خذ بردك وصيفك
‏ملعونه .. الذلّه

‏ارحل على كيفك
‏زيد الجفا بِله

‏الحشمه لطيفك
‏والا انت ؟ لا بالله !


#بشاير_المقبل

مَ اذكر إني قلت له (تكفى) وكمّلت الطليبه !
‏لا سِمَعها يِهْمِل التبْعات ويقول: " ابشريـبي "

‏حَيّ والله من عطا لحروفها العَسرات هيبه!
‏من يقدّر ثقل مَجراها على لساني .. حبيبي 🤍

‏⁧ #بشاير_المقبل ⁩

شيٍ نقوله يصلَح الحال لا قيل
وشي ٍ كفايه نفهمه بس ! ي فلان

عسى اللذي يامر على الغيم ويسيل
يامر على قلبك ويرجع كما كان

#بشاير_المقبل

تكلّمي .. صوتك يجيب العوافي
‏لا تسكتين الين تبرى المعاليق

‏قلبي على جال السواليف غافي
‏غافل عن همومه .. ولا وده يفيق

‏برد .. وكلامك ياصل الروح دافي
‏لحضة سعه في منتصف ليلة الضيق

‏سبحان من جابك ( وطن ) بالمنافي
‏ومن سخّرك لقليّل الحظ ( توفيق )

‏⁧ #بشاير_المقبل ⁩

تكفى .. على شان الغلا والمعزّه
‏ولجل الدموع اللي بعيني تِوزّن

‏جذعك لو يموت إصلبه لا تهزّه ..
‏ريح الهروج اللي على النفس حَزّن

‏لا أشوف راسك قاصره عِزّ .. عِزّه!
‏لو السيوف بنصف قلبك يغَزّن ..

‏وعيوننا يوم يتلاقن بحَزّه :
‏أربع بناتٍ في إبوهن يعَزَّن

‏⁧ #بشاير_المقبل⁩

يرتجف كفي واحس الوقت قيض !
‏قربك تصير الصرايم دافيه

‏تدري انك عافيه ؟ واني مريض !
‏وأكبر احلام المريض العافيه !

‏ما على الدنيا لميرادك معيض
‏ولا بها شربة حنان ٍ صافيه

‏قمة الافراح من دونك حضيض!
‏آثم التاريخ بـ الجغرافيه

‏سامح ٍطرفي .. عن الزله غضيض
‏المعاذير بعيونك كافيه

‏والله ان روحي من عروقي تفيض
‏ما سبقت ( احبك ) بـ لا نافيه

‏⁧ #بشاير_المقبل ⁩

"عيناكِ من فرطِ الجمالِ كأنها "
‏مخلوقةٌ لمِحاجر الغزلانِ

‏قمرانِ من ليلٍ أضاء سَوادُها
‏قَـلَبَ المَحالةَ ممكناً بثواني !

‏سُبحانَ من جمع الملاحَةَ كُلها ..
‏وأحاطها بالحسنِ …… في عينانِ 🤍

#بشاير_المقبل

يقول :

‏طيب ظنك في جميع الناس .. لا يتمادى
‏العرب ماهيب ابوك وشيمته يابنتي !

‏إن فرحتي في مدايحها وقلبك نادى ..
‏والله إن مافيه طيب بالزمن غير أنتي

‏واقول :

‏كل ما ناحت حمامه لي .. من اللي جاها
‏أبتعد .. خوفي تزيد جروحها من ردّي

‏اخ ّ: لا رِحمَت رجالٍ ما تعزّ نْساها
‏يرحم الله شيمة ابوي .. وشهامة جدي

‏⁧ #بشاير_المقبل⁩

راحوا مواليفي .. بقى منهم طيوف
‏والذكريات اللي تِقاطَعني قِطَع !

‏وين رحلو ا ؟ مدري مهانه او ظروف !
‏خبري عمر حبل الغلا ما ينقطع !

‏هزايل الأعذار و عيوني تشوف ..
‏من يستطيع الوصل لكن ما إستطع !

‏وشلون الاقيهم ملاقاة العيوف؟
‏والقلب بين إسمع -ليا اغليت- و أطع!

‏ثلثين مالي راح كفّارة حلوف
‏على : "يمين اني فلا آصل من قِطع"

‏⁧ #بشاير_المقبل⁩

عزة نفس ✨

قال : نفسي عزيزه! قلت : هرج الطواري
بالرخى كل نفس ٍ ودها بالـ تـِقوّي

عزة النفس تبقى كايده وانت داري
صوتها له هزيم ٍ بالحنايا يدوّي

الوعد بالشدايد لا حَدتك المساري
وإختبرك الزمان بضيقتك وش تسوي؟

جعل رزقي على الله " ما أذلّ واداري
واظحك بوجه ذلي والخفوق متشوّي! "

ما آقف فـ باب غيره لو يطول انتظاري
وان طفت نار حظي؟ ضلعي يشب ضوّي

واحد : " لعزّ نفسه " في عيونه مواري
افتخر به صديقي وافتخر به عدوي

#بشاير_المقبل

#على_سبيل⁩ العتب :

‏آمنت بإن ( الصمت ) يهدم دارك
‏اللي بنيته فوق روس جبالي

‏غصنٍ على غصن .. و تعمِّر نارك !
‏موقف على موقف تطيش دلالي!

‏لو أجمع بقلبي .. نقص مقدارك
‏أول طريق لصدّتي .. وإهمالي

‏لا جيت أعاتب .. طامعٍ بأعذارك
‏ولا ينتعاتَب غير منهو غالي 🤍

‏⁧ #بشاير_المقبل⁩

(الغيبات)

ياللي سألتونا عن الغيبات ! تبغون العلوم ؟
حنا نحَمد الله على البلوى قبل مدايده

إما نجيكم شامخين خشومنا بين النجوم
والا نتوارى .. لين تطفى بالحشى وقايده

الصمت لو جمّع على قلبك من همومك رجوم
يعزك اليا غيّر اللي تامنه .. عوايده

ما قد شكيت الا اطيح ، ولا رضيت الا اقوم
وقت المقادير الصلايف جيت منه بفايده :

للهرج : وقت ، وعفّه ، وحشمه ، وميزان ، وسلوم
حيٍ يقود لسانه .. وحي ٍ لسانه قايده !

إن جيتكم اشحذ فتات العطف من هَلّ العلوم
يا جعل جيدي ما تطبّه يا عرب قلايده

العون من عند اللطيف المعطي البرّ الرحوم
والا البشر مسنادها ما تنومن نكايده

محد ٍ بيغني لو عطا رزق الخلايق .. لمْحَروم
ومحدٍ بيمنع شي للإنسان ربي رايده

من طوّل الغيبات خلف الغيب خلوه محشوم ..
يطيب .. ويعوّد على سِمّاره وقصايده


بشاير المقبل