د تدارکاتو کمېسیون نوبتي غونډه کې د شاوخوا پینځه میلیارده افغانیو په ارزښت ۱۷ پروژې منظورې شوې.

د امر بالمعروف، نهی عن المنکر او د شکایتونو اورېدلو وزارت اعلان کړی، چې په تېرو دوو ورځو کې یې د دیني عالمانو او قومي مشرانو په منځګړیتوب د قومونو او کورنیو ترمنځ ۳۵ پخوانۍ دښمنۍ او شخړې حل و فصل کړې دي.

د دغه وزارت په وینا، یادې شخړې په دایکنډي، نورستان، بامیان، کابل، تخار، سرپل، خوست او غزني ولایتونو کې حل شوې دي.

الجزیرې راپور ورکړی، چې د لوېدیځې اروپا څو هېوادونه د ایران پر ضد د جګړې له احتمالي بیا پیل سره مخالفت کوي.

د راپور له مخې، د نړۍ په بازارونو کې د تېلو د بیو بې‌سارې لوړېدو په اروپا کې د ژوند د لګښتونو کړکېچ لا پسې سخت کړی دی.

د راپور پر بنسټ، جرمني او بریټانیا هغه هېوادونه دي چې د امریکا او اسرائیلي رژیم له لوري پر ایران د بریدونو په پیل کې یې چوپتیا غوره کړې وه، خو اوس د جګړې د پای ته رسولو لپاره پر ډیپلوماټیک حل ټینګار کوي.

د افغانستان مالیې وزارت په وروستیو څو ورځو کې په یو شمېر رسنیو او ټولنیزو شبکو کې د دولتي ادارو د کارکوونکو د معاشونو د ځنډېدو په اړه خپرې شوې اوازې په بشپړه توګه ناسمې بللې دي.

دغه وزارت د یادو اوازو په ردولو سره ډاډ ورکړی، چې د دولتي ادارو د کارکوونکو معاشونه به د عادي بهیر له مخې، له کومې ستونزې پرته او پر ټاکلي وخت ورکړل شي.

د نیمروز ولایت د ورېښمو سرحدي لارې کمېساري وايي، چې د لومړي ځل لپاره د نیمروز د ورېښمو او د ایران د سیستان او بلوچستان ولایت د میلک سرحدي لارو ترمنځ د ټرانزیټي موټرو تګ راتګ ۲۴ ساعته شوی دی.

د یادې کمېسارۍ په وینا، دا ګام د ټرانزیټي بهیر د اسانتیا، د سوداګریزو توکو د لېږد د چټکتیا، موټرچلوونکو او سوداګرو ته د لا ډېرو اسانتیاوو برابرولو په موخه اخیستل شوی دی.

د دغې سرحدي لارې د ۲۴ ساعته فعالیت له پیلېدو سره، د وارداتي او صادراتي توکو د لېږدوونکو موټرو شمېر، چې تر دې وړاندې په ورځ کې شاوخوا ۴۰۰ موټرو ته رسېده، اوس په شپه او ورځ کې نږدې ۸۰۰ موټرو ته لوړ شوی دی.

د افغانستان د معیار او کیفیت ادارې پلاوی د اسلامي هېوادونو د معیارونو او مترولوژۍ انستیتیوت (SMIIC) په کلنۍ عمومي غونډه کې د ګډون په موخه روسیې ته رسېدلی.

ټاکل شوې ده، چې دا نړیواله غونډه د روان میلادي کال د اکټوبر له ۲۶مې تر ۲۸مې نېټې پورې د روسیې په کازان ښار کې ترسره شي.
نور ولولئ⬇️
https://rta.af/news/d-maayar-ao-kyfyt-adar-plaoy-d-smiic-ph-aamomy-ghonh-k-d-on-lparh-rosy-th-orsd

د اطلاعاتو او کلتور وزارت د فرهنګ او هنر مرستیال شیخ عبدالرحمن طیبي د یوه پلاوي په مشرۍ د کندهار ولایت د میوند شهیدانو له زیارت او د اتلې ملالې میوند له مقبرې څخه لیدنه وکړه.

د اطلاعاتو او کلتور وزارت د معلوماتو له‌مخې، د دې لیدنې موخه د یادو تاریخي ابداتو د اوسني وضعیت ارزونه، د ساتنې او خوندیتوب د اړتیاوو معلومول او د اساسي ترمیم لپاره د مناسبو لارو چارو څېړل وو.
د میوند شهیدانو زیارت او د میوند جګړې د اتلې ملالۍ میوندۍ مقبره د افغانستان د تاریخي ویاړونو، عمومي مبارزو او د خپلواکۍ د ساتنې په لاره کې د سرښندنو مهم سمبولونه دي.

ټولګټو وزیر روزګان ولایت ته سفر پر مهال له یو شمېر رغنیزو پروژو څخه لیدنه کړې ده.

د ترانسپورټ او هوایي چلند وزیر ملا محمد فاضل مظلوم د ولایتي سفرونو په لړ کې کندوز ولایت سفر کړی دی.
نور ولولئ⬇️
https://rta.af/news/d-ranspor-ao-hoayy-chlnd-ozyr-kndoz-th-sfr-ok

په کویټ کې د افغانستان سفارت سرپرست مولوي محمد شفیق خطیب، د کویټ د مالیې وزیر ډاکټر سید یعقوب السید یوسف هاشم الرفاعي او د قضایي چارو د غوښتنو او ادارې هیئت له رییس سید محمد السید یوسف الرفاعي سره وکتل.

