✍️ Ziyovuddin Rahim
📖"Qur'on - qalblar shifosi"

Alloh taoloning Kalomi Qur’oni karim insonni to‘g‘ri yo‘lga boshlaydi, qalbini poklaydi, odobini sayqallaydi, ikki dunyo saodatiga yo‘llaydi. Ushbu “Qur’on – qalblar shifosi” kitobida Qur’on o‘qish, eshitish, tadabbur qilish fazilatlari bayon etilgan, Qur’onni qalbga jo aylash, Kalomullohni yaxshi ko‘rish bilan bog‘liq muhim ma’lumotlar berilgan. Shuningdek, Qur’on xatm qilish muddati, Kalomullohni yodlash usullari, qiroat odoblari, suralar fazilati haqida ham to‘xtalib o‘tilgan, ulug‘larning Qur’onga cheksiz muhabbati, yuksak hurmat-ehtiromi haqida ibratli rivoyatlar keltirilgan.

Mazkur asarda Qur’on qalbga shifo ekani, ma’naviy kasalliklar Qur’on bilan davolanishi alohida ta’kidlangan, ruhiy komilikka, ko‘ngil xotirjamligiga erishish yo‘llari ko‘rsatilgan. Ushbu kitob Allohning Kalomiga e’tiboringiz kuchayishiga, muhabbatingiz ortishiga, qalbingiz illatlardan tozalanib, imoningiz mustahkamlanishiga sabab bo‘ladi, deb umid qilamiz.

📚 @kitoblar_pdf

#Savodxonlik

Probel

Probel — bu soʻzlar orasidagi boʻsh joy, interval. Afsuski, koʻpchilik buni oʻz oʻrnida ishlata olmaydi. Shu bois bugun uni toʻgʻri qoʻllashni oʻrganamiz:

1. Har bir soʻz orasi ochib yoziladi:
Xushkelibsiz ❌
Xush kelibsiz ✅

2. Nuqtadan keyin joy ochib yoziladi:
Salom.Bugun dushanba ❌
Salom. Bugun dushanba ✅

3. Nuqtadan oldin probel qoʻyilmaydi:
Salom .Bugun dushanba ❌
Salom. Bugun dushanba ✅

4. Vergul, ikki nuqta (:), nuqtali vergul (;), undov belgisi (!), soʻroq belgisi (?), gap soʻngidagi uch nuqta (...) uchun ham xuddi shu qoidalar amal qiladi:
Nima ?Ha ,mayli ❌
Nima? Ha, mayli ✅

5. Defis (-) bilan yoziladigan juft soʻzlar, takror soʻzlar, baʼzi qoʻshimchalar (-ku, -da, -a, -u va b.) orasida boʻsh joy qoldirmay yoziladi:
Oldi - berdi ❌
Oldi-berdi ✅

Asta - sekin ❌
Asta-sekin ✅

6. Umuman olganda, defisning ikki tarafida hech qachon boʻsh joy boʻlmaydi. Faqatgina osma defis bundan mustasno:
5 - noyabr ❌
5-noyabr ✅

Audio - va videoaloqa ❌
Audio- va videoaloqa ✅

7. Vaqt oraligʻini ifodalash uchun ishlatiladigan qisqa tire (–) qatnashgan soʻzlar boʻsh joy qoldirmay yoziladi:
3 – 4 dona ❌
3–4 dona ✅

1941 – 1945-yillar ❌
1941–1945-yillar ✅

8. Gaplarni va gap boʻlaklarini ikkiga ajratuvchi tire (—) har ikki tomondan boʻsh joy qoldirib yoziladi:
Til—bu millat gʻururi ❌
Til — bu millat gʻururi ✅

Qaragʻay—bu daraxt ❌
Qaragʻay — bu daraxt ✅

9. Qavs ichidagi soʻz yoki soʻzlar qavsdan ajratmay yoziladi:
( Qavs ichidagi soʻz ) ❌
(Qavs ichidagi soʻz) ✅

10. Qoʻshtirnoq ichidagi soʻzlar ham qoʻshtirnoqdan ajratmay yoziladi:
“ Qoʻshtirnoq ichidagi soʻz ” ❌
“Qoʻshtirnoq ichidagi soʻz” ✅

11. Son yoki boshqa biror belgidan soʻng birikib kelgan qoʻshimchalar ajratib yoziladi:
15dan ziyod ❌
15 dan ziyod ✅

100%gacha ❌
100% gacha ✅
(*Foiz belgisini son bilan qoʻshib yoki ajratib yozish borasida turli qarashlar mavjud)

12. Dona sonlar raqamlar bilan yozilsa, ta alohida yoziladi:
5ta ❌
5 ta ✅

©️xatoliklar

📚 @kitoblar_pdf

YANA SHE’RIMGA

(Sonet)

She’rim! Yana o’zing yaxshisan,
Boqqa kirsang, gullar sharmanda.
Bir men emas, hayot shaxsisan,
Jonim kabi yashaysan manda.

