Muharrir va ekspertlar darrov payqaydigan 2 ta mantiqiy xato. Sizda ham uchraydimi?

Keling, tan olaylik. Baʼzan shunday jumlalarni ishlatamiz: qulogʻimizga oʻrnashib qolganidan ichidagi mantiqiy nosozlikni umuman sezmaymiz.

Oqibatda nima boʻladi? Jumlangizning grammatikasi joy-joyida, lekin professional muharrir yoxud milliy sertifikatda essengizni baholayotgan ekspert mantiqiy kamchilikni darrov payqaydi.

Bugun ana shunday mantiqiy xatolardan ikkitasini tahlil qilamiz.

1️⃣ Tezlik sekinlashadimi yoki harakat?

Bunday xatolar ayniqsa yangiliklar va maqolalar matnida koʻp uchraydi.

❌ Xato: Avtomobilning tezligi sekinlashdi.

✅ Toʻgʻri: Avtomobilning tezligi pasaydi.

✅ Toʻgʻri: Avtomobilning harakati sekinlashdi.

💡 Nega bunday?

Soʻzlarning oʻzagiga qarang: tezlikning oʻzagi – tez, sekinlashdining oʻzagi – sekin. “Tezlik sekinlashdi” deyish goʻyoki “uzunlik kaltalashdi” degandek mantiqsiz. Tezlik – bu koʻrsatkich. Koʻrsatkich sekinlashmaydi, uning darajasi oshadi yoki pasayadi. Sekinlashish esa jarayonga (harakatga) xos.


2️⃣ Kasallik imkoniyatmi?

Ijobiy va salbiy maʼnolarni adashtirish oqibatida tugʻiladigan yana bir mashhur leksik xato.

❌ Xato: Qishda grippga chalinish imkoniyati ortadi.

✅ Toʻgʻri: Qishda grippga chalinish xavfi/ehtimoli ortadi.

💡 Nega bunday?

Imkoniyat soʻzi inson uchun foydali, ijobiy vaziyatlarga nisbatan ishlatiladi (yutish imkoniyati, oʻqishga kirish imkoniyati). Grippga chalinish yutuq emaski, uning imkoniyati boʻlsa! Salbiy holatlarda xavf yoki ehtimol soʻzlarini qoʻllash matn mantigʻini asrab qoladi.

📌 Qissadan hissa:

Soʻz tanlayotganda bir soniya toʻxtang: vaziyat ijobiymi yoki salbiy? Gap jarayon haqidami yoki koʻrsatkich? Shu kichik toʻxtam matningizni professional darajaga olib chiqadi.

👇 Oʻzimizni tekshiramiz:

⚡️ – Men umuman bunday xatolarga yoʻl qoʻymayman!

✍️ – Qayd qilib oldim, endi eʼtiborli boʻlaman.

🤔 – Ikkinchisini bilardim-u, birinchisi oʻylantirib qoʻydi.

🚀 Kopirayter doʻstlaringizga yoki esse sinoviga tayyorlanayotganlarga yuborib qoʻying. Biri obroʻyini, ikkinchisi ballini yoʻqotmasin!

@oriftolib | Sahifalarimiz

“Jigar”ning oʻzbekchasi nima, jigar?

Bugun koʻchada, ijtimoiy tarmoqlarda, umuman, kundalik hayotimizda yaqin doʻstlarni, oshna-ogʻaynilarni jigar deb chaqirish urfga kirdi. Lekin bu soʻz aslan oʻzbekcha emasligini, fors tilidan oʻzlashganini koʻpchilik xayoliga ham keltirmaydi.

Xoʻsh, qon-qardoshlik, yaqinlikni anglatuvchi, murojaat shakliga aylangan bu tushunchaning qadimiy turkiy muqobili nima boʻlgan?

🟢 Bu – barchamiz yaxshi biladigan bagʻir soʻzidir.

Aslida bagʻir – tana aʼzosini anglatuvchi soʻz. Lekin vaqt oʻtishi bilan bu aʼzoni atashda asli forscha boʻlgan jigar ommalashib ketdi. Oʻzbekcha bagʻir esa koʻproq koʻkrak, quchoq, panoh, qalb maʼnolarida qoʻllanadigan boʻldi. Bu soʻz iboralarimizga chuqur singib ketgan, eʼtibor bering-a:

▫️ Hech qachon jigari butun demaymiz – gʻamsiz, bearmon odamni bagʻri butun deymiz.

