#Nazmiy

📜 TAMOM..

Men endi ketaman...
Uni kechirdim.
Kechirdim eng so‘nggi g‘animimni ham.
Endi tinch yashayman tog‘lar yurtida
.Daraxtlar,
shamollar,
maysalar bilan...Teraklar tagida jimgina yotib,
Yulduzlar haqida suraman xayol.
Qizil olmalarga qo‘shilib oqib,
Tunning tushlariga kiraman behol...
Quvvatimni so‘rgan ko‘zlarni artib,
Pok nafasi ila kuch berar tuproq.
Dardsiz nigohlardan, g‘amsiz «oh»lardan.
Shu o‘t-o‘lanlarga yaqinman ko‘proq.
Avliyodek cho‘kka tushib o‘tirgan
Qoyalar bag‘ridan topaman panoh.
Tanisha boshlayman, sodda ruh bilan
Ismini shivirlab aytar har giyoh.
Momomday qo‘yniga oladi zamin,
Yashayman uzoq yoz bilan yoyilib.
Obi rahmatlar - bu,
O, bu rahmatlar,
Chopaman yomg‘irlar bilan chayilib...
Eslayman o‘zimni,
Oy nurlarida
Osmonga qovushib ketgan lahzalar.
Oniy titroqlarning alangasidan
Jismimda uyg‘onar mangu larzalar!..
So‘ng qaytib kelmayman bu shum o‘lkaga,
Yurakda tugagach alam, intiqom.
Yaralib boshqa Ruh,
Boshqa ishq bilan
Baxtli...
Unutaman uni,
batamom!

✍️Zebo Mirzo

📚 @kitoblar_pdf

✍️ Abdulla Qodiriy
📖 "Diyori bakr"

📚 @kitoblar_pdf

#Tavsiya

Bu kitob asosida suratga olingan film Oskarni olgan. Kitob o'z vaqtida Amerikaning eng zo'r romani mukofotiga loyiq ko'rilgan. Yuqoridagi ikki ta'rif hazilakam muvaffaqiyat emasligini tushunib yetgandirsiz, chamamda.

Shunday kitoblar borki, bosh qahramon o'z tilidan gapirganda asl kitobxon u bilan birga nafas olib, u chekkan og'riqni his qiladi. U bilan birga kulib, u bilan bir vaqtda yig'lay oladi. Janob Charli Gordonning hikoyasi ham shu qadar zavqli va bir vaqtning o'zida ayanchliki, siz yozuvchining mahoratiga beixtiyor tan berasiz.

Kitobdan parcha: "Qochoqlar bo'lsa, bir-ikki hafta OZODLIKda yurgach, tashqi dunyodan o'zlari uchun hech qanday yaxshilik topmay, yana bizning bag'rimizga qaytib keladi. Jamiyat ularni qabul qilmaydi, bu ham yetmaganday, turli xil yo'llar bilan ularni kamsitishga urinadi"

Dahoning ojizligi va ojizning daholigi haqidagi intellektual asarni o'qiganlarning hech biri hozirgacha vaqti behuda ketganidan, xato tanlov qilganidan shikoyat qilganini eshitmadim.

Nomi: Eljernonga atalgan gullar
Muallif: Deniel Kiz

📚 @kitoblar_pdf

​​#tavsiya

*️⃣2021-yilning eng mashhur asari “Qo‘rqma” romanining muallifi, yozuvchi Javlon Jovliyev o'zi sevgan asarlarni siz aziz kitobxonlarga tavsiya etadi.