Yuragimning dardi — naqshisan,
Qilolmayman seni hech kanda!
O’t bo’lurmi ishqi yo’q tanda?
Dardimsanki, she’rim yaxshisan.

Sen orada ko’prik bo’lding-da,
Geyne bilan o’rtoq tutindim.
Lermontovdan ko’mak o’tindim.

Butun umrim sening bo’yningda.
Saharda qon tupursam, mayli.
Men — Majnunman, she’rim, sen — Layli!

— Usmon Nosir

📚 @kitoblar_pdf

#maktubot

«Assalomu alaykum!

Men Sizni esladim.

Balki gunoh ish qilgandirman, lekin o‘z enamdek bo‘lib qolgan mehribon qo‘shnimizning ko‘nglidan o‘tolmay, maktubingizni oldim. Javob yozaymi-yozmaymi deb, bir haftani o‘tkazdim. Axir bu maktubning ortida inson ko‘ngli turibdi-ku, deb o‘yladim so‘ng. Allohning o‘zi kechirsin!

O‘sha kuni olamning rangi boshqacha edi debsiz va bu go‘zallikning ijodkorini xato aytibsiz. Hamma narsaga qodir faqat Allohdir. Alloh taolo beadad va betimsol husn sohibidir. Ul zoti mukarram o‘zining beadad jamolining beadaddan bir ulushini biz bandalariga ham ato etmish. Bizlar bundan iftixor qilmog‘imiz va Yaratganga shukronalar aytmog‘imiz lozim. Biz barchamiz go‘zalmiz.

Hozirgi aytadigan gapimni nokamtarlikka yo‘ymagaysiz. Illo uning ma’nosini keyinroq tushungaysiz, inshoolloh.

Siz Farhod bo‘lolmassiz, men esa Shirin. Siz Otabek emassiz, lekin men Kumushlikka qodirman. Siz Anvar emassiz, ammo men Ra’no bo‘la olaman.

Men ham zaminiyman, emas osmonliq,
Vale shakkari sho‘r, biling, osonliq.

Namozlaringizda duo qilib turing. Ilohi, gunohlarimizni avf etsin!

Iltimosim — endi xat yozmang. Allohning o‘zi bir yo‘lga boshlagay.

Mumtozmahal.»

✍️Nabi JALOLIDDINning
«Ayo ishq» hikoyasidan

📚 @kitoblar_pdf

​​​#Tasiya

🌸“Qon hidi” asarini o‘qib...

   Urush... Unda qatnashish, oʻlimlarni koʻp koʻrish, unga koʻnikib ketish inson uchun bir fojia boʻlsa, urushdan tirik qaytish yana bir fojiadir. Urushdan qaytganlarni koʻrib koʻpchilik havas qiladi, qirgʻindan omon chiqdi deb suyunadi. Aslida-chi? Aslida urush koʻrganlar avvalgi hayotida yashay oladimi? Aslo! Endi ularni xotiralar tinch qoʻymaydi. Urushda oʻldirgan insonlari tushlariga kirib undan jon talab qilishadi. Bu ahvolda yana qancha tirik qolish mumkin? Urushda ruhini, qalbini tashlab kelgan insonni tirik deyish mumkinmi?

*Abdurashid Nurmurodov*ning mazkur romani ham urush haqida. Afgʻon urushi haqida. Nima uchun jang qilayotganini ham tushunmay, qoʻliga qurol olib odam oʻldirishga moslashib ketgan, urushdan keyin esa qon hidini sogʻinib yashagan taqdirlar haqida.
 
