די האנטינגטאן באנק האט היינט פארגעשטעלט א נייעם פראגראם מיטן נאמען 1866 סטודיא, געבויט מיט עי-איי טעכנאלאגיע פון גוגל קלאוד (GOOGL). דער פראגראם איז געמאכט פאר קליינע ביזנעסער, כדי זיי זאלן קענען באקומען הילף מיט פינאנצן, מארקעטינג און פארשידענע טעגליכע אויפגאבן פון איין פלאץ.

די סיסטעם נוצט גוגל'ס דזשעמיני מאדעלן און עי-איי אגענטן, וועלכע קענען העלפן א מענטש אויסארבעטן א פלאן פאר א נייעם ביזנעס, פארשטיין וועלכע פערמיטס ער דארף, צוגרייטן רעקלאמעס און איבערקוקן אויב די ביזנעס איז גרייט צו בעטן א הלוואה. די אגענטן קענען אויך געדענקען וויכטיגע אינפארמאציע איבערן ביזנעס כדי צו פארבינדן עטליכע עי-איי ארבעטער איינע מיט'ן אנדערן.

א פרישער רויטערס באריכט האט היינט ווידער אויפגעברענגט די וואקסנדע שפעקולאציעס אויף וואל סטריט איבער א מעגליכע טעסלא (TSLA) ספעיס-עקס (SPCX) צוזאמשטעל.

בארקלעיס אנאליסטן האבן שוין פאריגע וואך געזאגט אז אזא אפמאך קען מעגליך ווערן געמאלדן נאך פאר טעסלא'ס יערליכע שעיר-האלטער פארזאמלונג, וואס די פירמע האט היינט באשטעטיגט פאר דעצעמבער 3.

טעסלא, ספעיס עקס אדער מאסק האבן דערווייל נישט קאמענטירט אויף די קלאנגען.

מעטא (META) האט ארויסגעגעבן פרישע דעטאלן איבער איר ריזיגע עי-איי סופערקאמפיוטער, פראמעטעוס, אין אהייא. דער סיסטעם פארבינדט שוין הונדערטער טויזנטער שטארקע טשיפס פון ענווידיע (NVDA), אויסגעשפרייט איבער עטליכע געביידעס, אזוי אז זיי קענען ארבעטן צוזאמען ווי איין גרויסער קאמפיוטער.

דער פלאן איז צו פארגרעסערן דעם סיסטעם ביז ארום איין מיליאן טשיפס. מעטא נוצט די קאמפיוטער קראפט צו טרענירן אירע פארגעשריטענע עי-איי מאדעלן, אריינגערעכנט איר נייע מיוז ליניע פון מאדעלן. ווען מען טרענירט אזעלכע גרויסע מאדעלן, מוזן טויזנטער טשיפס אויסטוישן אינפארמאציע כמעט אין דער זעלבער צייט, און אפילו א קליינע טעכנישע פראבלעם קען אפשטעלן א גרויסן טייל פון די ארבעט.

מעטא זאגט אז דער ערשטער טייל פון פראמעטעוס איז שוין פארענדיגט, און אז זי האט שטארק פארבעסערט די שנעלקייט פונעם סיסטעם.

וויזא (V) האט געמאלדן א נייע צוזאמארבעט מיט די קריפטא פעימענט פירמע מעש, וואס זאל ערמעגליכן מענטשן צו באצאלן אין געשעפטן מיט ביטקוין און אנדערע קריפטא וואלוטעס אדער 'סטעיבלקוינס'. דער פלאן איז צו מאכן די געלטער נוצבאר אין געשעפטן וואס נעמען אן וויזא, אהן דעם וואס דער קויפער זאל דארפן אריבערפירן דאס געלט אין א געווענליכע באנק קאנטע.

די טעכנאלאגיע וועט פארבינדן דעם דיגיטאלן בערזל מיט וויזא'ס עקזיסטירנדע פעימענט סיסטעם, און מעש וועט זיך אפגעבן מיטן אומטוישן די דיגיטאלע וואלוטע אויף געווענליכע געלט, בשעת דער פארקויפער באקומט די באצאלונג דורכ'ן געווענליכן וויזא סיסטעם. דאס מיינט אז געשעפטן וועלן נישט דארפן אליין אננעמען אדער האלטן קריפטא.

וויזא'ס נעטווארק דערגרייכט איבער 175 מיליאן געשעפט לאקאציעס איבער דער וועלט, אבער די פירמעס האבן נאך נישט ארויסגעגעבן ווען דער סערוויס וועט זיך אנהויבן.

