د سترې محکمې د رویت هلال کمېټې له هېوادوالو غوښتي، چې نن (دوشنبه، د تلې ۲۰مه) په خپلو سیمو کې د جمادی‌الأولی میاشتې د لیدلو هڅه وکړي او د میاشتې د لیدو په صورت کې دې د خپلې سیمې محکمې او رویت هلال کمېټې ته شاهدي وړاندې کړي.

نور ولولئ⬇️
https://rta.af/news/kmyth-royt-hlal-az-mrdm-khoast-bray-mshahdh-hlal-mah-gmadyalaoly-tlash-knnd

د اسلامي امارت ویاند مولوي ذبیح‌الله مجاهد وايي، چې د پاکستاني چارواکو لخوا پر افغانستان د خپلو ناکامیو پړه اچول د هېڅ ستونزې حل نه دی، په پاکستان کې سیاسي، امنیتي، ټولنیز او اقتصادي ستونزې د اندیښني وړدي چې پر ټوله سیمه منفي اثر کړی دی.

نوموړي زیاته کړې، د پاکستاني چارواکو له خوا بې ځای تورونه لګول، د مذاکراتو بهیرونه سبوتاژ کول او د حل پر ځای د لوړ رتبه چارواکو ټول تمرکز په پروپاګند کول ناکام سیاست دی.

ښاغلي مجاهد ویلي، چې پاکستان باید په کور دننه د خپلو مشکلاتو د حل لپاره رغنده ګامونه واخلي، د خپلو سیاسیونو او ولسونو مشورو او حقونو ته درناوی وکړي.

د کډوالو او بېرته راستنېدونکو چارو وزیر مولوي عبدالکبیر د افغانستان لپاره د اروپایي ټولنې له استازي نیکولا بیلومو سره په کتنه کې راستنو شویو ته د مرستو رسولو، بیا مېشتېدنې او دایمي حل‌لارو په اړه خبرې کړي.

په دې کتنه کې د یادې ټولنې استازي د اسلامي امارت لخوا د میلیونونو راستنو شویو افغانانو د لړۍ د ښه مدیریت ستایلی او زیاته کړې یې ده، چې اروپایي ټولنه راستنو شویو ته د اغېزمن کار او د ستونزو حل په برخه کې همکارۍ او مرستو ته چمتو ده.

دغه راز مولوي عبدالکبیر ویلي، چې اسلامي امارت د راستنو شویو د ستونزو پر دایمي حل تمرکز لري او د کډوالو ښارګوټو د رغولو په برخه کې د اروپايي ټولنې د مرستې غوښتنه کوي.

د ټولګټو وزارت ویاند محمد اشرف حق‌شناس وايي، د بادغیس – هرات لویې لارې اړوند له قلعه نو څخه د بادغیس ولایت تر لامان بازار پورې د سړک د فرش د ترمیم او استنادي دېوالونو جوړولو چارې د څه باندې ۳۱.۷ میلیونه افغانیو په ارزښت پیل شوې.
نور ولولئ👇
https://rta.af/news/aghaz-kar-trmym-frsh-srk-shahrah-badghys-hrat-ba-hzynh-nzdyk-bh-mylyon-afghany

د کورنیو چارو وزیر خلیفه سراج‌الدین حقاني، د اسلامي همکاریو سازمان د سرمنشي له ځانګړي استازي، ډاکټر طارق علي بخیت او مل پلاوي سره وکتل.

د کورنیو چارو وزارت وايي، په دې لیدنه کې د افغانستان او اسلامي همکاریو سازمان ترمنځ د اړیکو د پیاوړتیا، بشري او ټولنیزو موضوعاتو او په دې برخو کې د همکارۍ د پراختیا پر لارو چارو خبرې شوې دي.

لنډ خبرونه| ۱۴۰۵/۰۷/۲۰
د اسلامي امارت ویاند مولوي ذبیح الله مجاهد وايي، په پاکستان کې سیاسي، امنیتي، ټولنیزې او اقتصادي ستونزې د اندېښنې وړ دي او پر ټوله سیمه منفي اغېزې لري.

په کویټ کې د افغانستان سفارت سرپرست مولوي محمد شفیق خطیب، په دغه هېواد کې د سعودي عربستان له سفیر سلطان بن سعد بن خالد ال سعود سره وکتل.

په کویټ کې د افغانستان سفارت وايي، په دې کتنه کې د دواړو هېوادونو ترمنځ پر دوه اړخیزو اړیکو، اقتصادي همکاریو او په کویټ کې مېشتو افغانانو ته د عمرې لپاره د ویزو د صادرولو په اړه خبرې وشوې.

تېره ورځ (یکشنبه، تلې ۱۹ مه) ۱۳۶ افغان کډوال له پاکستان او۴۹۰ افغان کډوال له ایران څخه هېواد ته راستانه شوي دي.

د سنايي غزنوي ښارګوټي رغنیزې چارې په چټکۍ روانې دي.

