لا تقطفون الورد من خضر الأحضان
‏دايم يموت من العطش في يدينا !

‏تفرح حبايبنا على حزن الأغصان!
‏معذور يا طير البخت ما تجينا

‏هذا البلد من دمع الأحباب غرقان
‏ياما بكوا منّا .. وياما بكينا

‏يمكن سبب قلة توافيقنا كان ..
‏للورد غصن ٍ مات يدعي علينا !

‏⁧ #بشاير_المقبل

فقر الفرح جاير لو المال مملوك
‏والروح كفٍ قاسي الوقت حنّاه

‏ياطيفه العابر على البال ارجوك
‏عطني من الفرحه فتافيت .. لله

#بشاير_المقبل

قلبي جريح .. ولاهي آثار وسواس !
‏شَره ٍ ورا سجن الحنايا يصوّت :

‏هرجك يهد الحيل ما كنت حسّاس !
‏لو سَمْعِته ضلعان دربي تلوّت

‏يا واحدٍ حرّض على عيني الباس
‏واقف يشوف ظروف وقتي تقوّت !

‏و المشكله ما تنشكى لأقرب الناس
‏هذي وَحَدها .. يا وليفي تموّت !

‏⁧ #بشاير_المقبل⁩

يا ريم ..

يا ريم … حنّا ذابحينٍ ولدكم؟
‏وِضح الليالي من جفاكم مجاهيم!

على كبر شرهة عيونٍ رجتكم
عشتوا ٍ ورا أهدابي كبارٍ محاشيم

‏ما عاد يوفّي وصلكم في وعدكم
‏ولا عاد نبغى سيلكم ! يكفي الديم !

‏الوقت .. لو ياوي لقلب ٍفقدكم !
‏ما مر ّ كنّه من ( ثقال المعازيم )

يا ريم عفنا كل شي ٍ بعدكم
سمّي على قلبي من الشوق يا ريم

#بشاير_المقبل

ناديت يا رب القلوب القواسي
تسخر لنا من صالح الخلق خَيّر

و تبدّلوا ناسك .. وبدّلت ناسي
ما اخترت خلانك ، ولاني مخيَّر

عيّنت لي قلب ٍ مقاسه مقاسي
ما عادني بحماك ريم ٍ مذيّر

وماعاد به - دربٍ يجيك - متواسي
وتلومني لا ما لفيتك مْسيِّر !

غيّر تضاريس الجبال الرواسي ..
مَر الزمن ! وش عاد قلبٍ صغيّر ؟!

#بشاير_المقبل

إليا سكت ذيب شوقي في حشاي يعوي
‏وإليا تكلم - يمين الله - كلامه طرب

‏ويوم يتبسّم أحس الكون كله سِوي
‏يسود الأرض السلام ويصلَح اللي خرب

‏واليا زعل قلت حيل الله ياروحي قوي
‏كن الفرح غيمه! وهالقلب ماقد شرب

‏يمشي على شوف عيني كن ماله خوي
‏لو تمشي بظله اليامن لفانا عرب

‏⁧ #بشاير_المقبل⁩

كفو .. كفو .. كفو .. كفو ما تهونون
يا رجال ابو سلمان ، قدر .. وحشيمه

يا صقورنا الخضرا .. ثلاثين مليون ..
ناموا من ( شعور الفخر ) فوق غيمه

يكفي سجود طويق .. لله منون
على بساط إرث الملوك العظيمه

تسيّد الخفاق الاخضر على الكون
واسقيتوا المختال مرّ الهزيمه

هذي السعوديه يا الابطال .. تدرون
للمستحيل بعزم اهلها خصيمه

ما يعشق الشعب السعودي على هون
مجنون بأرضه و بولاه لزعيمه

#بشاير_المقبل 🇸🇦🇸🇦💚💚

يا ليت من عاشَر (ردي) يترك على وجهه وسم
ما بالعمر وقت لمشاريع ٍ تقفّاها حسوف

يا لعن ابوهم بيض وحكاهم مثل سيل الوسم
وقلوبهم اسود من عيون الكحيلات الخشوف!

#بشاير_المقبل

✨يوم من الايام صادفت كبيرة سن في مكان عام على كرسي متحرك طلبت من ولدها اللي يدفها انه يوقفها عشان تصلي ورد عليها بـ اففففف سمعها كل من في المكان !!

قلت:

أُفّ ؟.. يا كثر الالم .. بعيونك المليانه !
‏ياعسى ربي يعوض شيبتك بجنانه

‏"أف"وأنتي منحني ظهرك عشان عيونه !
‏"أف"وأنتي نظرتك له نظرة الشفقانه!

‏"أف"وأنتي مادعيتي ربك الا عِزّه
‏"أف"وأنتي ارحم واعظم واحنّ إنسانه!

والله ان ربي يرد حقوقك من عياله
والله ان يشهد على الذنب الكبير لسانه

جعل ما يكثر مع عيال الحمايل جنسه
جعلك تعلّين من كاس العوض باخوانه

‏ليت مثله ياخذه ربي ويشفع لأمه
‏قبل لا يذّن إبوه إليا إنولد بآذانه

‏⁧ #بشاير_المقبل⁩

الشوق صوتٍ بالمحاديب رعّاد
‏وصدرٍ تصافق فيه هند الرسايل

‏بين الكرامه والغلا حرب وجهاد!
‏واللي طرا لي شب روس الفتايل

‏ناسٍ تخاشرني بهالروح ي قناد
‏احبهم حب الطنايا لحايل

‏راحوا مراح الونس من عقب الاعياد
‏وخلوا ديار القلب صفرٍ محايل

‏أجواد ، لكن مارعو حق الأجواد
‏وافين قول ولاوفوا بالفعايل

#بشاير_المقبل

الحنين بهالشتاء لا شافنا سالين .. كَوّد !
‏لمّكم من كل دار لـ بالي و بدد سلاته

‏مسلمٍ في غير رب الكون عقله ما تجوّد
‏قام يطغى شوقه ويسرح ويخطي في صلاته !

