علم و کتاب

تجارت کی ترقی غیر ملکیوں سے ارتباط خیالات کا مبادلہ اور خیالات کی توسیع علوم کی ترقی ترقی کا شوق شوق میں ایک کا دوسرے کو پیچھے چھوڑنے کی کوشش کرنا اور اس غرض کے حاصل کرنے کے لیے نئے نئے ایجاد اور دریافت میں سعی کرنا ایسے مسلسل واقعات ہیں کہ ایک سے دوسرا بطور علت و معلول کے خود بخود پیدا ہوتا چلا جاتا ہے اور اسی لیے میں نے تجارت کو تہذیب کی کنجی کہا ہے۔۔۔اس زمانہ میں اسلامی قافلے اور جہاز قرطبہ سے لے کر چین کے مشرقی ساحل تک تمام سمندر اور خشکی کو اپنا جولان گاہ سمجھتے تھے اور کوئی اور قوم ان کا مقابلہ کرنے والی نہ تھی۔۔۔جس قدر مسلمان مصنف جغرافیہ پر لکھنے والے اور بڑے بڑے سیاح گزرے ہیں، وہ سب آٹھویں صدی تک ختم ہو جاتے ہیں"۔
ہم نے سفرنامہ کے مقدمے کی طویل عبارتوں سے چند اقتباسات پیش کئے ہیں، جو یہ ثابت کرنے کے لئے کافی ہیں کہ جب تک خلافت اسلامیہ عربوں کے ہاتھوں میں رہی ، دور عباسی تک سلطنت اور تجارت قدم سے قدم ملا کر چلتے رہے، لیکن جب خلافت اور سلطنت ترکوں اور مغلوں کے پاس آئی تو پھر مسلمانوں نے تجارت کو چھوڑدیا، ان کے یہاں اب ملک گیری اور فتوحات کا غلبہ ہوا۔عثمانیوں کے ہاتھوں قسطنطنیہ کی فتح اور سقوط اندلس کے بعد سنہ ۱۴۹۸ء کے تلاش ہند کے مشن کی کامیابی کے بعد یورپ نے عالمی تجارت پر قبضہ کا جو سلسلہ شروع کیاپانچ سو سال بعد بھی وہ تھمتا ہوا نظر نہیں آتا، سامراجی نظام سے آزاد ہونے کے باوجود تجارتی مصالح اور مفادات نے عالم اسلام کو دو ر غلامی سے زیادہ پابند کردیاہے۔ اور تجارتی مفادات کی بیڑیاں دور غلامی کے طوق سلاسل سے زیادہ مضبوط لگتی ہیں۔
بات کہاں سے کہاں پہنچ گئی، ہماری ناقص رائے میں علماء دین کو معاشرے میں وقار حاصل کرکے دین کو سربلند کرنا ہے تو ان میں عزت نفس پیدا کرنا ضروری ہے، یہ عزت نفس اس وقت تک انہیں نہیں مل سکتی جب تک کہ یہ اہل ز ر کے عطیات، ہدایا، زکات و صدقات اور احسان مندیوں سے آزاد نہ ہوں۔ اور یہ اسی وقت ممکن ہے جب کہ یہ اپنی محنت سے اپنی و اہل وعیال کو دوسروں کا دست نگر بنائے بغیر خود سے ان کی بنیادی ضروریات پوری کرنے کے قابل نہ بن جائیں۔ اس کے لئے ایک منصوبہ بند طریقہ کار کی ضرورت ہوگی۔ جو فی الحال دور دور تک نظر نہیں آتا۔مدارس اور دینی مراکز سے یہ امید رکھنا کہ وہ اتنی تنخواہیں دیں گے جن سے مدرسین کی ضروریات زندگی پوری ہوں، تو یہ کھیلنے کے لئے مانگے چاند والی بات ہوگی ۔
یہ بات سمجھنی ضروری ہے کہ اللہ تعالی نے ہر ایک کو یکساں صلاحیتیں نہیں دی ہیں، اوراگر سب کی یکساں صلاحیتیں ہو ں تو دنیا کا کام کیسے چلے، کیونکہ دنیا چلانے کےلئے حافظ، عالم، سائنس داں، جغرافیہ داں، صنعت کار ، تاجر اور ملازم و محاسب سبھوں کی ضرورت ہے، دنیا کا کاروبار اس وقت صحیح چلتا ہے جب کہ دھنک کے ساتوں رنگ موجود ہوں۔ بس ضرورت اس بات کی ہے ان میں باہمی ربط وتعاون ہو۔ لہذا علماء و فارغین میں جو تجارت اور صنعت کاری کی صلاحیت رکھتے ہوں ، اور جو صرف ملازمت کرسکتے ہوں، ان میں تال میل ہو، اور آپس میں افہام وتفہیم سے چھوٹی موٹی تجارت ہو، لیکن یہاں سوال امانت داری کا آتا ہے، اس کی ضمانت کہاں سے لائی جائے۔ یہی وجہ ہے کہ ہمارے اچھے سے اچھے پروجکٹ اور منصوبے تھوڑی ہی مدت بعد دم توڑدیتے ہیں۔ اور ناکامیابی اور مایوسی ڈیرہ کرنے لگتی ہے۔ اس سلسلے میں مسلسل ٹھنڈے دل سے سوچنے اور غور کرنے کی ضرورت ہے۔ جب تک ہم خود اپنی برادری کی باہمی خیر خواہی اور تعاون کی بنیاد پر ترقی وبہبود کے لئے سوچنے اور مختلف صلاحیتوں کو یکجا کرکے آگے بڑھنے کی کوشش نہیں کریں گے۔ مدارس کی روز بروز گرتی صورت حال سے چھٹکارا مشکل ہوگا۔
یہاں یہ بات ذہن میں رکھنے کی ہے کہ برصغیر میں جب فاتحین کے گھوڑوں کی ٹاپوں کے ساتھ اسلام در خیبر کے راستے داخل ہوا، تو ان کے مزاج میں جہانگیری اور حکمرانی تھی، زمین داری ان کے مزاج کو بھاتی تھی،ملک زراعتی تھا، تجارت ان میں پنپ نہ سکی، لہذا بر صغیر کی جب آزادی ہوئی تو زمینداری کے ہاتھوں سے نکلنے کی وجہ سے مسلمانوں کا بڑا طبقہ مختصر عرصہ میں قلاش ہوگیا، لیکن بد قسمتی سے زمینیں ہاتھوں سے نکلنے کے باجود زمیندارنہ مزاج کی جو سماجی و معاشرتی خرابیاں تھی ان کے خوں سے نہ نکل سکیں۔ اس کا نتیجہ سامنے ہے، ہمارے مدارس اور تعلیمی ادارے زمیندارانہ انداز ہی سے چلتے ہیں، اقرباء پروری، اور خاندانی قبضوں کی جو شکایتیں روز بروز ہمارے کانوں میں پڑتی ہیں آخر یہ کیا ہیں؟۔ اداروں پر باپ کے بعد بیٹے کے قبضے کے تذکرے تو روز سننے میں آتے ہیں، لیکن قوم کی اکثریت کا مزاج باپ کی جگہ بیٹے اور پوتے کو قبول کرنے کا ہوگیاہے۔ لہذا جو لو گ اداروں میں موسساتی نظام، دستور وغیرہ کی بات کرتے ہیں ان کی آواز صدا بہ صحراء ثابت ہوتی ہے۔ انہیں سپورٹ کرنے والے نہیں ملتے۔

❤1

429 viewsAbdul Mateen Muniri, 05:40