Chorvoq suv omborida cho‘kib ketgan uch nafar fuqaroni qidirish bo‘yicha qidiruv operatsiyasi yakunlandi. Bugun soat 13:35 da Favqulodda vaziyatlar vazirligi g‘avvoslari uchinchi cho‘kib ketgan odamning jasadini topishdi. Eslatib o‘tamiz, baxtsiz hodisa 2-sentyabr kuni Toshkent viloyati Bo‘stonliq tumanida sodir bo‘lgan edi. Katerda sayr qilish paytida oila a’zolaridan biri cho‘milish uchun suvga tushgan. Qutqaruv nimchasi bo‘lmagani uchun u cho‘kkan va unga yordam berish maqsadida akasi va otasi ham suvga tushishgan. Oqibatda uchalasi ham cho‘kib ketishgan. Kichik o‘g‘lining jasadi kecha, 9-sentyabr kuni FVV g‘avvoslari tomonidan topilgan. Ta’kidlanganidek, bugun yana bir o‘g‘il va otasining jasadi topilgan. Favqulodda vaziyatlar vazirligining tezkor tashkil etilgan shtabi, Jizzax va Sirdaryo viloyatlari Favqulodda vaziyatlar boshqarmalarining qo‘shimcha kuch va vositalarini jalb qilish, shuningdek, eng yangi zamonaviy qidiruv uskunalarini ishga solish orqali qidiruv ishlari samaradorligiga erishildi. Suv omborining hajmi kattaligi hamda uning chuqurligiga qaramay, cho‘kib ketganlarni qidirish ishlari nisbatan qisqa vaqt ichida yakunlandi. Fursatdan foydalanib, yurtdoshlarimizni suv obyektlarida xavfsizlik qoidalariga rioya qilishga chaqiramiz.

➡️Boshqa yangiliklar

📱Fvv.uz | 📱Facebook | 📱Telegram | 📱Youtube |📱 instagram | 📱X.com