په نورستان کې له څه باندې ۳۵۰ سېلاب‌ځپلو کورنیو سره نغدي مرستې وشوې.

د جلال‌اباد ښاروالۍ له لوري د نړیوال بانک په مالي ملاتړ د اتو بېلابېلو پروژو د پلي کېدو چارې پیل شوې.

د میدان وردګ ولایت په مرکز او درېیو ولسوالیو کې له لسګونو سېلاب ځپلو کورنیو سره نغدي مرستې وشوې.

د لغمان په الینګار ولسوالۍ کې له لسګونو سېلاب ځپلو کورنیو سره نغدي مرستې وشوې.

د لغمان په فراشغان ولسوالۍ کې « د اسلامي نظام تر چتر لاندي د شريعت د نفاذ او همغږۍ» ولسي غونډه ترسره شوه.

شل کلن مزل؛
د بامیان امنیه قوماندان مولوي محمد حبیب‌الله شاکر وايي، شهید امیرالمؤمنین ملا اختر محمد منصور تقبله‌الله ډېر مهربان و.
بشپړه خپرونه👇
https://youtu.be/TMg-p1T2MdM

۲۴ خپرونه؛
په لوګر کې د راډیو خبریال سمیع الله عیسی‌خېل په دغه ولایت کې د جهادي اثارو د راټولو د روان بهیر په اړه جزییات ورکوي.

د کابل او یو شمېر ولایتونو د هوا حالات.

کاوش؛
د اقتصادي چارو کارپوه محمد شبیر بشیري وايي، چې د منځنۍ او سویلي اسیا ترمنځ د ترانزیټي دهلېز په توګه د افغانستان د بدلولو لپاره باید د هېواد د لویو لارو په بیارغونه پانګونه وشي.
بشپړه خپرونه👇
https://youtu.be/WeLaLRQKKSM

د پاکستان د پارلماني چارو وزیر په خپلو تازه څرګندونو کې ویلي چې اسلام اباد به د هغو ترهګریزو فعالیتونو د پای رسولو لپاره اقدام وکړي چې په وینایې له افغانستان څخه سرچینه اخلي.

د ملګرو ملتونو سرمنشي انتونیو ګوټریش د اسرائیلو له لوري د مېشت‌ځایونو د پراختیا، د فلسطینیانو له خپلو سیمو څخه د جبري ایستلو او په اشغال شوې لوېدیځه غاړه کې د مېشت‌کېدونکو د تاوتریخوالي د زیاتېدو په اړه ژوره اندېښنه څرګنده کړې ده.
ګوټریش پر خپلې ایکس‌پاڼې خبرداری ورکړی، چې د دې وضعیت دوام د ځپنې فضا رامنځته کوي او د قومي تصفیې خطر زیاتوي.
هغه ټینګار کړی، چې دغه اقدامات باید پای ته ورسېږي او د فلسطین د خلکو د برخلیک ټاکلو د مشروع حق له تحقق پرته په منځني ختیځ کې د تلپاتې سولې ټینګښت ناشونی دی.

د معیار او کیفیت ادارې پلاوی د اسلامي هېوادونو ترمنځ د تخنیکي همکاریو پیاوړتیا غونډه کې د ګډون لپاره د روسیې کازان ښار ته تللی دی.

د پېښو پر وړاندې د مبارزې او چمتوالي اداره وايي چې تېره یوه میاشت کې یې له کورنیو او بهرنیو موسسو سره د ۷ میلیونه ډالرو په ارزښت هوکړه لیکونه لاسلیک کړي.

د ایران ولسمشر مسعود پزشکیان د ګاز صادروونکو هېوادونو د ټولنې په اتمه سرمشریزه کې د ګډون او وینا په موخه د روسیې پلازمېنې مسکو ته رسېدلی دی.


د ایراني رسنیو د راپورونو له مخې، پزشکیان به د دې غونډې په څنډه کې د روسیې له ولسمشر او د غونډې له یو شمېر نورو ګډونوالو مشرانو سره هم لیدنې او خبرې وکړي.

