Tantanali ochilish marosimida Murotjon Berdialiyevich Azimov va universitet rahbariyati ishtirokida ramziy lenta kesilib, universitetning yangi kampusi rasman ochildi.

Tashrif davomida hurmatli mehmonlar universitetda talabalar uchun yaratilgan zamonaviy sharoitlar bilan yaqindan tanishib, universitetdagi bunyodkorlik ishlarini koʻzdan kechirib kerakli malumotlarga ega boʻlishdi.

10 gektar maydonda barpo etilgan kampusning loyiha qiymati qariyb 400 milliard so‘mni tashkil etadi. Mazkur majmua bir smenada 10 ming 200 nafargacha talabani qabul qilish imkoniyatiga ega.

Universitet hududida 800 o‘rinli faollar zali, 820 o‘rinli oshxona, 1 250 o‘rinli talabalar turar joyi, yopiq va sport maydonlari kabi zamonaviy infratuzilma obyektlari mavjud.

Shuningdek, mehmonlarga universitetning ta’lim salohiyati, professor-o‘qituvchilar tarkibi va xalqaro hamkorliklari haqida ma’lumot berildi. Ayni paytda universitetda 24 ming nafar talaba tahsil olayotgan bo‘lib, 400 nafarga yaqin professor-o‘qituvchi faoliyat yuritmoqda. Universitet 27 ta xorijiy davlat oliygohlari bilan hamkorlik aloqalarini yo‘lga qo‘ygan.

Tadbir davomida Qashqadaryo viloyati hokimi Murotjon Berdialiyevich Azimov hamda universitet rahbariyati so‘zga chiqib, yangi kampusning ta’lim tizimidagi ahamiyati, yoshlar uchun yaratilayotgan imkoniyatlar va kelgusidagi istiqbollar haqida fikr bildirdilar.

Yangi kampusning foydalanishga topshirilishi Iqtisodiyot va pedagogika universitetining moddiy-texnik bazasini yanada mustahkamlash, ta’lim jarayonini zamonaviy talablar asosida tashkil etish hamda talaba-yoshlar uchun munosib ta’lim muhitini yaratish yo‘lidagi muhim qadam bo‘ldi.