🇺🇿 Xotin-qizlar migratsiyasi: kasb-hunar, bandlik va yangi imkoniyatlar

Bugun O‘zbekiston Respublikasi Oliy Majlisi Senatining Yoshlar, xotin-qizlar, madaniyat, sport masalalari qo‘mitasi raisi Orzigul Qozixonova hamda viloyat hokimi o‘rinbosari Hafiza Artikova Migratsiya agentligining Buxoro hududiy filialiga tashrif buyurib, xotin-qizlarni kasb-hunarga o‘qitish, ularning bandligini ta’minlash va migratsiya sohasida amalga oshirilayotgan ishlar bilan yaqindan tanishdilar.

Tashrif davomida, avvalo, migratsiyadagi xotin-qizlar bilan ishlash, xorijda mehnat qilayotgan, turli sabablarga ko‘ra kam daromad topayotgan yoki qiyin vaziyatga tushib qolgan ayollarni qo‘llab-quvvatlash, ularning huquq va manfaatlarini himoya qilish hamda zarur hollarda Vatanga qaytarish va qaytganidan so‘ng ular bilan manzilli ishlash tizimini yo‘lga qo‘yish masalalariga alohida e’tibor qaratildi.

Shuningdek, xorijga mehnat migratsiyasiga chiqish istagidagi xotin-qizlarni oldindan xorijiy tillar va zamonaviy kasblarga o‘qitish, ularning mehnat bozorida raqobatbardoshligini oshirish hamda xavfsiz va tartibli mehnat migratsiyasi uchun zarur sharoitlarni yaratish masalalari muhokama qilindi.

🤝 Muhokamalarda “migratsiyadagi xotin-qizlar — markazda kasb o‘rganayotgan xotin-qizlar — Vatanga qaytgan xotin-qizlar” yo‘nalishida uzviy va manzilli ishlash zarurligiga alohida urg‘u berildi.

Jumladan, xorijda mehnat qilayotgan xotin-qizlarni qo‘llab-quvvatlash, Vatanga qaytgan ayollar bilan alohida ishlash, ularni kasb-hunarga yo‘naltirish, o‘qitish va barqaror daromad manbai bilan ta’minlash bo‘yicha mavjud imkoniyatlar ko‘rib chiqildi.

Tashrif yakunida xotin-qizlarning bandligini ta’minlash, kasbiy ko‘nikmalarini rivojlantirish, migratsiyadan qaytgan ayollarni jamiyatga moslashtirish hamda ularning munosib daromad topishiga ko‘maklashish bo‘yicha muammolar, takliflar va amaliy yechimlar muhokama qilinib, tegishli xulosa va takliflar ishlab chiqildi.