1⃣. Lev Tolstoy “Tirilish” – men bu romanni ikki marta o‘qib chiqdim va yana o‘qishim uchun tor xonamning eng ko‘zga ko‘rinadigan joyiga qo‘yib qo‘yganman, toki ko‘zim tushib tursin – uyg‘oq ursin yurak, vijdon tozalansin, ko‘zim oydinlashsin. Men kitobni maroq bilan o‘qiyman. Mavzu og‘ir yoki yengil bo‘lishiga qaramay, asarning ohangini topib, har bir jumlaning tug‘ilish tarixiga qiziqib, yaxshi o‘rinlariga havaslanib, kelishmagan joylariga o‘z talqinimni o‘ylab mutolaa qilaman, kitoblarda yashash menga yoqadi. “Tirilish” – bu san’at, “Tirilish” – bu hayot, “Tirilish” – o‘zlikni qidirishdir. Tarmoqlarda tez-tez romandan iqtiboslar qo‘yib boraman, yaxshilikni bo‘lishish kerak-ku, kuni kecha shu postim ostiga mening sevimli shoiralarimdan biri, olima Nodira Afoqova “Tirilish” romanini “Tolstoyning “Lison ut-tayri” deb yozib qo‘yibdi. Chindan shunday, Nexlyudovning Maslovaga (yarim cho‘ri, yarim asrandi qiz) qilgan ishi Tolstoyning yoshlikdagi qilmishlariga bog‘liqligi aytiladi, Nexlyudov bu Tolstoyning o‘zi, ha, men bunga shubha qilmayman. Bu kitobni o‘qigan odam tozalanadi, bu suv bilan yuvingandagi ozodalikdan ko‘ra yuksak pokizalikdir.

2⃣ Cho‘lponning “Kecha va Kunduz” romani mening bolaligim va bugunim, aniq bilamanki ertam ham. Men Zebini ko‘p tush ko‘rardim. U atlas ko‘ylakda, qo‘lida o‘quv dutori, sochlari o‘rilgan holda (balki momomning o‘tgan asrning 50-yillarida tushgan surati timsolida menga ko‘rinar) uyimiz va maktabimiz atrofida aylanib yurardi. U qari Mingboshiga (eri) dutor chalib bergan on (cholga “qiziqa” boshlaganidan) undan nafratlanganman, chunki Zebini boshqaga munosib ko‘rganman (balki o‘zimgadir bilmayman), axir Cho‘lpon Zebini qanday go‘zal tasvirlaydi (balki Cho‘lponning chin muhabbati Zebidir), san’atga qiziqishi esa minglab chiroyli, ammo qalbsiz qizlardan uni yuksak ko‘tarib qo‘yadi. Nima bo‘lganda ham Zebi o‘z ixtiyori bilan qari amaldorning qo‘yniga kirmaydi, deb o‘ylardim. Bu bolalik qanotsiz parvoz qiladigan hislar edi. Keyin roman Zebi va muhabbat doirasidan ko‘tarildi va yana-da ulug‘landi, men asarni aziz bilib yonimda olib qoldim. Men unda millat nafasini tuydim. Bu nafas shunchalar tiniq ediki, xuddiki Zebining ming hadik ila shafqatsiz va istiqbolsiz olamga boqayotgan lobar ko‘zlarida butun boshli Vatan manzarasini ko‘rsa bo‘lardi. Men Zebining ko‘zlaridagi o‘sha manzarani ko‘rgim kelaveradi. Agar kimdir asarni film qilmoqchi bo‘lsa, jon deb insenirovka qilib bergan bo‘lardim.

3⃣Mixail Afanasevich Bulgakov “Usta va Margaritta” – bu kitobni qishloqda, kerosin chiroqning xira yorug‘ida o‘qiganman – achchiq, ammo qadrdon manzara. Kitobni o‘qirkansiz atrofda sizni kimlardir qurshab olayotganini his qilasiz, siz yorug‘da, atrofni yorita olmaydi moychiroq, demak zulmat. Chiroq tutaydi, shishalari qorayadi, ammo bag‘ring kengayib boradi, yuraging to‘ladi, qo‘rquv va hayrat qoplaydi. Men Tolstoy, Chexov, Dostoyevskiylardan keyin shunday novatorlik bilan ijod qilgan odamgina g‘olib bo‘lishi mumkin edi, deb bilaman va bu shubhasiz Bulgakov nasridir. U ko‘p muhokama etilgan, maqtalgan, ayovsiz tanqid qilingan, ammo faqat yuksalib bormoqda. U kitobni qishning boshida boshlaydi, ammo umrining oxirigacha ham tugata olmaydi, balki romanni tugatib bo‘lmasdi. Birinchi variantini yozuvchining o‘zi yo‘q qilgan, eslashimcha, “Qora sehrgar” deb nomlagan, keyin yana o‘zgartirgan. Roman 1966-yilga kelibgina chop etiladi (qisqartirilib, “Moskva” jurnalida). Shundan so‘ng 1967-yilda Parijda kitob bo‘lib chiqadi. Ilk qirqilmagan varianti esa Moskvada 1973-yilda chiqqan.