▫️ Jigari keng degan ibora yoʻq, saxiy va kengfeʼl odam bagʻrikeng deyiladi.

▫️ Farzand yoki jiyanlarimizni “kel, jigarimga bosay” deb emas, “kel, bir bagʻrimga bosay” deb erkalaymiz.

Buyuk tilshunos Mahmud Koshgʻariy ham irodali, birovga boʻyin egmaydigan odamlarni bedük bağır (bagʻri butun) deb atagan.

Oʻzbek tilida muloqot uchun jigar ommalashgan boʻlsa-da, qardosh xalqlar bugun ham qadimiy turkiy soʻzni ishlatishyapti:

🇰🇬 Qirgʻiz qoʻshnilarimiz yaqin doʻstlarini boorim deb chaqiradi.

🇰🇿 Qozoqlar xuddi shu maʼnoda baur soʻzini ishlatadi.

🇹🇲 🇦🇿 Turkman, ozarbayjon va uygʻurlar esa bu soʻzni jigar va yurak maʼnolarida qoʻllaydi.

Demak, siz jigar deb ataydigan kishi aslida siz bagʻringizga oladigan, yuragingizga yaqin kishidir!

👇 Siz-chi, yaqin doʻstlarga qanday murojaat qilasiz? Reaksiyalarda bildiring:

(Jigar erkaklarga nisbatan qoʻllangani uchun pastda shunga mos variantlar berildi)

🔥 – Jigar / Jigarim

⚡️ – Doʻst / Oshna

✍️ – Ogʻayni / Birodar

🤔 – Boshqa soʻz bilan

@oriftolib | Sahifalarimiz

Essega 30 daqiqa qoldirib, balldan ayrilmang!

Bilim va malakalarni baholash agentligi imtihon vaqti boʻyicha soʻrovnoma eʼlon qilgan edi. Demak, bu masala dolzarb.

Milliy sertifikat imtihonida test va esse uchun jami 3 soat (180 daqiqa) vaqt beriladi. Testga berilib ketib, esse uchun atigi 20–30 daqiqa qoldirganlar ham boʻladi. Ularning natijasi qanday boʻladi? Buning javobi uncha qiyin emas: shoshilinchda yozilgan, xatolarga toʻla matn va past ball.

Stressga tushmaslik va hammasiga ulgurish uchun amaliyotchilar sinovidan oʻtgan taqsimotni tavsiya qilaman:

⏱️ 2 soat-u 10 daqiqa – test va javoblar varaqasi uchun

Test savollarining qiyinligi turlicha, yechish va belgilashga koʻp vaqt ketadi, shu sababli asosiy vaqtni testga ajratamiz.

💡 Test ishlashdan oldin esse mavzusi bilan shunchaki tanishib oling, lekin u haqida chuqur oʻylab chalgʻimang. Shunda miya ongosti darajasida unga gʻoya yigʻishni boshlaydi.

⏱️ 50 daqiqa – esse yozish va tahrir uchun

Bu vaqtni oʻz ichida quyidagicha taqsimlaymiz:

▫️ 5 daqiqa: Fikrlarni jamlash va ketma-ketlikni belgilab olish.

▫️ 35 daqiqa: Esseni qogʻozga tushirish (300–350 soʻz uchun bemalol yetadi).

▫️ 10 daqiqa: Matnni muharrir koʻzi bilan oʻqib, xatolarni toʻgʻrilash.

(Eslatma: Baholash yoʻriqnomasiga koʻra, matn ustida qilingan toʻgʻrilashlar va oʻchirishlar xato hisoblanmaydi).

👇 Sizningcha, imtihon uchun vaqt qanday ajratilishi kerak? Fikringizni reaksiya orqali bildiring:

⚡️ – Hozirgi tartib yaxshi (umumiy 3 soat bemalol yetadi)

✍️ – Testga alohida, essega alohida aniq vaqt chegarasi oʻrnatilsin

😢 – Men vaqtni umuman boshqara olmayman, doim shoshilib qolaman

@oriftolib | Sahifalarimiz

For sale: baby shoes, never worn.
Chaqaloq tuflichasi sotiladi. Umuman kiyilmagan.

Bu qisqa hikoyani Heminguey yozganmi? Uni qanday tushunish kerak? Bu jumlalarda nimalar yashiringan?

