Yo‘llarda ehtiyot bo‘ling: Hech qaysi manzil inson hayotidan qimmat emas!

Bir lahzalik e’tiborsizlik — bir umrli armon. Tezlik bilan bosib o‘tilgan yo‘lning oxiri ba’zan ayriliq, ko‘z yoshi va iztirob bilan tugaydi. Yo‘l qoidalariga rioya qilish — o‘z hayotingizni va o‘zgalar hayotini asrash demakdir!

Afsuski, Nurobod tumanida ham avtomobillar ishtirokidagi yo‘l-transport hodisalarining oldini olish dolzarb masalalardan biri bo‘lib qolmoqda. Bunday avariyalar insonlarning bevaqt hayotdan ko‘z yumishiga, og‘ir tan jarohatlari olishi yoki bir umrga nogiron bo‘lib qolishiga sabab bo‘lishi mumkin.

Yo‘l-transport hodisalari ko‘pincha tezlikni me’yoridan oshirish, avtomobil boshqaruvini yo‘qotish, quvib o‘tish qoidalariga rioya qilmaslik, charchoq, uyqusizlik va haydash vaqtida telefonga chalg‘ish kabi omillar bilan bog‘liq.

Unutmang, avtomobilni boshqarish shunchaki rulni burish emas. Bu — o‘z hayotingiz, yo‘lovchilaringiz va yo‘ldagi boshqa insonlarning taqdiri uchun javobgarlikdir.

Tasavvur qiling, ertalab oilangiz bilan xayrlashib, yo‘lga chiqdingiz. Farzandingiz kechqurun qaytishingizni kutmoqda, ota-onangiz siz uchun duo qilmoqda, turmush o‘rtog‘ingiz esa uyga sog‘-salomat kelishingizni istaydi.

Ammo bir lahzalik shoshqaloqlik, ortiqcha tezlik yoki e’tiborsizlik ularning hayotini butunlay o‘zgartirib yuborishi mumkin.

Bir oilaning quvonchi qayg‘uga, bolalarning orzulari armonlarga aylanishi hech gap emas. Ayrim insonlar esa avariya oqibatida sog‘lig‘idan ayrilib, umrining qolgan qismini og‘ir jarohatlar bilan yashashga majbur bo‘ladi.

O‘ylab ko‘ring: manzilga besh daqiqa oldin yetib borish uchun hayotingizni xavf ostiga qo‘yishga arziydimi? Hech qaysi manzil inson hayotidan qimmat emas!

Aziz yurtdoshlar! Hayot — bebaho ne’mat. Uni shoshqaloqlik, tavakkal va beparvolik bilan xavf ostiga qo‘ymang.

O‘ZINGIZNI ASRANG! YAQINLARINGIZNI O‘YLANG! TEZLIK EMAS, XAVFSIZLIKNI TANLANG!

✅@nur_press

🔴 Is gazi — ko‘rinmas xavf: o‘zingizni va yaqinlaringizni himoya qiling!

Is gazi (uglerod oksidi – CO) — rangsiz, hidsiz va ta’msiz zaharli gaz. Uni inson sezgi organlari orqali aniqlay olmaydi. Shu bois gazdan zaharlanish xavfi ko‘pincha kech payqaladi. Is gazi yoqilg‘ining to‘liq yonmasligi natijasida hosil bo‘ladi. Nosoz gaz jihozlari, isitish pechlari, dudburon va mo‘rilarning noto‘g‘ri ishlashi, shuningdek, avtomobil dvigateli yoki ko‘chma generatorni yopiq joyda ishlatish zaharlanishga sabab bo‘lishi mumkin.

❗️Zaharlanishning dastlabki alomatlariga befarq bo‘lmang!

Bosh og‘rig‘i, bosh aylanishi, holsizlik, ko‘ngil aynishi, qusish, nafas qisishi va ko‘krak sohasidagi og‘riq is gazidan zaharlanish belgisi bo‘lishi mumkin. Og‘ir holatlarda hushdan ketish, ongning chalkashishi va tirishish kuzatiladi. Bunday alomatlar paydo bo‘lsa, ularni oddiy charchoq yoki shamollash bilan adashtirmang.

📌Zaharlanishning oldini olish uchun:

🔷Isitish mavsumi boshlanishidan avval gaz jihozlari, isitish uskunalari, suv isitkichlar, mo‘ri va dudburonlarni mutaxassislarga tekshirtiring.
🔷Xonadagi havo almashinuvi va shamollatish tizimining sozligini ta’minlang. Mo‘ri va ventilyatsiya yo‘llarini berkitib qo‘ymang.
🔷 Ko‘chma generator, barbekyu va ko‘mir yoqiladigan moslamalardan uy, garaj yoki boshqa yopiq joylarda foydalanmang. Avtomobil dvigatelini yopiq garajda ishlab turgan holda qoldirmang.
🔷Gaz plitasi yoki duxovkadan xonani isitish maqsadida foydalanmang.
🔷 Imkon qadar uyga, ayniqsa, yotoqxonalar yaqiniga is gazini aniqlovchi maxsus signalizatorlar o‘rnating va ularning sozligini muntazam tekshirib turing.

❓Is gazidan zaharlanish gumon qilinsa, nima qilish kerak?

✔️Darhol barcha odamlarni, jumladan, bolalar va keksalarni xavfli hududdan tashqariga — toza havoga olib chiqing.

✔️Zudlik bilan 103 yoki 112 raqamiga qo‘ng‘iroq qilib, tez tibbiy yordam chaqiring.

✔️Jabrlangan shaxsni shifokor ko‘rigidan o‘tkazing. Alomatlar yengillashgan taqdirda ham tibbiy yordamni kechiktirmang.

✔️Mutaxassislar bino xavfsizligini tasdiqlamaguncha ichkariga qaytmang.

❗️Unutmang: is gazining hidi yo‘q, ammo xavfi juda katta. Ehtiyot choralariga rioya qilish — o‘zingiz va yaqinlaringiz hayotini asrashning muhim sharti!

✅@nur_press