تدرون وش أثمن من عقود الذهب في عين حوّا ؟
‏اليّا جْفلت بين الظروف وعندها رجلٍ وليده
‏ٰ
‏يكبر قدر لامن تصاغر ، و أن ثقل حمله تقوّى
‏ما تشتكي غيداه في فيّة جناحينه لهيده
‏ٰ
‏ذاك الامان اللي نعيشه عند من لا قال سوّا
‏يشبه وقوفي للكبار .. وفي يديّ أجزل قصيده 🤍

#بشاير_المقبل

سعد ابن جدلان:

علـى ضـوء الكلام اللي كشف عنا ستار الصمت
عرفت اني تحت برق الامل في روض الاحلامي

احـسبـنك تـيمم بـاتجـاهـي ويـن مـايـممت
اثر مانته ورايه بالطريق ولانـت قدامي

مصـيبه لاتـردت قيـمتك فـي عين مـن قيــمت
يشوفك فالسهل وانته تشوفه فالسما السامي

كثر ماحـن قلبي للونيـس وكـثر مــادرهـمت
فجر صدري حنيني واتعب الاقدام درهـــامي

عيون الصد وعيون التجافي "حول"مهما اكرمت
تشــوف المجتهد كسـلان والبناي هـــدامي

مادام ان جانبي شام لجنابك وانت عني شمـت
كثر خيرك وانـا لانيب لاجايع ولا ظـــامي

اشوف انه علي واجــب ليـا مـريتكـم سـلمت
مرور اكرام تربطه الكرامه عند الاكرامي

على شـان الخفوق اللي على عرشه قعدت وقمت
وحجب عنك الدجا لين اشرقت لك بيض الايامي

ختـام السـالفه يـاطيب العشـره كرمت ودمت
هذا حقك علي وحـق هقواتي على اوهـــامي

مصير الوقت يشرح لك دروسه وان غفلت ونـمت
يصحيك الزمان اللي يصحي كـل مـن نــامي

تذكرني لامنها خــابت اوهـامــك بمـن وهمت
وعرفت الفرق في حب الخشوم وحـب الاقدامي

( ولد اليهود )

يبدو اني كلما قلت : اني اسعد من خَلق ..
ربي بحظٍ لقاك ؛ إلتفتت عيون الحسود !

وش بلا وجهك جفول و لاعب ٍ فيه الغلَق
ولك مع العالم وليفٍ فضّلك عن هالوجود؟

قلبي الغالي ! رميته في يدك كنّه خَلَق ..
والعيون أصخيتها ما كنّ بالدنيا ورود

وجهك الطاهر حبيب عيوني و رب الفلق ..
ما يهون الهم فيه إلا على ولد اليهود

الهموم اللي سببها : خلق خِلقت من عَلَق
كبّها .. من باب عفو المقدره أو باب جود

إن بغيت الحرب "جيتك عون" بارود ٍ طلق
وان بغيت السلم جبت الغصن والورقا شهود

انت .. خطّيت بيمينك ملحمة نصر و ألق
دارك بصدري : وطن ماله قوانين وحدود

من عرفتك .. كني اللي عايشٍ عيش القَلَق
وارتحل من دار ضيم وحَلّ دار ابن سعود

#بشاير_المقبل

جيت وجهي مرتوي ما بان جدبي
‏لا تهمك رِقّـتي ، قلبي يهودي :)

‏جاهله ! لو من فراق اللي زهد بي
‏رحت اصبّ الدمع واشوّه خدودي !
‏
‏⁧#بشاير_المقبل

‏لا تُكثِري التسبيحَ ما مِنْ مخرجٍ
‏مِنِّي، ولا شطٍّ ولا يقطينِ

جاسم الصحيح

(ملجا الأمان)

جراهيد ، ونهيت سباع ، وعتام ، (وطريق) أشراك ، تشابه علمه وغيبه!
حَدت (غِدروق) من قلبي وصارت قَـفرة شفاهي .. مصبّ لوادي الرّمه!

ركضت الين صدري صار غربال وهواه إدراك ، زبنته في مراقيبه
نبيل ٍ قد ملك عرش الوداد .. وقنن أشباهي .. و صَفّ الهامي وأمّه

تجلدا صبري العُود العتيق وعُوزي الفتاك ، جهمت افرش محاريبه
تحت سدرة (صلاة الفجر) نوّخ عذري الواهي ، واخذت شماغه آشمه !

