Өмірден таңдап тапқан дара бағым-ау,
Қатулы қабағыма қарама мынау.
Сен шақырып,
Мен ылғи «бармаймын» деп,
Гүлден нәзік көңіліңді жараладым-ау.

Тағдыр — қатал. Көнуші ем үн шығармай сынға,
Болып алдым-ау бұл күнде қырсық әрқайсыңа.
Сенің орның басқадан бөлек қой, жаным,
Сөзімді тыңдай бермей, ұрсып алмайсың ба?

Сендей адам мен үшін анық көп дейсің бе,
Кештерімді қызық та, жарық та етпейсің бе?
«Бармаймын» дегеніме көне бересің бе,
Көздерімді тұндырып алып кетпейсің бе?!

Авторы: Күләш Ахметова

Б- ға

Сен мені кінәлама!
Өзіңдей мен ғашықпын бір ағаңа.
Бақытын айырбастар адамдар көп,
Сенің досың болмасын сыра ғана.

Сен маған өкпелеме!
Серісін сүйген сұлу жек көре ме?
Біз ешқашан бармаған, көріспеген,
Сырымды айтып отырмын Көктөбеге,
Шынымды айтым отырмын Көктөбеге.

Сен мені айыптама!
Жанарымда жарқылдар Жайық дала.
Екі-ақ адам жүзетін теңіз болса,
Екі-ақ адам еседі қайық қана.

Сен мені ұғасың ба?
Үмітім ұлы күнге ұласуда.
Сенің ағаң артатын сағыныштар,
Сені ғашық еткізді құба шыңға.

Сен мені кешір, күнім!
Ақылынан алжасты есім бүгін.
Кім маған дұрыс жолды нұсқар дейсің,
Келгенде шешімді күн.

Болсын десең жолың нұр, ісің дара,
Сен, қайыспа түңілер тұсыңда да.
Ал мен бәрін сүйемін, тек бір жанды
Ұмыту үшін ғана...

Авторы: Сәуле Нысанбек

Жан жарым бол, періштем.

Гүл ерніңе тамшы болып тамайын,
Таңғы шық боп қабағыңа қонайын.
Ханға қимас ханшайымым келіссең,
Өмір бақи бас уәзірің болайын.

Сарайдағы сан мың жүрек тыз етсін,
Әрекеттен байқасын жұрт ізет шын.
Бас уәзіргә жаратпасаң сен егер,
Мәңгі бақи болайыншы күзетшің.

Тал бойыңа жарасады тарпаңдық.
Ал мен жүрмін қалжыраумен арман ғып.
Күнде өзің бой жазатын бақтағы,
Тағайындап қоя салшы бағбан ғып.

Сарайыңда сарбазың боп кезіксем,
Міне, қалқам, ұсынысым келіссең,
Не деп кеттім, сандырақтап тәйірі,
Жан жарым бол, періштем

Авторы: Айдар Сейдәзім

"Қазақша кітаптар" арнасы, қазақ және әлем авторлардың кітаптары, электрондық нұсқада

МЕН БАРДА...

Ерітіп тағдыр тоң бетін
Танытпай кейпін енжардың.
Қамығар сенің жоқ ретің
Бақытты етер мен бармын.

Ұшардай көкке құс төсің
Ынтығым ноқта ағытты.
Көңілің мүлде түспесін
Мен бармын етер бақытты.

Көңіліңдегі құлыпты ал
Теңіңмен қыдыр, кем қалма.
Бойыңды жазып күліп қал
Сасасың несін мен барда.

Жүресің еркін тыныстап
Рухына жырым ас - қатық.
Кеудеңді шалқақ, тік ұстап
Мен барда мүлде саспа түк.

Өлеңнің айбат, сұсы бар
Жат оған сұқтан, көзігу.
Көңліңнен бұлтты ысырар
Барымды менің сезіну...

