‏أنت وينك ؟
‏يا اللي انسى الناس مع طلّة جبينك !

لفّي الشال غطّي ما استطعتي .. حرام
تفتنين اللي بذمّتْه بيت ومَرَة

من لمحتك وانا ماني على ما يرام
ويمّك الشوف ما استغفر وغضّ بْصَرَه !

وجه فيني نفش عهن الشعر والهيام
واستجنّ القصيد وداج سبْع ابحره

وجه والكامل الله كنّ فيه التمام
حسنه العذب سبحان اللذي صورّه

خدّ لا من ضحك كنّه يغيض الظلام
وجفن لا من رمش كنّه يزفّ بْشَرَة

وفمّ لا من تكلّم .. طاح سوق الكلام
كل صوتٍ لغيره يعتبر .. ثرثرة

كنّ عينينك اللي من بياض وعتام
رمشها ريش تحته صفحة ومحبرة

وشَعرك تغار منْه الريح كلْ ما استقام
تعتصفْه وتروح بكلّ صوب شْعَرَة

كلّ هذا وخصرك عن حلال وحرام
ظنّي ينقاس بالفرجار والمسطرة

خصر وان صام له قطبين عيّوا الصيام
شفت خير بشمال وبالجنوب اكثره

هندسة جسم فيه الاختلاف انسجام
كلّ ما يستره من لبس .. ما يستره !

كنّ جيتي نيابة عن قدوم الغمام
كلّ موضع قدم تنبت عليه شجرة

اشهد ان بالحسن لك كلّ ذروة سنام
وان ما لك شبيه الا على المنظرة

مثلك ان مرّ ما يشبه مرور الكرام ،
مرّ رتّب شعوري بلحظة وبعثره

لو يكذب الشعر ما يصدق معاه الشعور
كذّاب من هو يقول انّ أعذبه .. أكذبه !

الشعر نبتة فكر والصدق غصن وجذور
لو ما ارتوى واستقام الغصن لمّ حْطبه

احسّني للشعر .. أوّل محطة عبور
يمرّ في خاطري قبل ايّ احد يكتبه

عندي للافكار صالة فنّ .. عندي قبور
افكار للمشنقة .. وافكار للمأدبة

انا على افكار شعري يا شعوري غيور
ما احبّ اجيب الكلام اللي الجميع كْتبه

في ساحة الشعر لو ما جبت مالا يدور
بذلت مجهود لكن ما صعدت عْتبه

حضوري المنقطع بالشعر ماهو قصور
البال ما كلّ فكرة عابرة تطربه !

لو كلّ ما مرّ بالي بكتبه للحضور
يمديني املي لعشاق الشعر مكتبة

‏والله انك ..
‏دايم فبالي تمرّ وما انشغل في يوم عنّك
‏والله انك ..
‏عمر ثاني .. والا عمري ما عرفته إلا منّك
‏لا تبادلني الأغاني !
‏يكفي صوتك أغنية
‏كيف في قلبك أماني ؟
‏وانت أصلا "أمنية"

تذكرينه ؟
كلماتي
لحن وغناء : عبدالله العامري
https://youtu.be/tv3QaEAEq3k

‏حنّا نفس العمر كيف انتي صغرتي؟
‏اعرف ان العمر ما يرجع لـ احد !

‏كم سنة مرّت .. وبعدك ما كبرتي
‏مثل ما كنتي قبل .. واجمل بعد !

‏كمّلك سبحانه الخالق .. وصرتي ،
‏حسن .. متشكّل على هيئة جسد !

‏تفتنين الليل حتى لو سهرتي
‏ودّه ان الشمس ما تشرق ابد !

‏حطّها براسك ..
‏انا ما احتاج أحد !
‏قلبي من عمره غَني
‏مهما فقد !
‏ولو عن عيوني تغيب
‏يبقى قدرك يالحبيب
‏مثل دمع ان طاح
‏ما يرقى ابد !

