – bir mayoq, umr yo‘llarini yoritguvchi chiroq, qalbga qo‘yiladigan ziyo kabidir.

Jaloliddin Rumiyning buyukligi yana shundaki, u islomning ulug‘ shoiri va mutafakkiri bo‘lgani holda barcha mazhab­lar va dinlardan yuqori ko‘tarila oldi, bani basharni birlashtiruvchi yagona ilohiy g‘oyalarni olg‘a surib, kishilarni bir-biriga yaqinlashtiruvchi e’tiqod va iymon, ishq va sig‘inish, poklik va tavbadan so‘z ochdi. “Cho‘llar muxtalif, ammo maqsad bir, ya’ni Olloh huzuri”, deya Ulug‘ Tangri haqiqati Olloh jami maxluhot barobarligini isbotladi.

Mazkur kitob Rumiy dunyosining yangi manzillarini ochadi, kitobxonni Rumiy bilan qayta yuzlashtiradi. O‘z navbatida kitobxon ham asar vositasida mehrga, muhabbatga, chin insoniy tuyg‘ularga chanqoq qalbini qondiradi.

🔥 - o‘qidim
😎 - o‘qiyapman
👍 - o‘qish rejam bor

📚 @kitoblar_pdf

Agar hayotni yangidan, shu bilan birga oqilona boshlay olganimizda-chi? Yashab o'tgan hayotimizning bittasi qoralama bo'lsa-yu, ikkinchisini unga qarab oqqa ko'chirgandek yashasak! O'shanda, o'ylashimcha, har birimiz, avvalo, o'z-o'zimizni takrorlamaslikka harakat qilgan, hech bo'lmaganda o'zi uchun boshqacha hayot tarzini yaratgan bo'larmidik.....

✍️ A.P.Chexov

📚 @kitoblar_pdf

#Savodxonlik

Uxlamoq yoki uhlamoq?

Bularning ikkisi ham toʻgʻri yozilgan, faqat bular ikki xil maʼnoni anglatuvchi soʻzlar:

1. Uxlamoq — uyquda boʻlmoq, uyquga ketmoq.
2. Uhlamoq — uh tortmoq, “uh” deb qoʻymoq.

Misol:
Gʻishmat uxlayotganida birdan uhlab qoʻydi.

©xatoliklar

📚 @kitoblar_pdf

#Jadid_gazetasi
📰 Jadid gazetasi. 22(77)-son (2025-yil, 30-may)

😎Avvalgi son

😎Barcha sonlar

📚 @kitoblar_pdf

#Kitob_faktlar
📊 Dunyodagi kitob xaridi bo‘yicha mamlakatlar reytingi

📚 @kitoblar_pdf

#Kitob_haqida

📖 "Urush farzandi"ning qayg‘uli sevgi qissasi

O‘zbekiston xalq yozuvchisi O‘lmas Umarbekov asarlarini, ehtimol, hamma ham o‘qimagandir. Ammo «Qiyomat qarz»ni ko‘rmagan inson topilmasa kerak.

Bugun adibning «Urush farzandi» qissasini tavsiya qilmoqchimiz. Bu asar bir qarashda oddiy sevgi qissasiga o‘xshaydi. Maftunkor Bolgariya, ulug‘vor dengiz, oltin qumlar, bolgar qiziga oshiq bo‘lgan o‘zbek yigiti...

Ikkinchi jahon urushining tamom bo‘lganiga ham 80 yil bo‘ldi. 80 yil... Bu bir inson umri. Urush fojialari haqida so‘z ketganida millionlab insonlarning halok bo‘lgani, fashistlar tomonidan vayron qilingan shahar-qishloqlar, o‘t ostida qolgan dalalar va mislsiz jasorat ko‘rsatgan qahramon jangchilar tilga olinadi, raqamlarda baholanadi. Bular haqida manbalarni istagancha topishingiz mumkin.

O‘quvchilik yillarimizda tarix kitoblarining kattagina qismi Ikkinchi jahon urushiga bag‘ishlangan edi. Sovet xalqining, sovet kishisining jasorati, mardligi hikoya qilinardi. Urush mardlik maydoni edi. Filmlarni aytmaysizmi?! Qo‘ltiqtayoqdagi jangchini ko‘rganmiz, boshi bint bilan o‘ralgan yaradorlarni ko‘rsatishardi, gullarga burkangan muzaffar jangchilar, baxtiyor qiz-juvonlar... Kalta yubkasi, boshiga istig‘no bilan qiyshiq qo‘ndirilgan pilotkali hamshira qizlar jang maydonidan yaradorlarni olib chiqishardi, biz ko‘rib ulg‘aygan filmlarda.