“Qon hidi”! Asarning nomiyoq oʻquvchini seskantiradi. Oʻqishni boshlaganingizdan soʻng dastlab qoʻrquv uygʻonadi. Chavaqlangan insonlar, mina portlashi natijasida sochilib ketgan ichagini qorniga joylamoqchi boʻlib qotib qolgan qo’llar... Tasavvur qilishning oʻzi dahshat! Lekin dastlabki boblardanoq urush muhitiga singib ketganingizni, oʻsha yerlarda siz ham yurganday, pistirmada dushmanni kuzatayotganday his qilishingizni sezmay ham qolasiz. Endi oʻldirilgan odamlar sizni vahimaga solmaydi, oʻlimga koʻnikib qoladi nigohimiz. Qahramonimiz uchun esa dushmanlarni oʻldirish, ularni xoʻrlash oddiy holga aylanib qolgan. Oʻldirmasang, seni oʻldirishadi axir. Umrining atigi sanoqli yillarini jangda oʻtkazgan inson keyingi hayotidan ham mahrum boʻladi. Endi u tinch hayotga koʻnika olmaydi. Xotirjam uxlash unga begona. Koʻz yumdi deguncha janglarga takror va takror qaytaveradi. Urushdan qaytganda tinch yashashni orzu qilgan hayoti rostdan ham tinchmi? Tinch hayotda fojiali oʻlimlar yoʻqmi? Urushdagi sevgilisini xotirlagani uchun eridan kaltak yeb oʻlgan Shirinoy, boqib yurgan moli fermer dalasiga kirib ketgani uchun urib oʻldirilgan norasida Safar, oʻqituvchilikning oyligiga roʻzgʻor tebrata olmay, biznes qilmoqchi boʻlgan Shakar va uning oilasi fojiasi, Surxondaryodan Toshkentga kelib, oʻqishga kira olmay, uyiga bir qop un olib borish ilinjida arava torgan, lekin maqsadiga yetmay halok boʻlgan Tohir...
   Ular urushda emas edi-ku! Savollar, savollar...
   Afg’on urushi, uning qatnashchisi ruhiyati, oʻy-xayollari, tinch hayotda koʻgan, urushdagidan kam boʻlmagan voqealari haqida bilmoqchimisiz? Haqiqiy yolg’izlik qanday boʻlishi haqida tushunchaga ega boʻlmoqchimisiz? Unda bu asar siz uchun! Tavsiya qilaman!

✍​​Kitobxon

📚 @kitoblar_pdf

✍ Imom Zarnujiy
📖 "Ilm olish sirlari"

Hadisi sharifda taʼkidlanganidek, “Ilm o‘rganish har bir muslim va muslimaga farzdir”. Maʼlumki, har bir ishni oxiriga yetkazish va uni mukammal ado etish uchun unga oid ilmlarni o‘rganish asosiy omil hisoblanadi. Insonga hamma ilmlarni o‘rganishi farz emas. Balki, hozir bajarilishi lozim bo‘lgan amalning ilmini bilishi kerak. Shunda bajaradigan ishi nuqson va kamchiliklardan holi va ilm asosida qilinganidan mukammal bo‘ladi.
Ushbu kitobda ilm olishga oid barcha zaruriy masalalar atroflicha yoritilgan. Mazkur asar ilm olish istagida bo‘lgan har bir kishiga dasturulamal bo‘lib xizmat qiladi, inshoolloh.

📚 @kitoblar_pdf

#Savodxonlik

Ayirish (ъ) yoki tutuq (’) belgisi

Ayirish (ъ) yoki lotin alifbosidagi tutuq (’) belgisining ahamiyatini koʻpchilik munosib baholamaydi. Quyida usiz soʻzlarning maʼnosi oʻzgarib ketadigan holatlardan misollar keltiramiz:

Daʼvo — daʼvo qilmoq, arz qilmoq
Davo — davo topmoq, shifo topmoq

Surʼat — keskin, joʻshqin surʼatdagi ish
Surat — suratga olmoq, rasmga tushirmoq

Sheʼr — sheʼr yodlamoq
Sher — yirtqich hayvon

Taʼrif — insonni taʼriflamoq
Tarif — qimmatroq tarifga oʻtmoq

Taʼqib — taʼqib qilmoq, quvmoq
Taqib — tugmani taqib

©xatoliklar

📚 @kitoblar_pdf

Payg'ambarimiz alayhissalom: “Kim ummatimga dini bilan aloqador qirqta hadis yodlatsa, Alloh taolo uni qiyomat kuni faqihlar va olimlar guruhiga kiritadi”, deb marhamat qilganlar. Ushbu hadis bashoratidan umidvor salaf ulamolar qirq hadisni ayirib to'plashga, sharhlashga, shogirdlarga o'qitishga katta e'tibor berishgan. Imom Muhiddin Zakariyo ibn Sharaf Navaviy rahmatullohi alayh ana shunday mashhur olimlardandirlar. U kishi to'plagan “Qirq hadis” necha asrdan beri o'qiladi, o'qitiladi. Kitob ommaga ham, ilm ahllariga ham birdek foydali bo'lishiga ishonamiz.

