‏ومن كان له خوةٍ تنشد عن الغيبه
‏ تحبه بـ طبعه الزين وعذاريبه
‏يعضها في نواجذ حلمه وطيبه
‏ ياشيب قلبٍ يضيق وماله مْدارِي

‏ ⁧ #بشاير_عبدالعزيز

دوّن جروحك لا تشافيت بكتاب
‏علمٍ يضوّي فالعلاقات نوّه

‏لولا جروحٍ ما حسبنا لها حساب
‏محدٍ يميّز صاحبه من عدوّه
‏
‏⁧ #بشاير ⁩_عبدالعزيز

- رثائيه

مكتوب يومك كلهم يبكونه
الموت لا جاء من يرد طعونه؟
الله يصبّر قلبي ، ويغفر لك
ويروي ثراك برحمته ومزونه
كلما طريتي والله إن أدعيلك
والله .. لا يحرمك ما يدعونه
هالصبح انتي وبعدك الله يعلم
منهو يموت الليله وينعونه
يمكن تكون المقبله هي دوري!
وتفيض روحي من وسط ماعونه !
الموت هيّن والبلا في قبري !
يا ويل حالي من سواد ركونه!
لا حثّ أبوي الطين فوق اكفاني
واسقى ترابي من دموع عيونه
وسمعت دق اقدامهم من فوقي
وعظ القبر على الجسد بسنونه
وراحوا هلي خلوني فيه لحالي
تحت التراب مقيده مرهونه
وجاني ملك يسألني منهو ربك؟
والخوف ساد المقبره بسكونه
وتخالفت حدب الصدر وانصكّت
والدود وردت جايعه مجنونه!
هو قبري اللي به هبوب الجنه ؟
والا كأنه ملةٍ مدفونه!
خلي القبر يوم الحشر وش حالي؟
عني بعيد العرش والا دونه !!
أنا مع "محمد" بجال الكوثر ؟
والا حطب للنار مع فرعونه؟
يالله يا ربي دخيلك عذني
قلبي تفطّر من بدو يطرونه
وراك موت استوعبي يا روحي
ياللي بملذات الزمن مفتونه
يالله ترحمنا إذا صرنا لك
وتشفع لعبد فيك حسن ظنونه
انت اللذي (يا رب) ما تنسانا
يوم البشر حتى الظنى ينسونه

#بشاير_عبدالعزيز

اللي يحبك ما يخليك زعلان
‏ولا يهتني بالنوم وانت متكدّر

‏ولا يهملك في حزة الضيقه انسان
‏واسمك على منهو يحب متصدّر
‏
‏⁧ #بشاير_عبدالعزيز ⁩

