إعتقادك انك شخص لا يمكن الإستغناء عنه هي بداية خيباتك ..
أنت قابلٌ للإستغناء عنه حتى وانت تؤدي أكثر الأدوار أهميةً في حياة احدهم !

قلت ُ عن ذلك ذات يوم:

جيت؟ منزالك عيوني رحت؟ ما بجزع و اطيش
لاني اللي تطرد المقفي .. ولاني والهه

راحت اللي كنت احسب اني بلاها ما اعيش
وعشت! لا وازيدك مْن الشعر صدمه؟ دالهه !

#بشاير_المقبل

‏وش اللي يِدعي قلوب العبيد بهالعتيم تضيق؟
‏تراعيها .. كليف ٍمن هواجسها شراب الما !

‏اجيه أبشتكي همٍ على قلبي عديل طويق!
‏والاقي فوق قلبه مثل اجا من همه وسلمى!

‏⁧ #بشاير_المقبل⁩ ⁩

الهروب من (الظروف) أول مواري للجبان
‏القوي يوقف .. عيونه شاخصه بعيونها

‏ما لبس ثوب الحياة اللي يبي لونه فلان
‏ما مشى سِكّه .. عشان العالم بيمشونها !

‏دون غاياته .. ولو كسّر شلافيه الزمان
‏دام له راس ٍ يشم ّ الريح .. يبقى دونها

‏⁧ #بشاير_المقبل⁩

يا محياً في عيون القلب يسوى له قبيله
‏مابقى في "يا صباح الخير " حرفٍ ما تشرّد!

‏إرجهن .. يقفي المقيض وتقبل المزن الثقيله
‏وان تبسّمت ؟ المطر يبدا على الصيف يتمرّد!

‏كيف لو راقن عيونك ! تمسي الجردا خميله
‏وكل خدٍ وسّمته الشمس في نجد يتورّد

‏ولو ضحك سنك ! تِسود الفرحه ايام ٍ طويله
‏وتسكن طيور السعد بوجيهنا الشَفقى تغرّد

‏⁧ #بشاير_المقبل ⁩

قلبي ليامن عزّ مخلوق .. مُسرف !
‏يِغلي .. ولا يِغلي على هون واسكات

‏لو كفّ حاجاتك من العمر تغرف
‏يلقى بنقص العمر منها ملذات

‏ولا شاف عينك من بلاويك تذرف
‏بَرّك على صدري جبال السروات

‏يشب لك ناره من الضلع الاطرف
‏ويهب ّفي قايظ لياليك نَسمات

‏فإن قلت كلمه تجرح شعورك .. إعرف
‏اني انجرحت بكلمتي عشر مرات 🤍

‏⁧ #بشاير_المقبل⁩

#القمر ⁩

‏قالت : قمر سبحانه اللي مسويه
‏ضوّا السما من زود نوره .. يجنن !

‏واللي يجنن والله هروجها فيه
‏وايدينها اللي يشرحنْ و يتثنن

‏واهدابها حمّالة الرشد والتيه
‏نِجلٍ بنظرات البراءه تِفنن

‏ودي اقول إن القمر حدر شوفيه..
‏وجهٍ عيونه يذبحن ما يِحِنن

‏خليه راقد في ذرا الغيم خليه
‏ولغير بدرك لِحظِنا لا يتعنن

‏⁧ #بشاير_المقبل ⁩

آعوذ بالله العظيم من القهر و إرهاقه
‏ومن قِلّة الحيله على وجهٍ تِسِرّ فعوله

‏والنظره اللي تلحظ أرزاق الحياة شْفاقه
‏والدمعه الحرّا على شي عجزت أطوله

‏والبطره اللي تِشبِعك من مجلسك ونفاقه!
‏والفاقه اللي ضاق منها مدهلك وحلوله!

‏والعَنوه المهتمّه .. الملهوفه .. التوّاقه
‏لأشياء ما تهتمّ لك ، وابوابها مقفوله!

‏يا الله جنّبنا الشقى وعيونه الذوّاقه
‏اللي تنقّى في مناعير الزمن وزحوله

‏⁧#بشاير_المقبل⁩

ليلةٍ ماهيب سمحه وإنقضت هدنة جروح
‏كل ما بالكون هادي وبذرى العوج حْرِكَه !

‏قلبي اللي ما تهزه ريح ! مهزوم وينوح !
‏جايرٍ .. من قِمّته جرّه و بالقاع فركَه

‏إنتهى من مبتداه وجا يعلمني : “ بروح “
‏لا يلوم الضايم إنسان ٍمن الضيم تركَه

‏من عرف بإن الغنيمه ماهي بقدّ الجروح
‏يجمع اللي حيّ فيه .. ويترك أرض المعركه

‏لك حبيب ! وجيّته ما تبعث لميّتك .. روح !
‏ودّعه ، وادفن شعورك ، وإرقد الليل .. أبركه

‏⁧ #بشاير_المقبل⁩

انا كل ما الشوق إستبدّ .. وبغيت لقاه
‏مواقيتي تْعَـيي تجي مع مواقيته

‏تمنّيت .. وادري لو درى ما تبيت مناه
‏قبل لا اتواسى يحصل اللي تمنيته

‏حلالاه يا وجه ٍأحبه وأحب حكاه
‏يخاشرني بكاس ٍ برد ما تقهويته

‏⁧ #بشاير_المقبل ⁩

( إلا من أتى الله بقلبٍ سليم )

.
.
.