✍️ Muallif: Imom Navaviy
📖 Kitob nomi: 40 hadis

📚 @kitoblar_pdf

#Savodxonlik

Sinonimlar lugʻati

Gapning biror boʻlagidagi inkor maʼnosini kuchaytirib beruvchi hech soʻziga sinonim boʻlgan soʻzlar lugʻati:
- aslo,
- asti,
- sira,
- mutlaqo,
- zinhor,
- butunlay,
- hargiz,
- taqir,
- zarracha,
- zigʻircha,
- tirnoqcha.

© xatoliklar

📚 @kitoblar_pdf

«Musulmon inson qanday muolaja bilan musulmonlar tarixidagi musibatlarni tuzatishi mumkin? Uning davosi baqir chaqir qilib namoyish o‘tkazishimizmi? Uning muolajasi qiyomatgacha uvvos solib yig‘lashimizmi? Ichqoralarning yayrashiga va din dushmanlarining quvonchi ko‘payishiga sabab bo‘lishi mumkin bo‘lgan ishlar bilan o‘zimizga ozor yetkazishimizmi?  Ishonamanki har bir oqil kishi ushbu savolim javobini biladi. Uning iloji; Biz musulmonlar shu ishlarni qilayotganlarga e’tiborimizni qaratishimizdir».

Imom Butiy

📚 @ilm_duri

HAQLAR VA OQ BO‘LISHLAR HAQIDA

Bir kishi xalifa Umar ibn Xattob roziyollohu anhuning huzurlariga kelib o‘g‘lidan shikoyat qildi. Umar rohiyollohu anhu uning o‘g‘liga odam yubordilar. U kelgach unga dedilar:
- Nima uchun otangga oq bo‘lding? Otangni gardaningda ado qilishing lozim bo‘lgan haqlarini bilmasmiding?!
- Mening otam ustida haqlarim yo‘qmi ey moʻminlar amiri?!
- Albatta bor. Otang sen uchun kishilar ayblamaydigan ona tanlashi lozim. Senga chiroyli ism tanlashi lozim. Senga odob berishi, tarbiyalashi, katta bo‘lguningcha nafaqa qilish lozim.
- Otam barcha aka-ukalarimni hur ayollardan tug‘dirgan. Meni esa cho‘ridan. Ular kichkinaligimdan otamning oldida meni onam bilan ayblashar edi. Otam menga Jual( go‘ngchi qo‘ng‘iz) deb ism qo‘ygan. Otam meni ilm halqalariga yubormagan, halol-haromni o‘rgatmagan. Men faqat uning tuyalarini boqar edim.
Umar roziyollohu anhu uning otasiga qarab dedilar:
- Sen o‘g‘lingga oq bo‘libsan-ku!