#ذكري_وفاه_الملك_عبدالله ⁩

‏ما نسينا والله إنّا مخشرينك ..
‏في دعاوينا و في أجر الضحيّه

‏كنت ابونا كلنا .. وكانت يدينك :
‏مزنة ٍ تمطر على الشعب بْرديّه

‏يعلم الله يابو متعب فاقدينك💔
‏يا عسى قبرك بساتينٍ و فَيّه

‏⁧ #بشاير_عبدالعزيز ⁩

مشاركة المرحله الثانيه من مسابقة الملك عبدالعزيز للأدب الشعبي

حِسن ظنّي بربّي ملا القلب وزياده
أبي سلعته مادمت أنا اليوم في سوقه
أظن العجاف من العمر ناخت شْداده
يزين البخت / ومزون الارزاق مسيوقه
أخيط الرضى لقلبٍ .. رجيت الله أعياده
‏وأرتّق جروح ٍ بالمعاليق مفتوقه
مثل حزني الليله .. فلاهوب لي عاده
وانا من فضل رب المخاليق مرزوقه
جزت عيني من البرق و دْويّ رعّاده
‏مثل جزوة اللي فاقد ٍعين معشوقه
تجول الخواطر والسهر يقدح زناده
وترجع عيوني بالزمن .. وأغرق بموقه
قبل يستلم نزّاع الأرواح له غاده
قبل‏ يآخذ الله مني أعز مخلوقه
انا وسطوة الظلما ؛ جفولٍ وصيّاده
تراعد بي أطرافي من الليل ملحوقه
أجي حضنها كني غريبٍ عن بلاده
‏رجع يجذبه من غربته عشقه و شوقه
أقول السماء يمه هجدني تِوقّاده
‏هقيتي غَضب ربي على الناس من فوقه؟
خذتني من يديني و جرّت تنهّاده
‏وقالت : سبق - باسه و تنكيله - رفوقه
تْخوّف نفوس الناس لا جتْك حَسّاده !
‏تْخوّف ذنوب العبد لا صارت تْروقه !
يا عفو الله و حلمه و رحمتْه بعباده
‏يا بيبانه اللي لا نصيناه .. مدلوقه
مْنيره عطتني للمقابيل زَوّاده
ومهره لعلم الطيب ماهيب مسبوقه
يعاف المراضع من غدا اليمّ بمهاده
‏وله بالشواطي من دوا الحال .. مشفوقه
سكن دار عدوانٍ توقّاه بإلحاده
وهو مسلمٍ ويسيل الإيمان بعروقه
عليها السلام من آدم .. لآخر أولاده
عدد ما اردف الغربي على القاع بحقوقه
وعساها مع محمد على الحوض ورّاده
‏ تنعّم بْوجه الله .. من النار معتوقه
نبي نلتقي عنده والارقاب سجاده
تحت ظل عرشه والمواعيد موثوقة
وانا لو ضمنت القلب يْلبّى له مراده
دعيت الله الليله عسى تاقف عروقه

#بشاير_عبدالعزيز

مشاركة المرحله الثالثه الإرتجاليه في
‏⁧ #مسابقة_الملك_عبدالعزيز_للأدب_الشعبي ⁩
‏⁧ #فرسان_القصيد ⁩
‏واللي وقع اختيار موضوع الإختبار فيها على موضوع (الشائعات)



ضاق بي صدر الوساع وساق لي همي سحايب
وامطرت عينٍ ملاها الضيم بدموعٍ سخيه

ساق رجلي ريهجانه قاصدٍ مجلاس شايب
شيخي اللي قاضبٍ شرع الله وسنة نبيه

وانسكب همي على صدره وجرّيت النحايب
لين صارت لحيته من ديم دمعاتي نديه

صحت يا شيخي تقول الناس ! والناس المصايب!
طالت أيدين الكلام وهزّت عزومٍ قويه

قوّلوني هرجتن ما قلتها بين القرايب
وانت تدري ساس بنتك ماهي الساس الرديه!

تربية شهمٍ يعز القوم ويفك النشايب
تربية ام السنع والطيب والنفس الرضيه

قال : يا بنتي سمعت من اول سنيني .. غرايب !
وش رجيتي من سنينك دام ذيك الاوليه !

اسمعي مني وانا اللي راسي من الناس شايب
شاربٍ شيخك هماج الخلق شرب الشاذليه

الرسول ! اشرف عباد الله ! و ورّوه العجايب !
في حديث الإفك طالوا عرضه ، وشاف الاذيه !

مريّ القول الهزيل مْرور عجلات الركايب
واسمعي قولة (سمين الهرج)(والناس السويه)

دام فوق متونك جنودٍ على فعلك رقايب !
لا يهمك من يقول بغيبتك يا ابوك سيّه

#بشاير_عبدالعزيز

مشاركة الجوله الرابعه المباشره
‏⁧ #مسابقة_الملك_عبدالعزيز_للأدب_الشعبي ⁩
‏⁧ #فرسان_القصيد ⁩
‏