📚 @kitoblar_pdf

##Savodxonlik

SANALAR IMLOSI

1. Hujjatlar odatda imzolangan kundan kuchga kiradi, shu bois ularga imzo qoʻyilgan sanasi yoziladi.

2. Sanalarni yozishda arab raqamlari ishlatiladi (yilni ifodalash uchun toʻrtta, oyni ifodalash uchun ikkita va kunni ifodalash uchun ikkita raqam), ular nuqta bilan ajratiladi: 2020.09.13, 2020.08.01.

3. Sanani raqamlar bilan yozganda, avval kun, keyin oy va yillarni yozish maqsadga muvofiq emas: 13.09.2020 ❌

4. Shunday yozilgan taqdirda, soʻngida yil soʻzi yoki uning qisqartmasi (y.) qoʻyilmaydi: 13.09.2020-yil ❌

5. Yilni ikkita raqam bilan ifodalash maqsadga muvofiq emas: 20.09.13 ❌

6. Sanani harf va raqamlar bilan ham yozish mumkin: 1992 йил 1 сентябрь (1992-yil 1-sentyabr/sentabr)

7. Sanani ifodalovchi soʻzlar qisqarsa, raqamlar va soʻzlar orasida boʻsh joy qoldirish kerak: 2020-y., m. a. VII asr.

8. Vaqt oraligʻini ifodalovchi ikki sana orasiga qisqa tire (–) qoʻyiladi va ularning orasida boʻsh joy boʻlmaydi: 2015–2020 йиллар (taqqoslang: 2015–2020-yillar), 12–13 сентябрь (taqqoslang: 12–13-sentyabr/sentabr)

©️xatoliklar

📚 @kitoblar_pdf

##Savodxonlik

“Tashrif buyurmadim”, shunchaki “keldim”

Xabar va yangiliklarni oʻqiganda, telekoʻrsatuvlarni koʻrganda eng tishga tegadigan iboralardan biri – “tashrif buyurish”. Duch kelgan odamga nisbatan oʻrni boʻlsa-boʻlmasa tashrif buyurdi deb ishlatib ketilaveradi. “Oʻzbek tilining izohli lugʻati” yozilishicha, tashrif arabcha soʻz boʻlib, asliyatda hurmat, ehtirom; ulugʻlash, sharaflash; marosim; marhamat qilib kelish maʼnolariga ega.

Tashrif va sharafning oʻzagi bir, tashrif buyurish sharaflantirish deganidir. Bu soʻz oʻzbek tilida yuksak martabali mehmonlar, ulugʻ kishilarga nisbatan ishlatiladi. Chunki ularning qadami biz uchun sharafdir.

Masalan:

1. Yurtimizga Malayziya Bosh vaziri tashrif buyurdi.
2. Maktabimizga atoqli olim, akademik Nayim Karimov tashrif buyurdi.

Oʻzi haqida gapirayotgan kishi tashrif buyurdim deyishi esa mutlaqo xato. Hatto u Bosh vazir yoki akademik boʻlsa ham. Bu qoida birinchi shaxs koʻplikka (tashrif buyurdik) ham tegishli. Chunki bunday ifoda nokamtarlik, manmanlik belgisi. “Men borgan edim, qadamim yetib, oʻsha joy sharaflandi”, deganday gap. Masalan:

1. “Men oʻtgan yili sanatoriyga tashrif buyurdim”, deyish oʻrniga: “Men oʻtgan yili sanatoriyga bordim”

yoki

2. “Mana, hozir koʻrsatuvimiz qahramonining xonadoniga tashrif buyurdik”, deyish oʻrniga: “Mana, hozir koʻrsatuvimiz qahramonining xonadoniga kirib keldik”,

deb gapirish toʻgʻri, oʻrinli va farosatli kishiga xos boʻladi.