Jan Jak Russo aytadi: “Uylanishimdan oldin menda bolalar tarbiyasi uchun oltita nazariya bor edi. Bugun esa menda oltita bola bor. Ammo birorta nazariya yo‘q!”.
Tarbiya nazariyotidagi eng go‘zal nazariya qissalar bilan tarbiyalashdir. Qur’oni karim itoatgo‘ylar, osiylar, Nabiylar, ayollar, hayvonlar, qullar va o‘tgan ummatlar qissasi bilan to‘la. Tarbiya va yo‘nalish berishda bundan o‘tadigani yo‘q. Bu uslubdan maqsad, yetkarish kerak bo‘lgan fikrni nafs yaxshi ko‘radigan suratda birovga yuklashdir. Inson qissaga tabiati bilan quloq tutib uni qabul qiladi. Bu katta yoshlilarda. Ammo yosh bolalarda esa bu uslub juda ham muhim va foydalidir. Bolalarda bu dunyo haqidagi fikrlar juda erta shakllanadi. Erta shakllangan narsani o‘zgartirish ham qiyin kechadi. Har bir qissaning qahramonlari bo‘ladi. Qahramonlar bolalar uchun bir yetakchi va o‘rnak vazifasini o‘taydi. Bolalar ularga taqlid qilishadi. Shuning uchun hikoyalarni tanlab olish lozim bo‘ladi. Bu bilan biz ularga yetakchilarni tanlab bergan bo‘lamiz. Fir’avnning qizining sartaroshi haqidagi hikoya Zolushka haqidagi ertakdan go‘zalroqdir. Bilqis haqidagi hikoya “Qorning oqligi” hikoyasidan yaxshiroqdir. Uxdud sohiblaridagi bola hikoyasi Robin Gud hikoyasidan azaldir. Gʻor sohiblarining qissasi Ali bobo va qirq qaroqchi qissasidan yaxshidir. Hadicha onamiz va Muhammad sallollohu alayhi va sallamning muhabbatlari haqidagi hikoya “Serebro” dagi muhabbat haqidagi hikoyadan afzaldir. Xizr va Muso alayhis salomlar haqidagi qissa Sindbod haqidagi hikoyalardan afzaldir. Ikki bog‘ sohiblari haqidagi qissa “Digemon qahramonlari”dan go‘zalroqdir. Fir’avnning xotini Osiyo haqidagi qissa “Rapunzel qissasi”dan go‘zalroqdir. Fotima, Oisha va Xansoning qissalari “Quvvat qizlari” dan yaxshiroqdir. Xolid ibn Valid Gevaradan buyukroqdir. Abu Bakr Mandeladan buyukroqdir. Umar Gandidan buyukroqdir. Usmon Bil Geytsdan buyukroqdir. Sa’d ibn Abi Vaqqos Napoleondan buyukroqdir. Xanso Agata Kristidan buyukroqdir. Hadicha Margaret Tetcherdan buyukroqdir.
Madaniyat bola uchun juda muhimdir. Ammo madaniyat daraxtning bargiga o‘xshaydi. Daraxning tomiri bargidan muhimroq bo‘ladi. Bolalarning yoshligidan tomiriga e’tibor berishimiz lozim. Shuning uchun birinchi aqoidni o‘qitish muhim. Murabbiylarning sayyidi shunday degan edilar:
“Hoy bola! Men senga bir qancha so‘zlarni o‘rgataman. Allohni muhofaza qil. Shunda Alloh ham seni muhofaza qiladi”.
Rasululloh sallollohu alayhi va sallam unga foyda beruvchi ham, zarar beruvchi ham Alloh ekanini anglatdilar.
Insonlar faqatgina sababchilardir. Boshingga tushishi kerak bo‘lgan ish xato qilmaydi. U albatta boshingga kelib tushadi. Xato qilishi kerak bo‘lgan ish sening boshingga tushmaydi. Alloh taolo barcha narsani Lavhul mahfuzda yozib qo‘ydi. Qalamlar ko‘tarilgan, sahifalar qurigan!

Abdulqodir Polvonov

📚 @ilm_duri

JANNAT

Inson hamisha nimagadir intilib yashaydi, deylik, puli ko‘payib qolishi bilanoq uy-hovlisini yaxshilashni boshlaydi. Maskanini chiroyli qilishga tushadi. Juda boyib ketsa, darhol villa sotib oladi. Koshona qasr quradi, dengiz bo‘yida yashashga intiladi.
Ha, bu intilish insonning fitratidagi holat: Odam alayhissalom jannatni ko‘rganlar, inson ham Odamning avlodi bo‘lgani uchun qonida aylanayotgan his bilan to jannatning tengini topmagunicha tinchimaydi. Odam bolasini faqat jannatgina xotirjam qila oladi.
Nemislarning tengsiz dahosi - Gyote aytadi: "Agar bir kishi menga: «Jannat o‘ylab topilgan joy» desa, men uni ahmoqqa yo‘yaman. Bu gapi bilan u insoniyatning orzusi bilan o‘ynashgan, eng og‘ir masalada hazillashgan bo‘ladi!"

Xayrulla Hamidov

📚 @ilm_duri

#ilmiy_suhbat

😎Ilmni kimdan, qanday olamiz?