ענווידיע (NVDA) אינאיינעם מיט די דייטשע סימענס פירמע האבן פארגעשטעלט נייע עי-איי סיסטעמען אין א סימענס פאבריק אין דייטשלאנד, וואס זאל העלפן פאבריקן פלאנירן פראדוקציע און דורכפירן ארבעט מיט ווייניגער צייט, קאסטן און טעכנישע טעותים.

איינע פון די וויכטיגסטע טיילן איז א דיגיטאלע 'קאפי' פון די גאנצע פראדוקציע פראצעס. איידער מען הייבט אן מאכן א נייעם פראדוקט, קען מען אויספרובירן אין קאמפיוטער ווי די מאשינען וועלן ארבעטן, טרעפן פראבלעמען און פארבעסערן דעם פלאן. לויט סימענס האט דאס ביי געוויסע פראבעס פארקלענערט די ארבעט פון אינזשענירן מיט ביז 85 פראצענט און פארקירצט די צייט צו ברענגען א פראדוקט צום מארקעט מיט ביז 40 פראצענט.

אין צוגאב האבן זיי אהערגעשטעלט א צווייטע סיסטעם וואס נוצט עי-איי אגענטן צו טוישן פראדוקציע פלענער ווען עס פעלן טיילן, באשטעלונגען טוישן זיך אדער מאשינען זענען נישט גרייט.

דזשענעראל מאטארס (GM) האט געמאלדן א נייעם שעיר צוריק-קויף פראגראם צוריקצוקויפן ביז $20 ביליאן פון אירע אייגענע שעירס איבער עטליכע יאר.

די מעלדונג איז געקומען אינאיינעם מיט אירע פינאנציעלע רעזולטאטן פארן דריטן פערטל, ווען דזשענעראל מאטארס האט באריכטעט $50 ביליאן אין רעוועניו אין גרויסן טייל צו פארדאנקען שטארקע פיקאפ טראק סעילס.

אר-טי-עקס (RTX) מעלדט אז זי האט דערגרייכט א רעקארד פון $340 ביליאן אין באשטעלונגען וואס זי דארף נאך אויספירן. דערפון זענען $164 ביליאן פאר מיליטערישע פראדוקטן און $176 ביליאן פאר ציווילע פליגער און פארבונדענע סערוויסעס.

אינעם דריטן פערטל האט די פירמע באקומען נייע קאמערציעלע און מיליטערישע קאנטראקטן אין ווערט פון איבער $81 ביליאן. די שטארקע נאכפראגע קומט צווישן אנדערע פון מיליטערישע ראקעטס, ווי פטריאט און טאמאהאק, און פון טיילן און מאטארן פאר פאסאזשיר פליגער.

סופער מייקרא (SMCI) האט איבערראשט וואל סטריט מיט'ן העכערן אירע שאצונגען אויפ'ן פערטל באדייטנד העכער ווי עקספערטן האבן ערווארטעט. די פירמע שאצט אצינד צווישן $18.5 און $19.5 ביליאן אין רעוועניו, אנשטאט די פריערדיגע ערווארטונג פון $14.5 ביז $15.5 ביליאן.

אמעריקאנער אוויאציע רעגולאטארן האבן ענדליך אפיציעל באשטעטיגט באואינג'ס (BA) נייעם 737 מעקס 10 פליגער, נאך יארן פון פארשפעטיגונגען און זיכערהייט פראבעס.

דאס איז דער גרעסטער פליגער אין באואינג'ס 737 ליניע, און איז געמאכט צו טראגן מער פאסאזשירן און נוצן ווייניגער ברענשטאף פאר יעדן זיץ.

לויט באריכטן האבן לופטליניעס שוין באשטעלט איבער 1,550 פון די פליגערס, און די ערשטע דעליוועריס זענען ערווארטעט אין 2027.

אנטראפיק, באקאנט פאר איר קלאָאד עי-איי פראגראם, האט היינט אפיציעל אריינגעגעבן דאקומענטן ביי רעגולאטארן כדי ארויסצוגיין צום סטאק מארקעט. די פירמע וויל פארקויפן שעירס פארן פובליק אויפ'ן נעסדעק אונטערן סימבאל (ANT).

דאס קען ווערן איינע פון די גרעסטע איי-פי-או'ס אין דער געשיכטע. באריכטן ברענגען אויף א מעגליכע ווערד פון ביז $2 טריליאן, און א פלאן אויפצוטרייבן צענדליגער ביליאנען דאלארן. די דאקומענטן צייגן אויך ווי שנעל דער עי-איי ביזנעס וואקסט, אבער אויך ווי טייער עס איז צו אנטוויקלען און אפערירן די מאדעלן: אין די ערשטע זעקס חדשים פון 2026 האט די פירמע באריכטעט א ריינע פארלוסט פון $80.7 ביליאן.