Авторы: Елубай Әуезов

Кеңейгенде ой-қиялдың алабы,
Көкейіңе түрлі сауал салады.
Сұрақ келді күндегіден ерекше,
"Махаббаттың түсі қандай болады?"

Ғашық болу - тәтті әуенді ыңылдау,
Сүйгеніңнің міні бар деп ұғынбау.
Көрген кезде қызартатын ұялтып,
Махаббаттың түсі болар қызылдау.

Төбеңе әкеп жылататын сұр бұлтты,
Шатты күйді қайғы-шер кеп жылжытты.
Сұп-суық боп сұрландырар барлығын,
Махаббаттың түсі бәлкім, сұрғылтты.

Ару отыр мұңнан алқа тағына,
"Аңсадым"-деп хат жазады жарына,
Сағыныштан сарғайтатын сарылтып
Махаббаттың түсі мүмкін, сары ма?

Жырлап талай сезім жайлы аңызды,
Көп ақындар сөздің майын тамызды.
Махаббаттың түсі емес, негізі
Махаббаттың шынайысы маңызды...

Авторы: Нұрсұлтан Нұртілеу

СЕНІ ҒАНА СҮЙЕМІН

Сені ғана сүйемін,
бір өзіңді,
қылығыңды сүйемін, мінезіңді,
сағыныштың сан батпан салмағынан,
жүз шаншылып жүрегім,
мың езілді.

Есіміңді еске алып күбірлесем,
таңғы түстей тәтті бір ғұмыр кешем,
сезінбес те ем тамшының тереңдігін
сезіміңе мен сенің үңілмесем.

Қиылып бір қарасаң үндеместен,
сұм дүние шығады мүлдем естен,
тақта отырған тәкаппар тағдырымды
қияр едім жолыңа дым деместен.

Алыстасаң –
аңсаймын,
аласұрам,
тағат тасып, шығады сабасынан,
жүрегімді тек сенің сөзің ғана
жазар еді сыздаған жарасынан.

Сені ғана сүйемін!
Бірақ, жаным,
сүйіктің боп мәңгі өмір сүре алмадым,
қараңғыда тауып ап тұтатарсың,
түнде сөнген жүректің шырағданын...

Авторы: Ұлықбек Есдәулет

Көздерің-ай, көздерің мөлдіреген -
Ешкім жаза алмаған ол бір өлең.
О, кездейсоқ мен оны көрмегенде
Соғып тұрған жүректі өлді дер ем.

О, мен бірақ ол көздей мөлдір емен.
Мен жоғалтқан сонда жүр сол бір әлем.
Сенi қайта көрмеуге көндірер ем,
Сезім қайдан лап етті өлді деген?

Көздерің-ай, көздерің - мөлдір әлем.
Мен де кеше дәл сендей мөлдірегем.
Көзімдегі от жарқ етті сөндi деген
Тосыламын, тосырқап енді неден?

...Көздерің-ай, көздерің мөлдіреген.

Авторы: Танакөз Толқынқызы

Өтiнiш

Мазаламайын,
Мазаламашы.
Тып-тыныш өмiр сүрейiк.
Сен менi мүлде жазаламашы,
Түк болмағандай жүрейiк.

Сағындырмайын,
Сағындырмашы.
Жаныма тыным бер менiң.
Ессiз сезiмге бағындырмашы,
Болмайын сенiң ермегiң.

Ғашық етпейiн,
Ғашық етпешi.
Жiгердi құмдай езбешi.
Жанымды менiң жасын етпешi,
Қайғы-мұңымды сезбешi.

Күттiрмейiншi,
Күттiрме менi.
Кездесуге де шақырма.
Бiр бақыт ұзақ күттiрген едi.
Сен олай етпе, мақұл ма.

Осының бәрiн терiс дейiкшi,
Бұл менiң қатал жарлығым.
Осы айтқандарға келiспейiкшi,
Керi iстейiкшi барлығын.