🎧 Audioni tinglang va munosabat bildiring:

🔥 – Men uchun yangilik boʻldi

✍️ – Saqlab qoʻydim, yana shunaqa audiopostlar boʻlsin

🤔 – Bu hikoyani oʻqiganman, tarixini bilmasdim

@oriftolib | Sahifalarimiz

Mana bu suhbat boshlandi. Qiziqqanlar, kiringlar.

@oriftolib | Sahifalarimiz

Esse imtihoniga tayyorlanayotganlar uchun maxsus toʻplam

Bular yozish malakangizni shakllantirish va rivojlantirishda asqatadi. Oʻqing, oʻrganing.

Manfaatli boʻlsin!

💎 Essega oid maqolalar

👉 Esse yozilishiga qoʻyiladigan talablar

👉 Esseda ball yoʻqotmaslik uchun: xususiy universitetlar nomi qanday yoziladi?

👉 Esseda ballni tushiradigan xato: qanday gapirsangiz, shunday yozmang!

👉 Esseda notanish mavzu tushib qolsa, nima qilish kerak? (Vahimaga oʻrin yoʻq!)

👉 Essega 30 daqiqa qoldirib, balldan ayrilmang!

👉 Nega xatosiz esse atigi 2 ball olishi mumkin?

👉 Yodlash ish bermaganda nima qilamiz? Esseda “oq qogʻoz qoʻrquvi”ni yengish uchun 4 usul

👉 Hatto tajribali mutaxassislar ham sezmay qoladigan koʻrinmas xatolar

👉 Muharrir va ekspertlar darrov payqaydigan 2 ta mantiqiy xato. Sizda ham uchraydimi?

👉 Oʻqituvchiga ham, oʻquvchiga ham birday muhim: esse qanday yoziladi?

👉 Esse qanday baholanishi kerak?

💎 Imloga oid maqolalar

👉 1-qism
👉 2-qism
👉 3-qism
👉 4-qism
👉 5-qism
👉 6-qism
👉 7-qism
👉 8-qism

💎 Punktuatsiyaga oid maqolalar

👉 1-qism
👉 2-qism
👉 3-qism
👉 4-qism

💎 Tahrirga oid maqolalar

👉 1-qism
👉 2-qism
👉 3-qism

💎 Soʻz qoʻllash mavzusidagi maqolalar

👉 1-qism
👉 2-qism
👉 3-qism
👉 4-qism
👉 5-qism

💎 Savodxonlik testlari

👉 1-qism
👉 2-qism
👉 3-qism
👉 4-qism
👉 5-qism
👉 6-qism

@oriftolib | Sahifalarimiz

Bitta jumladan iborat mashhur hikoya fojiasini sunʼiy intellekt yordamida qisqa metrajli filmga aylantirdim. Instagram sahifamda koʻrib, izohlarda oʻz fikringizni bildiring. Qani, mening oʻquvchilarim bu videoni qanday baholashar ekan?

👉 Videoni koʻrish

@oriftolib | Sahifalarimiz

Yosh ijodkorlar uchun zoʻr imkoniyat!

Kitobxonlik madaniyatini rivojlantirish jamgʻarmasi yosh qalamkashlar uchun tanlov eʼlon qildi.

Tanlovning asosiy shartlari:

📌 Kimlar uchun: nomzod 31 yoshga toʻlmagan boʻlishi hamda asarlari OAVda eʼlon qilingan yoki kitob boʻlib chiqqan boʻlishi kerak.

📌 Asosiy talab: ijodiy uyushmalar, OAV yoki nashriyotdan tavsiyanoma boʻlishi kerak.

📌 Yoʻnalishlar: nasr, nazm yoki dramaturgiya.

📌 Natija: eng sara deb topilgan 20 tagacha asar davlat hisobidan kamida 1 000 nusxada bepul nashr etiladi va tirajning 10% qismi (kamida 100 ta kitob) muallifning oʻziga sovgʻa qilinadi. Jamgʻarma kitoblarni targʻib ham qiladi.

Vaqtni boy bermang. Asaringizni tartibga keltiring, tavsiyanoma oling va omadingizni sinab koʻring.

⏳ Qabul muddati: 8-apreldan 5-maygacha.

👉 Ariza topshirish

📑 Nizom (PDF)

Batafsil maʼlumot: @kitobxonlikkengashi

@oriftolib | Sahifalarimiz

Siz soʻragan ijtimoiy masalaga oid esse tayyor!