אנטראפיק האט דערווייל נישט באשטימט וויפל שעירס זי וועט פארקויפן אדער זייער פרייז. אינוועסטירער וועלן צום ערשטן מאל קענען זעהן דעטאלירטע פינאנציעלע ציפערן פון איינע פון די גרעסטע עי-איי פירמעס, און באקומען די געלעגנהייט צו אינוועסטירן אין איר דירעקט.

אילאן מאסק ווארנט אז אסאך נייע פירמעס וואס פארדינגען עי-איי קאמפיוטער קראפט וועלן מעגליך נישט איבערלעבן דעם נאנטן צוקונפט.

די פירמעס, באקאנט אלס נייע קלאוד פראוויידערס, בארגן גרויסע סומעס צו קויפן טייערע ענווידיע (NVDA) טשיפס און בויען דאטא צענטערן, מיט'ן האפענונג אז עי-איי קליענטן וועלן באצאלן גענוג צו דעקן די חובות. מאסק זאגט אז ספעיס-עקס וועט נישט אפקויפן אזעלכע פירמעס.

די ווארענונג האט געברענגט פרישע דרוק אויף שעירס פון עטליכע עי-איי אינפראסטרוקטור פירמעס, צייגנדיג די וואקסנדיגע זארג אז די שנעלע עי-איי אויסברייטערונג קען מעגליך זיין אומ-רעאליסטיש.

דויטשע באנק (DB) האט אימפלעמענטירט עי-איי צו פארשנעלערן באשלוסן איבער הלוואות פאר ביזנעסער, אצינד זאגט די באנק אז קען קומען א באשלוס אין מינוטן, אנשטאט וואכן. ביי גרויסע אינטערנאציאנאלע פירמעס קענען רעזולטאטן וואס האבן געדויערט חדשים ווערן פארקירצט צו בלויז וואכן.

די באנק האט אויך אנטוויקלט אן אייגענעם סיסטעם מיטן נאמען אדא, צו בויען און קאנטראלירן עי-איי אגענטן וואס קענען אויספירן באנק ארבעט. דער פלאן איז אז די אגענטן זאלן העלפן מיט איבערקוקן אינפארמאציע, צוגרייטן באשלוסן און שפעטער אפילו קאמיוניקירן מיט די עי-איי אגענטן פון אירע קליענטן.

א נייע אפענע קאוד פראיעקט מיטן נאמען REA, קורץ פאר 'ריווערס ענזשעניר עניטינג, לאזט עי-איי אגענטן פארשן ווי אזוי עקזיסטירנדע פראגראמען ארבעטן, אפילו ווען מען האט נישט דעם אריגינעלן קאוד. אנשטאט בלויז בעטן אן עי-איי צו שרייבן א נייעם פראגראם, קען מען איר געבן א פראגראם אדער אן אפליקאציע און בעטן זי זאל נאכגיין די טעכנישע שריט וואס מאכן עס ארבעטן.

דער סיסטעם קען אויספארשן וועבזייטלעך, קאמפיוטער פראגראמען, ענדרויד אפליקאציעס און אפילו פארטיגע קאמפיוטער פיילס. זי נוצט ספעציעלע געצייג צו געפינען פונקציעס, נאכפאלגן וואו אינפארמאציע גייט דורך דעם פראגראם און צוריקגעבן אירע געפינסן. דער עי-איי אגענט קען דערנאך פרעגן מער פראגעס, ערקלערן ווי אזוי די פונקציעס ארבעטן און פרובירן נאכצובויען דעם זעלבן פראגראם.

אינעם פראיעקט זעהט מען ביישפילן ווי מען האט צוגעטראפן א חשבון פון אן אלטן קאמפיוטער שפיל און נאכגעבויט די פונקציעס אזוי גענוי אז זי האט געשטימט מיטן אריגינעלן פראגראם. דאס קען זיין נוצבאר צו פאררעכטן אלטע סאפטוועיר, פארשטיין אפליקאציעס און בויען ענליכע סיסטעמען.

דער פראיעקט איז פריי און אפן אויף גיטהאב. רעפאזיטארי: https://github.com/morluto/rea

א מעגליכער צוזאמשטעל פון טעסלא (TSLA) און ספעיס-עקס קען שאפן א פירמע אין ווערד פון ארום $3.5 טריליאן, לויט א פרישע פינאנציעלע אנאליז. אזא צוזאמשטעל וואלט פארבינדן טעסלא'ס קארס, באטעריעס און ראבאטיקס מיט ספעיס-עקס'ס ראקעטן, סאטעליטן און עי-איי אינפראסטרוקטור.

