“Toshkent irrigatsiya va qishloq xo‘jaligini mexanizatsiyalash muhandislari instituti” Milliy tadqiqot universiteti Axborot-resurs markazi foydalanuvchilari uchun O‘zbekiston Milliy kutubxonasi Xalqaro aloqalarni tashkil etish xizmati bosh mutaxassisi Husniya Boysunova hamda Elektron buyurtmalarni masofadan yetkazib berish xizmati rahbari Behbudshoh Anvarov tomonidan "O‘zbekiston Milliy kutubxonasi tomonidan yaratilayotgan imkoniyatlar” mavzusida seminar-trening o‘tkazildi.

📌 Seminarda tadqiqotchilar uchun xorijiy ma’lumotlar bazalari, Web of Science (WoS) va Scopus bazalarida indekslangan jurnallar, MyLoft platformasi, dissertatsiyalar uchun bibliografik yozuvlar va adabiyotlar ro‘yxatini shakllantirish hamda UDKni onlayn olish tartibi haqida ma’lumot berildi.

Shuningdek,axborot resurslaridan foydalanish, ilmiy ma’lumotlarni samarali qidirish, tadqiqot faoliyatida elektron platformalar imkoniyatlaridan unumli foydalanish,ilmiy izlanishlar uchun zarur manbalarni topish bo‘yicha amaliy tavsiyalar berildi.

📚 O‘zbekiston Respublikasi Prezidenti Administratsiyasining tegishli topshirig‘iga asosan o‘tkazilayotgan o‘rganish ishlari Farg‘ona viloyatida davom etdi

O‘zbekiston Milliy kutubxonasi direktori o‘rinbosari Nasiba Xoldorova jarayonlarda ishtirok etib, hududdagi axborot-kutubxona muassasalari faoliyati bilan yaqindan tanishdi.

📖 Jumladan, Farg‘ona viloyati Ko‘zi ojizlar kutubxonasi, Farg‘ona viloyat axborot-kutubxona markazi, shuningdek Farg‘ona, Oltiariq va Buvayda tumanlari hamda Marg‘ilon shahar axborot-kutubxona markazlari, Oltiariq tuman Ko‘zi ojizlar kutubxonasi faoliyati o‘rganildi.

O‘rganishlar davomida kutubxonalarning moddiy-texnik bazasi, fondlar holati, kitobxonlarga ko‘rsatilayotgan xizmatlar sifati hamda imkoniyati cheklangan foydalanuvchilar uchun yaratilgan sharoitlarga alohida e’tibor qaratildi.

🏛 Shuningdek, kutubxona tizimi samaradorligini oshirish va zamonaviy kutubxona infratuzilmasini rivojlantirish masalalari yuzasidan tegishli takliflar ishlab chiqilmoqda.

2026-yil 8–9-iyun kunlari Gyote institutida kutubxona xodimlari uchun “Train-the-Trainer” (“Murabbiylar uchun trening”) formatida o‘tkazilayotgan malaka oshirish treningida O‘zbekiston Milliy kutubxonasi va hududiy axborot-kutubxona markazlari mutaxassislari faol ishtirok etmoqda.

Loyihaning asosiy maqsadi - Markaziy Osiyo mamlakatlari kutubxonalarida o‘smirlar o‘rtasida mediasavodxonlik, tanqidiy fikrlash va raqamli barqarorlik ko‘nikmalarini rivojlantirishdan iborat.

Kutubxona ishining zamonaviy yondashuvlariga bag‘ishlangan ikki kunlik dasturdan media savodxonlik,tanqidiy fikrlash, dezinformatsiyaga qarshi kurash va faktcheking ko‘nikmalarini rivojlantirish, jalb qilish,o‘qitish vositasi kabi yo‘nalishlar o‘rin olgan.

Treningda Germaniyadan taklif etilgan xalqaro ekspertlar mediasavodxonlik, axborotni tanqidiy baholash, geymifikatsiya elementlarini kutubxona faoliyatiga joriy etish,zamonaviy ta’lim formatlaridan foydalanish bo‘yicha ma'lumot berdilar.