O‘zbekiston va Turkiya o‘rtasidagi uzoq yillik do‘stlik, shuningdek, ikki davlat rahbarlarining yaqin va samimiy munosabatlari energetika sohasidagi hamkorligimiz uchun mustahkam poydevor bo‘lib xizmat qilmoqda.

Samarqand viloyatida o‘tkazilgan xalqaro tender natijalariga ko‘ra, Turkiyaning “Aksa Elektrik” kompaniyasi g‘olib deb topildi.

Kompaniya tomonidan Samarqand viloyatida mavjud elektr tarmoqlarini ekspluatatsiya qilish, shuningdek, yangi tarmoqlarni qurish bo‘yicha loyiha amalga oshiriladi.

Ushbu loyihani amalga oshirish jarayonida “Aksa Elektrik” kompaniyasi Turkiya va boshqa xorijiy mamlakatlarda erishgan yutuqlari hamda to‘plagan tajribasini O‘zbekistonga olib kiradi.

Samarqand hududiy elektr tarmoqlarining barcha ishchi-xodimlari yangi kompaniyaga ishga qabul qilinadi.

Kompaniya vakillarining hisob-kitoblariga ko‘ra, chet eldan atigi 10–15 nafar mutaxassis jalb etiladi. Qolgan ishlar mahalliy mutaxassislar tomonidan amalga oshiriladi. Buning uchun xodimlarga zarur treninglar o‘tkaziladi, ularning malakasi oshiriladi hamda yangi joriy etilayotgan texnologiyalar bilan tanishtiriladi.

Albatta, bu biznes modeli respublikada birinchi marta qo‘llanilmoqda. Shuning uchun uning dastlabki natijalari va tajribasidan kelib chiqqan holda, kelgusida boshqa hududlarda ham ushbu tizimni joriy etish bo‘yicha ishlar amalga oshirilishi kerak. Bu borada hurmatli Prezidentimiz tomonidan ham tegishli topshiriqlar berilgan.

Kompaniyaning O‘zbekistondagi faoliyati doirasida elektr tarmoqlarini qurish, modernizatsiya va rekonstruksiya qilish ishlarida foydalaniladigan mahsulotlarning kamida 90 foizini ichki bozordan, ya’ni mahalliy ishlab chiqaruvchilardan xarid qilish ko‘zda tutilgan.

Loyiha doirasida kiritilishi lozim bo‘lgan investitsiyalar hajmi ham aniq belgilab qo‘yilgan. Ya’ni kompaniya belgilangan miqdordan kam bo‘lmagan hajmda investitsiya kiritishi shart. Bu, albatta, Samarqand viloyatining ijtimoiy-iqtisodiy rivojlanishiga katta hissa qo‘shadi. Ayniqsa, hududning turistik salohiyati va sanoatini rivojlantirishga qo‘shimcha turtki beradi, deb o‘ylayman.

Kompaniya mutaxassislari hozirdanoq hududni o‘rganish ishlarini olib borib, ilmiy yondashuv asosida loyihalarni shakllantirmoqda. Xususan, dastlabki ikki yil davomida Samarqand viloyatida birinchi navbatda amalga oshirilishi lozim bo‘lgan 400 ta mikroloyiha tanlab olindi.

Bu yerda “mikroloyiha” deganda, o‘rtacha hisobda bitta mahalla doirasida amalga oshiriladigan ishlar nazarda tutilmoqda. Ya’ni loyihalar ham “mahallabay” tamoyili asosida shakllantirilmoqda.