دوري لي يا بنات الفكر عفريت جنّ
هاجسي داج الثرى و الثريا نيته
فإن قضبت عْنان الأفكار ! شاعرةَ الوطنّ
وإن جمح شِعري لكبْر المقام ! بْنيّته
البطل في قصتي نقوة رجال الزمن
كَثرت عْجافي وانا في حراوي جيته
أنتخي به ثنّها .. ثنّ يا ابن سعود ثنّ
مستثغيثه صابره .. حيةٍ به ميته
عيطموسٍ ، جادلٍ ، خشف ، عمهوجة حِسن !
من يلوم (محيّر) الزين في ملكيته؟
ساق لي عمره مهر ، وإعتمر بشته كفن
زفّـني للعز من فوق سَرج عبيّته
ذابح ٍلعيوني السود .. ذود من الفتن
قص راس اعداي ما شال همّ لـ ديّته
دقت أرض العارض الخيل والدمّام دَنّ
ولعبنّ كل السيوف الصّقال بهيّته
الضّيوف موجّبه ، والبيارق رفرفنّ
من لفى هلّا به و لا قبل عانيته
يوم كلٍ ينهب بكف وبكف يغبنّ
لمّهم من عزّ قيض الشتات بفيّته
وفوق هام الترك كل المجاهيم هْلكنّ
ما بقى الا جافل الوِضح في منقيّته
إيه أنا نجد العذيّه على رمحٍ وسن ّ
شوق ابو تركي ومعشوقته وصْبيّته
عزّنا معزي .. عسى مسكنه جنة عدنّ
و( الشيوخ ) مورَّثـه ورث ..في ذريّته ..
كلمة ٍ كفوٍ لها من نذر روحه ثمنّ
خادم البيتين ، يا حزمه وحنيّته
وقفة جبال .. ومشي عقربيّات المزن
لو نظر بالقاع ماتت نوايا حيته
تنهض العوجا ليا صاح صيّاح المحن
كل رجالٍ تتله عزاوي خيّته
لو يمد إيده على طاهر ترابي عَفن
ان سلم من موتته كاسرين ايديّته
ليت اخو نوره يشوف البوداي وش غدنّ؟
الحضاره ناشت سهيل في درعيته
وناطحاتٍ بالسما واقفاتٍ يشهدن ..
حاصل التاريخ برهان مصداقيته
سالمين وفي رخا غانمين وفي أمن
عايشين .. وشامت القوم ناره ميّته


#بشاير_عبدالعزيز


ملاحظه :
(الشيوخ) جمع شيخ وهذا الجمع قصد به التعظيم،وهو لقب شائع في جزيرة العرب لكل ذي سلطان أو رئاسة يطلق عليه في ديرته وما يتبعها، تمييزاً له عن غيره من شيوخ القبيلة أو رؤسائها، وقلما يجري لفظ "الشيوخ" في المملكة على ألسنة غير النجديين .

مشاركة الجوله الخامسه للحلقه المباشره في برنامج ⁧ #فرسان_القصيد ⁩
‏⁧ #مسابقة_الملك_عبدالعزيز_للأدب_الشعبي ⁩
‏والّتي كُتبت قبل الحلقه ، خلال ٤ ساعات في غرض ( الرثاء )

باسمك اللي نُوح فوق الفلك قِد سمّا به
مدني يا وامر الطوفان حيل وقوه

جيت لا هارون لا حيه ولا عرّابه
ما معي يا كود عبرات الفقيده خوّه

دمعةٍ وقفَت على خدي ، يقول خطابه :
يا بشاير هذي امك بالنعش مزهوّه

دوك بسمتها على وجناتها خلابه
كنّها اللي بِشّرَت في منوةٍ مرجوّه

امك اللي قالت : نفوس البشر غلّابه
الملَك يكتب رداها ، والزمان مفوّه

الولا يا بنيّتي رب العباد اولابه
مغرياتك من عجاريف الدهر ، تلهوّه

طبقي شرع الولي واستمسكي بكتابه
انهلي صافي قراهيده وحلو قنوّه

اسكبي دمعك على فوت الفروض سكابه
لا تقولين الزمن يبطي ، وعمري توّه

إذبحيني عند من عدّ القيم محرابه
وادفنيني عند من به ماريات مروّه

الحيا والغيره اشياءٍ تهاونّا به
ما تمسّكَ بالثنين الا أصيل ربوه

يا مراعيف العيون اللي تساقط مابه
هزّتك ريح الضمير اللي نسيت هدوّه!

