علم و کتاب

*غلطی ہائے مضامین*

*عشق رَجعت ہے کہ اقدام ہے؟ معلوم نہیں!*

*احمد حاطب صدیقی (ابونثر)*

مالیگاؤں، ہند سے تعلق رکھنے والے جناب ذکی انور ہمدانی نے میلبورن، آسٹریلیا سے ایک نامۂ طویل ارسال فرمایا ہے۔ ہم تو دل تھام کر بیٹھ گئے کہ ’’کس ’طوالت‘ کے یہ نامے مرے نام آتے ہیں‘‘۔ بہرحال، تلخیص اس ’نامۂ طویل‘ کی پیشِ خدمت ہے۔ فرماتے ہیں:

’’عرض یہ ہے کہ لفظِ رجوع کے دو استعمالات عرصے سے میرے ذہن میں ایک لطیف اشکال پیدا کررہے ہیں۔ کہا جاتا ہے کہ کسی مسئلے کی توضیح کے لیے فلاں کتاب یا فلاں اُستاد سے رجوع کیجیے۔ مفہوم گویا کسی سرچشمۂ علم،کسی مرجعِ استناد یا کسی ماخذِ معرفت کی طرف رُخ کرنے اور استفادہ کرنے کا ہے۔ دوسری جانب یہی لفظ اس مفہوم میں بھی مستعمل ہے کہ کسی شخص نے اپنی سابقہ رائے، موقف یا دعوے سے رجوع کرلیا۔ یہاں کسی شے کی طرف رُخ کرنا نہیں، بلکہ اس سے دست بردار ہونا یا اس کے دائرۂ التزام سے باہر نکل آنا ہے۔ یہی پہلو موجبِ حیرت ہے کہ ایک ہی لفظ ایک مقام پر قرب، توجہ اور اقبال کا مفہوم ادا کرتا ہے، دوسری جگہ بُعد اور انقطاع کا تاثر اُبھرتا ہے۔ دریافت طلب امر یہ ہے کہ لفظ رجوع کی اصل معنوی اساس کیا ہے؟‘‘

صاحب! آپ ہم سے مستفتی ہیں کہ ’’لفظ رجوع کی اصل معنوی اساس کیا ہے؟‘‘ جب کہ یہاں بجز ندامت کے پاس کیا ہے۔ ایسے متضاد معنی رکھنے پر ہم اس لفظ کی طرف سے ندامت کا اظہارکرتے ہیں اور اسی لفظ کی جانب سے آپ سے معافی کے خواستگار ہیں۔ نیز یہ کہ اس لفظ کی وجہ سے آپ کو جو حیرت کرنی پڑی اس کے لیے معذرت۔

بعد معذرت کے، عرضِ خدمت ہے کہ لفظ ’رجوع‘کی ’اصل معنوی اساس‘ جاننے کو ہم نے لغت سے رجوع کیا تو لغت نے ایک نیا شوشہ چھوڑ دیا۔ ہمیں ڈانٹا کہ درست ترکیب ’رجوع کرنا‘ نہیں، ’رجوع لانا‘ ہے۔ چلیے، ہم لغت سے رجوع لائے تو پتا چلا کہ اس لفظ کی اساس ’رجع‘ ہے جس کے متعدد معانی میں سے چند معنی ’لَوٹنا، جھکنا، مائل ہونا، واپس آنا یا دوبارہ آجانا اور عود کرنا‘ ہیں۔ مزید یہ کہ ’راجع‘ کہتے ہیں ’واپس آنے والے یا لوٹ آنے والے‘ شخص کو۔ ’راجع‘ کی جمع راجعین اور راجعون ہے۔ اللہ کے ہاں سے ہمارے ہاں آنے والی کوئی (نیک یا بد) روح کسی دن واپس اللہ کے پاس چلی جائے تو ہم کہتے ہیں کہ ’’اِنّا للہ‘‘ہم اللہ ہی کے ہیں، ’’وَاِنّا الیہ راجعون‘‘ اور ہم اُسی کی طرف لوٹ کر جانے والے ہیں۔

