Ikki kun davom etgan anjumanning yakuniy qismida Iqtisodiyot va pedagogika universiteti rektori Bozorov Otabek Nashvandovich xorijiy davlatlardan tashrif buyurgan mehmonlarga samimiy minnatdorlik bildirib, ularning xalqaro ilmiy-amaliy anjumandagi ishtiroki, bildirgan fikr-mulohazalari hamda ilmiy hamkorlikni rivojlantirishga qo‘shgan hissasini alohida e’tirof etdi. Mehmonlarga universitet nomidan esdalik sovg‘alari topshirildi.

Tadbir davomida ilmiy va pedagogik faoliyati, ta’lim hamda ilm-fan rivojiga qo‘shayotgan hissasi bilan ajralib turgan bir qator professor-o‘qituvchilar ham tegishli unvonlar bilan taqdirlandi. Ushbu e’tirof ularning kasbiy faoliyati va ilmiy izlanishlariga bildirilgan yuksak hurmat ifodasi bo‘ldi.

Mazkur xalqaro ilmiy anjumanda mamlakatimiz hamda xorijiy davlatlardan tashrif buyurgan professor-o‘qituvchilar, olimlar, tadqiqotchilar, tayanch doktorantlar va soha mutaxassislari ishtirok etib, ilm-fan va texnologiyalarning dolzarb masalalari yuzasidan o‘z ilmiy qarashlari, izlanishlari hamda amaliy tajribalari bilan o‘rtoqlashdilar.

Anjuman doirasida turli ilmiy yo‘nalishlar bo‘yicha ma’ruzalar tinglanib, zamonaviy ilm-fan oldida turgan dolzarb muammolar, ularning yechimlari va xalqaro ilmiy hamkorlikni rivojlantirish istiqbollari muhokama qilindi. Shuningdek, universitet talabalari ham ilmiy ma’ruzalarni tinglab, o‘z bilim va dunyoqarashlarini kengaytirish imkoniyatiga ega bo‘ldilar.

Anjuman yakunlari kelgusida yangi ilmiy tashabbuslarni amalga oshirish, istiqbolli hamkorlik aloqalarini rivojlantirish va ilm-fan taraqqiyotiga xizmat qiluvchi loyihalarni ro‘yobga chiqarish uchun mustahkam zamin yaratdi.

Uchrashuv davomida talabalarni qiziqtirgan savollar, ularning taklif va mulohazalariga alohida e’tibor qaratildi. Shuningdek, yoshlarning bilim olishga bo‘lgan intilishini qo‘llab-quvvatlash, tashabbuslarini rag‘batlantirish hamda universitet va talabalar o‘rtasidagi samarali muloqotni mustahkamlash yuzasidan fikr almashildi.