🎤Husayn Buxoriy

🕐 Mundarija:
00:00 — Kirish.
00:58  — Ustozdan darslarni eshituvchilarga eslatma
06:10 — «Risalatul-Mustarshidiyn» kitobi maʼviza uchun emas, dars boʻlishi uchun oʻqilyapti
10:21 — Kitobni oʻqishdan maqsad koʻp maʼlumotga ega boʻlishemas, balki kitobni qanday oʻqish, undagi yozilganlarga qanday amal qilish, oʻzimizning va muallifning qanday fikrlashini oʻrganishdir
15:48 — Ilm maʼlumotlarni tashish emas, mohiyatlarni anglashdir. Taʼlim mohiyatlarni tanishtirish emas, uni topishni oʻrgatishdir
23:12 — Nega baʼzida darslarning soati choʻzilib ketadi?
27:46 — Avvalgi darsning qisqacha takrori
29:07 — Iymon nimayu, tasdiq nima?
34:30 — Haqiqiy moʻminlar — aql egalarining yoʻli qanday boʻladi?
36:38 — Imom deb kimni aytadi?
43:15 — «Mana shu toʻgʻri yoʻldir»

📚 @ilm_duri

Alixonto‘ra Sog‘uniy o‘zining "Turkiston qayg‘usi kitobida yozadi:

"Ongi ochilmagan, bilimsiz bir millat o‘z dushmanlari oldida kushxonaga haydalmoqda bo‘lgan bir to‘p hayvondan hech qanday ayramasi yo‘qdir.
Insonning o‘ziga eng yaqin halokatlik dushmani ongsizlik, ilmsizlikdir. Shunga ko‘ra Olloh taolo Qur’onning birinchi surasini o‘qish, uqish, bildirish, yozish, qalam bilan boshlamish edi. Payg‘ambarimiz sollallohu alayhi vasallam erkak-xotin, o‘g‘il-qiz demay butun ummatlarini ilm o‘qishga buyurdilar. Kerakligicha din ilmini o‘qish hammaga farz bo‘lgandek, o‘z hukumatini, vatanini va millatini saqlash uchun zamonaviy fan ilmini o‘qib bilish ham farzdur".

📚 @ilm_duri

#ilmiy_suhbat
​
🔴«Ayol — madrasadir!»

🎤Husayn Buxoriy bilan suhbat

Ustoz Husayn Buxoriy tomonlaridan «Ayol — madrasadir!» nomi ostida qilingan suhbat.

🕐Mundarija:
00:00 — Kirish
00:48 — Moʻminlarning onalari haqida.
01:58 — Nabiy alayhissalom nega koʻp ayollarga uylanganlar?
05:19 — Dunyoning matohlarini xohlaysizlarmi?
07:09 — Birovga gapiradigan boʻlsangiz, soʻzni karashma qilmasdan oddiy gapiringlar
08:08 — Uyingizda oʻtiringlar
09:47 — Namozni toʻla ado qilinglar
11:24 — Zakotni beringlar
14:42 — Alloh sizdan nopoklikni ketkazishni va toʻla poklashni xohlaydi
21:58 — Oilaning ajrashiga sabab nima?
24:10 — Ayollarning ilm olishi haqida
26:22 — Hamma vaʼdalar, buyruqlar erkaklarga. Ayollarchi?
32:48 — Dushmanlar Ummati Muhammadni buzish uchun ummat ayollariga hujum qilishadi
34:50 — Uy bekasi boʻlib, farzand tarbiyasi bilan mashgʻul boʻlish or-nomus(mi?)
38:34 — Onalar farzandlariga ona tilini oʻrgatishsin
40:03 — Farzandni yetuklikka yetishining omillaridan biri. Hanna binti Foqudning qissasi
46:34 — Yusuf alayhissalomning Onasi haqida
48:17 — Hind binti Utba roziyallohu anhu haqida
49:45 — Zayd ibn Sobitning onalari haqida
52:40 — Imom Shofeʼiyning onalari haqida
56:04 — Sufron Savriy, imom Ahmadning onalari haqida
59:08 — Imom Molikning onalari haqida
01:01:30 — Imom Avzoiyning onalari haqida
01:02:17 — Imom Hajar Asqaloniyning onalari haqida
01:02:56 — Aminjon mahsum domla
01:03:36 — Ayol madrasadir
01:06:00 — Onaning qobiliyatlari farzandga oʻtadi
01:07:41 — Muhammad Hasan: «Men Qurʼonni Onamdan yodlaganman»
01:11:41 — Ayollar uy-roʻzgʻor bilan birga ibodat, ilmni qanday birga olib ketsa boʻladi?
01:14:36 — Savol-javob. Erkak ilm oʻqisa, ayol unga qanday xizmat qilishi kerak?
01:19:57 — Ayol ilm olgisi kelsa-yu uyidagilar bunga qarashi boʻlsa, nima qilish kerak?
01:32:17 — Uylanish yo turmushga chiqishda asosiy meʼyor nima?
01:37:20 — Tariqatga ergashish, ustoz tanlash haqida
01:41:16 — Xotima