لَوٹ جانے کی اصل معنوی اساس یعنی ’رجع‘ ہی سے اِسم بنا ’رجوع‘۔ مطلب ہے: واپسی، جھکاؤ، مَیلان اور رغبت۔ بیوی سے بے رغبتی ہوجائے اور پھر ایک یا دو طلاق دینے کے بعد عدت کی مدت کے اندر اندر شوہر اپنی رغبت سے بیوی کو واپس زوجیت میں لے لے تو اسے بھی ’رجوع‘ کہا جاتا ہے۔ ایسی طلاق بھی ’طلاقِ رجعی‘ کہلاتی ہے۔ ان سب مثالوں سے ظاہر ہوتا ہے کہ ’رجوع‘ کا اصل اور اساسی مفہوم قرب، توجہ اوراقبال ہی ہے۔ خواہ کسی کتاب اور اُستاد سے رجوع لایا جائے یا اپنے مؤقف اور خیالات سے رجوع کیا جائے۔ بھئی،سیدھی سی بات ہے ، کسی شخص نے اپنے غلط مؤقف اور اپنی خام خیالی سے رجوع کر لیا یا دست بردار ہوگیا، تو گویا وہ شخص درست مؤقف اور صحیح خیالات کی طرف واپس آگیا، یعنی حق کے قریب ہوگیا۔حق سے رجوع لے آیا۔

’رجوع لانا‘ فصیح ترکیب سہی، مگر فصحا نے ’رجوع کرنا‘ کی ترکیب بھی بکثرت استعمال کی ہے۔مثلاً میرتقی میرؔ کہتے ہیں::

رہے حال دل کا جو ایک سا تو رجوع کرتے کہیں بھلا
سو تو یہ کبھو ہمہ داغ ہے، کبھو نیم سوز کباب ہے

اسی طرح شیخ امام بخش ناسخؔ بھی بلبل بن کر گُل سے استفسار کرتے ہیں کہ

ایسا طبیب کون ہے اے گُل کہ بارہا
تجھ سے رجوع نرگسِ بیمار نے کیا

جھکنا اور مائل ہونا کے معنوں میں ایک ترکیب ’رجوعِ قلب‘ بھی رائج ہے، جس کا مطلب ہے دلی توجہ۔شَرَف کا شعر ہے:

کریمی اُس کی بھر دیتی شرفؔ دامن مرادوں سے
رجوعِ قلب سے جو بندۂ عاجز دُعا کرتا

رَجع سے بننے والا ایک اور لفظ ’رَجعت‘ ہے۔’رُجوع‘ کے ’’ر‘‘ پر تو پیش ہے، مگر’رَجعت کے’ر‘ پر زبرہے۔اِسے پیش کے ساتھ پڑھنا درست نہیں۔’رَجعت‘ ہمارے ہاں کثرت سے استعمال ہوتا ہے۔ اُردو میں یہ لفظ عموماً پسپائی کے معنوں میں لیا جاتا ہے، جو پیش قدمی یا اِقدام کی ضد ہے۔ رئیسؔ امروہوی عشق سے متعلق اپنی لا علمی (’ہم بہو بیٹیاں یہ کیا جانیں؟‘) کا اظہار کرتے ہوئے استفسار کرتے ہیں:

عشق رَجعت ہے کہ اِقدام ہے؟ معلوم نہیں!
یا فقط اِک روشِ عام ہے؟ معلوم نہیں!

رَجعت بھی پیچھے ہی مُڑنے کا عمل ہے۔ جو لوگ ماضی کی طرف حسرت بھری نگاہوں سے دیکھتے ہیں وہ ’رَجعت پسند‘ کہلاتے ہیں، یعنی ’قدامت پرست‘۔ سیاسی اصطلاح میں ’رَجعت پسندی‘ ضد ہے ’ترقی پسندی‘ کی۔ یہ الگ بحث ہے کہ آج کل جو لوگ اپنے آپ کو ’ترقی پسند‘ کہتے ہیں وہ واقعی آگے بڑھنا چاہتے ہیں یا پتھر کے دور تک پسپائی اختیار کرنا چاہتے ہیں۔ بھلا پتھروں کی پُوجا کون سی ترقی پسندی ہے؟ ہاں پتھر کے بتوں کو پاش پاش کردینا البتہ انقلابی اِقدام، پیش قدمی اور ترقی پسندی

727 viewsAbdul Mateen Muniri, 08:52