د دفاع وزارت لومړي مرستیال ملا حمیدالله اخندزاده، د اسلامي همکاریو سازمان د سرمنشي له ځانګړي استازي ډاکټر طارق علي بخیت او مل پلاوي سره وکتل.

دفاع وزارت وايي، په دې لیدنه کې د اسلامي همکاریو سازمان او افغانستان ترمنځ د اړیکو پر پیاوړتیا، د بشري، اقتصادي، ټولنیزو موضوعاتو او د امنیت د ثبات په اړه خبرې شوې دي.

د هلمند ځايي چارواکي وايي، په امارتي ادارو کې د خلکو ستونزې پر وخت حل کیږي او په دې سره د خلکو او ادارو ترمنځ ښې اړیکې رامنځته شوې دي.

د ننګرهار د خوږیاڼو ولسوالۍ اوسېدونکي وايي، د عالیقدر امیرالمؤمنین حفظه الله تعالی د ۱۷ مه ګڼه فرمان په پلي کېدو سره د ډېرو لګښتونو مخه نیول شوې، چې د خلکو په اقتصادي وضعیت یې مثبت اغېز کړی.

د ټولګټو وزارت ویاند محمداشرف حق‌شناس وايي، د ایران له لورې د ټولګټو وزارت په همغږۍ په فراه کې، د میل ۷۸ (ابونصر فراهي) سړک د ۶۴ کيلو متره برخې د بيارغونې چارې پیل شوې.

د حق شناس په وینا، د سړک ياده برخه له دې مخکې هم د ايران له لوري رغول شوې، چې د وخت په تېرېدو سره ويجاړ او یو ځل بیا يې د بيارغونې چارې پيل شوې.

د کورنیو چارو وزیر خلیفه سراج‌الدین حقاني، د افغانستان لپاره د اروپايي ټولنې له ځانګړي استازي توماس فریلېسن او مل پلاوي سره وکتل.

په دې لیدنه کې د افغانستان او اروپايي ټولنې ترمنځ د تعامل، د افغانستان د امنیتي وضعیت، سیمه‌ییز ثبات او د نشه‌يي توکو پر وړاندې د مبارزې په اړه خبرې وشوې.

همداراز د افغان کډوالو د وضعیت او بېرته راستنېدو، بشري موضوعاتو او د افغانستان او پاکستان ترمنځ د ستونزو د حل په اړه د سیمه‌ییزو هڅو پر اهمیت بحث شوی دی.

د عالیقدر امیرالمؤمنین حفظه الله تعالی د ۱۷ مه ګڼه فرمان د ښه تطبیق او عامه پوهاوي په موخه د میدان وردګ ولایت، د مرکز له بېلابېلو خصوصي ښوونځیو له زده کوونکو څخه د یاد فرمان اړوند ازموینه اخیستل شوې ده.

د هوا پېژندنې ریاست سبا (سه‌شنبه، د تلې ۲۱مه) په کابل، کاپیسا، پنجشېر، پروان، پکتیا، خوست، لوګر، سمنګان، بغلان، بدخشان، ننګرهار، لغمان، کونړ او نورستان ولایتونو کې د سختو بارانونو ورېدو او سېلابونو راوتلو اټکل کړی دی.

له پېښو سره د مبارزې او چمتووالي ادارې د یادو ولایتونو له اوسېدونکو غوښتي چې د احتمالي خطرونو د مخنیوي لپاره سیندونو او د خطر سیمو ته له نږدې کېدو ډډه وکړي.

بدلون؛
د سیاسي چارو شنونکی ډاکټر محمد زلمی افغان‌یار پوپل وايي، چې اسلامي امارت ولس ته خدمت کول خپل لومړیتوب ګرځولی دی.
بشپړه خپرونه:
https://youtu.be/g_zjzw3P42Y

د لغمان ولایت، دولت‌شاه ولسوالۍ ته د غځېدلي سړک پر مسیر د تګ راتګ د یوې ستونزمنې سیمې د جوړېدو چارې پیل شوې.

د اطلاعاتو او کلتور وزارت، د خپرونو چارو مرستیال مولوي حیات الله مهاجر فراهي په کونړ کې د خبریالانو لپاره په جوړ شوي سمینار کې ویلي، چې اسلامي امارت د ټولو رسنیو ودې او پیاوړتیا لپاره ژمن دی.

د لوړو زده کړو وزیر شیخ نداء محمد ندیم، کندهار ته د خپل سفر په ترڅ کې، د افغانستان د کرنیزو علومو او ټیکنالوژۍ پوهنتون مسوولینو ته وینا کړې ده.

د لوړو زده کړو وزیر، د یاد پوهنتون مسوولینو ته ویلي، چې د افغانستان اقتصاد پر کرنه او مالدارۍ ولاړ دی او یاد تخصصي مرکز باید څېړنیزې هڅې ګړندۍ کړي، د ځوانانو ښه روزنه او له خپلو داخلي سرچینو څخه ښه ګټه واخلي.