الهوى لا صارت نفوس العباد ألعابه
كيف ابخصف من ورق شعري ، أواري سوّه ؟

ربي اشرح لي غلق صدري وردّ رحابه
والحزن .. جعله على قلبي سلامٍ ضوه

توبتي كنّي أشم اليوم ريح ثيابه
لو يفنّد واقع أعمالي ، ويبرق نوّه

الرثا للحي يا دمعاتي الندّابه
لو على قبر الحبيبه روحته وغدوه.

#بشاير_عبدالعزيز

مشاركة الحلقه النهائيه في برنامج ⁧ #فرسان_القصيد ⁩
‏⁧ #مسابقة_الملك_عبدالعزيز_للأدب_الشعبي ⁩




يهز الأرض لا دوّا صدا خطواتي الرعّاد
مغازي هالخطاوي تفهم الفَطنه رسايلها
أعرف العز من ضده ، وانا (ثاري) مع الأضداد
لوا يمنى الفرايد وإنبرت تكتب جزايلها
عسى الله يدحر الذله ومن دنّق لها ورّاد
وعسى الله ينصر المله ومن علّا فضايلها
لمع نجمي على كل المنابر .. مشعلٍ وقّاد
وقفت مكرمه ، شيهانةٍ صادت جفايلها
عطاني حقي الدين ، وعطتني قدري الأسياد
ولا قاصر علي إلا أزارقها جمايلها
انا نصف السعوديه أنا القدوه ، انا الأمجاد ..
تربت في سراجيفي وعلّت من علايلها
انا اللي ما رضت للعلم غير الفرقدين مراد
انا من وصلت الجوزا - وعدّتها - شمايلها
انا الحره ، انا المرّه على ضميانة الأكباد ..
من هناك ومن هنيا ، نقض ربي حبايلها
انا اللي فهمتهم وش هزم "فرعون ذي الاوتاد"؟
وكسرى من نزع تاجه ؟ وخيبر من غوايلها؟
وفيه .. علّمتهم كيف ما دون (الديار ) حياد
قسم بالله يا سلمان ما ناخت رحايلها
تزوم وكحلها بارود والخاتم يصير زناد
تفل صفوف نَقّاض العهد فلت جدايلها
اذا يا والدي هقوات راسك في رجاي بعاد
فانا كفو ٍ رقيت سنودها و ارقب مخايلها
زرعت بخافقي عز وكرامه والحصاد : وداد
قهرت نفوس جهّال تضرّس في محايلها
تضيق الأرض - يا وجه السعد - في معشر الحِسّاد
وبنتك من وساع بطانها ترفى خمايلها
ياابوي ان شذّت الفِطّر من ركاب ( الولا ) وش عاد؟
عراميسك تدك البيد في صالي قوايلها
أخو حصه / تساما بالحنايا قدركم وأنقاد ..
مثل فرق انقياد (بكار فكري) عن قلايلها
أشـوف بعينك نجـومٍ سناه يقدّي النشّاد
وصملاتك تشيل الكايده وتشيل شايلها
وطن صدرك مثل (عين الكريم) ، ومنجزاتك (زاد)
يديك ضماد لجروح العرب ، وسناد مايلها
(كبيره هالنفوس) اللي ضَنت لمرادها الأجساد
ضريره يا عيون ما وعت مغزى رسايلها.


#بشاير_عبدالعزيز

يا سارق ٍجمّارة صدورنا .. عيب !
‏تسرق وتمشي واللواحظ بصيره !