Endi boshqa bir holatga eʼtibor qaratamiz. “Tashrif” soʻzi feʼlsiz, yakka oʻzi qoʻllanadigan oʻrinlar bor. Masalan:

1. Oʻtgan yili sayt tashrifchilari soni sezilarli oshdi.
2. Muzeyimizga umumiy tashriflar ikki milliontani tashkil etdi.

Bu oʻrinda soʻzning sharaflantirish maʼnosi yoʻq. Oʻzagida bor boʻlsa-da, jonli tilda oʻsha maʼno yoʻqola borgan (tashrif buyurishda ulugʻvorlik, yuksaklik maʼno qirrasi bor). Shu sababli soʻzni bu holatda ishlatishni xato emas deyish mumkin. Agar kimdir shu soʻzni qoʻllashni juda istamasa, jumlani tahrir qiladi:

1. Oʻtgan yili saytga kiruvchilar soni sezilarli oshdi. (Masalan, menga mana shu variant maʼqul. Ifodasi oʻzbekcharoq.)
2. Muzeyimizga keluvchilar ikki million kishiga yetdi.

©️Orif Tolib

📚 @kitoblar_pdf

Sahovatda, himmatda oqar daryo kabi bo‘l,
Shafqat va marhamatda kulgan quyosh kabi bo‘l,
O‘zga aybin yopishda qorong‘u tun kabi bo‘l,
Tavoze-kamtarlikda mayin tuproq kabi bo‘l,
Bag‘rikenglik-mehrda ulkan dengiz kabi bo‘l,
Qandaysan shunday ko‘rin, yo ko‘ringaning kabi bo‘l.

©️Jaloliddin Rumiy.

📚 @kitoblar_pdf

​#iqtibos

​​...Boshqa odamga ta’sir qilmoq – unga o‘z qalbingni bermoqdir. U birovlarning fikri bilan o‘ylab, o‘zgalarning ehtiroslari bilan yona boshlaydi. Uning fazilatlari ham o‘ziniki bo‘lmaydi. Agar, umuman, gunoh degan narsa olamda mavjud deb faraz qilsak, gunohlari ham o‘zgalardan o‘zlashtirilgan bo‘ladi. U begona bir ohangning sadosiga aylanib qoladi. U o‘zi uchun yozilmagan rolni ijro etayotgan aktyorga o‘xshab qoladi. Yashashdan maqsad – o‘zligini namoyon etishdir. Biz o‘z mohiyatimizni to‘la-to‘kis namoyon etish maqsadi bilan yashaymiz. Bizning asrimizda esa odamlar o‘zlaridan o‘zlari qo‘rqadigan bo‘lib qolishgan. Ular eng oliy burch – o‘z oldingdagi burch ekanini unutib yuborishgan...

✍️ Oskar Uayld. "Dorian Grey portreti" romanidan

📚 @kitoblar_pdf

Ishbilarmon va yozuvchi Robert Kiyosakining asarlari

📕 1. Robert Kiyosaki eng sara asarlari

📘 2. Boy ota, kambag'al ota

📗 3. Boy bola, aqlli bola

📔 4. Sarmoya tikish san'ati

📙 5. Yollanma ishchining tadbirkorga aylanishi

📕 6. Kichik biznesdan kattasiga

📘 7. Eng katta boyligingiz

📗 8. Boy ayol

📔 9. Pul oqimining kvadranti 1

📙 10. Pul oqimining kvadranti 2

📕 11. Yosh va boy holatda ishlashdan forig' bo'lish 1

📘12. Yosh va boy holatda ishlashdan forig' bo'lish 2

📚 @kitoblar_pdf

"Dengiz haqida so'zlab ber menga" kitobidan iqtiboslar:

▫️Baxt botindan keladi, tashqaridanmas.
▪️Muhabbat ko'zga ko'rinmas qanotlar baxsh etadi.
▫️Bizdagi yoriqlardan yorug'lik kiradi.
▪️Zulmatda nur yanada yorug'.
▫️Har qanday kurashda to'xtashni va yutqazishni bilish kerak.
▪️Noaniqlikni qabul qilishni o'rgan va savollarga tin ber.
▫️Yaxshi bo'l, yomonlar shundog'am yetarli.

Bu qissa hayotdagi eng muhim narsalar o'z uyingdaligini anglashing uchun dunyoning yarmini kezib chiqishingga to'g'ri kelishi haqida hikoya qiladi.