Mana bu postda esse namunasi haqida taklif aytgan edim. Unda ijtimoiy muammolar koʻp ovoz oldi. Bu orada amaliyotchi ustoz Akmaljon Izamov shu yoʻnalishda esse mavzusi taklif qilib qoldi:

Tibbiyot xodimlari ish kunlarini qisqartirish masalasi muhokamada:

– baʼzilar bu qaror xodimlarning ish unumdorligini oshiradi deb hisoblaydi;

– ayrimlar esa bu bemorlarga xizmat koʻrsatish tezligini pasaytirishi mumkin deb biladi.

Bu bahsli va argument topish biroz qiyin mavzu.

Ayni shu mavzudagi essega nima deysiz? Maʼqul boʻlsa – 🔥

@oriftolib | Sahifalarimiz

Tibbiyot xodimlarining ish kunlarini qisqartirish: unumdorlikning oshishimi yoki xizmat koʻrsatish tezligining pasayishi?

Bugun sogʻliqni saqlash tizimi xodimlarining ish grafigini maqbullashtirish, xususan, ularning ish kunlarini qisqartirish masalasi jamoatchilik va mutaxassislar oʻrtasida qizgʻin muhokamalarga sabab boʻlmoqda. Bir guruh tahlilchilar bu islohot shifokorlarning ish unumdorligini oshiradi deb hisoblasa, boshqalar tibbiy xizmat koʻrsatish tezligining pasayishidan xavotirda. Aslida, bu ziddiyatli vaziyat chuqur ijtimoiy-tahliliy yondashuvni, shifokor manfaati va bemor ehtiyoji oʻrtasidagi oltin muvozanatni taʼminlashni talab etadi.

Ish kunlarini qisqartirish gʻoyasi tarafdorlari fikricha, bu amaliyot oq xalat sohiblarining jismoniy va ruhiy salomatligini asraydi, bu esa mehnat samaradorligini oshiradi. Jahon Sogʻliqni Saqlash Tashkiloti maʼlumotlariga koʻra, tibbiy xatolarning salmoqli qismi aynan shifokorlarning surunkali charchogʻi oqibatida yuz beradi. Bunday hissiy zoʻriqishdan aziyat chekuvchi shifokorlar orasida jiddiy tibbiy xatoga yoʻl qoʻyish ehtimoli ikki baravar yuqori boʻladi. Ommaviy axborot vositalarida bot-bot yoritib turiladigan holat – operatsiya vaqtida bemor tanasida tibbiy uskunalar qolib ketishi ham aynan shifokorning yetarlicha hordiq chiqarmagani oqibatiga yaqqol misoldir. Reaksiya va diqqatning susayishi, shaxsiy salomatlik bilan bogʻliq muammolar ham tibbiy xizmat sifatining tushishiga, hatto fojiali oqibatlarga olib borishi ehtimoli katta. Kuch-quvvatini toʻliq tiklab olgan, bardam va tetik shifokor qisqa vaqt ichida bemorga aniq va sifatli tashxis qoʻya oladi.

Tibbiyot xodimlarining ish kunlarini qisqartirishni yoqlamaydiganlarning ham oʻziga yarasha asosli dalillari bor. Ularning fikricha, ish kunlarining qisqarishi poliklinika va shifoxonalarda kadrlar yetishmovchiligini yuzaga keltirib, bemorlarga xizmat koʻrsatish tezligini pasaytiradi. Misol uchun, aholi zich joylashgan hududlarda shifokor va hamshiralarning ish kunlari qisqartirilsa, shifokor qabuliga kirish uchun tabiiy ravishda uzundan uzoq navbatlar yuzaga keladi. Bu esa odamlarda tizimga nisbatan ishonchsizlik kayfiyatini uygʻotadi, hatto tezkor yordamga muhtoj bemorlarning hayotini xavf ostiga qoʻyadi.

Masalaning har ikki tomonini qiyoslagan holda aytishim mumkinki, men ish kunlarini qisqartirish gʻoyasini toʻliq qoʻllab-quvvatlayman. Shifokorlarning munosib dam olish huquqini taʼminlash – jamiyat salomatligi uchun hayotiy zaruratdir. Biroq kasbiy faoliyatdagi xavfli oqibatlarning oldini olish uchun bu islohot ehtiyotkorlik bilan amalga oshirilishi zarur. Fikrimcha, sogʻliqni saqlash xodimlarining ish kunlarini qisqartirish qoʻshimcha shtat birliklarini ochish va sohaga yosh kadrlarni kengroq jalb qilish bilan hamohang tarzda kechishi kerak. Yaʼni yangi mutaxassislar ishga olinsa va ish kunlari qisqarishi hisobiga kamayayotgan tibbiy xizmat qamrovi saqlab qolinsa, bemorlar sarson boʻlmaydi, navbatlar ortib, xizmat sifati pastlamaydi. Bu orqali shifokorning ham, aholining ham manfaatlari birdek himoya qilinadi.

