المشـاعر مشاعر، هتخرجها بما يرضي الله، هتعرف تعيش، هتكتمها، هترزع في خلقتك وخلقة العائلة الكريمة، والعالم، كل صباح، وكل مسـاء، وطول اليوم، وهتروح تاخد قراراتك ضد المشـاعر، فتلاقي نفسك بتسمع كلامها عن طريق إنك بتتخانق معاها عادي.
- أحمد ياسر رزة.

‏«فما كان لك منها أتاك على ضعفك!»
‏على ضعفك!

لو دخلك أقل من ١٠ آلاف جنيه
وهتفتح بيت بالإيجار
ما تتجوزش دلوقتي.

لقيت مستشيخ من بياعين الوهم
بيقول حتى لو دخلك ٤ آلاف
اتجوز ٤
لكل واحدة سرير
وربنا هيوسع رزقك بسبب كل واحدة!

إنت بتتكلم عن بنت ناس
ولا معزة أو فرخة؟!
يعني هترميلها أي لقمتين
بين أربع حيطان
وتقول كدا بقى عندها بيت؟

الجواز إيجار كل شهر
وأكل كل يوم
وعلاج وقت المرض
ومواصلات
وكهربا
ولبن وحفاضات لما ييجي طفل....

هل أنا كدا ضد التيسير على الشباب؟
لأ خالص
الفكرة ايه اللي انت هتيسر فيه
يعني شيل القاعة
قلل الدهب
خلي الشقة ٥٠ متر
هات ركنة بدل الصالون
وبلاش أوضة أطفال من أول يوم
كله يتشال
لكن بعد ما شلنا كل المناظر
لسه فيه إيجار
وأكل
وشرب
وعلاج
ومواصلات
دي مش طلبات عروسة مدلعة
دي الحياة نفسها...

والـ١٠ آلاف مش رقم نازل من السما
دي حسبة بالورقة والقلم لو هتعيش (مستقل) في شقة إيجار...

طب هتسكنوا في بيت عيلة
والعروسة موافقة؟
الحسبة هنا اتغيرت
والميزانية كمان اتغيرت
المهم تكون عارف مصاريف البيوت
مش ترمي نفسك في البحر
قبل ما تتعلم العوم
وتقول {إن الله يدافع عن الذين ءامنوا} !

والجاهل اللي جايبلي دليل من كلام صحابي جليل كان متجوز في خيمة؟
أيوه فين الدليل مش فاهم؟
الخيمة كانت مسكن مقبول
في عادات بلده وزمانه
مش حكم شرعي
إن كل زوجة في كل عصر
لازم تقبل تعيش في خيمة!

الشرع قال {بالمعروف}
ما قالش (بعادات وتقاليد البدو)...

وبلاش كل بنت ترفضك
تقول عليها مادية ونسوية
لو هي عايزة خدامة
زي ما أمها عندها خدامة
من حقها شرعًا ما تقبلش
غير زوج يقدر يوفرلها ده.
ولو عايزة فيلا
زي بيت أبوها
حقها تختار واحد عنده فيلا.
ولو عايزة دهب
زي بنت عمها
ده كمان حقها.
ولو عايزة شقة وفرح
ومستوى معين تعيش فيه
بردو حقها.

وإنت حقك تقول مش قادر
وتشوف غيرها
مش من حقك
تحول عجزك عن طلباتها
لفتوى إن طلباتها حرام
جيبك مش ميزان الشرع
ومش كل حاجة أعلى من مرتبك
اسمها مغالاة
ساعات اسمها ببساطة
إنت مش العريس المناسب وهي مش المناسبة
مد لحافك على قد رجليك
مش تقص من لحاف بنت الناس
عشان ييجي على قدك!

عايز واحدة ترضى بالبداية البسيطة؟
شوف واحدة ظروفها زي ظروفك
بنت قابلة تبدأ معاك
أو أرملة ترضى تقبلك
أو حتى مطلقة معندهاش مانع
وبالمناسبة مش كلهم كمان هيوافقوا
وحقهم...

لكن اللي خاضت التجربة خلاص
وبقت عايزة راجل وبيت وستر
غالبا طلباتها أبسط
مش لأنها أقل
لكن لأنها جربت الحياة
وعرفت إيه اللي يستاهل
وإيه اللي ما يستاهلش.

إنما انت عايز بكر
أصغر منك
فاتنة الجمال
ومن بيت مرتاح
وتتنازل هي
عن مستوى حياتها كله
وإنت ما تتنازلش
عن شرط واحد في العروسة؟!

ولو واحدة أغنى منك
رضيت بشقتك ولقمتك
وبدأت معاك من القليل
دي ربنا (يبارك) فيها الصراحة
بس افتكرلها ده
عشان لما ربنا يفتحها عليك
مش أول ما تمسك قرشين
تجري تتجوز عليها !

المهم إن جملة (اتجوز وربنا هيرزقك)
الجملة دي مش آية ولا حديث
وربنا قال:
﴿وَلْيَسْتَعْفِفِ الَّذِينَ لَا يَجِدُونَ نِكَاحًا حَتَّىٰ يُغْنِيَهُمُ اللَّهُ مِنْ فَضْلِهِ﴾
قال يستعفف
حتى يغنيه الله
مش يتجوز
عشان يغنيه الله.

وسيدنا النبي ﷺ قال:
«مَنِ اسْتَطَاعَ مِنْكُمُ الْبَاءَةَ فَلْيَتَزَوَّجْ
وَمَنْ لَمْ يَسْتَطِعْ فَعَلَيْهِ بِالصَّوْمِ»
مش عليه بالجواز
وبعدين ربنا يغنيه!