📚 @kitoblar_pdf

##Savodxonlik

Soat va daqiqalar imlosi

1. Soatlar va daqiqalarni ikki nuqta bilan ajratgan maʼqul: 15:00, 09:30

2. Kompaniyalar saytlarida, jurnallarda, umuman, badiiy va norasmiy matnlarda ularni nuqta bilan ajratsa ham zarar qilmaydi: 15.00, 09.30

3. Yarim tunni ikki xil koʻrinishda ifodalash mumkin: 00:00 yoki 24:00

4. Kunning yakuni haqida gap ketayotgan boʻlsa, 24:00 shaklini, kunning boshi haqida gap ketayotgan boʻlsa — 00:00 shaklini ishlatish mumkin: bizning restoran 8:00 dan 24:00 gacha ishlaydi, bizning restoran 00:00 dan 18:00 gacha ishlaydi.

5. 24:30 shaklida yozib boʻlmaydi, 00:30 shaklida yozish maqsadga muvofiq.

6. Vaqtni raqamlar bilan ifodalagandan keyin daqiqa soʻzini qoʻshish ortiqchalik qiladi: 12:30 daqiqa ❌

7. Oʻrni kelsa, misol uchun, aniqlik talab qilinadigan rasmiy hujjatlarda soatni soʻzlar bilan ham ifodalash mumkin: oʻn ikkidan oʻttiz daqiqa.

8. Ikki vaqt oraligʻiga qisqa tire (–) qoʻyiladi: 09:00–18:00

9. Butun sonli vaqtlarda nol-nol soʻzlari chiziqcha bilan yoziladi: oʻn ikki-yu nol-nol.

©️xatoliklar

📚 @kitoblar_pdf

#Imlosi_qiyin_soʻzlar

Xalaqit
Zaxira
Ehtiyoj
Tushunmoq
Kulgi
Xavotir
Tafovut
Shafqat
Tavfiq
Afv

📚 @kitoblar_pdf

​​XX asrning eng sara asarlari

Yigirma yilcha avval “Hurriyat” gazetasida bir qancha ziyolilarimiz – adabiyotshunos olimlar, shoir va yozuvchilar so‘rovnomada ishtirok etib, XX asr jahon va o‘zbek adabiyotida yaratilgan eng sara asarlar deb hisoblaydigan bir necha kitoblarni aytib o‘tishgan edi.
Quyida ilk ishtirokchilardan biri marhum adabiyotshunos-munaqqid, mohir tarjimon Ozod Sharafiddinov tavsiyalari bilan tanishishingiz mumkin.

Ozod Sharafiddinov (1929-2005) — adabiyotshunos olim, professor.

✅1. XX asr jahon adabiyotining 10 eng yaxshi asari deb qaysi asarlarni tilga olasiz?

1. Muxtor Avezov. «Abay» (roman), «Abay yo‘li» (roman).
2. Jon Golsuorsi. «Forsaytlar haqida qissa» (turkum romanlar).
3. Maksim Gorkiy. «Klim Samginning hayoti» (roman).
4. Teodor Drayzer. «Amerika fojiasi» (roman).
5. Tomas Mann. «Iosif va uning akalari» (roman).
6. Rabindranat Tagor. «Halokat» (roman).
7. Aleksandr Tvardovskiy. «Vasiliy Tyorkin» (doston).
8. Ernest Xeminguey. «Alvido, qurol» (roman).
9. Mixail Sholoxov. «Tinch Don» (roman).
10. Gabriel Garsia Markes. «Buzrukning kuzi» (roman).

Yana XX asrda yaratilgan eng yaxshi asarlar sirasiga Aleksandr Sojenisinning «GULAG arxipelagi» asarini, Aziz Nesinning hajviy hikoyalarini, Chingiz Aytmatovning «Asrga tatigulik kun» romanini kiritish mumkin.

✅2. XX asr o‘zbek adabiyotidagi eng yaxshi 10 asarni tilga oling.

