ថ្ងៃពុធ ៩រោច ខែអស្សុជ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៤ ខែវិច្ឆិកា ឆ្នាំ២០២៦

សាលាគណរាជធានីភ្នំពេញ បានប្រគល់ទេយ្យទានជូនដល់សាខាកាកបាទក្រហមកម្ពុជា រាជធានីភ្នំពេញ ដែលអញ្ជើញទទួលដោយ លោក ឯក ឃុនដឿន សមាជិកគណៈកម្មាធិការសាខា តំណាង ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ និងជាប្រធានគណៈកម្មាធិការសាខាកាកបាទក្រហមកម្ពុជា រាជធានីភ្នំពេញ ។

នាឱកាសនោះ សម្ដេចព្រះពុទ្ធជ័យមុនី បណ្ឌិត ឃឹម សន សម្ដេចព្រះសង្ឃនាយករងទី៣ គណៈមហានិកាយ នៃព្រះរាជាណាចក្រកម្ពុជា និងជាព្រះមេគណរាជធានីភ្នំពេញ បានមានព្រះថេរដីកាសោមនស្សរីករាយយ៉ាងក្រៃលែង ក្នុងការចូលរួមចំណែកជាមួយការងារមនុស្សធម៌ជួយដល់ជនរងគ្រោះ និងងាយរងគ្រោះដោយប្រការផ្សេងៗ តាមរយៈសាខាកាកបាទក្រហមកម្ពុជា រាជធានីភ្នំពេញ និងជាពិសេសកាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន។

ទេយ្យទានសាលាគណរាជធានីភ្នំពេញ សាលាអនុគណគ្រប់ខណ្ឌនិងព្រះចៅអធិការគ្រប់វត្តក្នុងរាជធានីភ្នំពេញ រួមមាន៖
អង្ករ៣តោន មី១៥០កេស ទឹកផ្លែឈើ៥៥កេស ទឹកក្រូច៥៥កេស ទឹកសុទ្ធ៨០កេស ទឹកដោះគោ៣៧៥កំប៉ុង ស្ករស២០៦គីឡូក្រាម ត្រីខ៣១០កំប៉ុង តែ៣០០កញ្ចប់ ទឹកស៊ីអុីវ៤៨០ដប ទឹកត្រី៤៨០ដប និងថវិកាចំនួន៨.០០០.០០

សម្ដេចព្រះមង្គលមុនីរង្សី ហ៊ូ ឈីវនាថ និមន្តដឹកនាំកិច្ចប្រជុំពិនិត្យសៀវភៅ និងប្រធានបទម្រាប់កិច្ចពិភាក្សាពេញអង្គ នៃអនុសំវច្ឆរមហាសន្និបាតមន្រ្តីសង្ឃទូទាំងប្រទេសលើទី៣៤ ព.ស.២៥៧០ និងវគ្គសង្ឃាភិបាលជំនាន់២ វគ្គ២
រសៀលថ្ងៃសុក្រ ១១រោច ខែអស្សុជ ឆ្នាំមមី អដ្ឋស័ក ព.ស.២៥៧០ ថ្ងៃទី៦ ខែវិច្ឆិកា ឆ្នាំ២០២៦ សម្ដេចព្រះមង្គលមុនីរង្សី ហ៊ូ ឈីវនាថ ប្រធានលេខាធិការដ្ឋានគណៈសង្ឃនាយក គណៈមហានិកាយ នៃព្រះរាជាណាចក្រកម្ពុជា និមន្តជាព្រះអធិបតីដ៏ខ្ពង់ខ្ពស់ដឹកនាំកិច្ចប្រជុំពិនិត្យសៀវភៅនិងប្រធានបទសម្រាប់កិច្ចពិភាក្សាពេញអង្គ អនុសំវច្ឆរមហាសន្និបាតមន្រ្តីសង្ឃទូទាំងប្រទេសលើទី៣៤ ព.ស.២៥៧០ និងវគ្គសង្ឃាភិបាលជំនាន់២ វគ្គ២ នាពេលខាងមុខ។
ជាមួយព្រះមន្ត្រីសង្ឃលេខាធិការដ្ឋាន ប្រព្រឹត្តទៅនៅអគ្គាធិការដ្ឋានពុទ្ធិកសិក្សាជាតិ។