Авторы: Бейбіт Сарыбай

Мендей кім бар ақ жаныңды ұға алған,
Сендік жүрек тәтті сырдан нәр алған.
Неге бізге арнамызды қоспасқа,
Екеумізде егіз мақсат, бір арман.

Пәк көңілмен жағып үміт алауын,
Келін болу - сенің асыл қалауың.
Бойдақтықтың бұзып тастап бөгетін,
Тіксем деймін мен де неке жалауын.

Оқу дейсің, басқа дейсің, қайтесің,
Құрғыр тірлік, күйсін, мейлі, өртесін.
Саф сезімді төсек қылып жастанып,
Жамылалық махаббаттың көрпесін.

Уайым құрсап, маза таппай тұрарсың,
Жалғыздықтың азабына шыдар кім.
Отау құрған ғашықтарды көргенде,
Мен сияқты қызығатын шығарсың.

Тәңір ешбір жанға қинау салмаған
Адам өзі тағдыр жолын таңдаған.
Шын бақытты жанұяны құрамыз,
Келші қалқам, сеніммен қол соз маған...

Авторы: Нұрсұлтан Нұртілеу

Жапырақтай күн сүйген жайқалғаныммен,
Табысқандай болғанмен қайта арманыммен.
Сен сағынып келгенде алыс жолдан,
Айтайын дегенімді айта алмадым мен.

Бәрін жақын алмашы, жаным жүрегіңе,
От деміңнен кеудемде жалын жыр өріле.
Толқығаннан төгіліп жылағанымда
Жұбата алмай соншама әбіржігенің не?

Есіңе салсын... санаңды қозғасын да өлең.
Есіңе салса, осынау тозбасын да өлең.
Тұла бойы тұншыққан тұнық сырымды
Мен сонда айтқан шығармын көз жасымменен.

Самал сазың тербетіп жан-орманымды,
Сыйғыза алмай жүрек пен жанарға мұңды -
Көз жасыма қосып ем құштарлығым мен
Қанаттары қайырылған бар арманымды.

О, мен қалай сүйемін нұрлы, ізгі әніңді.
Мендей сенің сыздатпас бір қыз жаныңды —
Жинайсың сен ып-ыстық ерініңменен
Жанарымнан шашылған жұлдыздарымды.

Авторы: Күләш Ахметова

Түк қалмады жылынарлық
Сезім-жалған!
Біліп алдық.
"Сен болмасаң өлем" деді ол
...Екеуміз де тірі қалдық

Мен аманмын! Ол да аман!
Жалғыз өзім...
Қолда балам!
"Өліп қалам әйтпесе" деп
Үйленіп ед зорға маған

Алладан бақ сұрағанбыз
Уақытша ма ұнаған қыз?
"Сен болмасаң өлем" деген
Екеуміз де дін аманбыз

Түсірдің бе сезімге кір?
Баққа болдың өзің кепіл!
"Сен болмасаң өлем" дедің
Тым болмаса сөзіңде тұр!

Авторы: Айдана Сегізбаева

Телефоннан өшіргенмін атыңды,
Күтпеу үшін келмейтұғын хатыңды.
Келді ұмытқым өліп қалған өзімді
Келді ұмытқым іштегі ұлы ақынды.

Сөйлемеуге серт байласқан тау сынды
Үндемеуден түгесілдім... Таусылдым...
Өшірдім мен мың жыл сүйген даусыңды
Өз өмірім өзіме енді жау сынды.

Қайтем саған арқалатып ар мұңын?
Сәлеміңе татымады бар құным...
Өшіргенмін қалдырмастан қалдығын,
Өшіргенмін өшірместің барлығын.

Көздеріме әлдененің тұнғанын
Ішімдегі әлдененің сынғанын.
Өшіргенмін көрсетпестен ешкімге
Өшті солай сүйген ай мен жылдарым.

Күн екен ғой! Күн екен ғой таң көркі.
Ақынмын ғой, қайта сүю қалды еркі.
Өшті бәрі...
Мен де өшемін уақытпен
Өшпей қалған жалғыз нәрсе - жан дерті...