حجتي معك دائماً هي أننا نتشابه بذائقتنا الموسيقية

تسمعين ؟
للملامح صوت .. للنظرة أنين !
وبالشفايف ..
صمت .. رجفة حرف خايف
الحزن له صوت في وجه الحزين !
تسمعين ؟

لو مجرّد ..
ما تجي عينك بعيني
نظرتك فيني تمرّد !
لو مجرّد ..
ما تسولف لي ثواني
كلّ شي فيني يتورّد !
و وجهك اللي حيل احبه
بالحسن سبحان ربّه !
لا ابتسم مدري يهَديني
أو يخلّيني مشرّد !!

مساء الخير
هل التعليقات متاحة لكم؟

مو عابرة
انتي الطريق من اوّله
لين آخره.

جديدي اغنية #ما_رحمك
من كلماتي
غناء فواز الرجيب
الحان فهد الناصر

https://www.youtube.com/watch?v=Yplwai0Ai4k

الحبّ فزّة ، والأماني طيش ،
والشوق كلْ ما افارقه .. جاني

ما كنّه الا الدمع لقمة عيش
وزّعه ليّ الحزن مجّاني !

من كثر ما دارت فبالي "ليش؟"
احسّها انخلْقت على شاني !

وزن اغلب الاحباب خفّ الريش
مع كل نسمة .. صرت وحداني

احتاج اسوي داخلي تفتيش
واشوف انا المجني او الجاني ؟

اموت بعض احيان لجل اعيش
نصفي يموت لنصفي الثاني !

وكأنّ عيني خُلقت لحراسة الليل فهيَ لا تنام حتّى تشرق الشمس.

‏لو نفترق وش يقطع الاخبار ؟
‏لو ما ادوّرها .. هي تْجيني !

‏شبّي الحنين وطفّي الأنوار
‏يا الذاكرة .. لا تنسّيني !

‏انا على جرح الحبيب اغار
‏ما ودي بـ غيره يداويني

‏خلّيني اتعايش مع التذكار
‏ما دام هوّ اللي يسلّيني

‏يعيش حبّ ، وينبني ، وينهار
‏ويبقى شعور أوّل لقى فيني !

‏سهرت .. والليل ماهو للقلوب الضعاف
‏ان مرّني الشوق يشعل في حشاي الهب

‏الصمت صحراء بموت من العطش والجفاف
‏تكلّمي .. وتمطر الغيمة .. وينبت عنب

‏يا بنت واللي خلق فيك الحيا والعفاف
‏واعطاك هذا الجمال اللي يثير العجب

‏ان لك معي صادق احساس ونوايا نظاف
‏وشعور ماهو قليل "الا مناجم ذهب"

‏لا يشغلك لا قال هذا أو هذاك
‏في حبّنا ما احدٍ حبيبي له دخل
‏.
‏كلّ الكلام اللي يقولونه وراك
‏ما غيّر بحبّك .. ولا قدرك نزل !
‏.
‏ازعّل الدنيا واجي همّي رضاك
‏واقول غيرك ما لي بالدنيا محل
‏.
‏معاك انا ما همّني دامي معاك
‏يرضى من بيرضى ويزعل من زعل !

مو عشانك إعتذرتي لي .. رضيت
يوم شفتك ضايقة طاح الحطب !

ما ارضى ضيقك والله لو انّي دريت
هالزعل بيضايقك .. برضى غصب

انا من حبّك .. ولا عمري شكيت ..
لانّ احبك صدق .. مو على حسب

ما ملك قلبي سِواك .. وما بغيت ،
ليه ابي الفضة وانا عندي الذهب ؟

طالبك هالضيق لو طوّل .. شقيت
أنتِ راحة .. لا تحسّين بـ تعب !

كنّي بيدي يوم ضايقتك محيت
كلّ لون بهالحياة .. وكلّ حب !

أنتِ فيني باقية .. مهما بقيت ،
يعني واحد عين والثاني هدب !

ولو تركت قلوب وبأخرى إلتقيت ،
مثل حبّك حبّ .. والله ما أحب !

تذكرينه ؟
كلمات سعد الردعان
لحن وغناء : عبدالله العامري
https://youtu.be/tv3QaEAEq3k