ملګرو ملتونو په افغانستان کې د بشري مرستو پر دوام ټینګار کړی.

د افغانستان د سوداګرۍ او پانګونې خونې پلاوي د ترکمنستان د تېلو او ګازو په نړیوال نندارتون کې ګډون کړی.

د کرکي ـ کابل د برېښنا لېږد پروژې په بشپړېدو سره به افغانستان ته تر ۸۰۰ میګاواټه برېښنا د لېږد زمینه برابره شي.

د کورنیو چارو وزیر خلیفه سراج‌الدین حقاني د خوست د امنیه قومندانۍ د نوې ودانۍ د پرانیستې په مراسمو کې ويلي، په هېواد کې اوسنی امنیت د امنیتي منسوبینو او د ولسونو ګډ کار ثمره ده.

د عامې روغتیا وزارت د روغتیایي خدمتونو وړاندې کولو مرستیال مولوي عبدالولي حقاني نن د روغتیا دویم نړیوال نندارتون غونډه کې د افغانستان د روغتیایي نظام پرمختګ لپاره د کورنیو او نړیوالو شریکانو، مسلکي ټولنو او خصوصي سکټور همکاري ارزښتمنه وبلله.

ښاغلي حقاني زیاته کړه، په ګډ کارکولو سره کولای شو د افغانستان روغتیایي نظام پیاوړی کړو.

د کډوالو او راستنېدونکو چارو وزارت مقام د دفتر د رییس مولوي سعید احمد بنوري په مشرۍ د کډوالو او راستنېدونکو او بهرنیو چارو وزارتونو ګډ پلاوي په انقره کې د مېشتو افغان کډوالو له یو شمېر استازو سره لیدلي دي.
نور ولولئ ⬇️
https://rta.af/news/ph-trkyh-k-afghan-koalo-khpl-stonz-d-koalo-charo-ozart-lh-ll-shoy-plaoy-srh-shryk-k

د افغان ګاز امارتي شرکت اجراییوي رییس مولوي اخترمحمد منصور، د یوه پلاوي په ملتیا د ترکمنسان د نفت او ګازو نړیوال کنفرانس کې ګډون کړی
د امارتي شرکتونو عمومي ریاست ویلي، د دغه سفر پر مهال ښاغلي منصور د ګاز د استخراج پروسس، لېږد او وېش په برخو کې د پرمختللو تجهیزاتو او معیاري ټکنالوژیو کارول د افغان ګاز شرکت له مهمو لومړیتوبونو څخه بللي.
دغه راز د معتبرو نړیوالو شرکتونو له استازو سره په لیدنه کې د مستقیمو تخنیکي او سوداګریزو همکاریو پر پراختیا، د علمي پوهې او تخصصي تجربو پر شریکولو، د نوې ټکنالوژۍ پر کارونې او د افغان ګاز په سکټور کې د پانګونې پر راجلبولو ټینګار شوی.

سرپل کې د سرحدونو، قومونو او قبایلو چارو وزارت د سرحدي پلټنو د مرستیال مولوي عنایت الله شجاع په مشرۍ، د اسلامي شریعت د احکامو پلي کولو او د خلکو او مسوولینو ترمنځ د همغږۍ ولسي غونډه وشوه.

د سرحدي پلټنو مرستیال مولوي عنایت الله شجاع په دې غونډه کې وویل، چې افغان ولسونو د تاریخ په اوږدو کې د یووالي او اتحاد لپاره سترې قربانۍ ورکړې دي او له ولسونو یې وغوښتل چې د تفرقه خپروونکو تبلیغاتو پر وړاندې هوښیار اوسي.

ښاغلي شجاع همداراز له هېواد څخه بهر مېشتو افغانانو غږ کړی چې بېرته خپل هېواد ته راستانه شي.

د هرات ولایت مقام وايي، د یاد ولایت د صنعتي تولیداتو صادرات په تېره یوه میاشت کې ۹۷ سلنه زیات شوي دي.