Urush haqiqatlari ancha keyin qalqib chiqa boshladi. Shunda ham hammasi emas. Ammo shular ham Ikkinchi jahon urushining bor fojialarini anglab yetish uchun yetarli edi. Vokzallarda, bozorlarda tilanchilik qilib kun ko‘rayotgan qo‘lsiz-oyoqsiz mayib-majruhlar haqida hech qanday film olinmagan, badiiy asarlar bitilmagan. Jamiyat tomonidan taqdir hukmiga itqitib tashlangan sobiq jangchilar sovet voqeligiga zid holat edi.

Sovet jamiyatida urushning bor azobini erkaklar bilan bab-baravar tortgan ayollar o‘z vaqtida munosib ehtirom ko‘rgan emas. Ularning katta qismiga suyuqoyoqlardan ham past nazar bilan qaraldi. Taqdirlari urushning davomidek tinch hayotda barbod bo‘ldi. Bular haqida hujjatli manbalar mavjud.

Urush yillarida yana bir toifa ayollar bor edi. Bular nemislar tomonidan bosib olingan hududlarda himoyasiz qolgan ayollar edi. Himoyasiz ayollar... Dushman qo‘l ostida haqsiz-huquqsiz, himoyasiz ayollar... Ayrimlari dushmandan farzandli bo‘ldilar. Va bu bolalarning taqdiri... Ular butun umr tavqi-laʼnat ostida qoldilar, onalari bilan.

Ha, 1945-yilda tamom bo‘lgan urush shu tariqa insonlar hayotida davom etdi. Bugun bu narsalarga ishonish qiyin. Ammo juda ko‘p insonlar ana shunday alamli taqdir bilan yashab o‘tdilar.
Nima uchun mavzudan chiqib ketganimga hayron bo‘lyapsizmi? Yo‘q, mavzudan chetga chiqdim, deb o‘ylamayman. Agar sevimli adibimiz O‘lmas Umarbekovning «Urush farzandi» qissasini o‘qish istagi tug‘ilsa, uning mazmun-mohiyatini chuqurroq anglashingizni istadim, xolos.

Qissa qahramoni Azizning kasbi agronom. Otasi urushda halok bo‘lgan, singlisi va onasi bor. U kasbi taqozosiga ko‘ra birmuncha vaqt Bolgariyada ishlaydi. Shu yerda sohibjamol Anna-Mariyani uchratib qoladi.

Sovet davlati internatsional do‘stlikni targ‘ib qilar edi. Turli millatlar o‘rtasida tuzilgan nikohlarni olamshumul voqea kabi bong urardi. Ammo Anna-Mariya kabi urush farzandlarini tan olmasdi. Ezgulikdan jar soldi-yu, urush farzandlarini shafqatsiz taʼna-malomatlar iskanjasida yashashiga yo‘l qo‘ydi.
Sevimli adibimiz bundan juda yaxshi xabardor bo‘lgan. Ehtimol, shuning uchundir asar qahramoni etib bolqon qizini tanlagan. Va o‘zigagina xos nazokat bilan urushning ulkan fojialaridan birini sevgi qissasida mahorat bilan ko‘rsatgan.

Bu go‘zal va qayg‘uli sevgi qissasi nima bilan yakun topganini bilishni istaysizmi? Albatta, istaysiz. Unda adib O‘lmas Umarbekov qissalari bilan javoningizdagi javohirlar sonini yana bittaga ko‘paytiring. Mutolaa zavqi sizni tark etmasin.

👉 Kitobni o‘qish

📚 @kitoblar_pdf

#Tavsiya

📖 Shuhrat. "Oltin zanglamas"

O‘zbekiston xalq yozuvchisi Shuhrat (G‘ulom Alimov) she’r-u dostonlari, romanlari, drama va tarjimalari bilan XX asr o‘zbek adabiyotida munosib o‘ringa ega ijodkordir. Elliginchi yillarda sho‘ro davri qatag‘onlik siyosati tufayli uzoq yillik qamoq jazosiga mahkum etilganlar orasida Shuhrat ham bor edi, shu jihatdan «Oltin zanglamas» romani ma’lum ma’noda avtobiografik asardir.

Romanda to‘g‘riso‘z, mehnatkash, halol, xalqparvar, oddiy o‘qituvchi Sodiqning tuhmat va ig‘voga uchrab, «xalq dushmani» deya qoralanishi, fojiali qismati hayotiy voqea­hodisalar asosida yoritilgan. Romanning keyingi qismlarida Sodiqning Ikkinchi jahon urushida ko‘rsatgan jasorati, o‘zining gunohsiz ekanini isbot etishi, qahramonlarcha halok bo‘lishi, umuman, jang manzaralari g‘oyat haqqoniy tasvirlangan. Qatag‘onlik siyosatining mislsiz azob­uqubatlarini tortgan va o‘z imon ­e’tiqodini  yo‘qotmagan xalqimiz hayoti va qismati har bir davr yoshlari uchun o‘rnak olishga arzirli saboqdir.

💽Kitobni yuklab olish

🔥 - o‘qidim
😎 - o‘qiyapman
👍 - o‘qish rejam bor

📚 @kitoblar_pdf