‏هذي تراها قلوب ماهي لعابيب!
‏من جارها رب الخلايق يجيره

‏كل الحبايب مثلك تصيب وتخيب
‏ولا يتركون الكسر دون الجبيره

‏⁧ #بشاير_عبدالعزيز ⁩

يا الله انك تجمع أحبابي بجنات النعيم
‏وتدمح بعفوك دقاق ذنوبنا وجلالها

‏أعترف في زلتي واستغفر الله العظيم
‏لي وللي فالقبور انقطعت من أعمالها

‏⁧ #بشاير_عبدالعزيز ⁩

ما ينغزك قلبك على شي ما صار
‏لو حطوا بكفك براهين وأعذار

‏لا تنتظر حيٍ يعلمك الاخبار
‏أصدق من الشوف ومن السمع ( قلبك )

‏⁧ #بشاير_عبدالعزيز ⁩

حبيبتي واللي خلق وجهك الزين
‏اني احس بضيق صدرك ومشكاه

‏روحي عساي اشوفك بيوم تبكين
‏من فرحةٍ كل الخلايق تمناه

‏ومن ضامك الله يرزقه بالملايين
‏ولا تكفي علاجه من الهم ودواه

‏⁧#بشاير_عبدالعزيز⁩

كم وردةٍ ماتت ورا الصدر بالهون
‏وعيني تشوف براحتينه سحايب

‏ما اقول شحّ الغيم ، لو مرّ بسكون
‏الموت لاصارت لغيري سكايب

#بشاير_عبدالعزيز

لو أجمع دمعي اللي فوق كف الشوق له منضوح
سقيت من الفيافي ما يخلي نجد مخضرّه

نزعه الله من صدر ٍسكن بأقصاه نزعة روح
ورضينا بالقدر يومن غدابه ، خيره وشره

الا ليته فطن للذكريات اللي تجي وتروح
وقِصَر طيبه عن أحبابٍ عقب فرقاه منضرّه


#بشاير_عبدالعزيز

ننقض حبال الوصل .. والشوق عقّاد
‏ونملا شليل القلب .. والقلب منقوب

‏يومٍ ثقل بعدك على مَشرقه زاد !
‏من صفحة التقويم لا شك معقوب

‏انا العليل اللي تصدد عن الزاد
‏وأنت الدوا اللي بالمقابيل مرقوب

‏حِسك - على الأوجاع - من غير ميعاد !
‏يشبه أثر يوسف على عين يعقوب

‏⁧#بشاير_عبدالعزيز⁩

يقول اللي له عيونٍ عطايب
‏عماه الدمع وخدوده خضايب

‏يا ليت إنه إذا مثلك توفّى !
‏يشيلونه على نود الهبايب

‏يغسّل طِهره العود المعتق
‏ويكّفن مبسمه بيض السحايب

‏وقبره .. حفرةٍ فوق الثريا
‏عليه الشمس والقمرا نصايب

‏⁧#بشاير_عبدالعزيز⁩

(مسيكين)

إلآمن هبت النسمات غربيه .. يزيد الهمّ
وتزيد العابرات من المشاهد لك على عيني !

وأهوّد للشعور اللي يصيح بهـالمحاني : نِــم
يبي يبقى ، يبي يشرق سناه ، وتزهر سنيني

طلبت عيونك وقلبك وحلّفتك وجتني : تَــمّ ..
وانا يوم أطلبك حاجه أعرف أنك بتعطيني

أنا في وجهك من الوقت لا غيّر علينا .. دِم
على ذاك النقى يامن زرع نبت النقى فيني

اراهن فيك يا عشقٍ جرى بالقلب مجرى الدمّ
- تركتك عمد - تسعى بالوريد وبالشراييني

ترفّق لاسكنت الجوف أنا داخل على الله ثمّ ..
عليك ، يسار صدري به يتيم ، وبه مْسيكيني


بشاير المقبل