قناة الدكتور يوسف مسلم MOOD Clinic

صباح الخير: ((الأمَنَة : ١ ))

من فترة، كثير من الناس بيسألوا في كل مكان: شو أحسن طريقة أحافظ فيها على صحتي النفسية؟ والحقيقة إنه هذا السؤال صار يشغل ناس كثير، ويمكن إنت كمان بتدور على إجابته….

خليني أحكي لك عن مفتاح مهم لتفهم نفسك وحياتك واهتماماتك، ونبدأ من باب رايحين نسميه: «التوجيهات السلوكية في الأحاديث النبوية».

يقول الرسول عليه الصلاة والسلام: {{ من أصبح منكم آمنًا في سِرْبِه، معافًى في جسده، عنده قوت يومه، فكأنما حيزت له الدنيا }}

تأمل الحديث، وكأنه بيلفت انتباهك لثلاثة مطالب كبرى بتسعى إلها في حياتك، والكل بيسعى لها: الأمن، والعافية، والقوت. شوف كيف بتظهر في يومياتك هذه الإحتياجات والمطالب، وكيف ممكن يدخل لحياتك من خلالها ناس ووعود وأفكار بتدعوك لتحقيقها.
خلينا نحكي سريعاً وبإختصار عن كل مطلب من هالمطالب:
الأمن والأمان: إنت بدك تطمئن على نفسك، وعلى أمانك الشخصي، وعلى أهلك والناس اللي بتحبهم، ويكون بيتك ووطنك آمنين. وبتبحث كمان عن الراحة والطمأنينة في داخلك، هذا الشعور اللي بيعطيك إنطباع إنك آمن. ومن هون بتشدك عناوين كثيره وأنت بتتصفح كل يوم: مثل السلام الداخلي والراحة النفسية. لكن لاحظ: حاجتك للأمان ممكن تكون مدخل لحدا يقنعك بطريقة أو كلام أو حتى برنامج، ويوعدك براحة ما بيقدر يحققها، أو بقدر يحقق هو فلوس كثيرة من بيعها، حتى لو كان ببيعك وهم.

العافية: بدك تكون بصحة كويسة، واهتمامك فيها ممكن يشغلك حتى وإنت مش مريض. شوف قديش بنسمع يوميًا عن فيتامينات وأعشاب ومكملات ورياضة وصالات رياضية مجهزة، وكل واحد بيحكي لك: عندي الشيء اللي جسمك محتاجه! ومع حرصك على صحتك، ممكن تصدق وعد أو تشتري شيئ من غير ما تتأكد إنك محتاجه أصلًا، بل ممكن يكون ظاهرة مفيد لكن بحمل ضرر كبير لك.

القوت: بدك يكون عندك ما يكفيك ويكفي أهلك. واليوم صار السعي لتأمين الاحتياجات أوسع ليشمل المسكن والملبس ومصاريف الحياة، وصار المال حاضر بقوة في تفكيرنا. ومن هذا الباب بتدخل وعود الثراء السريع. تذكر كم واحد خاطر بمدخراته، لأنه كان بدور على حياة أريح، فخسر حتى اللي كان مأمّن حياته فيه، وكم طارت من مدخرات، وبيعت بيوت لفرص ثراء سريع.

لاحظ، هذي المطالب الكبرى نفسها ممكن تتحول لمطبات كبرى، لما لهفتك لتحقيقها تخليك تصدق كل وعد، أو تمشي بطريق من غير ما تتبين حقيقته، أو وين ممكن يوديك، رغم في الحقيقة الواحد فينا مش دائماً ممكن يتأكد لوين رايح هالطريق.

في صباحاتنا الجاية، إن شاء الله، رح نوقف عند كل مطلب: نفهمه أكثر، ونحكي كيف نسعى فيه بطريقة صحيحة؛ حتى تفهم نفسك، وتفهم حياتك، وتعرف كيف تتحرك فيها.

أمانك، وصحتك، وكفايتك، مطالب كبيرة، وأساسية، ممكن تقودك لما ينفعك فعلاً، لكن ممكن تقودك لفخ لا سمح الله، لأنه باعة الوهم واقفين في كل طريق من هذي الطرق الثلاث، لحاولوا يقنعوك أنه حاجتك عندهم.
صباح الخير لكم جميعاً

✍️د.#يوسف_مسلم

🔹️https://t.me/moodclinic_training

619 views04:30