لنډ خبرونه| ۱۴۰۵/۰۷/۲۶
د افغانستان اسلامي امارت د رییس‌الوزرا له لوري له اړمنو کسانو سره د مرستو پر اړتیا ټینګار شوی دی.

مر بالمعروف، نهی عن المنکر او شکایتونو اورېدلو وزیر شیخ محمد خالد حنفي: د اسلامي امارت موخه په ټول هېواد کې د هر ډول تعصب له‌منځه وړل دي.

د ټولګټو وزارت له لوري د ۹ میلیونه او۸۲۰ زره افغانیو په لګښت، د دایکندي ولایت د پاتو ولسوالۍ د عمومي سړک د ترمیم، پراخولو او جغل اچولو چارې پیل شوې.

د ټولګټو وزارت وايي، چې د دې پروژې په چوکاټ کې د سړک په اوږدو کې د ۱۰ پلچکونو جوړول هم شامل دي.

د اړمنو لپاره د مرستو راټولولو د ځانګړې اوونۍ د پرانیستې په غونډه کې د چارو ادارې عمومي رییس شیخ نورالحق انور وویل، چې د اشغالګرو له لوري په هېواد کې د بمونو کارولو بېلابېلې ناروغۍ رامنځته کړې دي.

د اړمنو لپاره د مرستو راټولولو د ځانګړې اوونۍ د پرانیستې په غونډه کې د ریاست‌الوزرا اداري مرستیال مولوي عبدالسلام حنفي وویل، نړیوال سازمانونه د اسلامي امارت له خوا د اتو میلیونو بېرته راستنېدونکو کډوالو د مدیریت ستاینه کوي.

د اړمنو لپاره د مرستو راټولولو د ځانګړې اوونۍ د پرانیستې په غونډه کې د کلیو د بیارغونې او پراختیا وزیر ملا عبداللطیف منصور له ټولو لوریو وغوښتل چې په روانه اونۍ کې له افغاني سرې میاشتې ټولنې سره مرسته وکړي.

د اړمنو لپاره د مرستو راټولولو د ځانګړې اوونۍ د پرانیستې په غونډه کې له پېښو سره د مبارزې او چمتووالي ادارې عمومي رییس ملا نورالدین ترابي وویل، چې له افغاني سرې میاشتې ټولنې سره مرستې باید سیاسي نه شي.

د افغاني سرې میاشتې ټولنې عمومي رییس شیخ شهاب‌الدین دلاور د اړمنو کسانو لپاره د مرستو راټولولو د ځانګړې اوونۍ د پیل په مراسمو کې وویل، په هېواد کې د اوسني یووالي ساری په تېرو پنځوسو کلونو نه دی لیدل شوی.

د زابل د سرې میاشتې ټولنې مسوولینو، د اړمنو کسانو لپاره د مرستو راټولولو د ځانګړې اوونۍ له پیل سره هم مهاله له هېوادوالو او سوداګرو غوښتي چې له اړمنو سره مرستې وکړي.

نورستان کې د اوبو یوه کانال په جوړېدو سره به د ځايي بزګرانو لپاره د کرکیلې په برخه کې ګڼې اسانتیاوې رامنځته شي.

د ننګرهار د چپرهار ولسوالۍ یو شمېر اوسېدونکي غوښتنه کوي چې په دغه ولسوالۍ کې د هغو ښوونځیو د ودانیو د جوړولو چارې بېرته پیل شي، چې کارونه یې نیمګړي پاتې دي.

د کورنیو چارو وزارت لومړي مرستیال محمد نبي عمري، د پکتیکا ولایت لپاره د نوي والي د معرفي کېدو په غونډه کې پر اطاعت ټینګار کړی دی.

د بهرنیو چارو وزیر مولوي امیرخان متقي، د افغانستان لپاره د ملګرو ملتونو د سرمنشي له ځانګړې استازې او د یوناما له نوې ټاکل شوې مشرې رباب فاطمې سره کتلي دي.

بهرنیو چارو وزارت وايي، په دې کتنه کې د افغانستان په اړه د ملګرو ملتونو د راپورونو او ارزونو په تړاو، د کره او باوري معلوماتو پر کارولو، د واقعي وضعیت پر متوازن انعکاس او له اړوندو افغان ادارو سره د لازمې همغږۍ پر اهمیت تاکید وشو.

د یاد وزارت په وینا، د افغانستان او ملګرو ملتونو ترمنځ د همکاریو پر پراختیا، د راستنېدونکو افغان کډوالو پر بشري اړتیاوو او د مرستو پر اغېزمن تنظیم خبرې شوې دي.

په کتنه کې همداراز له سیاسي موضوعاتو څخه د اقتصادي فعالیتونو او بشري مرستو پر جلا ساتلو او د بشري اړتیاوو د پوره کولو ترڅنګ، د پراختیايي او زیربنايي پروژو د ملاتړ پر زیاتوالي ټینګار شوی دی.

ملا عبدالخالق عابد د پکتیا ولایت د نوي والي په توګه خپله دنده پیل کړه.

بلخ کې «بلخ؛ د افغانستان فرهنګي پلازمېنه او د تمدنونو څلورلارې» تر سرليک لاندې يو علمي سمینار ترسره شو.

له پېښو سره د مبارزې او چمتووالي ادارې عمومي رییس ملا نورالدین ترابي، په افغانستان کې د کډوالۍ نړیوال سازمان (IOM) له مشرې می‌هیونګ پارک سره د طبیعي پېښو له زیانمنو شویو او راستنېدونکو سره د لا زیاتو مرستو د راجلبولو په اړه خبرې وکړې.

د کډوالۍ نړیوال سازمان رییسې ویلي، چې د دوحې په راتلونکې تمویلوونکې غونډه کې به د بشري ډیپلوماسۍ او سیاست پر جلا کولو، د وقایوي پروژو د پلي کولو او په افغانستان کې د زیانمنو شویو خلکو د ملاتړ په اړه خبرې وکړي.

۲۴ خپرونه؛
هرات کې د راډیو خبریال شعیب جلالي د دغه ولایت د نړیوال ترمینل د پروژې د روانو چارو، پرمختګ او ظرفیتونو په اړه جزئیات وړاندې کوي.

د نن دوشنبې ورځې تاریخ!

الجزیرې د فلسطین د روغتیا وزارت په حواله راپور ورکړی، چې د ۷۵ فلسطیني شهیدانو ډله‌ییزه جنازه ترسره شوې ده.

د دغو شهیدانو جسدونه په دې وروستیو کې د هغو کورونو او ودانیو له کنډوالو راایستل شوي وو، چې پر غزې د اسرائیلي رژیم د جګړې پر مهال ویجاړ شوي دي.

سلګونو فلسطینیانو یکشنبه (د تلې ۲۶مه) د دغو شهیدانو د جنازې په مراسمو کې ګډون وکړ او جسدونه یې د شیخ رضوان په هدیره کې خاورو ته وسپارل.

د تسنیم خبري اژانس د راپور له مخې، د ایران د سپاه پاسداران ویاند سردار محبي خبرداری ورکړی، چې د ایران د انرژۍ پر زېربناوو هر ډول برید به د تهران له سخت غبرګون سره مخ شي.

محبي ویلي، د ایران زیانمنې شوې زېربناوې به د دغه هېواد د ځوانو ساینسپوهانو او متخصصانو له لوري په چټکۍ ورغول شي؛ خو په مقابل کې به اشغال شوې سیمې پر «سوځېدلې ځمکې» بدلې شي او اوسېدونکي به یې د سینا دښتې ته کډوال شي.