די צוויי פירמעס ארבעטן שוין צוזאמען אויף טעכנאלאגיע, אריינגערעכנט דעם טעראפאב פראיעקט צו פראדוצירן פארגעשריטענע טשיפס. א צוזאמשטעל קען זיי העלפן זיך טיילן מיט אינוועסטירונגען און טעכנאלאגיע.

די אמעריקאנער טשיפ אינדוסטריע האט היינט געליטן פון שטארקע פארקויפונגען. דער סעמיקאנדאקטאר אינדעקס איז אינמיטן טאג געפאלן מיט איבער 7 פראצענט, בשעת ענווידיע (NVDA), עי-עם-די (AMD), אינטעל (INTC) און מארוועל (MRVL) האבן אלע געליטן פארלוסטן.

אינוועסטירער זארגן אז פאליטישע און לאקאלע באגרעניצונגען קענען פארשפעטיגן נייע עי-איי דאטא צענטערן, און אז די ריזיגע אינוועסטירונגען אין טשיפס וועלן נישט אזוי שנעל ברענגען גענוג פראפיטן.

קוואלקאם (QCOM) האט באריכטעט אז אירע פארקויפונגען פון טשיפס פאר סמארטפאונס זענען אינעם לעצטן פערטל געפאלן מיט 26 פראצענט צו $5.14 ביליאן. די פירמע שפירט דרוק פון שוואכערע טעלעפאן פארקויפונגען, טייערע מעמארי און עפל'ס (AAPL) אריבערגיין צו אייגענע מאדעם טשיפס.

אין דער זעלבער צייט וואקסט איר ביזנעס פון טשיפס פאר אויטאס און אנדערע פראדוקטן. קוואלקאם וויל אויך אריינגיין שטארקער אין עי-איי דאטא צענטערן, און ווידערהאלט איר ציל פון $5 ביליאן אין דאטא צענטער רעוועניו אינעם פינאנציעלן יאר 2027.

ארם (ARM) האט באריכטעט $1.44 ביליאן אין פערטל רעוועניו, א וואוקס פון 27 פראצענט קעגן פאראיאר. די איינקונפט פון לייסענסן איר טשיפ טעכנאלאגיע איז געוואקסן מיט 50 פראצענט, און די רויאלטיס פון טשיפס פאר דאטא צענטערן האבן זיך געדאפלט.

לויט א פרישע בלומבערג באריכט האט מייקראן (MU) כמעט אפגעשטעלט די ארבעט אויף איר פלאנירטע $4.5 ביליאן מעמארי טשיפ פאבריק אין טאיאואן, טייוואן. דער שריט קומט נאך א פארלענגערטע קריגעריי מיט די ארטיגע ארבעטער איבער באונוסעס און פראפיט טיילונג.

די פאבריק איז געמאכט צו פארגרעסערן פראדוקציע פון מעמארי טשיפס וואס ווערן גענוצט אין קאמפיוטערס און עי-איי סערווער.

אמאזאן (AMZN) האט אנאנסירט א נייע צוזאמארבעט מיט אובער איטס, וואס וועט געבן אמעריקאנער פריים מעמבער די מעגליכקייט צו באשטעלן עסן פון רעסטוראנטן דירעקט אין אמאזאן'ס אפליקאציע אדער וועבזייטל.

ביי באשטעלונגען פון $25 אדער מער וועלן פריים באנוצער נישט צאלן קיין דעליווערי פי, און מען דארף נישט עפענען א באזונדערע אובער קאנטע. די סערוויס איז שוין אקטיוו אין פילע שטעט איבער אמעריקע. דער אפמאך נעמט איבער דעם פלאץ פון אמאזאן'ס פריערדיגע צוזאמארבעט מיט גראבהאב.

כינע האט אפגעשטעלט סאפטבאנק'ס (SFTBY) געפלאנטע $5.4 ביליאן אפקויף פון עי-בי-בי'ס ראבאטיקס אפטיילונג, טראץ וואס דער אפקויף איז צווישן א יאפאנעזער און א שווייצער פירמע, וויבאלד ארום 30 פראצענט פון עי-בי-בי'ס ראבאטיקס ביזנעס געפינט זיך אין כינע, וואו זי פארמאגט פאבריקן און אנטוויקלט טעכנאלאגיע.

כינעזע רעגולאטארן זארגן אז טעכנאלאגיע און אינפארמאציע פון די כינעזע אפעראציעס קענען אריבערגיין צו אויסלענדישע פירמעס און גענוצט ווערן צו אנטוויקלען עי-איי.

סאפטבאנק וויל נוצן עי-בי-בי'ס אינדוסטריאלע ראבאטס צו פארברייטערן איר ביזנעס אין עי-איי געשטיצטע ראבאטיקס. די צוויי פירמעס פרובירן אצינד צו טוישן דעם אפמאך כדי עס זאל קענען דורכגיין.