🇺🇿 Bosh vazir qashqadaryolik tadbirkorlar bilan ochiq muloqot o‘tkazdi

Prezidentimiz Shavkat Mirziyoyev tomonidan tadbirkorlikni rivojlantirish, yangi ish o‘rinlari yaratish, aholi daromadlarini oshirish hamda biznes uchun qulay shart-sharoitlar yaratish bo‘yicha belgilab berilgan vazifalar ijrosi doirasida bugun Qarshi shahrida O‘zbekiston Respublikasi Bosh vaziri Abdulla Aripov rahbarligida qashqadaryolik tadbirkorlar bilan ochiq muloqot bo‘lib o‘tdi.

Unda 300 nafardan ziyod tadbirkor ishtirok etdi. Ular orasida to‘qimachilik, farmatsevtika, qurilish, xizmat ko‘rsatish, qishloq xo‘jaligi va boshqa sohalarda faoliyat yuritayotgan ishbilarmonlar bor.

Muloqotning muhim jihati - tadbirkorlarning muammo va takliflarini bevosita mas’ul rahbarlarga yetkazish hamda imkon qadar shu joyning o‘zida hal etishga e’tibor qaratilganidir.

Uchrashuvda tegishli vazirlik va idoralar rahbarlari, viloyat tashkilotlari, tuman va shahar hokimlari ham ishtirok etdi.

Tadbirkorlar biznesni yuritish va kengaytirish, yangi loyihalarni amalga oshirish, moliyalashtirish, infratuzilma, yer va boshqa masalalar bo‘yicha o‘z takliflarini bildirdi.

Har bir murojaat mas’ul rahbarlar ishtirokida ko‘rib chiqildi. Qo‘shimcha o‘rganishni talab etmaydigan masalalar joyida hal etildi, qolgan murojaatlar bo‘yicha esa aniq chora-tadbirlar, ijro muddatlari va mas’ullar belgilandi.

Asosiy maqsad - Prezidentimiz ta’kidlaganlaridek, tadbirkorga to‘siq bo‘layotgan muammolarni bartaraf etish, biznes tashabbuslarini qo‘llab-quvvatlash va yangi loyihalarni hayotga tatbiq etish uchun zarur sharoitlarni yaratishdan iboratdir.

📱Gov.uz| 📱Telegram| 📱YouTube| 📱FB|📱Instagram| 📱X