علم و کتاب

خبر لیجے زباں بگڑی ۔۔۔ دل دھک سے بیٹھ گیا
اطہر علی ہاشمی
ہمارے ایک قاری نے انتباہ کیا ہے کہ آپ کی زبان بھی فلاں صاحب کی طرح بوجھل اور ثقیل ہوتی جارہی ہے جب کہ پہلے بات آسانی سے سمجھ میں آجاتی تھی، اب تو آپ لغات میں الجھ جاتے ہیں۔
اگر ایسا ہی ہے تو معذرت۔ کیونکہ یہ سلسلہ تو ہم نے اس لیے شروع کیا ہے کہ اردو میں، خاص طور پر اخبارات میں، جو غلطیاں عام ہورہی ہیں ان کی نشاندہی کردی جائے۔ اب جیسے ہم نے پچھلے کالم میں’’کان۔ کن‘‘ کا حوالہ دیا تھا لیکن بلوچستان کے علاقے دکی میں کان کے اندر جو حادثہ پیش آیا اس پر تمام ٹی وی چینلز ’’کان کُنوں‘‘ کی ہلاکت کی خبر دے رہے تھے۔ کسی ایک نے بھی کن (کاف پر زبر) نہیں کہا۔ نوجوان صحافی خواہ اخبار میں ہوں یا ٹی وی چینلز پر، کبھی تو صحیح تلفظ کی طرف مائل ہوں گے۔ ہم تو خیر کیا، کئی بڑے ادیب تو تلفظ اور املا پر کتابیں لکھ چکے ہیں۔ ہم ان ہی کے کام کو عام کررہے ہیں۔ لوگوں کی کوششوں کے اثرات نظر بھی آرہے ہیں۔ اخبارات میں دھماکا، دھوکا اور خورونوش وغیرہ لکھا جارہا ہے۔ بس ’پتہ‘ اب تک ’پتا‘ نہیں ہوا۔ ’کھلی چھٹی‘ بھی آہستہ آہستہ راہِ راست پر آکر ’کھلی چھوٹ‘ ہورہی ہے۔
ایک بڑے مؤقر اور معتبر ادبی رسالے ’’اجرا‘‘ میں تعزیت کے عنوان سے مدیر شہیر نے ایک جملہ لکھا ہے ’’خبر سنتے ہی دل دھک سے بیٹھ گیا‘‘۔ یہ محاورہ نہیں ہے۔ یا تو ’’دل دھک سے رہ گیا‘‘ یا ’’دل بیٹھ گیا‘‘ ہونا چاہیے تھا، دل یہ دو کام بیک وقت نہیں کرسکتا۔ دل دھک سے ہوجانا کا مطلب ہے اچانک صدمہ ہونا، صدمے سے دل پر چوٹ لگنا۔ خود ’’دھک‘‘ کا مطلب ہے: حیران، متحیر، صدمہ، خوف، ڈر (چھوٹی جوں یا لیکھ کو بھی کہتے ہیں)۔ دھک سے رہ جانے کا مطلب ہے: حیران رہ جانا۔ دل بیٹھ گیا کا مطلب تو واضح ہے، استادکا مصرع ہے:
گر بیٹھنے کا قصد کروں بیٹھ جائے دل
اخبارات میں ایک سرخی عموماً نظروں سے گزرتی ہے ’’ہر صورت فلاں کام کریں گے‘‘۔ یہاں صورت کے بعد ’’میں‘‘ ضروری ہے، یعنی ہر صورت میں۔ لیکن سرخیوں میں الفاظ کی قید بھی ہوتی ہے اس لیے ’’میں‘‘ عموماً نکال دیا جاتا ہے۔ اس کا حل یہ ہے کہ ’’بہرصورت‘‘ لکھا جائے جس سے جگہ بھی نہیں گھرے گی اور مفہوم پورا ہوجائے گا۔ اب تو جب سے اردو کی خبر ایجنسیوں کا رواج ہوا ہے انہوں نے ’’فلاں کے بارے میں‘‘ سے دو الفاظ نکال پھینکے ہیں اور عموماً خبروں میں یہ ہوتا ہے ’’فلاں بارے‘‘۔ اس طرح ’کے‘ اور ’میں‘ کی بچت تو ہوگئی لیکن زبان خراب ہوگئی۔ پنجاب کے اخبارات میں تو یوں ہی چھپتا ہے البتہ ابھی کراچی کے اخبارات میں یہ مضحکہ خیزی عام نہیں ہوئی ہے، شاید ہوجائے۔ اخبارات کی زبان اور املا بگاڑنے میں اردو کی خبر ایجنسیوں کا بھی بڑا ہاتھ ہے۔ وہاں شاید کوئی بتانے والا نہیں، جیسے برقی ذرائع ابلاغ میں اب کوئی زیڈ۔ اے۔ بخاری نہیں رہا۔
ایک تماشا تو ہندی کے ڈراموں، فلموں اور عام بول چال میں نظر آرہا ہے۔ پھول ’فول‘ اور پھر ’فر‘ ہوگیا۔ مزے کا ایک جملہ سننے میں آیا ’’فوفا، فوفی‘‘… کچھ غور کے بعد ادراک ہوا کہ یہ پھوپھا، پھوپھی ہے۔ بعید نہیں کہ یہ تبدیلی تحریر میں بھی آجائے۔ پرانی بھارتی فلمیں اور ڈرامے دیکھیں تو اداکار پھول کو پھول ہی کہتے سنائی دیں گے۔ کتنے ہی ہندو اردو کے بہت اچھے ادیب اور شاعر ہیں۔ اور وہی کیا، سکھوں میں بھی راجندر سنگھ بیدی، کنور مہندر سنگھ وغیرہ نام کما چکے ہیں۔ ان کا تلفظ بھی درست تھا۔ لیکن یہ بگاڑ اچانک آیا ہے اور اس کے اثرات بھارتی مسلمانوں پر بھی پڑ رہے ہیں۔ ان کا تلفظ بھی بگڑ رہا ہے۔ ظاہر ہے کہ مسلمان طالب علم اپنے اسکول میں اور اطراف میں جو سنیں گے وہی بولیں گے۔ ایک افسوسناک حقیقت یہ ہے کہ بھارت کے کچھ مسلمان شاعر اور شاعرات شاعری تو اردو میں کررہے ہیں لیکن اردو لکھ نہیں سکتے۔ وہ اردو شاعری ہندی رسم الخط میں لکھتے ہیں۔ اور خاص بات یہ ہے کہ پھ، بھ، تھ، ڈھ وغیرہ ہندی ہی سے اردو میں آئے ہیں۔ پھوار پڑے یا پھوٹ، یہ ہندی ہی کے الفاظ ہیں۔ پھوک، پھوکا، پھوکٹ، پھوڑا وغیرہ اردو میں عام ہیں مگر اصل ان کی ہندی ہے۔ اور وہیں ’’پھ‘‘ کو ’ف‘ بنادیا گیا ہے۔ اب یہ شعر یوں پڑھا جائے گا:
فول لایا فول کو، فول کر میں نے کہا
فول کیوں لائے ہو صاحب، تم تو خود ہی فول ہو

❤2

503 viewsAbdul Mateen Muniri, 02:09