Авторы: Танакөз Толқынқызы

ЖҮРЕКПЕН СҮЙЕ АЛМАУ...

Туары - тауық қыт-қыты
Болмаса қамы құлқынның.
Кескіні мынау, сықпыты
Қай жерін сүйем ұлтымның.

Садаға батыр, ұлыдан
Жексұрындықпен әйгі елім.
Азғындап әбден құрыған
Сүйейін айтшы қай жерін.

Өткенде енші тұрды бақ
Бүгінді теңге билеп шын.
Төсіңді соғып ұрғылап
Қалайша жалған сүймексің.

Тірідей көрің қазылды
Қудық қой алғыр миды елден.
Жылаған хәлің қазіргі
Ерінмен ғана сүйгеннен.

Дейсің бе, құдай сынағы
Шаршамайсың ба алдаудан?
Опасыздығың шығады
Жүрекпен сүйе алмаудан...

Авторы: Елубай Әуезов

Қызыл көрпе

Тәтті ұйқының құшағына беріліп,
Жатты сұлу шалқасынан керіліп,
Ақ дидарын, аппақ тәнін көргенде
Бойым балқып, кетті сезім еліріп.

Ай секілді маңдайдағы қиғаш қас,
Беттегі мең - сайда жатқан қара тас.
Дем шығарып кеудесінен жұпардай,
Қорғасындай толықсиды қарындас.

Ақ етіне қызыл көрпе басылып,
Көкірегі жатыр екен ашылып:
Діріл қақты уылжыған қос алма,
Қара шашы толқындай боп шашылып.

Күнім туып бақ жұлдызым жанатын,
Қымтап, шымқап, жаным рақаттанатын,
Болсам етті, әттең дүние-ай, сол көрпе,
Құшып, сүйіп, құмарым бір қанатын.

Дәурен қайда маған оны сүйетін?
Тым болмаса киімінің киетін,
Не сол көрпе астарының бір сабақ
Жібі болсам денесіне тиетін!

Авторы: Әзілхан Нұршайықов

ЛАЙЫҚСЫҢ

Сүйгем сені қарамай тосқауылға,
Ақыл қосқан тыңдамай дос, бауырға.
Сен де қалқам лайықсың бір жүруге,
Ұлы арманға жүйрігін қосқан ұлға.

Бір жүргенің жарасар қатар басып,
Бұйырса екен бөлісіп, татар нәсіп.
Қанағатын бергенде жүректердің
Бар ләззатқа бұлықсып батар ғашық.

Өмір сонда ерекше мәнге енеді,
Таңдайыңа білінер дәм бөлегі.
Ақық сезім біздерде қоспасы жоқ,
Құзар шыңға жеткізу ең керегі.

Жұртқа салсаң сезімге қоймақ нүкте,
От боп жанған сезімді ойнап түртпе.
Өліп-өшіп сүю тән екеумізге,
Қажеті жоқ табудың ойлап түк те...

Авторы: Елубай Әуезов

Жастық

(қысқартылып алынған)

...Боз үйге кіріп,
Буының құрып,
Жарыңның барсаң қасына,
Сипалап жүріп,
Төсегін біліп,
Тигенде қолың басына,
Ақылың кетіп, жан қалар,
Ғашығың сонда аңғарар.

Қолынан тартып,
Білегін артып,
Ақ тамақтан шөп етіп,
Тал бойың еріп,
Тіліңді беріп,
Сүлдерің қалар ес кетіп.
Ах, дүние, дүние!
Сонда ақылға кім ие?!

Есіңді жиып,
Иіскелеп сүйіп,
Оған да көңілің басылмай,
Тілекті алып,
Тоятың қанып,
Құйылып түскен лашындай,
Арманың бітіп жымыңдап,
Төсінде жатсаң тынымдап.