أرايك مِتّكي فيها ملاك ٍ( من جذور الراك .. أخذ طهره واخذ طيبه)
تحت هالة سكينه همّدت واهج تشرّاهي .. سأل :” لبيه يا يمه؟ ”

جثيت وقلت: يا ملجا الأمان بهالدروب انخاك ، جفا (قلبي) زواريبه
وراي الصبح ، وفروق الحمام . ودلّتك جاهي تِزعفَر بِنّها دَمّه

ياابوي أدخل على الله من وهانك ، لا تشوف إنهاك ، زماني زاد تثريبه
توال ِ الوقت .. ما فصّل ربيعي ثوبه الزاهي ، صدى ! وأقدامي بجمه

سواليفك قَراح ٍ كنها زمزم بعد لإمساك ، دوا روحي مشاريبه
وبسماتك نعيمٍ سرمدي ٍ .. غير متناهي ، تزمّ القلب وتضمه

قولوا له : صويحبه ضامي
‏قلبه على صالي الملّه

‏وصّوه ! في وصل الارحامي
‏اليا عفا واصلح احسن له

‏ازرى الصبر يرقب اقدامي
‏ليت إني ايوب و أدِلّه !

‏ما عاد الاقيه بخصامي
‏الشوق لامن طغى .. عِلّه

‏إن جا ؟ له أجر بـ تبسّامي
‏وان غاب ؟ ياويله من الله

‏⁧ #بشاير_المقبل ⁩

ما جيت في حبه (بعض) .. جيت كلّي
قدره سِمى من فوق كل المواليف

اغلا على قلبي من ابياتي اللي ..
كتبتها و دموع عيني مذاريف

شرهة شفاقه .. بعد صدة تغِلي
وقلوبنا من ما هجدها مصاديف

شوق ٍعلى ظهر الجمل ما يشَلّي
وسطوة وَله ندرج وراها معاسيف

يبطي يهادي بالمعاليق غِـلّي ..
لو هو حمامة دار .. ما زارني ضيف

والتمر لامنّا قعدنا نحَلي ..
وقت المسا بيني وبينه مناصيف !

#بشاير_المقبل

(تمرّد)

طيري الشهم الوفيّ اللي بعد ( صدّي ) تمرّد
واقف في ساحته اربع وعشرين انتحاري

ماعقَب عشّه ، فقير الريش ، مجروح ٍ مْجرّد !
وله عيونٍ تبصر جيوش النوايا و المواري

عَطفِته معها لسان ساحر ، وخدٍ مْورّد
ما بقى زملٍ سمعها ما تهيض بالمساري

رفرف من التوق واستنفر معاليقي وغرّد ..
سلّم ، وصرّح بشوقه ! وانهزم جيش انكشاري :

كل من قال ( ابعديه ) اصبح بجثماني مْشرّد !
كبريائي والشكيمه والانا .. والفين طاري!

رافعٍ رايات نصر اللي جنى نصره مْبرّد ..
قاوي صدي ، وصدي كان من فوق اقتداري.

#بشاير_المقبل

(بيوت طين)

جال الطريق .. قلوبنا يا عابرين بيوت طين
فيها الصبور اللي وقف واللي تهدم من عناه
 
تفقّدوها لا عبرتوا بالكلام .. مسيِّرين
لربما تلقون محتاج تعفف من حياه
 
قصّر عليه الحظ باصحاب الوجيه الغانمين
ساكت على كثر الوجع ، دايم على الله مشتكاه
 
جايع شعور وكنّ له عن " طيّب الكلمه " سنين
تنام عينه نومة اللي نام ما حصّل عشاه
 
لربما ! تلقى المفارِق ، والمعنّا ، والحزين !
والضامي اللي ناشفٍ ريقه ولا حيٍ سقاه
 
لربما كان ( السؤال ) إفراج عن همّ سجين
لربما ( كلمة ) ! ترد الميت لـ دروب الحياه
 
إسأل رفيق العوز لا تسأل رفيق المترفين
ضيّق عليه الوقت حتى ذاب  وجهه من سحاه
 
(لامن طلبت الله عطيه ؟ اطلبه خلٍ فطين
لا شاف قلبك حروته ينهدّ من ضيقه .. بناه )

#بشاير_المقبل