يا خالق الإنسان من ظلما ونور !
كسب النقى كايد ، و تحصيله كِليف

يحتاج للزلاّت في صدري قبور
ونفسٍ قوية باس ، وعيون الكفيف

وجاشٍ مثل هالأرض مع ضيمه صبور
و حِلم الرسول ، وذاكره مثل الخريف

عبدٍ من عبادك .. ولي كبدٍ تفور
أجزع ليا جاني من الغالين حيف !

ألهمني ( الغفران قوّه ) يا غفور ..
الوقت قسّاني ، وأنا عبدٍ ضعيف

وإجعلني أطوي هالثرى ( مثل الطيور ..
على الهبوب ) ، أمرّها .. حِملي خفيف

يهمّني : لامن تفقّدت الصدور
تلقى على جور الملا قلبي نظيف 💖

#بشاير_المقبل

يا صِنّاع العطور الفاخره .. لبوا مطاليبي
ابي عطرٍ ثقيل ، وله ثبات بروحي ، وفوّاح

تِسَمّع لا فهقت غلافه الدنيا تراحيبي
يزلّ العمر .. في صدري بقايا ريحته ما راح

دخيل الله ابي من ( ريحة امي الغاليه ) طيبي
وابيها صافيه ما شابها كدر الحياة .. قراح

عبير ( غدافها ) سلطانة أوطاني و تغريبي
لها بالذات سحرٍ يجعل ضواق الصدور .. شراح

ابي ريحة شعرها لا تحنّت في دواليبي
ودهن ٍكم تطيّب من نحَرها في ظلال وشاح

ورشوش ٍباقي لليوم يقتل بي .. ويِحْيـي بي
ومسكٍ حَدّه التنور يترك وجهها الوضّاح

وريحانٍ قِطَفته : رشوة ٍ ترفى عذاريبي
يسولف للزوايا عن غلاه بعينها لا فاح

وهيلٍ من سطاة دلالها فاع متعزوي بي
يبـي مشراقها بين النخيل .. وحِسّها المزّاح

ودفى طيّب نسَمها يوم تنشد : " قطعة قليبي!!
من اللي ضامك الله يحرم عيونه من الافراح ؟"

ابي لا ضلّت الخطوه سَحبني من تلابيبي
على درب السراط المستقيم اللي عليه ارتاح

وابي لا استاحشت عيني أحس انسان يدري بي
يجسّرني وانا بزحام ناس ٍ بالشعور شحاح !

والامنه اخذني حزني اغرق به .. وياتيبي
معي صبر انبيا .. وضلوعي المستاجعات صحاح

أبحيـى في رجاه .. آلين يملا هامتي شيبي
ثمنه الشوق ، وعماس الحنين ، ودمعي النضّاح

عساه اليا تضوّع من قميصي يا معازيبي
يردّ الشوف لعيون المسّره من بعد مرواح

#بشاير_المقبل

مايجيك الـوِدّ مني بالعيون الحمرا !
لا تسافر بالحلول ولي طريق قريّب

لا لبن عصفور منشودي ولاهي قمرا
والله إنّي ما أبي غير الكلام الطيّب

#بشاير_المقبل

يا سارق ٍجمّارة صدورنا .. عيب !
‏تسرق وتمشي واللواحظ بصيره !

‏هذي تراها قلوب ماهي لعابيب!
‏من جارها رب الخلايق يجيره

‏كل الحبايب مثلك تصيب وتخيب
‏ولا يتركون الكسر دون الجبيره

‏ ⁧ #بشاير_المقبل⁩

وصل المحبّه غير وصل المواجيب
‏شتّان .. بين الأوله والأخيره !

‏هذي : تِتقّى عن لسان العذاريب
‏وهذي شفاقه ، واحتياج ، وبريره

‏إلا اللقا حِنّه عن مزارَق الطيب
‏إما سرى بك (شوووق) جَفواك خيره

‏#بشاير_المقبل

(الترف)

الا يا وجهه الترف السموح الهادي المملوح
الا يا زوله اللي شب من عوج الحشى جمره

الا يا صوته الغضّ الجهور اللين المبحوح
الا يا حكيه اللي له على درب الحشى جرّه

الا يا مزحه اللي ما يخلف من وراه جروح
الا يا جدّه اللي ما ترك في خاطري حره

الا ياطبعه الصلف السموح،وسره المفضوح
الا يا قربه وبعده ، الا ياحلوه و مره

لو أجمع دمعي اللي فوق كف الشوق له منضوح
سقيت من الفيافي مايخلي نجد مخضرّه

نزعه الله من صدر ٍسكن بأقصاه نزعة روح
ورضينا بالقدر يومن غدابه ، خيره وشره

الا ليته فطن للذكريات اللي تجي وتروح
وقِصَر طيبه عن أحبابٍ عقب فرقاه منضرّه


#بشاير_المقبل

يا رب عاونّي على سطوة الياس ..
‏لا مَرّ قلبي بالليال الثقيله

‏سخر لي جنود السماوات ، والناس
‏عيني عليك - من الخلايق - دخيله

#بشاير_المقبل

من علّم النعناع عن ضيق صدري ؟
‏تسابق أوراقه على عابس شْفاي!

‏حزني أحسه غادر اليوم بدري !
‏وخلتني افكار ٍ على غير مشهاي

‏راقت .. كأن الغيم مرصوف حدري
‏قلبي (ولا هي عادته ) صار نسّاي!

‏وش قالن الأوراق للضيق ؟ مدري !
‏مير الأكيد إليا ادبرت .. خدّر الشاي

‏#بشاير_المقبل