✅ 2026-yil 15-oktyabr kuni O‘zbekiston Milliy kutubxonasida Oila va xotin-qizlar qo‘mitasi bilan hamkorlikda an’anaviy “Kitobxon onalar kuni” bo‘lib o‘tdi. Xalqaro qishloq ayollari kuni hamda o‘zbek tiliga Davlat tili maqomi berilganligining 37 yilligi munosabati bilan tashkil etilgan “Kitobxon ona – ma’rifatli avlod tarbiyachilari” mavzusidagi tadbirda Toshkent shaxar Yakkasaroy tumani va Toshkent viloyat “Oqila ayollar” harakati vakillari ishtirok etdilar.

🎤 O‘zbekiston Yozuvchilar uyushmasi a'zosi, shoira, Milliy kutubxona yetakchi mutaxassisi Gulchehra Shahobiddin qizi yig‘ilganlarni qutlar ekan, tilimizga Davlat tili maqomi berilishining ahamiyatini va o‘zbek tilining salmog‘i, sehri, jodusi, ohanrabosi adiblarimiz asarlarida o‘z ko‘rku tarovatini namoyon qilishini e'tirof etdi.

🎤 Tadbirda so‘zga chiqqanlar, O‘zbekistonda qishloq ayollari hayoti, turmushi, qishloq xo‘jaligi tarmog‘ida mehnat qilayotgan xotin-qizlarni har tomonlama qo‘llab-quvvatlash, ularning ijtimoiy-siyosiy hayotdagi mavqeni oshirish, ular uchun munosib mehnat va yashash sharoitlarini yaratish maqsadida amalga oshirilayotgan ibratli ishlar haqida so‘zladilar. Shuningdek, ular qishloq ayollarining kechinmalari, taqdiri, o‘y-xayollari, umr saboqlari va qishloq xo‘jaligi taraqqiyoti yo‘lida qo‘shgan xissalarini hikoya qiluvchi badiiy asarlar, ularning qahramonlari hamda bugungi kunda javlon urib mehnat qilayotgan zamonamiz qahramonlari haqida o‘z fikrlarini bayon etdilar.

🎤Tadbirda Qoraqalpog‘iston Respublikasi, viloyat, tuman axborot kutubxona markazi mutaxassislari ZOOM platformasi orqali ishtirok etdilar. Hususan, tadbirkor ayollar mazkur sana munosabati bilan ishtirokchilarni qutladilar, bugungi kunda ko‘rsatilayotgan e’tibor va ko‘mak borasida o‘z fikr-mulohazalari bilan bo‘lishdilar.

📝 Tadbirda o‘zbek tilining nufuzi, tarixi, o‘zbek tilida yozilgan ilk asarlar, adabiyotimizda o‘chmas iz qoldirgan yozuvchi va shoiralar, ularning o‘lmas asarlari va hanuzgacha el og‘zida doston bo‘lib kelayotgan asarning ayol qahramonlari haqida so‘z bordi.

🎼 Toshkent shahar Bektemir tumanidagi 1-son Madaniyat markazi qoshida tashkil etilgan “Ohanrabo” xalq folьklor etnografik jamoasi rahbari, Nuroniylar jamg‘armasi qoshidagi "Nuroniylar kuylaganda" jamoasi xonandasi Dilorom Ziyotova hamda mazkur jamoa xonandasi Buvisora Xannazarovalar ijrosidagi qo‘shiqlar ishtirokchilarga bayram kayfiyatini bag‘ishladi.

✅ 2026-yil 15-oktyabr kuni bolalar yozuvchisi Kristina Kretova va rassom Zilola Xamidovalarning “Sichqoncha Nedoning O‘zbekistondagi sarguzashtlari” kitobi taqdimoti bo‘lib o‘tdi.

📚Mualliflar bilan bo‘lgan uchrashuvda istirok etgan xususiy Smart school maktabi o‘quvchilari kitob yaratilish jarayoni, qahramonlar va ularning sarguzashtlari haqida qiziqarli ma'lumotlarga ega bo‘ldilar.

📖 Yangi qissada sichqoncha Nedo Buyuk ipak yo‘li shaharlari bo‘ylab sayohat qiladi, milliy taomlar hamda yurt tabiati haqida ko‘plab ma'lumotlarga ega bo‘ladilar. Kitob xarita, qiziqarli ma'lumotlar va turli topshiriqlar bilan boyitilgan.

📖 Mualliflar kitobning ko‘zlagan maqsadi haqida quyidagilarni so‘zlab berdilar. "Nedo ismli sichqoncha kutubxonada yashaydi, kitoblarni va sayohatni yaxshi ko‘radi. Bir kuni u noyob etnik rus sichqonchasini ko‘rish va Orol dengiziga qanday yordam berishni o‘rganish uchun Daniel ismli do‘sti bilan serquyosh O‘zbekistonga keladi. Ammo sayohat tezda haqiqiy sarguzashtga aylanadi. Toshkentda Nedo buyuk Ipak yo‘li izidan yurib, karvonboshi bo‘lgan Omarning bobosining qadimiy tumorini topishni orzu qilgan sayohatchi-blogerlar  — Hotam ismli bola va Omar laqabli tuya bilan tanishadi. Ular Samarqandning mashhur obidalarini ziyorat qilishdi, Buxoro va Xivaning qadimiy quduqlariga mo‘ralashdi, tandirda pishgan non, palov va sumalakni tatib ko‘rishdi, dono Etya-opa bilan tanishishdi va sehrli tumor sirini ochishdi".

📚“YILNING ENG YAXSHI AXBOROT-KUTUBXONA MUTAXASSISI – 2026” KO‘RIK-TANLOVINING II-BOSQICHI BO‘LIB O‘TDI

Alisher Navoiy nomidagi O'zbekiston Milliy kutubxonasida ko‘rik-tanlovning 2-bosqichi yuqori saviyada tashkil etildi.

Ishtirokchilar quyidagi shartlar bo‘yicha bellashishdi:  
1-shart. Kitoblarni interaktiv usullarda targ‘ib qilish
(Booktrailer, Buk-slem, Infografika, Quiz, Viktorina) — ishtirokchilar o‘zlari tanlagan adabiyotlarni ijodiy va interaktiv usullarda targ‘ib qilishdi.
2-shart. Bahru bayt
3-shart. Kutubxonada amalga oshirgan loyihasi taqdimoti
Ishtirokchilar o‘z amaliy loyihalarini sodda, aniq va kreativ tarzda taqdim etishdi.
4-shart. Test sinovi
Kutubxonachilik sohasi, AKT, mantiqiy va huquqiy savodxonlik bo‘yicha 20 ta test savollariga javob berish orqali o‘z bilimlarini namoyon etishdi.
Ishtirokchilar o‘z tashabbuskorligi, kreativ yondashuvi va nutq madaniyati bilan kutubxonachilik sohasining yuksak namunasini ko‘rsatishdi.

Quyida 2-bosqichda g'olib mutaxassislar ro‘yxati bilan tanishing:

1-o'rin  Ilmiy-metodik xizmati mutaxassisi Ashirmetova Xusnora Farxod qizi  
2-o'rin O‘quv zallari mutaxassisi Raximova Sarvinoz  Nodirxon qizi
3-o'rin Ilmiy-metodik xizmati mutaxassisi Taganmuratova Dinara Davran qizi