‏عزوتي .. لا تقطعون الوصل وقليبي تعوّد!
‏(التِعوّد) فالحياة اكبر و اقدم مشكلاته !

‏⁧ #بشاير_المقبل⁩

رجّع القلب كلّه للمحاني و إغد
‏كان باقي بعمري يوم واحد .. غِبَه

‏كل خل ٍ لخله: سِعْد عين .. ورَغد
‏وانت حِملٍ ثقيل ٍ ماحدٍ يرغبه

‏راح عمري كرامه لك: تعشّ وتغدّ !
‏لين روحي لحقها من يدك مسغبه

‏صرت منتالي ابتسي في ظلالك: وَغَد ..
‏إحرموه سْنناه .. ولا اهتنى بـ شْغَبه

‏⁧ #بشاير_المقبل⁩ ⁩

كبر حبك دورة الأيام ما حرّكته
‏كل عام يزيد قدرك عند من يغلونك

‏انت روح الدار ، وانت الخير ، وأنت بركته
‏لا خلا من هالحجاج ، ولا عدمت عيونك

‏⁧ #بشاير_المقبل⁩

قصة حياتك ( تَأدَب ) وأنت تَرويها
‏لو مَرّك فصول بالنَكسات مليانه

‏الله هو اللي كتبها .. وإرتضى فيها
‏ولا ينظلِم حَيّ في عِزّه وسلطانه

‏إن ذِقت مِرّ ! بتعيش تذوق حاليها
‏والعمر تمشي طريق عجافه .. سمانه

‏ما قَدَّر حمولك إلا وأنت قاويها
‏أدرى من الروح بأمر الروح .. سبحانه

‏⁧ #بشاير_المقبل⁩

( ترك المسافه ) شرط بين الاصدقا
‏إليا تِمنّيت الغلا يبقى عمر

‏أيامنا دمسات .. وشتاها شقى
‏وأصحابنا صوره من جروم السمر

‏ندفى بها : ودّ وتعاليل ولقى
‏واليا دنينا زود يحرقنا الجمر !

‏⁧ #بشاير_المقبل⁩

رسايله : غايب رجع
‏مسهود يومين و هجع

‏لحضة شِفا عقب الوجع
‏خِطّار.. لمضيّع طريق !

‏واليا إتصل : لذة نعاس
‏بعد المساري والعماس

‏بِكر الحيا عقب اليباس
‏عِلم السعه في عِزّ ضيق

‏وان سَيّر : يطيح الحطب
‏وارضى عن الوقت العَطَب

‏حلوٍ يجي مثل الرطب ..
‏للي صحى ما فكّ ريق

‏⁧ #بشاير_المقبل⁩

ألا يا رب لي قلبٍ كثر ماقد ثِـبَت .. رعديد !
‏وداعة عينك اللي ما نستني ، لا تخلّيني

‏وقفت بوجه برد الزمهرير وسافيات البيد
‏وأخاف إنه ليا طال الوقوف تزّل رجليني!

أمانه ! تخشرون إسمي من الدعوات يا حِجّاج
‏انا روحي لرحمة قاضي الحاجات .. محتاجه

‏الا يا ماهد ٍممشى نبيّك ليلة المعراج
‏طريقي موحش وغارت نجومه و اعتم سراجه

‏على قلبي عواصف ذعر منها والظروف أمواج
‏وقف طالبك من كثر السحى كنه على صاجه

‏لك المنّه على اقدارك لك الشكر ولك الالهاج..
‏بحمدك لين ترضى يا عظيم الملك .. بفراجه

#بشاير_المقبل

يَحْدُث : بأن يطوى مع النسيان
‏شاعر ويُذكَر من سَرق نَصَّه!

‏وينام مِلئ جفونه الغلطان!
‏ويسهر ضِحيّه ونْدِمَه غَصّه!

‏ويتعذّرنّك أسلم الأبدان
‏وتشيل ألمك ظهور منقصّه!

‏ويشكي عليك إنسان من إنسان
‏والشاكي ألعن شخص بالقصه!

‏يُثنى على سُوء .. ويذمّ إحسان !
‏وباقي ! على رفّ العَجب رَصّه!

‏(هالوقت ) يسعى بـ أهله الشيطان
‏يالله علينا بالهْدى وَصّه

‏عجايبه تفهق عجيب أزمااان
‏ما جا الدهر و سنينه بـ نِصّه

‏⁧ #بشابر_المقبل⁩

حتى الحزن ! حط الله بأعمق تفاصيله جَمال
لولاه كان الناس تطغى في سَعَتها وتغَفِل !

أقسى القلوب اللي تلين وزانه صخور الجبال ..
في حَضرته ما كنه إلا رِقّـة أوراق النفل

جعله ليامن مَرّ ما يبطي ، ولا يقهر رِجال
ولا يترك اليا زلّ بوجيه النِسا طَرفٍ جَفِل

و الله يعطينا لحَمله قوة ظهور الجْمال
وإلا يجي دونه من الرحمه .. دراويز و قفل!

#بشاير_المقبل