Bu ruknning savollari har kuni soat 19:00da eʼlon qilinadi.

#navbatdagi_mutolaa

Hamma jim turgan joyda haqiqat ham jim turadimi?

Ba’zan inson osoyishtalik izlab uzoqlarga ketadi. Ammo o‘tmishdan, xotiralardan, vijdon oldidagi savollardan qochib qutulish mumkinmi?

Said Ahmadning “Jimjitlik” romani bizni ana shu savollar ustida o‘ylashga chorlaydi.

Asar markazida ikki inson — Tolibjon va Mirvali turadi. Bir qishloqda ulg‘aygan, ammo hayotga qarashlari turlicha bo‘lgan bu qahramonlar taqdiri orqali yozuvchi insoniylik, adolat, manfaat va vijdon masalalarini o‘rtaga tashlaydi.
Bu roman faqat voqealarni kuzatish uchun emas, insonlarni anglash, ularning qarorlari ortidagi sabablarni izlash uchun ham o‘qiladi.

“Irmoqlar bilan 30 kitob” marafonida navbatdagi mutolaamiz — “Jimjitlik”.

Kitobni birga o‘qiymiz, qahramonlarni kuzatamiz va eng muhimi, tayyor xulosalarni emas, o‘z javoblarimizni izlaymiz.

Siz ham mutolaaga qo‘shiling. Balki bu roman sizni anchadan beri o‘ylantirib kelayotgan savollarga boshqacha qarashga undar.

#Tafakkur

Nega ba’zi insonlar boshqalarning ilmli bo‘lishini istamaydi?

Said Ahmadning “Jimjitlik” romanida bir-biriga zid ikki qarash to‘qnashadi.

Tolibjon salkam 20 ming kitobini qishloqqa sovg‘a qilib, bolalar uchun kutubxona tashkil etmoqchi. Uning maqsadi — yoshlarning dunyoqarashini kengaytirish, ularni bilimli, mustaqil fikrlaydigan insonlar qilib tarbiyalash.

Mirvali esa bunga mutlaqo boshqacha qaraydi:

“Menga ishchi kerak, olim emas, ishchi.”

Uning keyingi gapi esa yanada o‘ylantiradi:

“Ilmi bo‘lsa, tili chiqadi.”

Bir inson ilmni jamiyat taraqqiyotining asosi deb bilsa, boshqasi uni o‘z manfaatlariga tahdid sifatida ko‘radi.

Mirvali qishloqning bugungi ehtiyojlarini o‘ylayotganini aytadi. Ammo bu ehtiyojlar yoshlarning kelajagini cheklashga asos bo‘la oladimi?

Sizningcha, rahbar jamiyatning bugungi ehtiyojlarini qondirish uchun yoshlarning kelajagini belgilashga qanchalik haqli?

Mirvalining qarashlarida asosli xavotir ham bormi yoki bu o‘z manfaatini jamiyat manfaatidan ustun qo‘yishmi?

Fikringizni izohlarda asoslab bering.

Said Ahmadning “Jimjitlik” romanini mutolaa qilishda davom etamiz. Zero, yaxshi asar bizga tayyor javoblarni berishdan ko‘ra, o‘zimizni savolga tutishga o‘rgatadi.