انت (عادي كلامك) شعر جزل و سمين
‏كن ّهرجك قصيدة شاعرٍ أكلبي

‏يوم سَلطنْ "مصيبه" لا تردّت بعين ..
‏قيمتي عند من هو شرقي ومغربي!

‏فيه لهجة ملام ، وفيه ود ٍ دفين
‏فيه لين العشير .. و عِزّة اليعربي

‏من تسولف .. أصير قبالك الحاضرين
‏واهتف : ااااالله عليك و يا صلاة النبي 👏🏻

‏⁧ #بشاير_المقبل ⁩

ألا يا رب لي قلبٍ كثر ماقد ثِـبَت .. رعديد !
‏وداعة عينك اللي ما نستني ، لا تخلّيني

‏وقفت بوجه بردٍ زمهرير وسافيات البيد
‏وأخاف إنه ليا طال الوقوف تزّل رجليني!

‏⁧ #بشاير_المقبل⁩

لو تقول : الصقر ورقا قلت : ورقا
ولو تقول : الشمس زرقا قلت: زرقا

ولو تقول السيل يرقا قلت : يرقا
الخطا بالعين وارد ، وانت صايب 🤍

#بشاير_المقبل

وجهه بدا والقلب طاش!!
راوي وله لِحظٍ عْطاش

رمشه لعب فيه الهَجاد
وجفونه لحاف وفْراش

يتواضع ألين أقتفيه ..
يختال كنه مايناش!

برده دفى ، صيفه شتا ..
ليله ضمى ، صبحه رشاش

شوك ، ولواهيب ، و قفار
ورد ، ونسانيس ، وفَراش

شحيح! وإليامن عطاك..
كن العطا صاير بلاش !!

إصويحبٍ قربه يبي :
صبر النبي ، ورْباط جاش!

#بشاير_المقبل

يا خياله ، يا طيوفه ، يا هروجٍ تنحكابه
يا عطوره في ثياب الناس ! يا ضعفي وقوه

من سفح دمع العذارى ، طاح من عين المهابه
وانتم ابكيتوا عيوني لين شب الصدر ضوّه

ليه كل ما جيت ابسلى زدتوا بقلبي عذابه؟
ليه كل ما قلت ابنسى قلتوا ان الجور توّه؟

روحوا الله لا يبيح الشوق من ذنب الغلابه
ما تحسون بشحن قلبي ولا فيكم مروّه !

#بشاير_المقبل

الا يا وجهه الترف السموح الهادي المملوح
الا يا زوله اللي شب من عوج الحشى جمره

الا يا صوته الغضّ الجهور اللين المبحوح
الا يا حكيه اللي له على درب الحشى جرّه

الا يا مزحه اللي ما يخلف من وراه جروح
الا يا جدّه اللي ما ترك في خاطري حره

الا يا طبعه الصلف السموح ، وسره المفضوح
الا يا قربه وبعده ، الا يا حلوه و مره

لو أجمع دمعي اللي فوق كف الشوق له منضوح
سقيت من الفيافي ما يخلي نجد مخضرّه

نزعه الله من صدر ٍسكن بأقصاه نزعة روح
ورضينا بالقدر يومن غدابه ، خيره وشره

الا ليته فطن للذكريات اللي تجي وتروح
وقِصَر طيبه عن أحبابٍ عقب فرقاه منضرّه


#بشاير_المقبل

لو تسافر عن عيوني لآخر المعموره
والله إنك لقلبي اقرب من ( خرز سلسالي )

ولو يشحّ الفجر يا فجر الغلا في نوره
انت صبحي وانت ربحي وانت هيل دلالي

يجمعك قلبي من ورود العمر وزهوره
ويشربك ويفزّ من عزّ الوهن متشالي

#بشاير_المقبل

كلما جاني كلام ولا اشتهيت ..
اشتكي واعاتب اقول بجهد :

الله يجعلني اموت ولا حكيت
كلمةٍ تجرح بهالدنيا احد !

#بشاير_المقبل

( عِلم غلطاتي )

دقّ بابي ، وانثر المسباح ، واجرحني .. فدا
لايجيني علم غلطاتي - وانا اختك - من غريب !

لا قَبَسْ وألقى رضاك ، ولا على نارك هُدى !
ولا معي هُدهد سباك ! ولاني بعلّام غيب !

السكوت اللي يخلينا على الخلق حْددا ..
والقلوب اللي عثت فيها النميمه ما تطيب

بين ما قلته وما يُروى على لساني .. مِدا !
وما يردونه عليك من الحكي .. ربك حسيب

المجالس لاشربت بهارها ؛ شفت ( الندى ) ..
كنه الطوفان مقبل يهلِك الكون الرحيب !

كل خِلّ وله خليل .. وبالمخاليق حْسِدا
لا تقول اللي تَعَرف انه يكدّر لك حبيب

والمعادن ما تسر العين .. و اكثرها صدا
ينقلون الهرج ما كنه على العِقّال عيب!

جيل عادي لا مبادي لا سلوم ولا قِدا ..
عالمٍ تصبح على ودّ ! و تعافك بالمغيب!

أسوء النسوه ! يجي : رَجلٍ شعر وجهه سُدا
جاحدٍ ، ثرثار ، نمام ، وحسود .. وله نحيب

والرجال كثار .. لكن ! لعن ابو جد الرِدا
سوسة تاكل حصاد الشايب اللي شاب طيب

الصراحه لا تمركينا عليها .. مبتدا
ما غدينا اخبار في حلق الغريب ولا القريب

دقّ بابي .. وانثر المسباح .. واجرحني .. فدا
لايجيني علم غلطاتي - طلبتك - من غريب !

#بشاير_المقبل

(وصل الحبايب)

اشفقي ، مهزوم ي القمرا.. لفى عندك دخيل
جاك ودروبه ظلام وشرهته عكّازته

افهقي سود السحايب .. طرفه الليله كليل
واسكبي ضيّك على وادٍ عليك عنازته

جيش كحله من مهاديبه على قاعه يسيل
سايق العبرات مع جنده .. وصل غمّازته

ورّد همومه على الاوزان فالبحر الطويل
علّه يثور الكلام اللي ضلوعه حازته

كنت احسب (الموت) ماله في معاجمنا مثيل
ما دريت انه له اشباهٍ كثيره وازته :

(الوداع ، المنّه ، الحاجه ، الاجحاف ، الجميل
الخفوق اللي قفل عن صاحبه دروازته)

اسألي كل من لمستي وجنته في جنح ليل :
الظليمه ؟ ما خبرت ان المذاهب جازته !

يشتكون من الطعون ! وبيدهم سيفٍ صقيل !
ما نشف نصله من المذبوح عقب ركازته !

كان لي ذنبٍ يَحَجْب دعاي باليوم الفضيل!
كفّره قلبي وعجفات الليالي جازته

ايه يالقمرا وقولي : " لا تجرون العويل !!
دمعكم لامن فقدتوني مانيب بعازته

لا قتلتوا .. ادفنوا (وصل الحبايب) بالرحيل
لا تذَكّون القتيل ، وتتبعون جنازته" !

بشاير المقبل 🍂