1. Abdulla Qodiriy. «O‘tkan kunlar» (roman).
2. Cho‘lpon. «Kecha va kunduz» (roman).
3. Abdulla Qahhor. «Sarob» (roman).
4. Oybek. «Navoiy» (roman).
5. Odil Yoqubov. «Ulug‘bek xazinasi» (roman).
6. Pirimqul Qodirov. «Yulduzli tunlar» (roman).
7. Tog‘ay Murod. «Otamdan qolgan dalalar» (roman).
8. O‘tkir Hoshimov. «Dunyoning ishlari» (roman).
9. Abdulla Oripov she’rlari.
10. Erkin Vohidov she’rlari.

📚 @kitoblar_pdf

#Jadid_gazetasi
📰 Jadid gazetasi. 3-son (2026-yil, 16-yanvar)

😎Avvalgi son

😎Barcha sonlar

📚 @kitoblar_pdf

Muvaffaqiyatga oid kitoblar

📙 1. Jo Vitale eng sara asarlari

📕 2. Jim Ron eng sara asarlari

📗 3. Bodo Shefer eng sara asarlari

📘 4. Jon Kexo eng sara asarlari

📔 5. Robert Kiyosaki maktabi

📙 6. Vavilonlik eng boy odam

📕 7. Baxt va boylikka erishishning yetti yo'li

📗 8. Pul, muvaffaqiyat va Siz

📘 9. Vaqt - bu pul

📔 10. Biznes - bu men uchun

📙 11. Yaxshidan buyuklik sari

📕 12. Oldiniga hamma qoidalarni buzing

📗 13. Pul topishning ulkan sirlari

📘 14. Qanday qilib aqlli, sog'lom va boy bo'lish mumkin?

📔 15. Kambag'allikni tark etishni istaysizmi?

📚 @kitoblar_pdf

​#sheʼr_soʻz

UCHAYOTGAN ODAM

Tobora tushlarim qiziq tus olar,
tobora qichqirar qush tushlariday.
Koʻpincha uchaman,
uzoq uchaman
shundoq teraklarning uch-uchlarida.
Sezaman,
tigʻdayin shoxlar jismimni
oʻzimning qonimga boʻyar, alhazar.
Yuragim qamalgan qushday potirlar,
quvar qon hidini olgan kalxatlar.
Shundoq bir shum holat iskanjasida
yerning tortish kuchin yengmoqchi boʻlib,
silkiyman qontalash qanotlarimni,
ming bor tirilaman,
ming bora oʻlib.
Yuksakda bir olam — moviy ranglarda,
ozod ruhlar uchun boshpana bergan.
Uchib ketolmasdim,
goʻyo jismimni
koʻrinmas rishtalar bogʻlagan yerga.
Shundoq bir shum holat iskanjasida
yurak oʻynogʻidan sovuq ter bosib,
uygʻonar ekanman,
oylab oʻylayman
gʻaroyib tushlarning taʼbir, maʼnosin.
Nega men uchaman,
qayga uchaman,
nega takrorlanar gʻaroyib tushlar?
Demak, qachonlardir qanotim boʻlgan,
demak ajdodlarim toʻralgan qushdan.
Haftalab oʻylayman,
oylab oʻylayman,
ne uchun qushlarga tortar qonlarim?
Qachondir bahaybat qush edim, desam,
nega siz kulasiz, ogʻajonlarim!
Qush edim,
oʻt bilan oʻynashgan bir qush,
balki oʻt kuydirgan qanotlarimni.
Shu xolos, yillarcha urindim bekor
oʻqiyman deb, kuygan yodim xatini.
Men qushman,
qachondir yerga qulagan,
keyincha zaminga moslashgan jismim.
Gʻaroyib tushlarim esa, shubhasiz,
yodimning kuymasdan qolgan bir qismi…
Goh esa oʻngimda
kuymasdan qolgan
xotiram parchasi sabab boʻlarmi,
gavjum shaharlarning koʻchalarida
qanotday yozilib ketar qoʻllarim.
Qayga uchish kerak,
bilmayman, ammo
bilarsiz bemalol uxlayotganlar —
silkinib-silkinib kulayotganlar?!
Bilsangiz,
shu tobda jismu jonimni
zaharga aylanib, yoqar qonlarim.
Qushday boʻzlab uchdim boshlaringizda,
qushligin unutgan, ogʻajonlarim!
Zora eslasangiz,
zora tilagim,
balki nasib boʻlar sizlar-la uchmak.
Hozircha kechirdim, saqlamadim kek,
chunki men odammas,
chunki men qushman.