همدارنګه په دې موده کې د کرنې او مالدارۍ ۴۱ ډوله محصولات هم بهرنیو هېوادونو ته صادر شوي دي.
نور ولولئ👇
https://rta.af/news/sadrat-tolydat-snaaty-hrat-drsd-afzaysh-yafth-ast

د ټولګټو چارو وزیر، ملا محمد عیسی ثاني، روزګان ته د خپل سفر په ترڅ کې د یو شمېر ټولګټو پروژو ترڅنګ د روزګان ــ کندهار لویې لارې او د روزګان له مرکز څخه تر خاص روزګان ولسوالۍ پورې د لویې لارو رغنېزې چارې ارزولې دي.

ښاغلي ثاني د یادو پروژو د چارو پرمختګ او د رغنیزو فعالیتونو وضعیت له نږدې څارلی دی.

د کانونو او پټرولیم وزارت د سروې او جیولوجي مرستیال مفتي عبدالمتین سعید، د اقتصادي معاونیت، مالیې وزارت او چارو ادارې استازو د یوه روسي شرکت له استازو سره په کتنه کې د افغانستان د کاني زېرمو د سروې، اکتشاف او نورو اړوندو موضوعاتو په اړه خبرې کړې دي.

په یاد کتنه کې د یاد شرکت له مسوولینو سره د کاني زېرمو د سروې او اکتشاپ پر بېلابېلو اړخونو د پانګونې پر فرصتونو او د عملي چارو پر څرنګوالي خبرې شوې دي.

د کانونو او پټرولیم وزارت د سروې او جیولوجي مرستیال ویلي، چې افغانستان د کاني زېرمو له پلوه بډایه هېواد دی او د دې زېرمو د دقیقې سروې او اکتشاف له لارې د هېواد د اقتصادي ودې لپاره زمینه برابرېدای شي.

د کانونو او پټرولیم وزارت وايي، په دې غونډه کې د اړوندو ادارو ترمنځ د همغږۍ او د هېواد د کاني زېرمو د سروې او اکتشاف په برخه کې د همکاریو پر دوام ټینګار وشو.

د اطلاعاتو او کلتور وزیر شیخ شیر احمد حقاني د جهادي اثارو د ساتنې په سیمینار کې د جهادي اثارو او اسنادو پر رښتینې او بې‌طرفه راټولولو ټینګار وکړ.

لنډ خبرونه| ۱۴۰۵/۰۸/۰۳
د کډوالو او راستنېدونکو او بهرنیو چارو وزارتونو ګډ پلاوي په انقره کې د مېشتو افغان کډوالو ستونزې له نږدې اورېدلې.

د اطلاعاتو او کلتور وزیر شیخ شیر احمد حقاني، د جهادي اثارو د ساتنې په سیمینار کې ټینګار کړی، چې د شهیدانو کارنامې او جهادي اثار باید په دقت ولوستل شي.

په نیمروز ولایت کې له سوداګرو د زور زیاتي له لارې د پیسو پر اخیستلو تورن کسان نیول شوي دي.

د ننګرهار د خوږیاڼو ولسوالۍ اوسېدونکي وايي، د اسلامۍ امارت په راتګ سره په دغه ولسوالۍ کې زیات شمېر دښمنۍ پای ته رسېدلې دي.

خوست کې د طبیعي پېښو له لسګونو زیان‌ ګالو کورنیو سره نغدي مرسته شوې ده.

د پکتیکا ځوانانو له اسلامي نظام څخه خپل ملاتړ څرګند کړی او په هر ډول شرایطو کې یې له نظام سره پر بشپړې همکارۍ ټینګار کړی دی.

د مالیاتي ورکړو د اسانتیا او د عوایدو راټولولو د روڼتیا په موخه، د بلخ مسافر وړونکو او بار وړونکو موټرو چلوونکو ته بانکي کارتونه ووېشل شول.

د پنجشېر ولایت مقام اعلان کړی، چې د لومړي ځل لپاره به د دغه ولایت له کانونو څخه استخراج شوي زمرد د پنجشنبې په ورځ (د لړم ۷مه) په کابل کې د افغانستان نړیوال نندارتون په مرکز کې د پلور سیالۍ ته وړاندې شي.

د پنجشېر والي حافظ محمداغا حکیم، دغه ګام د دغه ولایت د کانونو، په ځانګړي ډول د زمردو، د ظرفیتونو د معرفي کولو لپاره یو فرصت بللی دی.