د نن سې شنبې ورځې تاریخ!

روسیې او اوکراین د سې‌شنبې په ورځ د روسیې تر کنټرول لاندې په اولشکي ښار کې د لنډ مهاله اوربند د ټینګښت خبر ورکړ.

د دغه اوربند موخه په یاد ښار کې د بشري مرستو رسولو لپاره د زمینې برابرول بلل شوي دي.

د رویټرز خبري اژانس د روسیې د دفاع وزارت په حواله راپور ورکړی، چې د مسکو پر وخت د سهار له څلورو بجو راهیسې د اوکراین د خرسون ښار پر لوري د توپونو بریدونه درول شوي، څو په اولشکي ښار کې د بشري مرستو د عملیاتو د پیل لپاره زمینه برابره شي.

د عامې روغتیا وزیر مولوي نور جلال جلالي د ترکیې هېواد د میډیپول روغتونونو او روزنیز ګروپ له پلاوي او د سرپل ولایت د سنچارک ولسوالۍ له قومي مخورو سره لیدنه کې د روغتیایي خدمتونو پیاوړتیا په اړه خبرې کړي.
په لیدنه کې د ترکیې له پلاوي سره د ځانګړي روغتون د جوړولو، د امبولانسونو د بېړنیو خدمتونو، د تجربو د شریکولو او د روزنیزو پروګرامونو د پلي کولو په برخو کې د همکارۍ طرحې وڅېړل شوې.

همداراز، د سنچارک ولسوالۍ قومي مشرانو د روغتیايي خدمتونو د پراختیا، د موجوده روغتون د امکاناتو د لوړولو او په دې ولسوالۍ کې د یوه عمومي روغتون د جوړولو غوښتنه وکړه.

د عامې روغتیا وزیر اړوندو مسئولینو ته لارښوونه وکړه، چې د دغې ولسوالۍ د روغتیايي ستونزو د حل لپاره لازم اقدامات ترسره کړي.

د بهرنیو چارو وزارت د ډيپلوماسۍ انستیتیوت رییس عبیدالله اخندزاده د مالیزیا د نړیوال اسلامي پوهنتون له رییس پروفیسر عثمان بکر سره لیدلي.
په دې لیدنه کې دواړو لوریو د ښوونیزو او علمي همکاریو پر پراختیا، افغان ‌ډیپلوماټانو او کارکوونکو ته د روزنیزو پروګرامونو پر جوړولو او د متخصصینو د تجربو پر شریکولو خبرې وکړې.

همداراز، ښاغلي اخندزاده د «ګډې همکارۍ له لارې هوساینه» تر سرلیک لاندې د یوې ورځې نړیوال سمپوزیم په څنډه کې د مالیزیا د بهرنیو چارو وزارت د ډیپلوماسۍ او نړیوالو اړیکو انسټیټیوټ له مشرې، داتو روز شازیلا عثمان سره هم لیدنه کړې.

په دې لیدنه کې د دواړو انسټیټیوټونو ترمنځ د همکاریو پر پراختیا خبرې شوې.

د ترکیې پلاوي د راډیو عمومي ریاست له لوی رییس او نورو مسولینو سره په لیدنه کې د دوه‌اړخیزو اړیکو په اړه خبرې وکړې.

د کلیو د بیارغونې او پراختیا وزارت وایي، چې د کندهار ولایت په سپین‌بولدک او لوړ شاه‌ولیکوټ ولسوالیو کې د ۵۲ میلیونه افغانیو په ارزښت د دوو پراختیایي پروژو چارې پيل شوې.
په دغو پروژو کې د یو زرو او۳۱۰ متره په اوږدوالي د استنادي دیوال، د ۳.۶۱ کیلو متره په اوږدوالي د جغلي سړک او ۵۴۵ متره په اوږدوالي د معبر جوړول شامل دي.