📚 @ilm_duri

🌿Hazratning kitobga muhabbatlari

«Hazratni xotirlab» ko‘rsatuvining har bir qismidan biz yuzlab xulosalar chiqarishimiz mumkin. Ko‘rsatuvning barcha sonlaridan olgan umumiy xulosalarim quyidagilar bo‘ldi:

*️⃣1) Hazratning kitobga bo‘lgan muhabbatlari, ilmga bo‘lgan chanqoqliklarini Alloh taolo bolaliklaridan ko‘ngillariga solib qo‘ygan va bu muhabbat yillar o‘tgan sayin kuchayib borib, hazratning ko‘plab kitoblar muallifi bo‘lishlariga sababchi bo‘lgan;

*️⃣2) Hazrat umrlarini doimo kerakli ilmlar, solih amallar, foydali ishlar bilan o‘tkazganlar, vaqtlarining bir soniyasini ham behuda sarflamaganlar;

*️⃣3) Oddiy inson, oddiy bashar ekanliklari muomalalarida ko‘rinardi, Haq taolo ilmlari tufayli bizdan ko‘ra ko‘proq fazilat bergani ularning yuzlarida, harakatlarida, amallarida yaqqol ko‘zga tashlanardi;

*️⃣4) Hazratning manxajlari, asosan, insonlarni ahli sunna val jamoaga chaqirish bo‘lgan;

*️⃣5) Hazratning eng katta maqsadlari – xalqni fiqhda, ya’ni imom Abu Hanifa rohmatullohi alayhning mazhablarida birlashtirish edi;

*️⃣6) Hazratning yashash tarzlari hanafiylik mazhabining eng oliy misoli bo‘lgan;

*️⃣7) Hazratdan ta’lim olgan har bir shogirdlari u yoki bu sohaning yetuk mutaxassisi bo‘lib yetishgan;

*️⃣8) Hazratga Alloh azza va jalla «qabul qilish va qabul qilinish» ne’matini ato etgan edi. Ya’ni, u zot biror insoning oldiga borsalar darrov xush ko‘rilar (qabul qilinar) edilar. Yoki bo‘lmasa, hazrat suhbatlarini boshlasalar, kattayu kichik, yoshu qari, erkagu ayol ularni birdek maroq bilan tinglardi (qabul qilardi). Shuningdek, shayximiz biror kitobni yozishni boshlasalar, Robbil ’alamiynning karomati bilan ana shu kitobda yoritilayotgan ma’lumotlarga insonlar orasida ehtiyoj paydo bo‘lardi. Kitob nashrdan chiqqach insonlar o‘zlarini qiziqtirayotgan masalalarga ana shu kitobni o‘qish orqali javob topardilar;

*️⃣9) Hazrat elni birlashtirish, odamlarni ittifoqdosh qilish uchun qo‘llaridan nimaki chora kelsa, barchasini ishga solganlar;

*️⃣10) Hazrat jamiki xizmatlarini xolis Alloh subhanahu va taolo uchun qilganlar!

Ibodat Gulmurodova

📚 @ilm_duri

Dunyoni sevmoq

Bir necha kishi to'planib, «Zolim nafs, xoin dunyo, musibatlarning eng avvali...» kabi sifatlar bilan dunyoni yomonlashar edi. Qizig'i shundaki, ular dunyoni yomonlagani sari kayfiyatlari chog', go'yo boshqa bir olamga «sayr» qilishardi. Ittifoqo, bu majlisga kelib qolgan haqiqiy bir olim ularga:
— Siz dunyoni naqadar sevishingizga hayron qoldim! — deya xitob qildi.
Bu gapdan majlis ahli dovdirab qoldi, hamma sukut saqladi. Nihoyat, oralaridagi bir olim chiqib:
— Biz dunyoni maqtamayapmiz, aksincha yomonlayapmiz, basharti dunyoni sevganimizda uni maqtardik. Binobarin, sening bu so'zlaring ma'nosiz, mantiqsiz, — dedi.

Orif zot shunday javob qildi:
— Yo'q, unday emas. Dunyo sizga yor bo'lmagani uchun ham uni yomonlash bilan qalbingiz taskin topmoqda. Agar qalbingizda dunyoga qiziqish bo'lmaganida, u bilan ovora bo'lmas edingiz. Inson sevgan narsasini gapirib tasalli topadi. Siz yomonlash orqali yashirin sevgingizga tarjimon bo'lib, qalbingiz taftini bosmoqdasiz.