هتقولي:
﴿إِنْ يَكُونُوا فُقَرَاءَ يُغْنِهِمُ اللَّهُ مِنْ فَضْلِهِ﴾؟
فيه فقير مستطيع
عنده أصل النفقة
لكن عيشته ضيقة
ده ما ترفضوش
لمجرد إنه فقير
وفيه واحد
مش قادر على أصل الإيجار
والأكل
والعلاج
ده غير مستطيع
وده اللي اتقال له (يستعفف).

وبعدين انت قريت تفسير الآية فين؟
افتح تفسير الفخر الرازي هتلاقيه
قال إن الأصح
إن الآية مش وعد
بإغناء كل واحد يتجوز
وفسر اللي لا يجد النكاح
باللي لا يجد المهر والنفقة.

الرزق مع السعي
مش بدل السعي
والفقر غير العجز
والتوكل غير التهور.

والحقيقة اللي توجعك قبل الجواز
أرحم من طفل يجوع بعده
وسهل جدا على مستشيخ
قاعد في التكييف
وكرشه قدامه
لا داري الإيجار بكام
ولا اللبن والحفاضات بكام
يقول لك (اتجوز وربنا هيرزقك)
هو هيقول الجملة
ويروح بيته
وإنت هتفضل
تدفع تمنها سنين!

قبل الجواز يديك الأفيون
(اتجوز وربنا هيوسعها عليك)
وبعد ما تغرق في الديون
يديك الأفيون اللي بعده
(اصبر.. ده ابتلاء)

وفي الحالتين
هو مش هيدفع جنيه!

كل يوم بيكلمني ناس
مش عارفين يدفعوا الإيجار
ولا يشتروا الدوا
ولا يصرفوا على عيالهم
لدرجة إنها تبكي وتقول
نفسي عيالي يدوقوا اللحمة...

تسأله انت اتجوزت ازاي؟
هو إنت مش عارف إنك غير مستطيع؟
يقولك الشيخ قال ربنا هيرزقك
وقال كمان العيل بييجي برزقه!

عايز تساعد الشباب بجد؟
قلل المهور
الغِ القاعات
وفر شغل
وفر سكن
وساعد غير المستطيع
يبقى مستطيع
لكن ما توزعش وعود
باسم ربنا.

فَلربّما اتردَمَ الطريقُ وربّما جَضَّ الفتى😊

..

سُحلُف

"فبكيتُ ليلتين ويومًا حتى ظننت أن الحُزن فالقٌ كبدي."

"أنت لستَ حُلما لأحدٍ.. لكنك تغنم عز المغنمة إن أكرمك الزمان بلقاء من يشتري ورد جمالك المُلتحف بأشواك عيوبك، فيقول هذا الجميل حبيبي وهذه الأشواك أحبها لأنها تحميه.

مسكينٌ المُحِبُ.. كل مُحبٍ مسكين..
وغانمٌ كلُّ محبوب." ♥︎

وَإِن يَمْسَسْكَ اللَّهُ بِضُرٍّ فَلَا كَاشِفَ لَهُ إِلَّا هُوَ ۖ وَإِن يَمْسَسْكَ بِخَيْرٍ فَهُوَ عَلَىٰ كُلِّ شَيْءٍ قَدِيرٌ!

أجازة من الوعي والحكمة والثبات الانفعالي والفهم والتريث

سيتم تصعيد كل الأمور
مواجهة الحركات الحمصي بما أهو أحمص منها
الوقوف على السقطة واللقطة
الدنيا الي عاوزة تتطربق ومالوا
...الخ

ثباتك الانفعالي وانت بتقول " من فضلك ده حقي " = انتصار

وصبرك على الطرف الآخر لحد ما ( يتقبّل ) الحقيقة الجديدة والصّادمة بالنسباله = فضل منك ليس إلا

وانزعاج وثوَران الطرف الآخر عند طلبك لحقك = لا يدل إلا على وجود مشكلةٍ ما عنده، هيحاول معاك بردود أفعال مختلفة ومتغيرة وضاغطة أحيانًا،
لكن بعد تمسّكك بحقك وثباتك.. هيهدى مع الوقت ويسلّم..
وده انتصار تاني ( مؤجّل - يُطبخ على نارٍ هادئة ).

"الخائف يجد أسبابًا لخوفه ولو خلقها خلقًا. والعبرة بمن ذكر الله في أمنه كما يذكره في خوفه."

بيئة العمل أصبحت سيئة 😷

الانسان يطمح في أجازة مش أقل من ٣ شهور

اصل يمكن ده مش مكاني ولا الزمان ده زماني او انا موهوم؟
هيهخو يشباب اوقات بأشفق عليكم اني بخصص الصياح هنا بس

احتفاليات ٦ اكتوبر اللي طقت ف دماغهم يعملوها ف الشغل مش متخيلاها الا كدة بجد

الله لطيف بعباده!

﴿يُؤْتِكُمْ خَيْرًا مِّمَّا أُخِذَ مِنكُمْ﴾ - "سورة الأنفال" الآية 70.

في اللحظة اللي بتعتقد فيها إنك مهزوم وأنت واقف قصاد نصيب بيضيع منك عشان مقتنع إنك مش هتعرف تعيش بدونه؛ كان ربنا بينسج لك برحمته قدر أجمل من اللي راح.. مش زيه حتى.. لأ.. أجمل منه..
كل فقد وراه عوض، وكل عوض أفضل من اللي اتفقد..
إن لم يكتب لك الله ما تمنّيت، فسيكتب لك ما يُنسيك كل ما تمنّيت.