Mohiyatan olib qaraganda, tibbiyotdagi har qanday islohot faqatgina bir soha vakillariga oid emas, u butun millat salomatligiga bevosita daxldor boʻlgan jiddiy jarayondir. Shifokorning ruhiy xotirjamligi va jismoniy sogʻlomligi qanchalik ahamiyatli boʻlsa, bemorning oʻz vaqtida tibbiy yordam olish huquqi ham shunchalik qadrlidir. Shunday ekan, ish kunlarini qisqartirish qarori sohadagi boshqaruvni toʻgʻri yoʻlga qoʻyish va malakali kadrlar zaxirasini shakllantirish orqaligina koʻzlangan ijobiy natijani beradi.

@oriftolib | Sahifalarimiz

Yuqoridagi esseni oʻqib chiqdingizmi?

Uning nega yuqori ballga munosibligini bilishni istaysizmi?

Agar bugun kechga qadar 200 ta 🔥 yoki ✍️ reaksiyasi yigʻilsa, baholash mezonlari asosida essening bandma-band tahlilini eʼlon qilaman.

Boshladik! 👇

🔥/✍️ – Tahlil zudlik bilan kerak!

😢 – Men bunday yoza olmasam kerak deb qoʻrqyapman…

@oriftolib | Sahifalarimiz

📢📢"SAIDA RASHIDOVA JAMOASI"da "Repetitorlik” yoʻnalishi uchun kuratorlar qidirilmoqda. 📢📢


Agar siz o‘zbek tilini sevsangiz, boshqalarga ham oʻrgatishni xohlasangiz, kreativ metodikalarga qiziqsangiz jamoamizga qo‘shiling!

Jamoaga qoʻshilish shartlari:

1️⃣ Oʻzingiz haqingizda CVni yozma ravishda oʻzbek, rus va ingliz tillarida tayyorlang.

2️⃣ Oʻzingiz haqingizda qisqacha maʼlumotlarni 3 tilda (oʻzbek, ingliz, rus) video tarzida yozib oling (1 daqiqa).

Yuqoridagilarni @UzbekWithSaidaAdmin telegramiga yuboring.

👉 @UzbekWithSaida

Soʻz oʻrnini adashtirish qanchaga tushadi: sogʻlom tishdan ayrilish yoki oʻnta telefon?

Koʻchada ketyapsiz. Bir stomatologiya klinikasi peshlavhasidagi yozuvga koʻzingiz tushdi: “Klinikamizda ogʻriqsiz tish sugʻuriladi!”

Nima boʻlganini tushundingizmi: klinika umuman ogʻrimayotgan tishlarni qoʻporib olar ekan!

Farzandiga dashnom berayotgan onaning soʻziga quloq tuting: “Koʻp telefonda oʻtirma!” Bola bechora uyib tashlangan telefonlar ustida oʻtirgani yoʻq aslida. Lekin soʻz toʻgʻri oʻrinda boʻlmagani uchun maʼnoga putur yetyapti.

Keling, shu yerda jumlalarni yengil tahrirlaymiz:

❌ Klinikamizda ogʻriqsiz tish sugʻuriladi.

✅ Klinikamizda tish ogʻriqsiz sugʻuriladi.


❌ Koʻp telefonda oʻtirma, koʻzing ogʻrib qoladi.

✅ Telefonda koʻp oʻtirma, koʻzing ogʻrib qoladi.


🟢 Mantiq qayerda oqsayapti?

Soʻzlarning joylashuvi butun boshli maʼnoni ostin-ustun qilib yuborishi mumkin.

“Ogʻriqsiz tish” desangiz, hech qayeri ogʻrimaydigan sogʻlom tish tushuniladi.

Ikkala holatda ham bitta xatolik bor: belgi bildiruvchi soʻz (ogʻriqsiz / koʻp) harakatga, yaʼni jarayonga (sugʻurishga / oʻtirishga) emas, buyumga (tishga / telefonga) bogʻlanib qolgan. Biz esa buyumni emas, aynan harakatni taʼriflamoqchimiz.