په کویټ کې د افغانستان سفارت وايي، په دې کتنه کې د افغانستان پر اقتصادي پرمختګونو، سوداګریزو اړیکو، د پانګونې پر فرصتونو او قضايي بهير خبرې وشوې.

همداراز دواړو لوریو پر دوه اړخيزو همکاريو او ګډې همغږۍ ټینګار کړی دی.

د لوړو زده‌کړو وزارت د وزیر شیخ نداء محمد ندیم په مشرۍ د خصوصي پوهنتونونو کمېسیون ناسته ترسره شوه.

د یاد وزارت په وینا، په دې ناسته کې شیخ نداء محمد ندیم په کاري چارو کې د معیارونو پر رعایت ټینګار وکړ او له ګډونوالو یې وغوښتل چې په ورځنیو او اوږدمهالو چارو کې د لوړو زده‌کړو اصول او معیارونه په پام کې ونیسي.
نور ولولئ👇
https://rta.af/news/d-khsosy-pohntonono-kmsyon-nasth-oshoh

لنډ خبرونه| ۱۴۰۵/۰۸/۰۴
کابل ښار ته له شاه‌ او عروس بند څخه د اوبو لېږد تړون لاسلیک شو.

د ښاري اوبو رسولو او فاضلابو امارتي شرکت له یوه خصوصي شرکت سره د یو میلیارد افغانیو په ارزښت له شاه او عروس بند څخه کابل ښار ته د اوبو لېږد پروژې تړون لاسلیک کړ.

د ښاري اوبو رسولو او فاضلابو امارتي شرکت اجرائیوي رییس مولوي غلام‌الرحمن کظیم ویلي، چې د دې پروژې په بشپړېدو سره به د کابل ښار په ۱۷مه ناحیه کې شاوخوا ۵۰ زره کورنیو ته د څښاک پاکې اوبه برابرې شي.
نور ولولئ ⬇️
https://rta.af/news/krardad-antkal-ab-az-bnd-shah-o-aaros-bh-shhr-kabl-amda-shd

د سرحدونو، قومونو او قبايلو چارو وزارت له لوري، د کابل په شکر دره ولسوالۍ کې « د اسلامي نظام تر چتر لاندي د شريعت د نفاذ او همغږۍ» ولسي غونډه ترسره شوه.

د سرحدونو، قومونو او قبايلو چارو وزارت، د دعوت او ارشاد رییس مفتي شفيع الله ثاقب د خلکو او مسوولینو ترمنځ د همکارۍ پر دوام ټینګار وکړ او یاده یې کړه چې دغه وزارت په ټول هېواد کې تر دا مهاله له څلور زره زیاتې شخړې حل کړې دي.

همداراز د دیني علماوو او قومي مشرانو له لوري له اسلامي نظام څخه پر ملاتړ ټینګار وشو.

د اقتصاد وزیر قاري دین محمد حنیف په کابل کې د جاپان له سفیر کینیچي ماساموتو او د جاپان د نړیوالې همکارۍ ادارې (جایکا) له رییس توساکا سوتا سره لیدلي دي.

د اقتصاد وزارت وايي، په دې لیدنه کې دواړو لوریو د اقتصادي همکاریو پر پراختیا، له افغانستان سره د جاپان د بشري او پراختیايي مرستو پر دوام او د پراختیايي پروژو پر پلي کولو خبرې کړې دي.

د یاد وزارت په وینا، جاپاني لوري له افغانستان سره د بشري او پراختیايي همکاریو په ځانګړې ډول د بدیل معیشت، روغتیا، زده‌کړو او د اقلیمي بدلونونو پر وړاندې د مبارزې په برخو کې د دوام ډاډ ورکړی دی.

د ریاست‌الوزراء اقتصادي معاونیت له لوري، د تمویلوونکو، نړیوالو موسسو، ملګرو ملتونو او پراختیايي شریکانو له استازو سره د کډوالو او راستنېدونکو چارو وزارت لومړیتوبونه شریک شوي دي.

د ریاست‌الوزراء اقتصادي معاونیت وايي، په شریک شویو لومړیتوبونو کې، راستنېدونکو ته د همېشنۍ سرپناه برابرول، زده کړو او روغتیايي چوپړتیاوو ته لاسرسی، د کاري فرصتونو رامنځته کول او د لومړنیو بشري مرستو رسول شامل دي.

د تمویلوونکو بنسټونو او نړیوالو موسسو استازو ژمنه کړې، چې راتلونکې مرستې او همکارۍ به د شریک شویو لومړیتوبونو په رڼا کې تنظیم کړي.

د کابل ښار په باغ بالا کې د یوه عصري پارک د روانو چارو بشپړ جزییات!
بشپړه خپرونه👇
https://youtu.be/sSezojoU8VA

بدلون؛
په پاکستان کې مېشت افغان خبریال ظاهر بهاند وايي، د پاکستان د رامنځته کېدو له وخته تر نن ورځې پورې دغه هېواد له افغانستان سره دښمني کړې ده.
بشپړه خپرونه
https://youtu.be/64cC7hkz9DI

بدلون؛
په پاکستان کې مېشت افغان خبریال ظاهر بهاند وايي، د پاکستان پوځي رژیم غواړي د خپلو داخلي ستونزو او ناکامیو پړه پر افغانستان واچوي.
بشپړه خپرونه
https://youtu.be/64cC7hkz9DI

بدلون؛
د سیاسي چارو کارپوه ډاکټر فیاض صافی وايي، هېڅ هېواد حق نه لري چې د سوداګرو له اجازې پرته د سوداګرو مالونه لیلام کړي.
بشپړه خپرونه⬇️
https://youtu.be/64cC7hkz9DI