✍️ Shavkat Rahmon

📚 @kitoblar_pdf

#Savodxonlik

Telefon raqamlari imlosi

Telefon raqamlarini yozish borasida hech qayerda aniq koʻrsatmalar berilmagan (yoki biz bilmaymiz), shu bois ularning imlosida koʻproq mantiqqa tayanishga toʻgʻri keladi.

1. Odatda avval telefon soʻzi yozilib, ikki nuqta qoʻyiladi, keyin esa bir joy tashlab raqam kiritiladi.

2. Telefon soʻzini qisqartirib yozish mumkin, bunda unga nuqta va ketidan ikki nuqta qoʻyiladi, ikki nuqtani qoʻymasa xatolik hisoblanmaydi: tel.: yoki tel.

3. Xalqaro qoʻngʻiroqlar boʻlishi mumkin boʻlgan tashkilot raqami boʻlsa, raqamni davlat kodi bilan yozish kerak: +998...

4. Orqadan ikki raqam sanab, ikki marta chiziqcha (defis) qoʻyiladi: 98 765-43-21

5. Odatda operator kodi qavsga olinadi, lekin bu mantiqan toʻgʻri emas. Oʻzi qavs ichiga toʻldiruvchi va qoʻshimcha maʼlumotlar kiritiladi. Oʻzbekistonda 2019-yildan beri operator kodini termasdan qoʻngʻiroqlar amalga oshirib boʻlmaydi. Avval bu qoʻshimcha maʼlumot edi, hozirda asosiy maʼlumotga aylangan. Shuning uchun operator kodini qavsga olmagan maʼqul:
(98) 765-43-21 ❌
98 765-43-21 ✅
+998 98 765-43-21 ✅

©️xatoliklar

📚 @kitoblar_pdf

#Jadid_gazetasi
📰 Jadid gazetasi. 4-son (2026-yil, 23-yanvar)

😎Avvalgi son

😎Barcha sonlar

📚 @kitoblar_pdf

#Tavsiya

Sevgi naqadar buyuk tuyg'u...
Rashod Nuri Guntekin bu tuyg'uning buyukligini isbotlab beruvchi o'tkir qalam sohibi, turk adabiyoti namoyondalaridan biridir. (“Choliqushi” asari bilan tanish o’quvchilar bizni darrov anglashdi)

Muallifning zamon sinovlariga dosh bergan, elga manzur eng sara asarlarini tavsiya qilamiz! O’qing, maza qiling!

📕 1. Choliqushi

📘 2. Oqshom quyoshi

📙 3. Otash kechasi

📔 4. Xotin dushmani. To'kilgan yaproqlar

📗 5. Rashod Nuri Guntekin eng sara asarlari

📚 @kitoblar_pdf

##Savodxonlik

Boqimanda

Aslida, boqimanda soʻzi yoʻq, barcha lugʻatlarda boqimonda shaklida keltirilgan. Faqatgina 1995-yilda nashrdan chiqqan va hozirda muomalada boʻlmagan imlo lugʻatida boqimanda soʻzi bor.

Xoʻsh, “boqimonda” soʻzining maʼnosi nima?
Bu soʻzning boqmoq soʻziga hech qanday aloqasi yoʻq, arabcha boqi(y) va tojikcha monda soʻzlaridan hosil qilingan.

Oʻzbek tilining izohli lugʻatida yozilishicha, boqimonda — bu:
1) qoldiq qarz, undirilmagan, toʻlanmay qolgan soliq va shu kabilar (har gal eski yilning boqimondasi yangi yilga oʻtaverib, jonga tegdi. “Mushtum”);
2) eski, avvaldan yigʻilib qolgan (idora hovlisidan oʻn ikki tonna boqimonda axlatlar chiqarib tashlandi. N. Aminov, “Qahqaha”).

Unda birovning boqimida boʻlgan, dardisar odamni nima deb atash mumkin?
Bunday odam boqimonda emas, boqindi deyiladi.

Toʻlanmagan qoldiq, qarz:
Boqimanda ❌
Boqimonda ✅

Birovning boqimidagi odam:
Boqimanda ❌
Boqindi ✅

©️xatoliklar

📚 @kitoblar_pdf