Hissa

Til ko'ngil tarjimonidir. Tillar ko'ngillarga bog'langan. Oshiqning fikri nima bo'lsa, zikri ham o'shadir. Qalbi pokiza, komil inson boshqasining qadrini yerga urishni ep ko'rmaydi, biroq voqealarga ibrat nazari bilan qaraydi, kerakli xulosalar chiqaradi.

📚 @ilm_duri

#mutolaa

🌿 Ilmning foydalari

Ilmning foydalari son-sanoqsiz ekanini hamma yaxshi biladi. Biz diniy ilmlarning ba’zi foydalarini qisqacha eslab o‘tamiz:

1. Ilm orqali Alloh taniladi, Unga ibodat qilinadi va tavhid asosida yashash yo‘lga qo‘yiladi.
2. Ilm e’tiqodlar va ibodatlarning asosidir.
3. Ilm talab qilish ibodatdir.
4. Ilm jannatga yetish yo‘lidir.
5. Ilm o‘z egasiga Allohdan qo‘rqishni kasb qildiradi.
6. Ilm o‘z egasiga xaloyiqqa nisbatan tavoze’li bo‘lishni o‘rgatadi.
7. Ilmdan avvalo, egasi, keyin boshqalar ham foyda oladi.
8. Ilmning ajri uning egasining ajalidan keyin ham boqiy qoladi.
9. Ilm o‘z egasini payg‘ambarlardan keyingi eng yuqori martabaga erishtiradi.
10. Ilm pastni baland, xorni aziz va singanni butun qiladi.
11. Ilm kishini jaholat zulmatidan ma’rifat nuriga chiqaradi.
12. Ilm tufayli silai rahm qilinadi va haq-huquqlar ado etiladi.

📖 Shayx Muhammad Sodiq Muhammad Yusuf. "Mukammal saodat yo‘li" kitobidan

📚 @ilm_duri

🌿“Ilm afzalmi, mol-dunyo afzalmi?

Hazrat Аli roziyallohu anhu xavorij toifasidan boʼlgan oʼn kishining “Ilm afzalmi, mol-dunyo afzalmi?” degan savoliga: “Ilm afzal”, deb javob berdilar va ularning har biriga alohida dalil keltirdilar:

– birinchisiga: “Ilm paygʼambar­larning merosidir, mol esa Qorun, Shad­dod, Firʼavn va boshqa shunga oʼx­shaganlarning merosidir!”;

– ikkinchisiga: “Ilm seni qoʼriqlaydi, molni esa sen qoʼriqlaysan”;

– uchinchisiga: “Mol egasining dushmani koʼp boʼladi, ilm egasining doʼsti koʼp boʼladi”;

– toʼrtinchisiga: “Molni sarflaga­ning sari u kamayib boradi, ilmni sarf­laganing sari u koʼpayib boradi”;

– beshinchisiga: “Mol egasini baxil-qizgʼanchiq degan nom bilan malomat qilib chaqirishadi, ilm egasini esa izzat-ikrom va hurmat-ehtirom bilan chaqirishadi”;

– oltinchisiga: “Mol oʼgʼridan yashiriladi, ilm esa oʼgʼridan yashirilmaydi”;

– yettinchisiga: “Molning egasi qiyo­mat kuni hisob-kitob qilinadi, ilm egasi esa qiyomat kuni shafoat qilinadi”;

– sakkizinchisiga: “Mol uzoq vaqt turishi va zamonlar oʼtishi bilan eski­radi (va qadri ketadi), ilm esa aslo es­kirmaydi va qadri ketmaydi”;

– toʼqqizinchisiga: “Mol qalbni qo­raytiradi, ilm esa qalbni yoritadi – yorugʼ va nurli qiladi”;

– oʼninchisiga: “Molning egasi bora-bora xudolikni daʼvo qiladi, ilm egasi esa hamisha bandalik maqomida turadi”, dedilar.

Soʼngra: “Аgar mendan yana shu savolni soʼrayverishsa, to oʼlgu­nimcha shunday (“Ilm moldan afzal”) deb javob beraveraman!” dedi. Keyin u (xavorij)­lar kel­dilar va hammalari imon kel­tirib, musulmon boʼldilar.

“Hidoyat” jurnalining 2020-yil, 2-sonidan

📚 @ilm_duri