Авторы: Шәкәрім Құдайбердиев

Тереземнен енген кезде көк аспан,
Көңіл шіркін көк аспанмен таласқан.
Көк аспаннан көрем тұнық көзіңді
Ақ жүзіңе ай секілді жарасқан.

Ғашық жаны қайдан табар миятты?!
Көкіректен сазы бөлек күй ақты.
Көл-көсір боп, көз жетпейтін көкжиек –
Саған деген сағынышым сияқты.

Қара жерге жауған аппақ қар қандай,
Аппақ неткен, аппақ неткен армандай!
Ақша қарды «адалдығың» деп білем,
(Адал адам білмейді ғой жанды алдай).

Құзар шыңға құс боп ұшар өлеңім,
Сен ғой, қалқам, өлеңім де, сенерім.
Сондықтан да табиғаттан тек қана
Мен өзіңді, тек өзіңді көремін...

Авторы: Рахат Қосбармақ

ӘЙЕЛІМ...

Дүбірлерде тұрақ таппай дәйегім,
Жолдасқа да, құрдасқа да бай едім.
Сынай қарап, былай қарап ақыры,
Нағыз досты таңдап берді әйелім.

Сіңіп қалған бала кезден санамда,
Әйел — сыншы, әйел күшті ғаламда.
Білектіге бой бермейтін баяғы,
Жеңгемізден жеңіліпті ағам да.

Тауысайын дауа болған қай емін?,
Жиынқұмар, серілікке сай едім.
Үй көрмейтін түздің тарлан тағысын,
Үйкүшікке айналдырды әйелім.

Әйел — құтың, әйел сенің бақытың,
Әйел — кітап күндіз мейлі оқы түн.
Ашып-жауып өтіп жатыр қараумен,
Көп бетіне, көкбетіне уақытым.

Көріп едің көштерінен қай елдің?
Оңбайды деп бар ма айтуға дәлелің?
Ебін тауып төркініне жыл сайын,
Бастайтын да, қостайтын да әйелім.

Барлық шуақ әйелдерден тарайды,
Ес білгелі естіген сөз талайғы.
Қонақ біткен үйге келсе алдымен,
Әйелімнің қабағына қарайды.

Таңдады әйел үй, дүние, көлікті,
«Кім билікті бұған қашан беріпті?».
Күпінгенмен деп осылай көңілім,
Бірте-бірте оған-дағы көніпті.

Қалады әйел, қалағанын алыпты,
Барам десе, барар жерге барыпты.
Семірді әйел, одан кейін арыпты,
Жақпайды екен өмір оған қалыпты.

Онсыз сірә өмір сүру қиын-ды,
«Былай еткен, олай қылған тиімді»
Қосып жүріп тиынына тиынды,
Таңдап өзі алып берді киімді.

Таңдады әйел, тыңдамаған не қалды?
Жас қырықтың қақпасына тақалды.
Өстіп жүріп «Тозды ғой» деп төсегің,
Таңдап алып бермес пе екен Тоқалды?!

Айта берем қай қылығын, әлегін,
Күнде өстіп өзгертеді әлемін.
Әйел деген... Дәрісі жоқ диагноз,
Еркек біткен таба алмас әй... емін.

Авторы: Самат Нарегеев

КӨЗ АЛМАЙ НЕГЕ ҚАРАЙСЫҢ

Көрмеген бұрын кісің бе ем,
Қадалды неге жанарың?
Көп жанның мынау ішінен
Көз алмай неге қарадың?!

Бөтен сөз ешбір айтпайсың,
Кездесе қалсақ оңаша.
Ойланасың да, таппайсың
Жасқанған бейне балаша.

Елеусіз ғана сөз айтсам,
Құп алып, үнсіз қостайсың.
Қуанасың ғой бір қайтсам,
Көрмеген көптен достай шын.

Қадалса сенің жанарың,
Лүпілдеп жүрек... Солай шын...
Айтсаңшы, дал боп барамын,
Көз алмай неге қарайсың?!

Авторы: Фариза Оңғарсынова