Bitta soʻzni yanglish joyga qoʻyib, oʻzimiz bilmagan holda shunday kulgili holatga tushib qolishimiz, havaskorday koʻrinishimiz hech gap emas. Soʻz gapdagi qaysi maʼnoga tegishli ekaniga doim eʼtiborli boʻling.

Bu esseda ham, reklama matnlarida ham, kichik hikoyalardan tortib katta romanlarda ham – har qanday matnda muhimdir.

👇 Bunday xatolarga duch kelganmisiz?

🔥 – Juda koʻp kuzataman.

🤔 – Baʼzan oʻzim ham shunday xato qilarkanman…

✍️ – Foydali boʻldi, endi yozganda eʼtiborliroq boʻlaman.

@oriftolib | Sahifalarimiz

Maza qilib inglizcha kino koʻrib oʻtirsam, ichidan lop etib oʻzbekcha reklama chiqib qolyapti-yu.

Bunchalar berahm boʻlmaydilar-kuuuu!

Rasmdagi chol ham shu matnni oʻqiganov. Anqovsirab turganidan hech narsa tushunmagani maʼlum 🥹

✈️ Rasmni masʼul tashkilotlar – mahalla va vadakanalga joʻnatib qoʻying 😉

[Rasm manbasi]

@oriftolib | Sahifalarimiz

🔥 Qani, boshladik!

Mana bu post qisqa vaqtda 200 ta olov yigʻdi. Barchangizga faollik uchun rahmat! Demak, sizlarga shunchaki qoidalar emas, tayyor matn ustidagi amaliy tahlillar kerak.

Nasib qilsa, essening ichki tuzilishini batafsil oʻrganamiz. Imtihonda mutlaqo boshqa mavzu tushganda ham, oson va saviyali yoza olishingiz uchun sizga universal yozish qolipini koʻrsatib boraman.

Diqqat markazimizda – KIRISH QISMI.

Tayyor boʻlsangiz – ✍️

@oriftolib | Sahifalarimiz

Yuqori ball oladigan esse qanday boshlanadi? (1-qism)

Kirish qismi – essening yuzi. Baholovchi ekspertning yozma ishga nisbatan ilk munosabati shu yerda shakllanadi. Tahlildagi matnimizning ilk xatboshisiga eʼtibor qarating:

“Bugun sogʻliqni saqlash tizimi xodimlarining ish grafigini maqbullashtirish, xususan, ularning ish kunlarini qisqartirish masalasi jamoatchilik va mutaxassislar oʻrtasida qizgʻin muhokamalarga sabab boʻlmoqda. Bir guruh tahlilchilar bu islohot shifokorlarning ish unumdorligini oshiradi deb hisoblasa, boshqalar tibbiy xizmat koʻrsatish tezligining pasayishidan xavotirda. Aslida, bu ziddiyatli vaziyat chuqur ijtimoiy-tahliliy yondashuvni, shifokor manfaati va bemor ehtiyoji oʻrtasidagi oltin muvozanatni taʼminlashni talab etadi”.

Bu xatboshi nima uchun mezon talablariga javob beradi? Chunki u 3 ta mantiqiy qadamdan iborat:

1️⃣ Mavzuni ochib berish

Matnni toʻgʻridan toʻgʻri “Mening fikrimcha…” deb yoki esse shartdagi savolni shundayicha koʻchirib boshlamang. Oldin muammoning jamiyatdagi dolzarbligini oʻz soʻzlaringiz bilan tushuntiring.

2️⃣ Ikki xil qarashni koʻrsatish

Mezonning 2-bandida “ikki xil qarashni yoritish” talabi bor. Bu qarashlar asosiy qismda keng yozilsa-da, kirish qismidayoq ularga qisqacha ishora qilib oʻtish matnning mantiqiy salmogʻini oshiradi.

3️⃣ Tezis (asosiy gʻoya) va silliq oʻtish

Abzas oxirida shunday tezis – tayanch fikr beringki, u asosiy qismga oʻtish uchun mantiqiy zamin tayyorlasin.

Keyingi postimizda aynan shu kirish qismida qanday soʻzlar tanlangani va publitsistik uslub sirlari haqida gaplashamiz.

👇 Mavzu davomini kutyapsizmi?

⚡️ – Albatta! Tezroq chiqsin.

✍️ – Oʻzimga saqlab olyapman.

@oriftolib | Sahifalarimiz